1. ¿Jamüsü nünüiki Pablo nachiki na aküjakana pütchi waneepia?

KOJUTÜSHII nümüin Pablo na aküjakana pütchi waneepia. Anuu nünüiki: «Kojutüsü wamüin tü jiʼyataainkat, tü kasa anasü jaainjakat süka aipüraliin jia jee jüchecherüin jaaʼin sünain jaʼatapajüin nünain chi Wasenyotsekai Jesukürisüto nuʼupala chi Washikai Maleiwa» (1 Tes. 1:3, NM). Kojutüsia nümüin Jeʼwaa tü naainjakat na aʼyataakana nümüin süka süpüshuaʼa naaʼin, jaʼitairü wainmain jee palitchonle naʼyataain nümüin (Heb. 6:10).

2. ¿Kasa wekirajaainjatka anain sünain ekirajaayakat tüü?

² Sümaiwa jee maaʼulu yaa, wainma tü kasa naainjakat na wawalayuukana süpüla naʼyataain waneepia nümüin Jeʼwaa. Wekirajaa palajana sünain tü naainjakat na anoujüshiikana nakalioʼu na aluwataaushiikana. Süchikijee tia wekirajaweerü anain tü naainjakat maaʼulu na aʼyataakana waneepia nümüin Maleiwa jee tü waainjüinjatkat süpüla kojutüin wamüin tü naʼyataainkat.

3, 4. (1) ¿Kasa naʼyataaka anain nümüin Jeʼwaa noʼutku na anoujüshiikana namaiwa? (2) ¿Kasa naainjaka süpüla eeinjatüin namaʼana tü choʼujaakat namüin?

³ Süchikijee woutiisain Jesuu, oʼttüshi nia sünain aküjaa tü pütchi aküjünajatkat sümüin wayuu sainküin mmaka (Luc. 3:21-23; 4:14, 15, 43). Ouktapa nia, nayainnapa na aluwataaushiikana  aküjaka pütchi nüchikumüin (Aluw. 5:42; 6:7). Eeshii na akolojookana wattamüin süpüla naküjüin pütchi jee misioneeroin naya. Jamüshijaʼa Felipe, nüküjüin tü pütchikat suluʼu kojuya mma chaa Palestina (Aluw. 8:5, 40; 21:8). Akaʼaya Pablo, nüküjüin tü pütchikat wattapünaa (Aluw. 13:2-4; 14:26; 2 Cor. 1:18, 19). Eeshii na ashajakana süpüshi tü Wiwüliakat jee na seküretaariokana, maʼaka naaʼin Silvano (Silas), Marcos nümaa Lucas (1 Ped. 5:12). Eeshii nawalayuu jieyuu akaaliinjaka naya (Aluw. 18:26; Roma 16:1, 2). Ashajünüsü süchiki tü naainjakat suluʼu tü Ashajuushikat süka Griego. Shiiʼiyatüin wamüin tia sünain kojutüin nümüin Jeʼwaa na aʼyataakana nümüin jee naaʼinmajüin naya.

⁴ ¿Kasakaʼa nepijaain aaʼu? Eeshii na aʼyataakana shiatapünaa kaʼi maʼaka naaʼin Pablo jee na nümaajanakana. Nnojoishii aʼatapajüin naya walawaa saaʼu naküjüin pütchi, eesü süsülajünüle kasa namüin natuma na nuwalayuukana (1 Cor. 9:11-15). Nounejaain naya sünain ekawaa jee atunkaa nepialuʼumüin. Akaaliinjünüshii naya natuma na nawalayuukana (paashajeʼera Aluwataaushikana 16:14, 15 jee Filipos 4:15-18).

5. ¿Jamüsü nünüiki wanee wayuu sümaa nuʼwayuuse süchiki aʼyatawaa waneepia nümüin Jeʼwaa?

