2 Reyes 9:1-37
9 Upéi Eliseo ohenói peteĩva umi proféta raʼykuérape ha heʼi chupe: “Eñapytĩ nde ao nde kuʼáre ha pyaʼe ejagarra ko aséite ryru ha tereho Ramot-Galaádpe.+
2 Reg̃uahẽ vove upépe eike pe kotýpe ha ehenói Jehúpe,+ haʼe oĩ hína umi kuimbaʼe* omoakãvandi pe ehérsito. Ha toho nendive pe koty fondopeguápe, mombyry umi oĩhágui.
3 Upéi ejagarra pe aséite ryru ha eñohẽ iñakãre, ha ere chupe: ‘Péicha heʼi Jehová: “Che romoĩ* rréiramo Israélpe”’.+ Upe rire pyaʼe porã esẽ pe kotýgui”.
4 Upémarõ pe proféta osẽ oho Ramot-Galaádpe.
5 Og̃uahẽrõ guare, umi kuimbaʼe omoakãva pe ehérsito oguapy hína kuri upépe. Pe proféta heʼi: “Aguereko peteĩ mensáhe ndéve g̃uarã che ruvicha”. Ha Jehú oporandu: “¿Mavaitévape g̃uarã piko hína?”. Haʼe heʼi: “Ndéve g̃uarã che ruvicha”.
6 Upémarõ Jehú opuʼã ha oike pe óga ryepýpe, ha pe proféta oñohẽ iñakãre pe aséite ha heʼi chupe: “Péicha heʼi Jehová Israel Jára: ‘Che ronombra rréiramo regoverna hag̃ua Jehová puévlo Israélpe.+
7 Rehundi vaʼerã nde ruvicha Acab rogayguápe, ha che añevengáta Jezabel rehe oñohẽ haguére che profetakuéra ruguy, ha enterovete umi ótro Jehová siervokuérare ojuka vaʼekuére.+
8 Ha ahundíta kompletoite Acab rogayguápe, ahundíta enterovete kuimbaʼe* Acab familiarégui, umi iñarruinadovéva ha ikangyvéva jepe Israélpe.+
9 Ajapóta Acab rogayguáre ajapo haguéicha Nebat raʼy Jeroboán rogayguáre,+ ha ajapo haguéicha Ahíya raʼy Baasá rogayguáre.+
10 Ha Jezabel rehe katu haʼe heʼi umi jagua hoʼutaha chupe Jezreel yvýpe,+ ha avave noñotỹmoʼãiha chupe’”. Upéi pe proféta oavri pe okẽ ha osẽ odipara.+
11 Jehú osẽ jeýrõ guare oĩháme umi ótro kuimbaʼe omoakãva pe rréi ehérsito, haʼekuéra oporandu chupe: “¿Trankilopánte piko? ¿Mbaʼéreiko ou ne rendápe pe tavyrón?”. Haʼe heʼi chupekuéra: “Peẽ ningo peikuaa koʼãichagua kuimbaʼe vyroreínte voi heʼiha”.
12 Péro haʼekuéra heʼi: “¡Ani ndejapu! Emombeʼu katu oréve”. Upépe Jehú omombeʼu chupekuéra mbaʼépa heʼi pe kuimbaʼe. Ha omombeʼu avei mbaʼépa heʼive chupe: “Péicha heʼi Jehová: ‘Che ronombra rréiramo regoverna hag̃ua Israel’”.+
13 Upépe káda uno pyaʼe porã ojagarra ijao ha oipyso umi grádape henonderãme+ ha ombopu hikuái umi turu, ha heʼi: “¡Jehúgui oiko rréi!”.+
14 Upéi ñemihaitépe Jehú+ opuʼã Jehoram rehe.
Jehoram ha kompletoite Israel ehérsito odefende hína kuri Ramot-Galaad,+ rréi Hazael+ de Síriagui.
15 Upe rire rréi Jehoram oho jey Jezreélpe+ ojerrekupera hag̃ua ijerídagui, pórke umi sirio ojapi kuri chupe oñorairõrõ guare rréi Hazael de Siria kóntrape.+
Upéi Jehú heʼi: “Peiméramo che ládo,* aníke peheja avave osẽ pe siudágui okañy hag̃ua ha oho Jezreélpe omombeʼu la oikóva”.
16 Upémarõ Jehú ojupi ikárro de gérrape ha oho Jezreélpe, pórke Jehoram oñeno hína kuri upépe pe ijerída káusare, ha rréi Ocozías de Judá ovahea kuri ohecha hag̃ua Jehorámpe.
17 Pe guárdia oñatendéva pe siudáre oñemboʼy hína kuri Jezreel tórre ári, ha ohecha oñemoag̃uimbaitemaha oúvo atyraite kuimbaʼe Jehúndi. Ha ensegída heʼi: “Ahecha atyraite kuimbaʼe oúva hína”. Ha Jehoram heʼi: “Emondo peteĩ soldádo kavaju arigua tohug̃uaitĩ ha teʼi chupe: ‘¿Reju piko hína pyʼaguapýpe?’”.
18 Upémarõ peteĩ soldádo kavaju arigua oho ohug̃uaitĩ chupe ha heʼi: “Péicha heʼi pe rréi: ‘¿Reju piko hína pyʼaguapýpe?’”. Péro Jehú heʼi chupe: “¿Nde piko mbaʼe reñeʼẽta chéve pyʼaguapýre? ¡Ehasa katu che atukupe gotyo ha eju che rapykuéri!”.
Upépe pe guárdia oñatendéva pe siudáre heʼi: “Pe mensahéro ningo ohug̃uaitĩ chupekuéra péro ndouvéi”.
