Süsakiraka anain wayuu

Nnojotsü aküjünüin suluʼu tü Bibliakat süchiki tü kanüliakat brindis, ¿jamüsü nnojotkaʼa naainjain tia na aküjaliikana pütchi nüchiki Jehová?

Nnojotsü eiwaʼalüin naainjain wanee wayuu tü kanüliakat brindis, naatawaisü sukuwaʼipa tia suluʼu waneirua mma. Eeshii na ayalerakana nasüneʼe sümaa nataʼijiraain shia, chi aainjakai tia nüküjain nümüin wanee wayuu niʼreein talatüin nia, anain nia jee waneirua kasa makalü aka saaʼin tia. Na anakana amüin tia naküjain wanee pütchi jee shiale nayalerüin nasieʼe sümaa nasüin süpüshi tü wiinokot. Mayaainjeʼe nnojoluin mojuin tia namüin na wayuukana, natüjaa aaʼu na aküjaliikana pütchi nüchiki Jehová jamüin nnojotka anain tia.

Nnojotsü shiain sutuma nnojoluin neʼreein na anoujashiikana talatüin naaʼin wanee wayuu. Jamüshiijaʼa na Laülaashii jülüjakana aaʼin na anoujashiikana soʼu nükalia Cristo, naküjain wanee pütchi makalü anüiki: «Kasataalejeseʼe anain jia» (Aluwataaushikana 15:29). Eeshii waneinnua wayuu aʼyataapuʼukana nümüin Maleiwa makana anüiki namüin waneinnua aluwataashii: «¡Señotkalee [...], kasataalejeseʼe anain pukuwaʼipa süpüla kaʼikat süpüshuaʼa!» otta eeshii na makana: «¡Anainjatü nukuwaʼipa chi aluwataashikai süpüla kaʼikat süpüshuaʼa!» (1 Reyes 1:31; Nehemías 2:3).

¿Jaralii na aainjapuʼukana tü kanüliakat brindis? Anuu tü aküjünakat suluʼu Aapiria Wayuu ojuʼitaka maatsoʼu 1 soʼu 1968 (alijunaikiruʼusü) süchiki tü sümakat tü karaloʼutakat Encyclopædia Britannica (1910), tomo 13, süpana 121: «Shiyalerapuʼuin wayuu tü iita kaluʼukat wiino süpüla anainjatüin nukuwaʼipa wanee wayuu naashin, tia aainjünapuʼusü sümaiwa, asapuʼushii naya napüleerua na namaleiwasekana jee na outushiikana. Na griegokana otta na romanokana noʼyotopuʼuin wiino namüin namaleiwase soʼunnaa nekaain otta nayalerüin nasieʼe naainjapa wanee miʼiraa süpüla anainjatüin nakuwaʼipa jee anainjatüin nakuwaʼipa na outushiikana». Anuu sooʼomüin tü sümakat tia karaloʼutakat: «Nataʼijiraapuʼuin tü nasüneekat shiyaawase anainjatüin sukuwaʼipa wayuu, naainjain tia nasaapa shikiira wanee kasa».

¿Shiimainchejeʼe tü aküjünakat süchiki tia? Tü karaloʼutakat International Handbook on Alcohol and Culture, anoutunakat soʼu 1995 müsü sünüiki: «Sünain tü kanüliakat brindis, aapünapuʼusü isha jee wiino sümüin tü maleiwayaasükat shiiʼiree saapünüinjatüin nümüin wanee wayuu tü suchuntaakat naaʼin. ‹¡Kasataalejeseʼe katüin poʼu waneepia!›, ‹¡Kasataalejeseʼe anain pia waneepia!›, müshii naya sümüin namaleiwase».

Mayaainjeʼe naainjapuʼuin na manoujainsaliikana wanee kasa süpüla naʼwaajüin maleiwayaasü jee namaʼanain shiyaakua wanee kasa, eesüjaʼa nnojorüle mojuin shia maaʼulu yaa namüin na anoujashiikana. Süpüla wayaawataleein saaʼu tia, anashii wekirajaale sünain wanee süchon wunuʼu kanüliaka granada ashajünaka achiki suluʼu tü Bibliakat. Anuu tü sümakat wanee enciclopedia süchiki tia: «Eesüjaʼa suʼwaajünüle tü granadakat natuma waneinnua wayuu anoujakana nünain Maleiwa naküjainruʼu». Mayaainjeʼe müin shia, nuluwataain Maleiwa süpüla shiʼyapüjünüin shiyaakua granada sotpünaa nüsheʼin chi laülaashikai napüleerua na sacerdotekana otta eʼitaanüsü shia sünain süsepü tü piichi aʼwaajülee nukumajirakat Salomón (Éxodo 28:33, 2 Reyes 25:17). Jamüsüjaʼa tü süttiija aʼatünapuʼukat sünain najapü wanee wayuu eekai kasaalüin, sünainpünaasü paala shia tü iküleesia ekirajaka alawaa. Maaʼulu yaa, nnojotsü mojuin sümüin wayuu tia. Neʼrüle wanee süttiija sünain najapü wanee wayuu, nayaawata aaʼu kasaalüin nia.

