Emotenonde umi mbaʼe iñimportantevéva. Filipenses 1:10 omeʼẽ ñandéve ko konsého: “Pehechakuaa mbaʼépa hína umi mbaʼe iñimportantevéva”. Ejapo peteĩ lísta emoĩháme umi mbaʼe rejapo vaʼerã. Oĩramo jepe heta mbaʼe iñimportánteva rejapo vaʼerã, elehi umíva apytégui mávapa iñimportanteve ha ejapo raẽ upéva.

Eplanea umi mbaʼe rejapótava. Eclesiastés 10:10 heʼi: “Pe hácha nahaimbéiramo ha péichante reipuru, hetaiterei regerreáta hese. Péro pe arandu ñanepytyvõ osẽ porã hag̃ua la traváho”. ¿Mbaʼépa heʼise upéva? Ko ehémplo ñanemboʼe ñaplanea porã vaʼerãha umi mbaʼe jajapótava ani hag̃ua japerde rei ñane tiémpo. Iporãta avei remboyketéramo umi mbaʼe naiñimportanteguasúiva ha hoʼu reíva ndehegui ne tiémpo ha ne enerhía. Péicha hembyvéramo ndéve tiémpo, ikatúma readelanta algúna kósa erekóva nde lístape. Replanea porãramo umi mbaʼe rejapótava rejoguáta pe kuimbaʼe ohaimbeʼe porãvape ihácha oñepyrũ mboyve ombaʼapo pórke reipuru porãta la ne tiémpo.

Ani eñekomplika rei. Ani reaseptánte ejapóvo umi kósa naiñimportanteguasúiva ha hoʼu reítava ndehegui ne tiémpo. Una vépente rejaposéramo hetaiterei mbaʼe rejestresa reíta ha nderevyʼamoʼãi.

Ani rejereterei rejapo hag̃ua la kósa. Eclesiastés 11:4 heʼi: “Pe oikóva okontrola pe yvytu, noñemitỹmoʼãi. Ha pe oikóva omañánte umi araíre, ndokosechamoʼãi”. ¿Mbaʼépa heʼise upéva? Peteĩ persóna ojeretereíva ojapo hag̃ua la kósa operdeterei itiémpo ha amo ipahápe ndojapói jey mbaʼeve. Ojoguáta peteĩ agrikultór oikóvape omaña pe tiémpore, ohóma rangue oñemitỹ térã omonoʼõ. Upéicha avei jaikóramo ñamakanea térã jaduda ijetuʼúta jadesidi porã hag̃ua. Añetehápe ningo oĩtante voi situasión tekotevẽtahápe ñainvestiga raẽ jadesidi mboyve peteĩ mbaʼe, la Biblia heʼi voi ‘pe iñarandúva opensa porãha ojapo mboyve álgo’ (Proverbios 14:15). Péro jareko vaʼerã avei enkuénta sapyʼánte jadesidíta jave álgo ndaikatumoʼãiha voínte jaikuaapa entéro umi detálle (Eclesiastés 11:6).

Ani neexihenteterei. “Pe persóna orekóva pe arandu oúva yvágagui, [térã Ñandejáragui] [...] noñemohatãi haʼe heʼívapente” (Santiago 3:17). Ndaivaíri ningo añetehápe jajapo porãse opa mbaʼe, péro ñaneexihentetereíramo ñahaʼarõta voi osẽ ñandéve perfékto jajapóva guive, ha upépe ñañedesepsionáta. Por ehémplo peteĩ persóna oñepyrũva oaprende peteĩ idióma oikuaa porã ojavytaha, ha upéva oipytyvõta chupe omehora hag̃ua. Péro peteĩ persóna okyhyjéramo ojavýrõ g̃uarã ijetuʼuvéta chupe oaprende hag̃ua upe idióma. Añetehápe, ñarrekonoséramo ñane límite ñasẽ porãvéta. La Biblia heʼi voi: “Umi orrekonoséva la ndaikatúiva ojapo iñarandu” (Proverbios 11:2, nóta). Umi persóna iñumíldeva ipochy rangue ojavy jave opukánte ijehe.

Embaʼapo ha epytuʼu mimi avei. Ñandejára Ñeʼẽ heʼi: “Iporãve repytuʼuʼimi, reiko rangue rejejuka traváhope. Péicha haʼete reikóva yvytu rapykuéri” (Eclesiastés 4:6). Oĩ ningo ojopyetereíva ha ojejukáva voi traváhope, ha upévare ja ndodisfrutavéima la ojapo vaʼekuégui. Ha ótro katu ohasáma la rrája ha iñateʼỹgui ni nombaʼaposevéima voi, ha péicha operde rei itiémpo. La Biblia katu ñanemokyreʼỹ ñandeguápo hag̃ua ha avei ñamboyke hag̃ua tiémpo ikatu hag̃uáicha jadisfruta umi mbaʼe jajapo vaʼekuégui. Upéva haʼe voi “peteĩ rregálo Ñandejára omeʼẽva” (Eclesiastés 5:19).