⁵ Müsia maaʼulu yaa, wainma wawalayuu aʼyataakana waneepia nümüin Jeʼwaa (paashajeʼera tü pütchikat: «Tü naainjakat na aʼyataakana waneepia nümüin Jeʼwaa»). ¿Jamüshii naʼyataaka waneepia nümüin Jeʼwaa? Naküjeerü shia pümüin püsakirüle naya jee atütülaajeerü paaʼin sutuma tü namakat pümüin. Eeshi wanee wawala pürekutsoot rekulaatshi, pesiaatshi jee misioneeroshi nümaiwa. Maaʼulu yaa, suluʼushi Weteet suluʼu wanee mma naata, anuu nünüiki: «Anasü maʼin tü kasa taneekakat süka taʼyataain waneepia nümüin Jeʼwaa. Poloopa mekiisalümüin touyase, nnojotsü tatüjaain aaʼu tekirajaainjachire suluʼu eʼikülee miyoʼu, taʼyataainjachire waneepia jee pürekutsoolinjachire taya. Nnojotsü tatüjaain aaʼu tü taaʼinrüinjatkat. Tatüjaaitpa aaʼu nnojoluin motuin naaʼin Jeʼwaa tü kasa waainjakat süpüla waʼyataain waneepia nümüin. Nnojoishijeʼe aʼyataain taya waneepia nümüin kachiiruale neʼe taaʼin ekirajawaa suluʼu eʼikülee miyoʼu». Anuu sünüiki tü nuʼwayuusekat: «Kooʼomüinsü maʼin tanoula sutuma taʼyataain waneepia nümüin Jeʼwaa. Weʼrüin nuʼunirüin wakuwaʼipa jee naaʼinmajüin waya. ¡Nnojotsüjeʼe weʼrüin tia woʼunüle neʼe süchiirua waneeirua kasa! Taapüin analuʼutkat waneepia nümüin Jeʼwaa saaʼu waʼyataain waneepia nümüin». ¿Jama piakai? ¿Meesü pukuwaʼipa mayaa?

6. ¿Kasa sotuinjatka waaʼin waneʼewai wakua?

⁶ Eeshi nnojoire piʼyataain waneepia nümüin Jeʼwaa süka kapüleein shia pümüin. Jaʼitairü müin pukuwaʼipa, soteesü paaʼin kojutüin maʼin nümüin Jeʼwaa tü kasa paainjakat süpüla puʼwaajüin nia. Soto paaʼin kojutüin maʼin nümüin Pablo naʼyataain na nuwalayuukana. Aluwataashi nia nünüiki namüin na chajanakana Colosas jee eeshii na nuchuntakana anülia suluʼu tia karalouktakat (paashajeʼera Filemón 1, 2). Müshia Jeʼwaa, kojutüsü maʼin nümüin tü kasa paainjakat süpüla puʼwaajüin nia. ¿Kasakaʼa waaʼinrüinjatüin süpüla wakaaliinjüin na aʼyataakana waneepia nümüin Jeʼwaa?

7, 8. (1) ¿Kasa naainjaka na pürekutsootkana? (2) ¿Kasa waaʼinrajatka süpüla wakaaliinjüin na pürekutsootkana?

⁷ Na pürekutsootkana, natütüleʼerüin naaʼin na wawalayuukana maʼaka naainjüin shia na aküjakana pütchi namaiwa. Eeshii na aküjakana maʼin pütchi soʼu akaratshi shikii oora. ¿Kasa waaʼinrajatka süpüla wakaaliinjüin naya?

⁸ Müsü Shari, wanee pürekutsoot: «Süka  waküjüin pütchi waneepia, jaʼyasü waaʼu ichein wanoula. Choʼujaapejeʼe watütüleʼennüin aaʼin» (Roma 1:11, 12). Wanee wawala pürekutsootka sümaiwa, müsü shia nachiki na pürekutsootkana eere suutkajaain: «Aʼyataashii maʼin naya waneepia. Talatüsü naaʼin namaanüle natuma na wawalayuu keʼejenakana, nounejaanüle sünain ekawaa, nasülajünüle amüin mojukuʼu müsü süliainjatka kosoliina jee kasa eeka choʼujaain namüin. Wakaaliinjüin naya waainjüle tia».

9, 10. ¿Kasa naainjaka na wawalayuukana süpüla nakaaliinjüin na pürekutsootkana?

