Yé tọ́njẹgbonu to ajiji mẹ po wezun po bọ ofẹ̀n yetọn lẹ to núdọ! Osọ́ huhlọnnọ ẹnẹ lọ lẹ po mẹhe to yé kùn lẹ po hẹn nujijọ lọ jiawu sọmọ bọ e nọ taidi nujijọ he dọ̀n ayidonugo hugan to Biblu mẹ! Tintan lọ yin osọ́ wewe, bọ mẹhe to e ji yin ahọlu gigonọ de he ṣẹṣẹ mọ jẹgbakun yí. To godo etọn, osọ́ he tindo sinmẹ miyọ́nnọ de tọ́njẹgbonu bọ mẹhe to e ji to jijọho desẹ sọn aigba lẹpo ji. Osọ́ atọ̀ntọ de bọdego, bo diyuu taidi zinvlu, bọ mẹhe to e ji hẹn nujlẹgàn ovi awenọ de do alọ mẹ, ehe nọtena owẹ̀n awubla tọn gando whèdomẹ núdùdù dandan tọn lẹ go. Osọ́ ẹnẹtọ lọ yin awutunọ bo tindo sinmẹ wlanwlan, bo nọtena azọ̀nylankan po azọ̀n he nọ hẹn okú wá devo lẹ po, bọ Okú lọsu wẹ to e ji. Podọ Yọdò, yèdọ yọdò paa gbẹtọvi lẹ tọn to hihodo e pẹkipẹki, bo to mẹhe hù e te lẹ yí badabada!​—Osọhia 6:1-8.

“N’dibu whla tintan he n’hianu gando osọ́-kùntọ ẹnẹ lọ lẹ go. N’lẹndọ Whẹdazan ko sẹpọ bọ n’ma na luntọ́n, na n’ma ko wleawufo wutu.”​—Crystal.

“Numimọ omẹ voovo ẹnẹ he to osọ́ he tindo sinmẹ voovo lọ lẹ kùn lẹ tọn jiawu na mi. To whenue n’mọnukunnujẹ nuhe numimọ lọ zẹẹmẹdo mẹ, e họnwun na mi.”​—Ed.

Numọtolanmẹ mẹnu tọn wẹ a nọ tindo gando osọ́-kùntọ ẹnẹ Osọhia tọn lọ lẹ go? Crystal tọn kavi Ed tọn? To popolẹpo mẹ, aliho jiawu he mẹ osọ́-kùntọ lọ lẹ to wezunhọ̀n te yin dopo to nujijọ he yin yinyọnẹn hugan to owe Osọhia tọn he yin owe godo tọn Biblu tọn lẹ mẹ. Be a yọnẹn dọ nukunnumimọjẹ numimọ ehe mẹ sọgan hẹn ale wá na hiẹ lọsu ya? Gbọnna? Jiwheyẹwhe dopagbe dọ a sọgan mọ ayajẹ nujọnu tọn, eyin a hia nuhe yin kinkando owe dọdai tọn enẹ mẹ lẹ bo plọnnu sọn yé mẹ bosọ nọgbẹ̀ sọgbe hẹ yé.​—Osọhia 1:1-3.

Dile etlẹ yindọ numimọ osọ́-kùntọ ẹnẹ lọ lẹ tọn nọ dobuna mẹdelẹ, lẹndai etọn ma yin nado gbàhundona we. Na nugbo tọn, gbẹtọ livi susu lẹ wẹ ko mọdọ numimọ ehe hẹn yise yetọn lodo bo tlẹ na yé todido na sọgodo dagbe de. E sọgan yin nudopolọ na hiẹ lọsu! Jaale bo hia hosọ he bọdego.