Josué 14:1-15
14 Péicha umi israelita ojagarra imbaʼerã pe yvy oñemeʼẽ vaʼekue chupekuéra Canaánpe. Upe yvy omeʼẽ chupekuéra erénsiaramo Eleazar pe saserdóte, Josué Nun raʼy, ha umi omoakãva Israel trívu asegún káda família.+
2 Upe yvy oñemeʼẽva erénsiaramo ojesortea vaʼekue oñemeʼẽ hag̃ua chupekuéra,+ péicha voi Jehová omanda vaʼekue Moiséspe ojejapo hag̃ua umi 9 trívu imédiope g̃uarã.+
3 Moisés omeʼẽma vaʼekue umi mokõi trívu imédiope iñerensiarã, pe yvy oĩva éste gotyo pe Jordángui,+ péro umi levítape nomeʼẽi iñerensiarã omeʼẽ haguéicha umi ótro trívupe.+
4 José familiarégui oiko vaʼekue mokõi trívu:+ Manasés ha Efraín.+ Péro umi levítape noñemeʼẽi ijyvyrã, oñemeʼẽnte chupekuéra umi siuda+ oiko hag̃ua ha umi pastoty oĩva pe siuda jerére hymbakuérape g̃uarã, ha opa mbaʼe orekóvape g̃uarã.+
5 Upémarõ umi israelita orreparti pe yvy Jehová omanda haguéicha Moiséspe.
6 Upéi unos kuánto kuimbaʼe Judagua oñemboja Josué rendápe Guilgálpe,+ ha upéi Caleb,+ Jefuné raʼy pe quenizita, heʼi chupe: “Nde ningo reikuaa porã mbaʼépa Jehová heʼi vaʼekue+ nderehe ha cherehe Moiséspe,+ Ñandejára siérvope, amo Cadés-Barnéape.+
7 Che areko vaʼekue 40 áño Jehová siérvo Moisés chemondórõ guare Cadés-Barnéagui avichea hag̃ua pe yvy.+ Ha aju jeýrõ guare amombeʼu porã chupe opa mbaʼe ahecha vaʼekue.+
8 Umi che ermanokuéra oho vaʼekue chendive katu omokangy pe puévlope, péro che ndajapói upéicha, pórke cheñeʼẽrendu Jehová che Járape che pyʼaite guive.+
9 Upe díape Moisés ohura vaʼekue heʼívo: ‘Nde ha ne familiakuérape ameʼẽta pe yvy repyrũ hague, ha opytáta peẽme g̃uarã erénsiaramo pára siémpre, pórke nde neñeʼẽrendu Jehová che Járape nde pyʼaite guive’.+
10 Ha Jehová opermiti gueteri chéve aikove+ opromete haguéicha,+ ha ohasáma 45 áño Jehová ojapo hague ko promésa Moiséspe, Israel okorrérõ guare oikóvo pe desiértore.+ Koʼág̃a aikove gueteri ha arekóma 85 áño.
11 Koestedía peve chembarete gueteri, chembarete haguéicha Moisés chemondórõ guare avichea hag̃ua pe yvy. Upe tiémpope guaréicha chembarete gueteri aha hag̃ua añorairõ ha ajapo hag̃ua oimeraẽ mbaʼe.
12 Upévare emeʼẽna chéve ko lugár oĩháme umi montañakuéra, upéva ningo Jehová oprometéma vaʼekue voi omeʼẽtaha ñandéve. Nde rehendu vaʼekue upe lugárpe oĩha umi anaquim,+ umi isiudakuéra katu tuichaicha ha umi imurallakuéra ijyvateterei,+ péro Jehová katuete oĩta chendive+ ha amosẽmbáta chupekuéra, Jehová opromete haguéicha”.+
13 Upémarõ Josué ovendesi Calébpe, Jefuné raʼýpe, ha omeʼẽ chupe Hebrón iñerensiarã.+
14 Upévare Hebrón opyta Calébpe iñerensiarã koʼag̃aite peve, pórke haʼe siémpre iñeʼẽrendu Jehová Israel Járape ipyʼaite guive. Haʼe hína Jefuné raʼy pe quenizita.+
15 Ymave Hebrón héra vaʼekue Quiryat-Arbá+ (Arbá haʼe vaʼekue pe kuimbaʼe tuichavéva umi anaquim apytépe). Ha péicha upe yvýpe noñorairõvéima hikuái.+
