“Aga wẹ nunina dagbe lẹpo gọna nunina pipé lẹpo nọ wá sọn bo nọ jẹte wá sọn Otọ́ hinhọ́n olọn tọn lẹ lọ dè.” (Jakọbu 1:17) Wefọ enẹ to alọdlẹndo alọtútlú Otọ́ mítọn olọn mẹ tọn Jehovah Jiwheyẹwhe tọn. Ṣigba, to nunina susu he Jiwheyẹwhe na gbẹtọvi lẹ mẹ, dopo tin he klohugan. Detẹ wẹ? Hogbe Jesu tọn he yin yinyọnẹn ganji he to Johanu 3:16 mẹ lẹ dọmọ: “Jiwheyẹwhe yiwanna aihọn lọ sọmọ bọ e namẹ Visunnu detọ́n dopo akàn etọn, na mẹdepope he do yise hia to ewọ mẹ ma nado yin vivasudo adavo nado tindo ogbẹ̀ madopodo.”

Visunnu detọ́n dopo akàn Jiwheyẹwhe tọn he e namẹ—wẹ yin nunina daho hugan he mí ko mọyi, na gbọn enẹ gblamẹ wẹ mí sọgan yin tuntundote sọn kanlinmọgbenu ylando, yọnho po okú po tọn si. (Salmu lẹ 51:5; Johanu 8:34) Mahopọnna vivẹnu depope he mí sọgan do, mílọsu lẹ ma gán penugo nado tún míde dote sọn kanlinmọgbenu enẹ. Ṣigba gbọn owanyi daho Jiwheyẹwhe tọn gblamẹ, ewọ wleawu tundote enẹ tọn. Gbọn Visunnu detọ́n dopo akàn etọn, Jesu Klisti ninamẹ taidi ofligọ de dali, Jehovah Jiwheyẹwhe na todido gbẹninọ kakadoi tọn gbẹtọvi tonusetọ lẹ. Amọ́, etẹwẹ ofligọ lọ yin taun? Naegbọn e do yin dandan? Podọ nawẹ mí sọgan mọaleyi sọn e mẹ gbọn?

Ofligọ yin ahọ́ de he nọ yin súsú nado fli nuhe ko yin hinhẹnbu de gọ̀ kavi tún nude dote sọn kanlinmọgbenu. Biblu dọ dọ mẹjitọ mítọn tintan lẹ, Adam po Evi po, yin didá matin ylando, po todido lọ po nado duvivi ogbẹ̀ tọn kakadoi to paladisi mẹ to aigba ji to pọmẹ hẹ kúnkan sọgodo tọn yetọn. (Jenẹsisi 1:26-28) E blawu dọ yé hẹn onú enẹ lẹpo bu, na yé de nado vẹtolina Jiwheyẹwhe bo gbọnmọ dali lẹzun ylandonọ. Etẹwẹ yin kọdetọn lọ? Biblu na gblọndo dọmọ: “Ylando gbọn mẹdopo gblamẹ biọ aihọn mẹ podọ okú gbọn ylando gblamẹ wá, gbọnmọ dali okú dlẹnkan jẹ mẹlẹpo dè, na yemẹpo wẹ ko waylando wutu.” (Lomunu lẹ 5:12) Kakati Adam ni jo ogú ogbẹ̀ pipé tọn do na kúnkan etọn, ylando po kọdetọn etọn he yin okú po wẹ e jodo na yé.

Nado wleawuna ofligọ de, nuhe yin hinhẹnbu lọ pẹpẹ wẹ dona yin súsú. To whenue Adam desọn ojlo mẹ bo vẹtolina Jiwheyẹwhe, e waylando bo hẹn ogbẹ̀ pipé gbẹtọvi tọn etọn bu. Sọgbe hẹ Biblu, enẹ wẹ zọ́n bọ kúnkan Adam tọn wá tin to kanlinmọgbenu ylando po okú po tọn. Enẹwutu, e biọ dọ ogbẹ̀ pipé devo—enẹ wẹ ogbẹ̀ Jesu tọn—ni yin zizejo taidi ofligọ de nado tún mí dote sọn kanlinmọgbenu. (Lomunu lẹ 5:19; Efesunu lẹ 1:7) Ahọ́ ofligọ tọn ehe he Jiwheyẹwhe gbọn owanyi dali sú wẹ hẹn ẹn yọnbasi na gbẹtọvi lẹ nado tindo todido lọ nado wá duvivi nuhe Adam po Evi po hẹnbu tọn—yèdọ ogbẹ̀ madopodo to paladisi mẹ to aigba ji.—Osọhia 21:3-5.

