Sunouteʼerüin nakuwaʼipa tü Bibliakat

¿JAMÜSÜ suuʼulaaka suulia aʼwaajaa ayaakua wanee wayuu 60 ouyase? ¿Kasa naaʼinraka wanee sacerdote sintoísta süpüla nüküjalinjachin pütchi nüchiki Jehová? ¿Jamüsü nnojotka mojuin maʼin saaʼin wanee wayuu mayaainjeʼe süsülajuushin sutuma shii joʼuuiwaʼaya shia? Naküjeerü joo süchiki tü alatakana namüin.

«Aʼwaajapuʼusü taya shiyaakua santo» (ABA DANSOU)

JUYA JEMEIKA OʼU SHIA: 1938

SUUMAINKA: BENÍN

TÜ SAAʼINRAPUʼUKAT: AʼWAAJAPUʼUSÜ SHIYAAKUA SANTO

TAKUWAʼIPAPUʼUKAT: Miyoʼusü taya suluʼu wanee pueulo So-Tchahoué sünülia, pejesü sünain wanee lamuuna miyoʼu eere poopooin maʼin tü mmapaʼakat. Sutuma nnojoluin eein karateet chayaa, anuwaluʼushii na wayuukana noʼunajanapa. Shia shipijaaka aaʼu wayuu tü olojookot jime, epijaa kaaʼula, anneerü, püülükü otta eeshii na kasachirakana, kepiashii na wayuukana taapüla, alama jee shiale ladrillo. Mayaainjeʼe wainmain wayuu maʼletsekana chayaa nnojotsü eein aʼluwajaa maʼaka suluʼu waneirua mma.

Jintüliiwaʼaya taya sümaa tü tawalakat, aluwataanüshii waya suluʼu wanee iküleesia nutuma chi washikai süpüla wekirajünüin sünain aʼwaajaa santo. Mapa taʼwaajüin wanee maleiwayaashi kanüliakai Dudua, tia shia suwalaʼata nünülia chi maleiwayaashikai Oduduwa sutuma tü pueulokot yoruba. Takumajüin wanee nipiayaasü otta toʼttaka joo sünain asülajaka kasairua nümüin: maʼaka saaʼin süseitain palma, ñame, warutta, kaliina, toomasü otta waneirua mürüt. Wainma nneerü takataajaka sünain tiairua kasa.

SUNOUTEʼERÜIN TAKUWAʼIPA TÜ BIBLIAKAT: Toʼttapa sünain ekirajawaa tü Bibliakat, tayaawata aaʼu waneeshiain neʼe chi Maleiwa shiimainshikai, chi kanüliakai Jehová otta mojusü nümüin waʼwaajüle wanee naata nuulia (Éxodo 20:4, 5; 1 Corinto 10:14). Tayaawata aaʼu tooʼulaainjatüin suulia tü kasa taaʼinraka, tojutaka wainma kasa eejatkat tamaʼana sümaʼaleeya shiyaakuairua tü santokalüirua, ooʼulaasü taya suulia oʼunaa sümaʼanamüin outsü jee nnojoluitpa taya sünainpünaain tü naaʼinrakat na tapüshikana nekiira na outushiikana.

Eetaasü maʼaka 60 juya taya sünain aʼwaajaa shiyaakua santo, müsüjeseʼe kapüleein maʼin tamüin tooʼulaain suulia tia. Akaʼaya na taʼaleewainkana, na tapüshikana otta na kepiakana taʼütpünaa napüleeruain aaʼin taya sümaa nemeeʼerainpalain taya. Tachuntuinjeseʼe nümüin Jehová katchinjatüin taaʼin nutuma süpüla taaʼinrüin tü anakat noʼuluʼu. Sütütüleʼerüin maʼin taaʼin tü pütchi suluʼukat Proverbios 18:10, tü makalü mayaa: «Tü nünüliakat Jehová müsü aka saaʼin wanee piichi ounjulaaya. Aaʼinmajünüshi chi wayuu achuntakai nünülia».

Wanee kasa akaalinjaka maʼin taya shia toʼunuin sünain tü outkajawaakat namaa na aküjaliikana pütchi nüchiki Jehová. Teʼrüin yalaala, aijiraain maʼin na aʼwaajakana nia, ponusü maʼin taaʼin nachajaain maʼin sukuwaʼipa noonooinjatüin sümaa tü sümakat tü Bibliakat. Tayaawatüitpa aaʼu nayain na aküjaliikana pütchi nüchiki Jehová na shiimainshiikana anoujain.

