Be a ko jẹazọ̀n kleun de pọ́n ya? Vlavo a yawu jẹgangan sọmọ bọ a ko wọnji nujijọ lọ go. Ṣigba, nulẹ ma nọ yì domọ na nuhe dù okú mẹyiwanna de tọn. Doto Alan Wolfelt dọ to owe etọn Healing a Spouse’s Grieving Heart mẹ dọmọ: “E nọ vẹawu taun nado ‘duto’ awubla lọ ji.” Etomọṣo, e yidogọ dọmọ: “Dile ojlẹ lẹ to yìyì, awubla towe na wá depò po alọgọ mẹdevo lẹ tọn po.”

Di apajlẹ, lẹnnupọndo lehe tọgbo Ablaham yinuwa do ji to whenue asi etọn kú. Biblu dọ dọ, “Ablaham sọ wá nado blawu na Sala podọ nado viavi na ẹn.” E họnwun dọ e na ko biọ ojlẹ susu to Ablaham si nado duto awubla etọn ji. * Sọ lẹnnupọndo apajlẹ Jakọbu tọn ji, yèdọ mẹhe yin yẹdoklọ nado yise dọ gbekanlin de ko hù visunnu etọn Josẹfu. E blawu na “azán susu,” podọ hagbẹ whẹndo tọn etọn lẹ ma penugo nado miọnhomẹna ẹn. To owhe susu godo, okú Josẹfu tọn gbẹ́ to ahun ji na ẹn.​—Jenẹsisi 23:2; 37:34, 35; 42:36; 45:28.

To egbehe, nudopolọ wẹ gando susu mẹhe nọ nọ̀ aluẹmẹ na okú mẹvivẹ yetọn tọn wutu go. Pọ́n apajlẹ awe he bọdego ehelẹ.

• “Asu ṣie Robert kú to 9 juillet 2008. Afọnnu azán he gbè ehe jọ tọn ma gbọnvona azán he pò lẹ. To núdùdù afọnnu tọn godo, dile e ko yin aṣa mítọn do, whẹpo e do dedo azọ́nmẹ, mí donùnùgo na míde, gbò míde fán, bo dọ ‘n’yiwanna we’ na ode awetọ. To owhe ṣidopo godo, awufiẹsa he to ahun ṣie mẹ ma busẹ. N’ma lẹndọ n’sọgan wá duto awubla ehe ji gbede.”​—Gail, owhe 60.

• “Dile etlẹ yindọ e ko yì owhe 18 todin he asi yiwanna ṣie ko kú, n’gbẹ́ nọ jẹdò etọn bo nọ blawu. Whedepopenu he n’mọ nuhe yọ́npọ́n de, n’nọ flin in, podọ n’nọ to nulẹnpọn mapote do lehe onú enẹ na ko yọ́npọ́n na ewọ lọsu do ji eyin e gbẹ́ togbẹ̀ wẹ.”​—Etienne, owhe 84.

E họnwun dọ jọwamọnu de wẹ numọtolanmẹ awufiẹsa tọn he nọ dẹn-to-aimẹ enẹlẹ yin. Aliho voovo mẹ wẹ mí nọ blawu te, podọ e ma na yin nuyọnẹnnu nado nọ dawhẹna mẹdevo lẹ na aliho he mẹ yé yinuwa te to nugbajẹmẹji de whenu. To ojlẹ dopolọ mẹ, mí ma dona nọ dowhẹ míde eyin e wá taidi dọ mí to awubla zẹjlẹgo na okú mẹyiwanna de tọn. Nawẹ mí sọgan duto awubla ji gbọn?