Infórme omeʼẽva umi opredikáva umi notísia porã

Koʼág̃a ae isentído la hekove

JESÚS heʼi oikuaaha ijovechakuérape (Juan 10:14). Peteĩ persóna ikorasõ porãramo, ohayhúramo pe pyʼaguapy ha hustísia, oñemoag̃uiséta Jesús segidorkuérare. Ha peteĩ kuña Belgicagua heʼi haguéicha, hekove orekóta sentído. Jahechamína iñexperiénsia:

Haʼe heʼi: “Umi testígo de Jehová ohórõ guare ombota che róga rokẽ, che añedeprimiete kuri ha adesidíma ajesuisidataha. Haʼekuéra omombeʼu chéve mbaʼéichapa oñesolusionáta umi provlemakuéra ha upéva chegustaiterei. Péro omombeʼu chéve hikuái pe solusión odependeha Ñandejárare, ha upéva ndachegustái. Upérõ ojapóma kuri ocho áño che ndahavéi hague che iglésiape, pórke ndachegustái la tovamokõi ahecháva upépe. Añemeʼẽ enkuénta siertoha umi Testígo heʼíva chéve, ha arrekonose ijetuʼutaha jaiko Ñandejára reheʼỹ.

Ambyasyeterei ningo, péro umi Testígo chevisita rire unas kuánta vése, ndaikatuvéi añekomunika hendivekuéra. Añeñandu vaieterei kuri, apita 2 káha sigarríllo al día, inklusíve añepyrũ ajedroga. Upéi añentremetéma pe espiritísmore, añeʼẽségui che avuélo omano vaʼekue ndive. Upéva káusare aju heta che provléma, pyharekue aime jave cheañoite umi demónio cheatormenta. Heta mésere chembohasa asy hikuái. Upe tiémpope, og̃uahẽvo pe kaʼarupytũ akyhyjeterei ha naimeséi cheaño.

Peteĩ díape asẽ ajepasea, aha peteĩ tape normálmente ndahaihápe ha ag̃uahẽ oñemopuʼãhápe peteĩ lugár tuicháva. Añesorprende ahechávo ombaʼapoha upépe hetaiterei hénte. Añemoag̃uivévo añemeʼẽ enkuénta haʼeha hikuái testígo de Jehová, haʼekuéra omopuʼã peteĩ Salón del Reino. Upépe chemanduʼa umi Testígo ohórõ guare chevisita che rógape. Ha apensa mbaʼeichaitépa igústo vaʼerãmoʼã enterove ko múndope oikórire umi testígo de Jehová oikoháicha.

Aipotaiterei jey oho chevisita hikuái che rógape. Upémarõ añeʼẽ algúno ermáno oĩvandi pe lugárpe. Upéi añemboʼe Ñandejárape ha 10 día haguépe og̃uahẽ che rógape peteĩva umi ermáno añeʼẽ vaʼekuéndi. Heʼi chéve añepyrũ jey hag̃ua astudia la Biblia ha che vyʼápe aasepta. Ensegidamínte cheinvita aha hag̃ua umi rreunionhápe pe Salón del Réinope ha aasepta avei. Impresionánte la ahecha vaʼekue upépe, hetaite tiémporema che atopase persóna ovyʼáva, ojoayhúva ha asy peve atopa la aheka vaʼekue.

Upe guive aha káda rreunionhápe, 3 semána upe rire ndapitavéima, amombo umi lívro oñeʼẽva astrolohíare, umi dísko orekóva músika satánika ha umi demónio chereja trankíla. Añepyrũ ajapo umi mbaʼe aaprendéva la Bíbliagui ha 3 mése haguépe apredikáma umi notísia porã. Ajevautisa 6 mése rire a 2 día ajevautisa rire añepyrũ ajapo che prekursorádo auxiliár.

Aagradeseterei Jehovápe opa mbaʼe ojapo vaʼekuére cherehehápe. ¡Hasy peve isentído la che rekove! Añetehápe Jehová réra ningo peteĩ tórre isegúro porãva umi ihústova odipara upépe ojeprotehe hag̃ua (Proverbios 18:10). Añeñandu pe salmísta heʼi haguéicha Salmo 84:10-pe: ‘Che avyʼave un diami jepe aiméramo nde róga korapýpe, aiko rangue 1.000 día ótro lugárpe. Che aimeseve Ñandejára róga rokẽme, aime rangue umi iñañáva rógarupi’”.

Ko kuñakarai ipyʼaporãva hasy peve ovyʼa ha isentído la hekove. Upéicharõ, oimeraẽ persóna ikorasõ porãva ha ohayhúva Jehovápe, ovyʼáta ha hekove orekóta sentído.