TÜ KASA ANASÜ TEʼRAKAT: Anasü takuwaʼipa namaa na tachonniikana sutuma tü pütchi suluʼujeejatkat tü Bibliakat. Mataasü süshakatinnakai saaʼin wanee tachisa jawatüsü toulia. Oʼunusü süpüshuaʼa tanneetse sünain aʼwaajaa ayaakua sümaa nnojoluyaain anain taya sutuma. Aʼyataasü taya jooluʼu nümüin Jehová chi ajaʼttireechikai süpüshuaʼa tü kasa mojusükat (Alateetkat Mapeena [Apocalipsis] 21:3, 4). Nnojoluitpa taya aʼwaajüin shiyaakua santo, nia taʼwaajaka Jehová süka süpüshuaʼa taaʼin, jimatüsü taaʼin nutuma, naaʼinmajüin taya otta talatüsü taaʼin.

«Suluʼutüjülia taaʼin taʼyataain nümüin Maleiwa jintüliiwaʼaya taya» (SHINJI SATO)

JUYA JEMEIKA OʼU NIA: 1951

NUUMAINKA: JAPÓN

TÜ NAAʼINRAPUʼUKAT: SACERDOTEPUʼUSHI NIA SULUʼU IKÜLEESIA SINTOÍSTA

TAKUWAʼIPAPUʼUKAT: Miyoʼushi taya suluʼu wanee mma kanüliakat Fukuoka. Chi tashikai otta tü teikat nekirajüin jintüliiwaʼaya taya sünain aʼwaajaa namaleiwase na suluʼukana iküleesia sintoísta. Jülüjapuʼusü maʼin taaʼin toʼttaainjachin nutuma Maleiwa otta takaalinjainjanain na wayuu eʼrakana müliaa. Sotusü taaʼin nasakirüin waya wanee ekirajüi suluʼu koleejia kasain waaʼinrüinjatüin miyoʼupa waya. Na takonpañeetsekana naküjain süchiki naʼyataainjanain sünain waneirua kasa anasü maʼaka cientiifico otta waneirua kasa. Shiasaʼa taküjapa tayakai süchiki taʼyataainjachin nümüin Maleiwa asirajüshii na waneinnua taka.

Süchikijee tojoʼlooin suulia bachillerato, ashajitshi taya suluʼu wanee koleejia süpüla tekirajaain süchiki tü sunoujakalü anain wayuu. Teʼraajaka wanee sacerdote suluʼukai tü iküleesia sintoísta münaka. Naashajeʼerapuʼuin waneepia wanee karaloʼuta yuuisü süta, nüsakiraka taya sünain kasain karaloʼuta naashajeʼerüin, süka jülüjain taaʼin süta tü karaloʼutakat «shia tü Bibliakat» tamaka nümüin. Anuujeseʼe nünüiki tamüin: «Chi eekai keeʼireein naaʼin sacerdotein suluʼu iküleesia sintoísta naashajeʼerüinjatü karaloʼutakat tüü».

Oʼunamaatüshijeseʼe taya sünain ayaʼlajaa wanee Biblia, teʼitaakat shia eere süpülee karaloʼuta eere jaʼyain shia, nnojotpejeʼe eeyaai taashajeʼerüin shia süka wainmain tü kasa tekirajaaka anain. Süntaka mapa tü kaʼi tagraduajüinjachika oʼu süpüla sacerdoteinjachin taya suluʼu iküleesia sintoísta. ¡Talatüsü maʼin taaʼin sutuma tia!

Nnojotpejeʼe anain taaʼin sutuma tü teʼrakat mapa, wainma na sacerdote nnojoliikana kachipünaain naaʼin nakuwaʼipa na wayuukana otta wainma na nnojoliikana kanoulain. Jamüshijaʼa wanee tekiipüʼü müshi nia tamüin: «Müleka keeʼireere paaʼin anain pukuwaʼipa, paashajaa neʼe süchiki filosofía, jalia paashajaʼalayaai süchiki tü punoujakalü anain.

Mojusü maʼin taaʼin sutuma tü nakuwaʼipakat. Mayaainjeʼe nnojoluin toʼunuin suluʼujee tia iküleesiakat ekirajaashi taya süchiki waneirua iküleesia, nnojotpejeʼe anayaain tamüin tü tatüjakat süchiki. Nnojotsü müin eekai saaʼin tamüin wanee iküleesia eekai shikirajüin tü shiimainkat nüchiki Maleiwa.