19 Upémarõ omondo jey ótro soldádo kavaju arigua, ha oho ohug̃uaitĩ chupekuéra ha heʼi: “Péicha heʼi pe rréi: ‘¿Reju piko hína pyʼaguapýpe?’”. Péro Jehú heʼi chupe: “¿Nde piko mbaʼe reñeʼẽta chéve pyʼaguapýre? ¡Ehasa katu che atukupe gotyo ha eju che rapykuéri!”.
20 Upépe pe guárdia oñatendéva pe siudáre heʼi: “Pe mensahéro ohug̃uaitĩ chupekuéra péro ndouvéi, ha pe oúva omaneha lája pe kárro ojogua Jehúpe, haʼéva Nimsí niéto,* pórke itarovávaicha voi omaneha”.
21 Ha Jehoram heʼi: “¡Ejokua ñandéve pe kárro de gérra!”. Upémarõ ojokua chupe hikuái ikárro ha Jehoram rréi de Israel ha Ocozías+ rréi de Judá, osẽ káda uno ikárrope ohug̃uaitĩ hag̃ua Jehúpe. Haʼekuéra ohug̃uaitĩ chupe pe jezreelita Nabot yvýpe.+
22 Jehoram ohechamírente Jehúpe, heʼi chupe: “Jehú, ¿reju piko hína pyʼaguapýpe?”. Péro haʼe heʼi: “¡Mbaʼe pyʼaguapy piko oĩta nde sy Jezabel hekovai*+ ha ojapo aja oikóvo heta paje!”.+
23 Upepete Jehoram ombojere ikárro odipara hag̃uáicha, ha heʼi Ocozíaspe: “¡Ocozías, ñanetraisiona hikuái!”.
24 Jehú katu ojagarra hiʼárko ha ojapi Jehorámpe ilómo mbytetépe ha pe flécha ovandea ha osẽ ikorasõ rupi. Ha haʼe hoʼa omano ikárrope.
25 Upéi Jehú heʼi iñajudánte Bidcárpe: “Ehupi chupe ha egueraha emombo pe jezreelita Nabot yvýpe.+ Nemanduʼáke: ñande jaha vaʼekue oñondive kárrope Acab rapykuéri Jehová heʼírõ guare koʼã mbaʼe ikóntrape:+
26 ‘Jehová heʼi: “Kuehe ahecha Nabot ha itaʼyrakuéra ojejuka hague”.+ Ha Jehová heʼi avei: “Che ahura ndéve repagataha+ pe rejapo vaʼekuére ko yvýpe”’. Upévare ehupi ha egueraha emombo chupe upe yvýpe, Jehová heʼíma haguéicha”.+
27 Rréi Ocozías+ de Judá ohechárõ guare la oikóva, okañy ha oho pe tape ohasávare pe hardín* guasúrupi. (Upe rire Jehú omuña avei chupe ha heʼi: “¡Pejuka avei chupe!”. Upémarõ ojapi chupe hikuái ikárrope oarrivakuévo Gúrpe, oĩva Ibleam+ ypýpe. Péro haʼe osegi oho Meguidó peve ha omano upépe.
28 Upémarõ isiervokuéra ogueraha chupe ikárrope Jerusalénpe, ha oñotỹ chupe isepultúrape ituakuéra ypykuéndi pe Siuda de Davídpe.+
29 Ocozíasgui+ oiko vaʼekue rréi Judápe, 11 áño ogoverna haguépe Jehoram, Acab raʼy).
30 Jehú og̃uahẽrõ guare Jezreélpe,+ Jezabel+ oikuaa upéva. Upémarõ haʼe oñemakilla ha opinta hesa,* oarregla iñakãrangue ha oñemoĩ omaña yvy gotyo iventána guive.
31 Ha Jehú oikévo pe okẽrupi, haʼe heʼi chupe: “¿Osẽ porãmba piko rakaʼe Zimrípe ojukárõ guare huvichápe?”.+
32 Ha Jehú omañávo yvate, pe ventána gotyo, heʼi: “¿Mávapa oĩ che ládope? ¿Mávapa?”.+ Upepete mokõi térã mbohapy ofisiál palasiopegua omaña yvy gotyo hese.
33 Jehú heʼi: “¡Peity chupe upégui!”. Upémarõ haʼekuéra oity chupe, ha hoʼávo pe huguykue ohypyipa pe pare ha umi kavaju. Upéi Jehú omopyrũmbaite hese ikavajukuéra.
34 Upe rire haʼe oike okaru ha hoʼu víno. Upéi haʼe heʼi: “Peñenkargána ko kuña desgrasiádare ha tapeho peñotỹ chupe. Amo ipahápe ningo haʼe peteĩ rréi rajy hína”.+
35 Péro ohórõ guare hikuái oñotỹ hag̃ua chupe, otopántema iñakãngue, ipo ha ipykue.+
36 Upéi ou jeýrõ guare hikuái ha omombeʼu Jehúpe, haʼe heʼi: “Oñekumpli Jehová heʼi vaʼekue+ isiérvo Elías pe tisbita rupive, heʼírõ guare: ‘Umi jagua hoʼúta Jezabélpe Jezreel yvýpe,+
37 ha Jezabel retekue isarambíta Jezreel yvy tuichakuére animál rekakáicha, ani hag̃ua voi avave heʼi: “Kóva hína Jezabel”’”.
Nóta
^ Hebréope: “iñermanokuéra”.
^ Hebréope: “oimeraẽ okuarúva parére”. Péicha ojeʼe hebréope ojeapoʼi hag̃ua umi kuimbaʼépe.
^ Térã: “Pene álma oĩramo de akuérdo”.
^ Hebréope: “raʼy”.
^ Térã: “idolatría”.
^ Hebréope: “kása hardín”.
^ Térã: “opinta hesa hũme”.
