“Nawẹ Yẹn Na Dawhá Dẹnsọ?”

“Ṣo, whetẹnu wẹ awufiẹsa ehe na wá doalọte?” wẹ Jayne dọ po avi po. Azọ̀n kansẹẹ tọn he jẹ e te to gbigbayipe gbọn lanmẹ na ẹn. Lehe hẹnnumẹ etọn lẹ po họntọn etọn lẹ po na ko jlo nado hẹn azọ̀n ylankan enẹ gbọ bo doalọtena awufiẹsa etọn do sọ! Yé biọ to Jiwheyẹwhe si to odẹ̀ mẹ nado gọalọna ẹn. Be Jiwheyẹwhe na sè odẹ̀ yetọn ya? Be e tlẹ nọ hò mítọn pọ́n ya?

JIWHEYẸWHE yọ́n ninọmẹ gbẹtọvi lẹ tọn ganji. Ohó etọn Biblu dọmọ: “Nudida lẹpo wẹ to hunwẹn dopọ bo tin to awufiẹsa mẹ dopọ kakajẹ din.” (Lomunu lẹ 8:22, NW) Jiwheyẹwhe yọnẹn dọ gbẹtọ livi kanweko susu wẹ nọ mọ awufiẹsa egbesọegbesọ taidi Jayne, vlavo to agbasa-liho, to numọtolanmẹ-liho kavi to apọ̀nmẹ. E nọ mọ gbẹtọ livi 800 he nọ dọ́ huvẹ egbesọegbesọ lẹ, po livi susu devo he nọ jiya danuwiwa whégbè tọn lẹ po, gọna mẹjitọ susu he nọ hanú gando sọgodo po dagbemẹninọ ovi yetọn lẹ tọn po go. Be hiẹ ko kanse dewe pọ́n dọ Jiwheyẹwhe ka na dádo whẹho lọ mẹ to gbèdopo ya? Matin ayihaawe, to whenuena e yindọ mí nọ jlo nado gọalọna mẹyiwanna mítọn lẹ, be Jiwheyẹwhe ma na jlo nado gọalọna whẹndo gbẹtọvi tọn he yin nudida etọn lẹ ya?

Eyin hiẹ ko kàn kanbiọ mọnkọtọn lẹ sè dewe pọ́n, yọnẹn dọ mẹdevo lẹ nọ wàmọ ga. To nuhe hugan owhe 2600 lẹ die, dawe nugbonọ de he nọ yin Habbakuk tindo numọtolanmẹ dopolọ taidi mẹsusu to egbehe bo kanse Jiwheyẹwhe dọmọ: “OKLUNỌ E, nawẹ yẹn na dawhá dẹnsọ, bọ hiẹ ma na sè? Yẹn dawhá tọ́n hlan we sọn huhlọnnu mẹ, bọ hiẹ ma na whlẹngán gba. Etẹwutu wẹ hiẹ do ylanwa hia mi, bosọ hẹn mi nado pọ́n tasinyẹn? Na hẹngble po huhlọnnu po tin to nukọn ṣie: podọ nukọnwhlẹndomẹ tin finẹ, podọ nuwhlẹndomẹ sọ fọ́n daga.” (Habbakuk 1:2, 3) Habbakuk he yin yẹwhegán Heblu de mọ nuyiwa danuwiwa kanlinjọmẹ tọn lẹ po mẹgbeyinyan lẹ po to azán etọn gbè. To egbehe, linlin nuyiwa mọnkọtọn lẹ tọn wẹ mí nọ sè egbesọegbesọ, ehe nọ hẹn gbẹtọ homẹdagbenọ lẹ jẹflumẹ.

Be Jiwheyẹwhe yí nukun pẹvi do pọ́n ahunmẹdunamẹnu Habbakuk tọn lẹ wẹ ya? Lala. E dotoaina kanbiọ ahundopo tọn Habbakuk tọn lẹ bo miọnhomẹna ẹn bosọ na ẹn tuli to ayimajai etọn mẹ. Jehovah Jiwheyẹwhe dopà na Habbakuk dọ Emi na hẹn yajiji wá opodo bo gbọnmọ dali hẹn yise etọn lodo. Owẹ̀n Jiwheyẹwhe tọn he gọ́ na todido sọgan vọ́ jide na hiẹ lọsu ga, dile e wà na Jayne po whẹndo etọn po do. Hosọ he bọdego lẹ na na gblọndo kanbiọ ehelẹ tọn: Naegbọn mí sọgan deji dọ Jiwheyẹwhe nọ hò mítọn pọ́n nugbonugbo? Etẹwẹ Jiwheyẹwhe na wà nado hẹn yajiji wá opodo, podọ to whetẹnu?