Si. Ko múndo tuichakuére umi testígo de Jehová apytépe oĩ hetaiterei kuña opredikáva umi notísia porã oñeʼẽva Ñandejára Rréinore. Salmo 68:11 heʼi voi: “Jehová omeʼẽ pe mandáto, umi kuña opredikáva umi notísia porã, haʼe hína peteĩ ehérsito tuicháva”.

Péro la ojapóva umi kuña oĩva umi testígo de Jehová apytépe idiferentete umi ótra rrelihióngui. ¿Mbaʼépepa idiferénte hikuái?

Heta rrelihiónpe umi kuña omboʼe ha ogia jepi pe Iglésiape. Péro umi testígo de Jehová apytépe umi kuña opredika ha omboʼe umi ndahaʼéivape Testígo, tahaʼe ogahárupi térã oĩháme hénte.

Umi testígo de Jehová apytépe umi kuimbaʼénte ikatu omboʼe kongregasiónpe. Upévare umi kuña noporomboʼéi oñembyaty jave hikuái oĩramo peteĩ kuimbaʼe ojevautisáva ijapytepekuéra, ha upéva avei idiferentete heta rrelihióngui (1 Timoteo 3:2; Santiago 3:1).

La Biblia ohechauka porã kuimbaʼekuéraguinte ikatuha oiko ansiáno kongregasiónpe. Por ehémplo, Pablo omanda vaʼekue Títope ‘onombra hag̃ua umi ansiáno káda siudápe’, heʼi avei chupe ‘pe ansiánore ndojeʼéi vaʼerãha ikondúkta vaiha ha peteĩnte hembireko vaʼerãha’ (Tito 1:5, 6). Pablo oskrivi vaʼekue avei Timotéope: “Peteĩ kuimbaʼe oñehaʼãmbaitéramo oservi ansiánoramo, ojapose hína peteĩ mbaʼe iporãva. Pe ansiáno ikondúkta porã vaʼerã ani hag̃ua umi hénte oreko mbaʼeve ivaíva heʼi vaʼerã hese, peteĩnte hembireko vaʼerã, [...] ivale vaʼerã oporomboʼe hag̃ua” (1 Timoteo 3:1, 2).

¿Mbaʼérepa umi kuimbaʼégui añónte ikatu ansiáno? Pablo heʼi vaʼekue: “Che napermitíri umi kuña oporomboʼe ni omanda kuimbaʼére, síno opyta vaʼerã kirirĩháme. Pórke Ñandejára ojapo raẽ vaʼekue Adánpe, ha upéi Évape” (1 Timoteo 2:12, 13). Upéva ohechauka porã Ñandejára oipotaha kuimbaʼénte ogia ha omboʼe kongregasiónpe.

Enterove umi testígo de Jehová osegi pe ehémplo ohejáva chupekuéra ilíder Jesucristo. Lucas heʼi vaʼekue: “Jesús oho entéro umi siuda ha puevlokuérarupi opredika ha oikuaauka umi notísia porã oñeʼẽva Ñandejára Rréinore”. Upéi Jesús heʼi idisipulokuérape ojapo hag̃ua avei upéicha. “Upémarõ oho hikuái okorre entéro umi puévlorupi, omombeʼu umi notísia porã” (Lucas 8:1; 9:2-6).

Koʼág̃arupi entéro testígo de Jehová, tahaʼe kuimbaʼe térã kuña, ojapo ikatúva entéro okumpli hag̃ua pe profesía Jesús heʼi vaʼekue: “Umi notísia porã oñeʼẽva Ñandejára Rréinore oñemombeʼúta oparupiete ko yvy ape ári, upe mensáhe ojekuaa hag̃ua entéro tetãrupi, ha upéi og̃uahẽta pe fin” (Mateo 24:14).