SUNOUTEʼERÜIN TAKUWAʼIPA TÜ BIBLIAKAT: Soʼu 1988 teʼraajüin wanee budista aküjakai tamüin anain taashajeʼerüle tü Bibliakat, sotoka taaʼin nünüiki chi sacerdote suluʼukai tü iküleesiakat sintoísta. Toʼttakalaka sünain aashajeʼeraa shia süka ponuin maʼin taaʼin tü pütchikat eesü jayuule taaʼu sünain aashajeʼeraa.

Süka taashajeʼerüin tü Bibliakat tayaawata aaʼu toʼuraajüinjachin nümüin Maleiwa maʼaka shikirajüin Mateo kapiitulo 6 wetsiikulo 9 sünainmüin 13. Teiteʼerakuʼu tamüsü pejeewa tü sümakat tia pütchikat mayaainjeʼe kupaain taya sünain tü taaʼinrakat suluʼu tü iküleesiakat.

Sümaʼinruʼu taashajeʼerüin tü Bibliakat wainmain kasa tasakitkalü anain taaʼin. Tatüjaa aaʼulu nekirajüin wayuu sünain tü Bibliakat na aküjaliikana pütchi nüchiki Jehová süka nekirajapuʼuin tü taʼwayuusekat. Taashajaaka sümaa wanee Aküjat Pütchi, wainma tü kasa tasakitkalü anain shia otta asoutusü shia tamüin sükajee tü Bibliakat, ponusü maʼin taaʼin tia, süchajaain sukuwaʼipa tia wawalakat süpüla tekirajünüin natuma na Aküjaliikana Pütchi.

Mapa oʼunushi taya sünain tü outkajawaakat. Tayaawataleein aaʼu mapa eejanain sünain tü outkajawaakat noʼutku wawalayuu müliapuʼukana tatuma. Mayaapejeʼe müin shia nasaküin taya otta kamaneeshii naya tamüin.

Tayaawata aaʼu sünain tü outkajawaakat keeʼireein naaʼin Maleiwa alinjatüin nüpüla wanee wayuu tü nuʼwayuusekat otta na nüchonniikana. Nnojotpejeʼe müin sukuwaʼipa tatuma, süka taʼyataain maʼin sünain sacerdotein taya, nnojotsü jülüjayaain taaʼin sukuwaʼipa tü taʼwayuusekat otta na piamashiikana tachonnii. Naya jülüjaleeka maʼin taaʼin na wayuu antakana suluʼumüin tü iküleesiakat suulialeʼeya tü taʼwayuusekat.

Sutuma tekirajaain sünain tü Bibliakat aleewashi maʼin taya nümaa Jehová. Wainma wetsiikulo antaka suluʼumüin taaʼin maʼaka saaʼin sümakat Roma kapiitulo 10 wetsiikulo 13 tü makalü yaa: «Chi eekai nuchuntuin nünülia Jehová, oʼtteʼenneechi nia». Suluʼutüjülia taaʼin taʼyataain nümüin Maleiwa jintüliiwaʼaya taya, jooluʼu teʼraajüichipa nia.

Nnojoluitpa anain tamüin taʼyataain suluʼu tia iküleesiakat. Shapaapuʼusü taaʼin jameerüin nanüiki na waneinnua tooʼulaale suulia sintoísmo. Jülüjapejeʼe taaʼin tamapuʼuin tooʼulaainjachin suulia teʼraajapa chi Maleiwa shiimainshikai. Süka tayaawatüin saaʼu tü taaʼinrajatkat ooʼulaashi taya suulia tia iküleesiakat soʼu tü juyakat 1989 taneekaka taʼyataainjachin nümüin Jehová.

Napüleerua aaʼinchi taya na shikiipüʼükana tü iküleesiakat shiiʼiree makatüin taya, shiapejeʼe kapüleein maʼin tamüin taküjain süchiki tü taaʼinrajatkat namüin na kachooinkana taya. Jamüshijaʼa tounapa nepialuʼumüin, shapaasü maʼin taaʼin. Wainmajüsü taaʼin saaʼu jameerüin nanüiki tamüin, kutkuttüsü neʼe tasaʼa otta kojuyatua tashaʼwalaain wopuluʼu süpüla toʼuraajüin nümüin Jehová.