⁹ Süpüla wakaaliinjüin na pürekutsootkana, wojuʼita namaa sünain aküjaa pütchi. Anuu sünüiki Bobbi, wanee pürekutsoot: «Choʼujaasü nojuʼitüin wamaa na wawalayuukana luuneoʼu sünainmüin piennoʼu». Müsü wanee wawala pürekutsootsü eere suutkajaain Bobbi: «Nnojoishii jaraliin ojuʼitüin wamaa aliika». Müsü wanee wawala aʼyataasü suluʼu Weteet chaa Brooklyn, pürekutsootpuʼusü shia: «Sotusü taaʼin tü sümakat tamüin wanee wawala keʼejenasü, müsü shia: ‹Nnojorüle jaralüin ojuʼitüin pümaa, piyamaaja taya tojuʼitai pümaa›. ¡Ayatsü pürekutsoolüin taya sutuma sükaaliinjüin taya!». Anuu tü anakat süpüla waaʼinrüin saashin tü wawalakat Shari: «Sujutaapa tü aküjaakat pütchi, nnojoluwaishii namaain weinshi na wawalayuukana na pürekutsoot maʼwayuusekana. Wounejaa naya süpüla nekirajaain wamaa soʼu tü Ai Waʼwaajakalü oʼu Maleiwa sümaa Wapüshi. Katsüinjeerü nanoula wamaale naya sünain aaʼinraa waneeirua kasa».

¹⁰ Eesü wanee wawala aʼyataasü waneepia nümüin Maleiwa, eeirü maʼaka jaʼrai shikii juya sünain tia, müsü shia süchiki tü naainjapuʼukat na laülaashiikana wanaa sümaa pürekutsoolüin shia: «Alapalaapuʼushii naya naaʼu na pürekutsootkana sülatapa piama kashi. ‹Anayaashiijeʼe jia, anayaasüjeʼe jukuwaʼipa chaa eere jiʼyataain, eetaaka tü kasa alatakat jümüin›, müshii namüin. Nakaaliinjeein maʼin naya. Antüshii naya wepialuʼumüin süpüla neʼrajaain kasain choʼujaain wamüin». Eesü sotule waaʼin tü nümakat Pablo nümüin wanee anoujüshi chejeʼewai Éfeso. Mayaainjeʼe niʼyataain süpüleerua nüpüshi chia anoujüshikai, nükaaliinjüin Pablo (2 Tim. 1:18, NM).

11. ¿Kasa naainjaka na pürekutsoot pesiaatkana?

¹¹ Eeshii wawalayuu eeka pürekutsoolüin  pesiaat. Aküjüshii pütchi soʼu 130 oora kashiwai jee nakaaliinjüin na wawalayuukana sünain waneeirua kasa. Süka naküjüin pütchi waneepia, nnojotsü apütaain kaʼi süpüla naʼyataainjanain. Süpüla shiainjatüin jülüjüin naaʼin waneepia tü aküjaakat pütchi, asülajünüsü namüin kashiwai suluʼujee Weteet tü süliainjatkat tü kasa choʼujaakat namüin.

12. ¿Kasa eeka süpüla naaʼinrüin na laülaashiikana jee na wawalayuukana süpüla nakaaliinjüin na pürekutsoot pesiaatkana?

¹² ¿Kasa waaʼinrajatka süpüla wakaaliinjüin na pürekutsoot pesiaatkana? Müshi wanee laülaashi aʼyataashi suluʼu Weteet jee nütüjaa aaʼu tü alatakat namüin na pürekutsoot pesiaatkana: «Anashii yootule na laülaashiikana namaa na pürekutsoot pesiaatkana süpüla natüjaainjatüin aaʼu tü nakuwaʼipakat otta tü naainjüinjatkat süpüla nakaaliinjüin naya. ‹Asülajüna amüinchii naya, nnojotsü choʼujaain namüin akaaliinjünaa›, eeshii na wawalayuu makana. Eepajaʼa süpüla nakaaliinjünüin naya wawalayuukana». Talatüsü naaʼin na pürekutsoot pesiaatkana maʼaka naaʼin na pürekutsoot rekulaatkana eere wawalayuu ojuʼitaka namaa sünain aküjaa pütchi. ¿Eeshiche süpüla pujuʼitüin namaa sünain aküjaa pütchi?

13, 14. (1) ¿Kasa choʼujaaka nümüin chi wawala alapalaakai waaʼu jee tü nuʼwayuusekat? (2) ¿Kasa paaʼinrajatka süpüla pükaaliinjüin chi wawala alapalaakai waaʼu sümaa tü nuʼwayuusekat?

