Jahecháma haguéicha pe ótro artíkulope, Jesús opredika meme vaʼekue “umi marandu porã oñeʼẽva Ñandejára Rréinore” (Lucas 8:1). Haʼe ningo heta kilómetro oguata vaʼekue pe Israel tuichakuére oñeʼẽ hag̃ua Ñandejára goviérnore. Umi cuatro Evangéliope ningo oñemombeʼu Jesús rekovekue, ha umívape mas de 100 vése oñeñeʼẽ pe Rréinore. Ha umi pártepe, Jesús memete lénto pe oñeʼẽ vaʼekue upévare. Péro koʼãva ningo peteĩ ehémplonte, haʼéngo katuetei oñeʼẽvéne raʼe Ñandejára Rréinore oĩrõ guare ko yvy ape ári (Juan 21:25).

¿Mbaʼérepa iñimportantete raʼe Jesúspe g̃uarã Ñandejára Rréino? Pórke haʼe oikuaa Ñandejára oiporavóma hague chupe oservi hag̃ua rréiramo pe Rréinope (Isaías 9:6; Lucas 22:28-30). Péro Jesús ndojapói upéva orresiviségui pe podér ni oñemombaʼeguasu hag̃ua chupe (Mateo 11:29; Marcos 10:17, 18). Haʼe oikuaa porã ko goviérno rupive ojejapotaha heta mbaʼe porã Itúva ha entéro yvypóra iñeʼẽrendúva rehehápe. *

Jesús ningo ohayhu Itúvape ipyʼaite guive (Proverbios 8:30; Juan 14:31). Omombaʼeterei umi kualida porãite oguerekóva, por ehémplo mbaʼéichapa oporohayhu, oporoporiahuvereko ha ihústo (Deuteronomio 32:4; Isaías 49:15; 1 Juan 4:8). Upévare Jesús ipochy ojeʼe haguére Itúvare ndojepyʼapyiha yvyporakuérare osufri jave, ha ivaiveha katu, ojeʼe haʼe voi oporombohasa asyha. Jesús kyreʼỹme omombeʼu vaʼekue “umi marandu porã oñeʼẽva Ñandejára Rréinore” oikuaa porãgui upe Rréino añoite omopotĩtaha Itúva réra (Mateo 4:23; 6:9, 10). Péro, ¿mbaʼéichapa ojejapóta upéva?

Ko Rréino ojapóta heta kámbio ou porãtava yvyporakuérape. Por ehémplo, Jehová ‘omokãmbaitéta umi hénte resaykuéra’, oipeʼaitéta opa mbaʼe ñanembosufríva ha “ndaiporimoʼãvéima omanóva, oñembyasýva, hasẽva ni hasýva” (Apocalipsis 21:3, 4). Jaʼe porãsérõ g̃uarã, Ñandejára Rréino oipeʼáta opa mbaʼe ñanembohasa asýva ha javyʼáta opa árare. *

 Ko goviérno ohechaukáta Ñandejára imbaʼeporã ha ipoderosoha, ha péicha omopotĩta héra. ¡Ajeve voi ningo Jesús oñeʼẽ meme raʼe ko Rréinore! (Santiago 5:11.) Péro ko Rréino ojapóta avei heta mbaʼe porã umi hénte Jesús ohayhúva rehehápe. ¿Mávapa hína umíva? Umi hénte iñeʼẽrendúva guive Ñandejárape.

Ou mboyve ko yvy ape ári, Jesús oiko vaʼekue hetaiterei tiémpo Itúvandi yvágape. Ha oipytyvõ chupe ojapo hag̃ua opa mbaʼe, por ehémplo, umi estrélla, galaxiakuéra, ko ñane planéta porãite ha ñandéve avei (Colosenses 1:15, 16). Péro opa mbaʼe ojapo vaʼekue apytégui, Jesús ñandéve ñanderayhuve, jepe yvyporamínte ñande (Proverbios 8:31).

Upéicha rupi, Jesús kyreʼỹme osẽ vaʼekue opredika umi héntepe. Ha heʼi voi ou hague ko yvy ape ári ‘omombeʼu hag̃ua marandu porã’ umi oikotevẽvape (Lucas 4:18). Péro Jesús ndahaʼéi heʼínteva oporohayhuha, síno ohechauka avei upéva. Por ehémplo, ohechárõ guare umi hénte oñembyatyha ohendu hag̃ua chupe, “oiporiahuverekoiterei chupekuéra, ha omonguera umi hasývape” (Mateo 14:14). Ótra vuéltape katu, peteĩ kuimbaʼe hasy vaietereíva heʼi chupe: “Karai, nde reipotáramo ningo ikatu chemonguera”. Jesús ohayhu ha oiporiahuvereko rupi chupe, heʼi: “Si, romonguerase”, ha omonguera upe kuimbaʼépe (Lucas 5:12, 13). Ha peteĩ jey ohechárõ guare iñamíga María hasẽha omano haguére iñermáno Lázaro, Jesús “oñeñandu vaieterei” ha “hasẽ” voi; “oguapyeterei hese” upe oikóva (Juan 11:32-36). Upéi omoingove jey Lázarope, ojapóramo jepe 4 díama omano hague, ha péicha ojapo peteĩ milágro ijojahaʼỹva (Juan 11:38-44).