Tantapa nepialuʼumüin na kachooinkana taya, nnojotsü taküjamaatüin namüin süchiki tü taaʼinrakat taküjain shia namüin kamaʼa mapa, süpüla taküjain nümüin chi tashikai, oʼuraajüshi maʼin taya palajana. Taküjain nümüin teʼraajüichipain chi Maleiwakai otta tooʼulaainjachin suulia sintoísmo, nnojotsü jamüin nünüiki tamüin süka mojuin maʼin naaʼin. Antüshii noʼutku na tapüshikana shiiʼiree nemeejeein taaʼin. Nnojotsü mojuin tanüiki namüin süka suluʼuitpain taaʼin taʼyataainjachin nümüin Jehová. Kakalia mapa nnojoliinnapa jashichin tamüin na tapüshikana saaʼu tü taaʼinrakat.

Mayaainjeʼe tooʼulaain suulia tü iküleesia kaluʼupuʼukat taya ayatayüiyain suluʼuin tekii nakuwaʼipa na sintoístakana, kapüleeshaatasü tamüin motuin taaʼin tü kasa taaʼinrapuʼukat otta tü teʼrakat.

¿Kasa taaʼinraka süpüla taʼwanajaain tü jülüjakat taaʼin? Piamasü kasa, tü palajatka shia taʼajüin süpüshuaʼa tü kasa sünainpünaakat tü sintoísmokot maʼaka saaʼin karaloʼutairua, cuadro otta waneirua kasa kojutusü eejatka tamaʼana. Tü wane kasa taaʼinrakat, shia aleewain maʼin taya namaa na Aküjaliikana Pütchi. Sutuma tia, moto moto müsü taaʼin tü takuwaʼipapuʼukat paala sümaiwa.

TÜ KASA ANASÜ TEʼRAKAT: Mojupuʼusü saaʼin tü taʼwayuusekat namaa na tachonniikana süka nnojoluin kachipünaain naya taaʼin. Taaʼinrapa tü sümakat tü Bibliakat süchiki talatirüinjachin kaʼi sümaa tapüshi, paaʼinwashii waya sutuma, aʼyataasü tü taʼwayuusekat mapa nümüin Jehová, maaʼulu yaa, aʼyataashii waya wapüshuaʼa nümüin Jehová, tayakai, taʼwayuuse, chi wachonkai otta tü wachonkat nümaa chi suʼwayuusekai.

Talatüsü taaʼin maaʼulu yaa süka taʼyataain nümüin Maleiwa otta takaalinjain wayuu maʼaka keeʼireetüjüliain shia taaʼin. Alanaʼaleesia tü kasa anasü teʼrakat, taapashaatain maʼin analuʼutka nümüin Jehová saaʼu tia.

«Eesü tamaʼana kasa süpüshuaʼa nnojotpejeʼe talatüin taaʼin» (LYNETTE HOUGHTING)

JUYA JEMEIKA OʼU SHIA: 1958

SUUMAINKA: SUDÁFRICA

TÜ SAAʼINRAPUʼUKAT: JÜLÜJAPUʼUSÜ SAAʼIN MAALIN SHIA APÜLAWAA

TAKUWAʼIPAPUʼUKA: Jemeisü taya suluʼu wanee pueulo joʼuuchon kanüliakat Germiston eere shiʼyataain wayuu suluʼu mina, nnojotsü jouluin kaʼruwarannuu suluʼu tia pueulokot. Sutuma isainjatia nachiki nepijain taya na kachooinkana taya naapüin taya sümüin wayuu piamasü semaana süchikijee jemelin. Shiʼipaʼaya temiyoʼulaain nayaʼaya taaʼinruʼu na shiimainshiikana kachooin taya na wayuu epijakana taya. Tatüjaapa saaʼu nnojoluin müin tia, mojusü maʼin taaʼin otta müsü mojutukai taaʼin, nnojoluinnapain müin tapüshikai naaʼin na wayuu epijaakana taya otta jülüjasü taaʼin nnojoleerüin nayaawatüin saaʼu jamüin mojuka maʼin taaʼin.