¹³ Chi wawala alapalaakai waaʼu sümaa tü nuʼwayuusekat, katchinsü nanoula jee natütüleʼerüin waaʼin. Choʼujaapejeʼe watütüleʼerüinjatüin naaʼin jee wojuʼitüin namaa sünain aküjaa pütchi. Talatüsü naaʼinya nounejaanüle sünain ekawaa, yootoo jee ashaittaa. Eeshii ayuuire naya jee chale naya pitaaraluʼu. Wanaʼlaa namüin ayuuire naya jee wakaaliinja naya. Aaʼinmajünüshi Pablo namaa na nümaajanakana nutuma Lucas, chi tottoot ashajakai tü karalouktakat Aluwataaushikana (Col. 4:14; Aluw. 20:5–21:18).

¹⁴ Chi wawala alapalaakai waaʼu sümaa tü nuʼwayuusekat, choʼujaasü namüin alinjanain naya napüla na naʼaleewainkana jee natütüleʼerüin naaʼin. Müshi wanee wawala alapalaakai waaʼu: «Nayaawata aaʼu na taʼaleewainkana mojule taaʼin. Sutuma nasakiijüin taya, taküjüin namüin tü alatakat tamüin. Akatchinraasü taaʼin sutuma jülüjüin naaʼin tü tanüikikat». Talatüsü naaʼin naya wawalayuukana sutuma jülüjüin naya waaʼin.

15, 16. (1) ¿Kasa naʼyataaka apüla na weteliitakana jee na suluʼukana tü Piichi süpülajatkat tü Outkajawaakat Miyoʼu? (2) ¿Kasa waaʼinrajatka süpüla wakaaliinjüin naya wawalayuukana?

¹⁵ Na wawalayuu suluʼukana Weteet jee suluʼu tü Piichi süpülajatkat tü Outkajawaakat Miyoʼu, aʼyataashii naya süpüla süküjünajatüin maʼin tü pütchi anasükat. Eere weteliita eere woutkajaain, ¿kasa waaʼinrajatka süpüla weeʼiyatüin nojutü?

¹⁶ Nantapa suluʼumüin Weteet, eesüjaʼa süpüla mojuin naaʼin sutuma wattain naya noulia napüshi jee naʼaleewainyuu. Talateerü naaʼin müleka talatuukale amaa naya suluʼu Weteet jee suluʼu tü outkajaaleekat (Mar. 10:29, 30). Oʼunawaishii naya semaanawai sünain tü outkajawaakat jee sünain aküjaa pütchi. Eesüjaʼa kapüleere namüin naainjüin tia wainmale naʼyataain. Makalaka anain kojutüle naya jümüin jee kojutüin jümüin tü naʼyataainkat. ¡Jalia mojujayaai jünüiki nachiki! (paashajeʼera 1 Tesalónica 2:9).

17, 18. ¿Kasa naainjaka na wawalayuu aʼyataakana waneepia nümüin Jeʼwaa suluʼu wanee mma naatajatü?

¹⁷ Eeshii na wawalayuu akolojookana suluʼumüin wanee maa naatajatü. Ekirajaainjana  naya sünain anüikii naatajatü, neküinjatü joo tü eküülü ekünakat chayaa jee kiʼrainjatü namüin tü akuwaʼipaa nnojotkat nakuwaʼipain. ¿Jamüshii nakolojooka wattamüin? ¿Kasa naaʼinraka chayaa?

¹⁸ Eeshii eekai misioneeroin jee aküjüshii pütchi waneepia. Atüjüshii na wawalayuukana nanainjee. Awalaajünüsü piichi napüla jee asülajünüsü namüin suluʼujee Weteet tü süliainjatkat tü kasa choʼujaakat namüin. Eeshii na ounejaanakana suluʼumüin Weteet jee süpüla nakaaliinjüin sünain akumajaa wanee Weteet jeketü, Piichi Eere Sülatinnüin Pütchi, Piichi Outkajaalee jee Piichi süpülajatka tü Outkajawaakat Miyoʼu. Tü kasa choʼujaakat namüin maʼaka saaʼin eeinjanale natunküin, tü neküinjatkat, aapünüsü namüin chaa suluʼu Weteet jee nayale aapüin na wawalayuu nantakana amaʼanamüin. Oʼunawaishii naya sünain tü outkajawaakat, sünain aküjaa pütchi namaa na wawalayuukana maʼaka naainjüin shia na weteliitakana jee talatüshii na wawalayuukana namaa.