Jesús oikuaa porã umi milágro ojapóva ndoduramoʼãiha, oikuaa umi persóna omonguera vaʼekuépe hasy jeytaha ha umi omoingove jey vaʼekuépe omano jeytaha. Péro oikuaa avei umi mbaʼe ojapótava Ñandejára Rréino opytataha opa árare, ndahaʼemoʼãi sapyʼaiterãnte. Upévare haʼe ndahaʼéi ojapónteva umi milágro, síno oñemeʼẽmbaite “omombeʼu [hag̃ua] pe marandu porã oñeʼẽva Ñandejára Rréinore” (Mateo 9:35). Umi milágro Jesús ojapo vaʼekue, michĩmínte ohechauka umi mbaʼe ojapótava Ñandejára Rréino ko yvy ape ári. Jahechamína mbaʼépa heʼi la Biblia oikotaha upe goviérno poguýpe.

•  Ndaiporimoʼãvéima hasýva.

  ‘Upéramo umi ohechaʼỹva ohecháta, ha umi ohenduʼỹva ohendúta. Ndoguatáiva guasúicha odiparáta, ha iñeʼẽngúva vyʼágui osapukáita.’ Avei, upérõ “avave ndeʼimoʼãi: ‘Cherasy hína’” (Isaías 33:24; 35:5, 6).

• Ndaiporimoʼãvéima omanóva.

  “Umi hekojojávape oñemeʼẽta ko yvy, ha oikóta pype opa ára g̃uarã.” (Salmos 37:29, NM.)

  “Ñandejára oipeʼáta ñemano, noñemanomoʼãi arakaʼeve, opárupi omokãta tesay.” (Isaías 25:8.)

• Oñemoingove jeýta omano vaʼekuépe.

  ‘Opavave umi oĩva pe sepultúrape ohendúta iñeʼẽ ha osẽta.’ (Juan 5:28, 29.)

  Umi omanóvape “oñemoingove jeýta” (Hechos 24:15).

• Káda uno orekóta hogarã ha itravahorã.

  ‘Opavave ojogapóta ha oikóta imbaʼe teépe, oñotỹta parrál ha hoʼúta hiʼa. Ndaiporimoʼãi peteĩ ojogapóva ótro oiko hag̃ua pype, térã peteĩ oñemitỹva ótro hoʼu hag̃ua chugui. [...] Che siérvo ovyʼáta okarúvo hembiapokuégui.’ (Isaías 65:21, 22.)

•  Ndaiporimoʼãvéima oñorairõva.

  ‘Ñandejára ojoko opaichagua ñorairõ guasu oikóva ko yvy ape ári.’ (Salmo 46:9, ÑÑB.)

  “Nopuʼãmoʼãvéima ojuehe umi tetãnguéra, ha noñemboʼemoʼãvéima chupekuéra oñorairõ hag̃ua.” (Isaías 2:4, NM.)

• Ndofaltamoʼãi tembiʼu.

  ‘Ko yvy omeʼẽta hiʼa, ñande Ruete ñanderovasa porã haguére.’ (Salmo 67:6, ÑÑB.)

  ‘Ko yvy henyhẽta trígo raʼỹigui, ohupyty peve sérro ruʼã.’ (Salmo 72:16, ÑÑB.)

• Ndaiporimoʼãvéima imboriahúva.

  “Ñande Ruete ndahesaraimoʼãi imboriahúvagui.” (Salmo 9:18, ÑÑB.)

  “Haʼe onohẽta imboriahúvape [...] jejopy vaígui, ha oikotevẽvape ndorekóiva mamo oho hag̃ua. Oiporiahuverekóne imboriahúvape ha chupe onohẽne jejopy vaígui.” (Salmo 72:12, 13.)

¿Rehechakuaápa mbaʼérepa iñimportantete Jesúspe g̃uarã Ñandejára Rréino? Oĩ aja ko yvy ape ári haʼe omombeʼu vaʼekue ko notísia porã entéro umi ohendusévape chupe, oikuaágui ko Rréino añoite osolusionataha opaichagua provléma, ohechaukaháicha umi promésa jahecha vaʼekue.

¿Ndévepa ndegusta avei koʼã promésa ojapóva Ñandejára? Oiméramo upéicha, ¿mbaʼéichapa ikatu reaprendeve Ñandejára Rréinogui? ¿Mbaʼépa rejapo vaʼerã rehupyty hag̃ua koʼã mbaʼe porã? Umi ótro artíkulope oñembohováita koʼã porandu.