Wanaa sümaa 16 touyase oʼunapuʼusü taya suluʼu bar namaa na taʼaleewainkana süpüla ayonnajaa otta aapajaa muusika. Akamüjasü taya wanaa sümaa 17 touyase, meesü taya maʼaka naaʼin na jieyuu aürütkana maʼin ojuʼitaka ayaakua sünain süta sikariia. Wanaa sümaa 19 touyase akolojoosü taya Johannesburgo sünain aʼyatawaa. Süka taʼaleewajaain namaa wayuu mojukana akuwaʼipa, yarüttüsü tanüikipala, akamüjasü taya otta asawaisü taya waneepia sujutaayamüin semaanakat.

Aainjapuʼusü maʼin taya ejercicio, ekirajaapuʼusü taya sünain gimnasia aeróbica, squash otta fútbol. Sutuma aʼyataalüin maʼin taya kojutusü taya atumawaa otta anasü takuwaʼipa, nnojotsü taya eʼrüin müliaa. Mayaainjeʼe müin anakai maʼin saaʼin takuwaʼipa noʼuluʼu na waneinnua, eetaayaai müin shia, mojusü maʼin taaʼin otta nnojotsü tayaawatüin saaʼu tü taaʼinrajatkat. Eesü tamaʼana kasa süpüshuaʼa nnojotpejeʼe talatüin taaʼin.

SUNOUTEʼERÜIN TAKUWAʼIPA TÜ BIBLIAKAT: Wanaa sümaa toʼttuin sünain ekirajaa sünain tü Bibliakat tekirajaa anainrü aipüralin maʼin wayuu chi Maleiwakai Jehová otta sünain naapüin wamüin tü Bibliakat süpüla nuʼunirüinjatüin wakuwaʼipa (Isaías 48:17, 18). Tayaawata aaʼu choʼujaain nuʼunirüinjatüin Jehová takuwaʼipa süpüla tanouteʼerüinjatüin shia.

Tachajaainjana wayuu anakana süpüla taʼaleewain, maʼaka sümüin Proverbios 13:20, «kekiijeechi maʼin wanee wayuu naʼaleewajaale nümaa chi wayuu kekiikai maʼin. Mojeerü nukuwaʼipa wanee wayuu naʼaleewajaale nümaa chi wayuu eekai mojulaain». Süka taaʼinrüin tü sümakat tia pütchikat nnojoluitpa aleewain taya namaa na taʼaleewainpuʼukana, naya aleewaka amaa taya jooluʼu na Aküjaliikana Pütchi.

Tü kapüleekat maʼin tamüin shia tooʼulaain suulia akamüjaa. Wanaa sümaa eejiraain taya shiiʼiree tooʼulaain suulia akamüjaa akaüsülaasü maʼin taya 14 kilo sooʼomüin taawain. Mojushaatasü maʼin taaʼin sutuma tia otta alatüsü maʼaka poloo juya süpüla süshakajüin tepesain süchikuaʼa. Tayaawata aaʼulu tooʼulaainjatüin suulia akamüjaa, achuntusüjeseʼe maʼin taya nümüin Jehová waneepia otta naapüin tamüin tü nütchinkat süpüla tountuin shia.

TÜ KASA ANASÜ TEʼRAKAT: Nnojoluitpa taya ayuulin, talatüsü taaʼin sümaa tü kasa eekat tamaʼana, nnojoluitpa jülüjain taaʼin anainjatüin maʼin taʼyataain otta takanajüinjatüin wainma nneerü süpüla talatüinjatüin taaʼin. Talatüsü taaʼin nümaa chi taʼwayuusekai sünain wekirajüin wayuu sünain tü Bibliakat namaʼaleeya apünüinshii taʼaleewainyuu aʼyataapuʼukana tamaa. Süpülapünaa outuin na wayuu epijakana taya, taküjain namüin süchiki nasoʼiraajeenain aaʼin na outushiikana yaa mmapaʼa paʼaraiisüpa tü mmakat nutuma Maleiwa.

Sutuma aleewain maʼin taya nümaa Jehová nnojoluitpa jülüjain taaʼin maalin taya apülawaa. Maaʼulu yaa talatüsü maʼin taaʼin süka suluʼuin taya tü nupueulosekat Jehová, na suluʼukana müinnapa naya maʼaka saaʼin tei, tashi otta tawalayuu tamüin (Marcos 10:29, 30).

[Ayaakuaa]

Teʼrüin aijiraain maʼin na aküjaliikana pütchi nüchiki Jehová

[Ayaakuaa]

Iküleesia naʼwaajüle na sintoístakana