19. ¿Kasa waaʼinrajatka süpüla sotuin waaʼin na wawalayuu aʼyataakana waneepia nümüin Jeʼwaa woumainpaʼa?

¹⁹ ¿Kasa waaʼinrajatka süpüla kojutüin wamüin na wawalayuu aʼyataakana waneepia nümüin Jeʼwaa woumainpaʼa? Nnojorüle nekaajüin wanee eküülü, jülüjeesü waaʼin tia wounejaapa naya sünain ekawaa. Eeshii süpüla wasakirüin naya kasain nekeein amüin jee kasain nnojoluin nekaajüin. Nnojo waashichijaain namüin isale nachiki tü wanüikikat jee nnojorüle kiʼrain naya sünain tü wakuwaʼipakat. Süka nnojoleerüin nayaawatamaatüin aaʼu jamaluʼuluin tü pütchi waküjakat namüin, wakaaliinja naya sünain jamüin süküjia wanee pütchi wayuunaikiruʼu. Soteesü waaʼin natüjeein süpüleerua tü wanüikikat.

20. ¿Kasa waaʼinrajatka süpüla wakaaliinjüin na aʼyataakana waneepia nümüin Jeʼwaa jee wakaaliinjüin nashi sümaa nei?

²⁰ Eeshi chi kakaliaichikai maʼin aʼyataain waneepia nümüin Jeʼwaa, akaisaʼa nuuʼulaainjachin jooluʼu suulia tia süpüla naaʼinmajüin nüshi jee nii. Nunoujüle nüshi sümaa nii, eeshiijaʼa süpüla namüin: «Nnojo puuʼulaain suulia aʼyatawaa waneepia nümüin Jeʼwaa, ayata piʼyataain waneepia» (3 Juan 4). Na nachonniikana, nachajaweerü sukuwaʼipa süpüla nakaaliinjüin naya jee nawaraijaain naaʼu. Na wawalayuu kepiakana pejepünaa nünain nashi sümaa nei, nakaaliinjüinjana naya müleka choʼujaale kasa namüin. Jülüjeesü waaʼin naküjüin maʼin pütchi jee nekirajüin maʼin wayuu naya wawalayuukana (Mat. 28:19, 20). Laülaayuule jee ayuuire nashi sümaa nei, aneerü naaʼin müleka kaaliinre naya püpüla.

21. ¿Jamüsü nanüiki na aʼyataakana waneepia nümüin Jeʼwaa wakaaliinjüle jee watütüleʼerüle naaʼin?

²¹ Eeshii na aʼyataakana waneepia shiiʼiree washireein naya. Akanasaʼa na aʼyataakana waneepia nümüin Jeʼwaa, aʼyataashii süka alin napüla Jeʼwaa otta na wayuukana. Nnojotsü shiain shiiʼiree washirüinjanain naya. Talatüsü naaʼin müleka wakaaliinjüle naya. Anuu sünüiki wanee wawala aküjüsü pütchi suluʼu wanee maa naatajatü: «Nashajüle karaloukta tamüin na tawalayuukana, talatashaatasü taaʼin, teʼrüin alin taya napüla sümaa kojutüin namüin tü taʼyataainkat».

22. ¿Jamüsü pünüiki süchiki tü aʼyatawaakat waneepia nümüin Jeʼwaa?

²² Na aʼyataakana waneepia nümüin Jeʼwaa, naneeküin wanee akuwaʼipaa anashaatasü. Watta saalii tü kasa natüjakalü apüleerua otta shieerü nakuwaʼipaka tia suluʼupa naya tü mma jeketüinjatkat. Wakaaliinja na wawalayuu aʼyataakana waneepia nümüin Jeʼwaa jee kojuta wamüin waneepia tü naʼyataainkat jee tü kasa anasü naainjakat (1 Tes. 1:3, NM).