Eke porã. Peteĩ eskritór de la Biblia heʼi vaʼekue: “Aháta añeno ake pyʼaguapýpe” (Salmo 4:8). La majoría umi okakuaapámava oke vaʼerã 8 óra al díarupi ikatu hag̃uáicha orrekupera ifuérsa, oñeñandu porã ha orrendive. Jake ha japytuʼu porãramo jaipuru porã hína ñane tiémpo, pórke upéva ñanepytyvõ heta mbaʼépe. Por ehémplo, ikatu ñañekonsentrave, ñanemanduʼa porãve la kósare ha ñaaprende umi mbaʼe ipyahúva. Péro ndajakeporãirõ katu ipelígro ñañeaksidenta, jajavy meme ha ñandepirevai.

Ereko vaʼerã peteĩ ovhetívo ikatútava rehupyty. Eclesiastés 6:9 heʼi: “Ikuentave jadisfruta umi mbaʼe ikatúvare jahecha, jaiko rangue jaipota umi mbaʼe ndaikatumoʼãiva jahupyty”. ¿Mbaʼépa heʼise upéva? Peteĩ persóna iñarandúva ndoikomoʼãiha oñekonsentraiterei umi mbaʼe ndaikatumoʼãivare ohupyty. Upévare ndohejái ombotavy chupe umi propagánda ojeofresehápe pláta térã préstamo ndaikatumoʼãiva upe rire opaga. Upéva rangue, oñekontentánte umi mbaʼe orekóvare.

Ehecha mbaʼeichagua kualidápa ereko. Epensa mbaʼépa iñimportanteve ndéve g̃uarã. Remotenondéramo umi mbaʼe oĩ porãva upéva nepytyvõta redesidi porã hag̃ua ha reipuru porãvéta ne tiémpo. Umi kualida porã ñanepytyvõ avei jaikuaa hag̃ua mbaʼépa ñamotenonde vaʼerã ha jaaprovecha hag̃ua ñane tiémpo. ¿Mbaʼépa ñanepytyvõta jareko hag̃ua umichagua kualida? Heta persónape oipytyvõ la Biblia heʼíva, pórke orrekonose hikuái Ñandejára voi omoaranduha chupekuéra Iñeʼẽ rupive (Proverbios 2:6, 7).

Ehechauka vaʼerã eporohayhuha. Colosenses 3:14 heʼi: “Pe mborayhu oipytyvõ enterovépe oĩ hag̃ua unído oñondivepa”. Ndajaporohayhúiramo ndaikatumoʼãi ñañeñandu porã ni javyʼa, koʼýte ñande rogapýpe. Oĩ omotenondéva pe pláta térã ijestúdio, péro amo ipahápe ndovyʼái. Ndareíri ningo la Biblia hetaiterei vése oñeʼẽ pe mborayhúre, ha heʼi haʼeha pe kualida iñimportantevéva (1 Corintios 13:1-3; 1 Juan 4:8).

Eñemotiémpo eikuaa porãve hag̃ua Ñandejárape. Peteĩ karai hérava Geoff ohupyty vaʼekue heta mbaʼe porã hekovépe: oreko peteĩ família iporãitereíva, heta amígo ha peteĩ traváho porã. Upéicharõ jepe haʼe oñandu ofaltaha chupe álgo. Geoff ningo haʼe vaʼekue paramédiko, upévare pyʼỹinte ohecha vaʼekue mbaʼéichapa heta hénte osufri ha omano, upéicha rupi haʼe oikuaase vaʼekue upearãntepa jaikove. Péro peteĩ vuéltape olee unos kuánta puvlikasión ojapóva umi testígo de Jehová, ha oñekontesta chupe umi mbaʼe oikuaaséva.

Geoff omombeʼu hembireko ha ifamiliakuérape mbaʼépa oaprende kuri ha haʼekuéra avei oikuaaseve. Upémarõ ifamília kompletoite oñepyrũ ostudia la Biblia, upéva oipytyvõ chupekuéra oipuru porãve hag̃ua itiémpo ha ovyʼave hag̃ua. Ha ndahaʼéi voi upévante, síno omeʼẽ avei chupekuéra esperánsa oikovévo peteĩ múndo ndaiporimoʼãveimahápe sufrimiénto ni mbaʼeveichagua mbaʼe vai (Apocalipsis 21:3, 4).

Geoff experiénsia ñanemomanduʼa Jesucristo heʼi vaʼekuére: “Ovyʼa umi ohechakuaáva oikotevẽha Ñandejárare” (Mateo 5:3). ¿Emboykénepa nde avei michĩmi ne tiémpo reikuaa porãve hag̃ua Ñandejárape? Rejapóramo upéva rehechaukáta hína reipuru porãitereiha ne tiémpo.