E họnwun dọ nuhe nunina Jiwheyẹwhe tọn he yin ofligọ lọ wadotana lẹ wẹ zọ́n bọ ogbẹ̀ madopodo do yọnbasi. Enẹwutu, enẹ wẹ yin nunina daho hugan lọ. Nado yọ́n nuhewutu enẹ do yin “nunina pipé” de, mì gbọ mí ni pọ́n lehe e sọgbe hẹ nuhe nọ gọalọna mí nado basi nunina họakuẹ lẹ, dile e ko yin hodọdeji to hosọ he wayi mẹ do.

E hẹn pekọ wá na nujlomẹ mítọn. Míwu gbẹtọvi lẹ tindo ojlo jọwamọ tọn lọ nado nọ to gbẹnọ zọnmii. (Yẹwhehodọtọ 3:11) Mílọsu lẹ ma penugo nado hẹn pekọ wá na ojlo enẹ, ṣigba ofligọ lọ hẹn ẹn yọnbasi na mí. Biblu dọmọ: “Na ale ylando tọn wẹ okú, ṣigba nunina he Jiwheyẹwhe nọ namẹ wẹ ogbẹ̀ madopodo gbọn Klisti Jesu Oklunọ mítọn dali.”—Lomunu lẹ 6:23.

E súdo nuhudo mítọn lẹ tọn. Gbẹtọvi lẹ ma sọgan wleawuna ofligọ lọ. Biblu basi zẹẹmẹ dọmọ: “Ofligọ-kuẹ lọ na ogbẹ̀ yetọn sù sọmọ  bọ e nọ zẹ̀ nugopipe yetọn go.” (Salmu lẹ 49:8) Enẹwutu, nado yin tuntundote sọn ylando po okú po si, mí tindo nuhudo alọgọ Jiwheyẹwhe tọn dandan. Ṣigba, “gbọn ofligọ he Klisti Jesu suahọ etọn nado tún mí dote lọ dali,” Jiwheyẹwhe wleawu nuhe sin hudo mí do tọn.—Lomunu lẹ 3:23, 24.

E yin nina to ojlẹ he sọgbe mẹ. Biblu dọmọ: “Dile mí gbẹ́ to ylandonọ yin, Klisti kú na mí.” (Lomunu lẹ 5:8) Na ofligọ lọ yin nina “dile mí gbẹ́ to ylandonọ yin” wutu, ehe do obá he mẹ Jiwheyẹwhe yiwanna mí jẹ hia, mahopọnna dọ mí gbẹ́ yin ylandonọ. Podọ e nọ na mí todido taun, dile etlẹ yindọ mí dona doakọnna kọdetọn ylando tọn lẹ todin.

E do mẹwhinwhàn dagbe podọ matin ṣejannabi hia. Biblu do nuhe whàn Jiwheyẹwhe nado na mí Visunnu etọn taidi ofligọ hia dọmọ: “Gbọn ehe dali wẹ owanyi Jiwheyẹwhe tọn ko yin didehia to whẹho mítọn mẹ, dọ Jiwheyẹwhe do Visunnu detọ́n dopo akàn etọn hlan aihọn mẹ, na mí nido sọgan mọ ogbẹ̀ gbọn ewọ gblamẹ. Ehe mẹ wẹ owanyi lọ te, e ma yindọ míwlẹ wẹ ko yiwanna Jiwheyẹwhe gba, ṣigba dọ ewọ wẹ yiwanna mí.”—1 Johanu 4:9, 10.

Nawẹ a sọgan dohia dọ a yọ́n pinpẹn nunina daho hugan lọ tọn gbọn? Flindọ hogbe Jesu tọn he to Johanu 3:16 mẹ lẹ dọ dọ mẹhe “do yise hia” to ewọ mẹ lẹ kẹdẹ wẹ na yin whinwhlẹngán. Sọgbe hẹ Biblu, yise yin “nukundido dejidego nuhe mí to todo lẹ tọn.” (Heblu lẹ 11:1) Nado tindo jidide mọnkọtọn, oyọnẹn he pegan yin dandannu. Enẹwutu, mí to tulina we nado dín whenu bo plọnnu gando Jehovah Jiwheyẹwhe go, yèdọ Mẹhe na mí “nunina pipé” ehe, podọ nado yọ́n nuhe a dona wà nado duvivi ogbẹ̀ madopodo he avọ́sinsan ofligọ Jesu tọn hẹn yọnbasi tọn.

A sọgan wà onú ehe lẹpo gbọn dogbigbapọnna nudọnamẹ sinai do Owe-wiwe ji he to nọtẹn Intẹnẹt tọn www.pr418.com ji lẹ dali. Homẹ Kunnudetọ Jehovah tọn lẹ tọn na hùn nado gọalọna we. Mí deji dọ dile a to nuplọn gando nunina daho hugan ehe go bo to ale mọyi sọn e mẹ, a na yin whinwhàn nado dọmọ: “Opẹ́ wẹ na Jiwheyẹwhe gbọn Jesu Klisti Oklunọ mítọn gblamẹ!”—Lomunu lẹ 7:25.