1 Samuel 7:1-17
7 Upémarõ, umi hénte oikóva Quiryat-Jearímpe ou ogueraha Jehová árka Abinadab rógape,+ oĩva sérrope. Ha haʼekuéra oiporavo itaʼýra Eleazárpe oñatende hag̃ua Jehová árkare.
2 Upéi ohasáma 20 áño ojegueru hague Ñandejára árka Quiryat-Jearímpe, ha umi israelita oñepyrũ oñemoag̃ui jey Jehováre.+
3 Ha Samuel heʼi umi israelítape: “Oiméramo peñemoag̃ui jey Jehováre pende pyʼaite guive,+ peipeʼa vaʼerã pende apytégui umi dios extranhéro raʼanga,+ ha Astoret estatuakuéra.+ Jehovápe añoite peadora vaʼerã. Peservi chupe pene korasõ mbytete guive, ani peduda ni michĩmi.+ Upéicha haʼe pendesalváta umi filistéogui”.+
4 Upémarõ umi israelita ohundipa umi Baal ha Astoret estatuakuéra, ha oservi Jehovápe añoite.+
5 Upéi Samuel heʼi unos kuánto kuimbaʼépe: “Pembyaty entéro Israelguápe Mizpápe,+ ha upépe che añemboʼéta Jehovápe penderehehápe”.+
6 Upémarõ umi israelita oñembyaty Mizpápe. Ohechauka hag̃ua hikuái oñembyasyha, upe díape ndoʼúi mbaʼevete.+ Avei onohẽ y pósogui ha oñohẽ Jehová renondépe,* ha heʼi hikuái: “Ore ropeka Jehová kóntrape”.+ Ha Samuel oservi de hués+ umi israelítape Mizpápe.
7 Umi filisteo oikuaávo haʼekuéra oñembyatyha Mizpápe, umi governánte filisteo+ oho odesafia chupekuéra oñorairõ hag̃ua. Umi israelita oikuaávo upéva, opyta okyhyjeterei.
8 Upémarõ umi israelita heʼi Samuélpe: “Por favór, esegíkena eñemboʼe Ñandejára Jehovápe ñanepytyvõ hag̃ua.+ Ejeruréna chupe tañandesalvami umi filistéogui”.
9 Upéi Samuel ojagarra peteĩ ovecha raʼy, ojuka ha omeʼẽ ofrénda ojehapypaitévaramo+ Jehovápe. Samuel ojerure asy Jehovápe oipytyvõ hag̃ua Israélpe, ha Jehová ohendu iñemboʼe.+
10 Samuel ojapo aja pe ofrénda ojehapýva, umi filisteo ou oñorairõ hag̃ua Israel ndive. Péro Jehová oipytyvõ umi israelítape ogana hag̃ua, oñepyrũ osunu hatãiterei+ ha sarambi ojapo umi filistéore+ ha operde hikuái.+
11 Upémarõ umi israelita osẽ Mizpágui ha omuña umi filistéope. Ohundi ohóvo chupekuéra, og̃uahẽ meve Bet-Car sur gotyo.
12 Ha Samuel ojagarra peteĩ ita+ ha omoĩ Mizpá ha Jesaná mbytépe. Haʼe ombohéra upe monuméntope Ebenézer,* ha heʼi: “Jehová koʼág̃a ñanepytyvõ jeýma yma guaréicha”.+
13 Péicha umi filisteo opyta Israel poguýpe ha haʼekuéra ndojagarravéi Israel território.+ Samuel oikove aja Jehová osegi okastiga umi filistéope.+
14 Ha umi filisteo omeʼẽ jey Israélpe umi siuda oipeʼa vaʼekue chugui. Péicha Israel orrekupera jey iterritório Ecrón guive Gat peve.
Ha Israel oiko pyʼaguapýpe umi amorreo ndive.+
15 Ha Samuel osegi ohusga Israélpe oikove aja pukukue.+
16 Káda áño haʼe oviaha jepi ohusga hag̃ua Betel,+ Guilgal+ ha Mizpápe.+
17 Péro upéi oho jey hógape oĩva Ramápe,+ ha ohusga upépe umi israelítape. Upe lugárpe Samuel omopuʼã peteĩ altár Jehovápe.+
