Jeremías 19:1-15
19 Péicha heʼi Jehová: “Tereho ha ejogua peteĩ kambuchi peteĩ alfarérogui.+ Upéi egueraha nendive unos kuánto kuimbaʼe omoakãva* pe puévlo ha unos kuánto omoakãva umi saserdótepe,
2 ha tereho pe lugár héravape Hinón Raʼy Ñu,+ pe Alfaréro Rokẽ* entrádape. Ha upépe emombeʼu umi mbaʼe haʼéva ndéve.
3 Ere vaʼerã: ‘Pehendu Jehová ñeʼẽ, peẽ Judá rreikuéra ha peẽ peikóva Jerusalénpe. Péicha heʼi Israel Jára Jehová, umi ehérsito yvagapegua ruvicha:
“Agueru potaite hína peteĩ sarambi guasu ko lugárpe, ha oimeraẽ ohendúva oiko hague upéva opytáta ijapysa ryapupa.
4 Péicha oikóta hesekuéra chereja haguére,+ ha ojapo haguére ko lugárgui peteĩ lugár ni che ndaikuaavéimava.+ Upépe haʼekuéra ojapo hína sakrifísio umi ótro dióspe, umívape ndoikuaái haʼekuéra ni umi ituakuéra ypykue ni umi rréi de Judá, ha omyenyhẽ ko lugárpe umi inosénte ruguykue.+
5 Omopuʼã umi lugár yvate oadora hag̃ua Baálpe, ha ohapy hag̃ua itaʼyrakuérape ofrénda ojehapypaitévaramo Baálpe,+ upéva che namandái ni ndaʼéi vaʼekue chupekuéra ojapo hag̃ua, ha núnka ndarekói vaʼekue che pyʼapýpe upéva”’.*+
6 ‘Jehová heʼi: “Upévare og̃uahẽta hína umi día ndojeʼemoʼãveimaha pe lugár rehe Tófet ni Hinón Raʼy Ñu,* síno Ñu Ojeporojukaha.+
7 Ko lugárpe napermitimoʼãi osẽ porã mbaʼeve Judá ha Jerusalénpe, ha ahejáta iñenemigokuéra ojuka chupekuéra espádape ha avei ahejáta ohundi chupekuéra umi oikóva ojukase chupekuéra.* Ha umi heʼonguekuéra opytáta umi guyra ha umi animál salváhe ko yvy arigua rembiʼurã.+
8 Umi hénte okyhyjeterei ha oñakãmbovaváta* ohechávo umi mbaʼe ajapóva ko siudáre. Ha entéro ohasáva upérupi omañáta hese, ijurujáita opytávo, ha oñakãmbovaváta ohechávo entéro umi mbaʼe vaiete oikóva hese.+
9 Ha ahejáta chupekuéra hoʼu itaʼýra ha itajýra roʼokue, ha hoʼúta avei umi hapicha roʼokue, pórke isiudakuéra oñemongoráta ha ojedesesperáta hikuái ohechávo umi iñenemígo ha umi ojukaséva* omongoraha chupekuéra”’.+
10 Upéi ejoka pe kambuchi umi kuimbaʼe ohóva nendive renondépe,
11 ha ere chupekuéra: ‘Péicha heʼi Jehová umi ehérsito yvagapegua ruvicha: “Péicha ahundíta ko puévlo ha ko siuda, ojejokaháicha peteĩ kambuchi ojapo vaʼekue peteĩ alfaréro ha upéi ndaikatuvéimava oñemyatyrõ. Ha Tófetpe oñotỹta hikuái umi omano vaʼekue, ndaiporivéi peve lugár oñeñotỹ hag̃ua chupekuéra”’.+
12 ‘Péicha ajapóta ko lugár rehe’, heʼi Jehová, ‘ha avei umi oikóvare pype, ikatu hag̃uáicha ko siuda ojogua Tófetpe.
13 Ha umi óga oĩva Jerusalénpe ha umi rréi de Judá rogakuéra opytáta ikyʼa ha ojoguáta Tófetpe.+ Péicha oikóta entéro umi ógare, pórke iterrásape oofrese hikuái sakrifísio entéro mbaʼe oĩvape yvágape+ ha oñohẽ hikuái ofrénda líkida umi ótro dióspe g̃uarã’”.+
14 Upéi Jeremías ou Tófetgui, upe lugár Jehová omondo haguépe chupe oprofetisa hag̃ua, ha oho oñemboʼy Jehová róga korapýpe ha heʼi pe puévlo kompletoitépe:
15 “Péicha heʼi Israel Jára Jehová, umi ehérsito yvagapegua ruvicha: ‘Aguerúta ko siudápe ha umi ipuevloʼi oĩvape ijerére entéro mbaʼe vai haʼe vaʼekue oikotaha hesekuéra, pórke haʼekuéra ikaprichóso ha ndojaposéi umi mbaʼe haʼéva’”.+
Nóta
^ Hebréope: “ansianokuéra”.
^ Ikatu avei: “pe Okẽ Hetahápe Tanimbu”.
^ Térã: “núnka ndoikéi vaʼekue chéve che akãme”.
^ Ehecha “Gehena” Diksionáriope.
^ Térã: “oheka hiʼalmakuéra”.
^ Hebréope: “oturuñeʼẽta”.
^ Térã: “ohekáva hiʼálma”.