¿Sünainpünaasüche tü iküleesia ekirajakalü alawaa tü wiino asünakat? Eejana wanee wayuu aʼwaajapuʼukana Baal, ekerotushii naya eere naʼwaajüin namaleiwase. Eküshii naya, asüshii wiino jee noʼulerashi Abimélec, chi nüchonkai Gedeón (Jueces 9:22-28). ¿Eejaitche wanee wayuu aʼyataai nümüin Jehová naʼaka naya wayuukana sümaa nuchuntuin sümüin wanee maleiwayaasü süpüla mojuinjatüin nukuwaʼipa Abimélec? Anuu tü nümakat Amós nachiki waneinnua israelita eʼrüliijaakana wayumüin nümüin Jehová: «Nasapainkashii sümülatuʼu tü aʼwaajüleekat jee nasüin tü wiino nasutukat noulia na wayuu kasalajanaka naainjala natuma, nasüin tia wiinokot eere naʼwaajüin namaleiwase» (Amós 2:8). ¿Naaʼinrüinche tia wanee aʼyataakai nümüin Jehová jaʼitairü amülaain tü wiinokot süpüleerua maleiwayaasü jee shiale nasüin soʼu tia? (Jeremías 7:18). ¿Niyalerüinche wanee anoujashi wanee iita kaluʼukat wiino süpüla nuchuntuin sümüin wanee maleiwayaasü saainjüinjatüin wanee kasa nüpüleerua wanee wayuu jee anainjatüin nukuwaʼipa sutuma?

Sümaiwa palaa, eejana waneinnua wayuu aʼyataakana nümüin Jehová ayalerakana najapü süpüla nachuntuin sülatüinjatüin wanee kasa anasü. Nayalerapejeʼe najapü süpüla nachuntuin nümüin chi Maleiwa shiimainshikai. Jamüshijaʼa Salomón, «ashaʼwalaashi shiʼipoʼujee tü aʼwaajüleekat Jehová sümaa niyalerüin najapü sümaa nümüin: ‹Jehovákalee, chi Namaleiwase na israelitakana, nnojoishi eein wanee Maleiwa makai aka paaʼin [...]; paapaja tanüiki chejee iipünaajee, paapaja wanüiki sümaa motuin paaʼin waainjala›» (1 Reyes 8:22, 23, 30). Müsia neʼe tü naainjakat Esdras «anasü nünüiki nümüin Jehová [...], anuukalaka nanüiki na wayuukana: ‹¡Amén! ¡Amén!›, sümaa nayalerüin najapü. Nasapainkashii naya sümaa naʼwaajüin Jehová» (Nehemías 8:6; 1 Timoteo 2:8). Wayaawatüin sutuma tia, nnojoluin nayalerüin najapü iipünaamüin süpüla nachuntuin sümüin wanee maleiwa saainjainjatüin wanee kasa pülasü napüleerua jee shiale wanee kasa makalü aka saaʼin tia (Isaías 65:11).

Na wayuu aainjakana brindis maaʼulu yaa, nnojotsü naainjain tia süpüla nachuntuin sümüin wanee maleiwayaasü anainjatüin nakuwaʼipa natuma, isapejeʼe nachiki naküjain jamüin nayaleraka iipünaamüin tü iita nasiakat wiino. Mayaainjeʼe müin sukuwaʼipa tia sutuma wayuu, nnojotsü nashatüinjatüin shia na anoujashiikana.

Nnojoishii sünainpünaain na aküjaliikana pütchi nüchiki Jehová waneirua kasa saainjaka wayuu, maʼaka saaʼin saludo a la bandera, eeʼirajaa himno nacional jee waneirua kasa. Saashin wayuu nnojotsü sünainpünaain tia aʼwaajaa maleiwayaasü. Saainjünüle wanee kasa makalü aka saaʼin tia, nnojotsü nataʼülüin sukuwaʼipa wayuu na Aküjaliikana pütchi jee nnojotsü naküjain wanee kasa mojushiijeetka sümüin wayuu. Nnojoliipejeʼe naya sünainpünaain tia süka nnojoluin pansaain shia sümaa tü nümakat Maleiwa suluʼu tü Bibliakat (Éxodo 20:4, 5; 1 Juan 5:21). Wainma wayuu jülüjakana aaʼin nnojoluin sünainpünaain tü iküleesiakat aainjaa brindis. Mayaainjeʼe müin shia, eesü waneirua kasa nayaawataka anainjee na anoujashii shiimainshiikana, nnojoliinjanain sünainpünaain naya tia süka naainjapuʼuin shia na wayuu suluʼukana tü iküleesia ekirajünakalü aluʼu alawaa. Na wayuu aainjakana tia müsüjaʼa nachuntakai saaʼin saainjünüinjatüin wanee kasa pülasü napüleerua (Éxodo 23:2).