Nugbo Kavi Lalo?

◼ Lalo: Sinsẹ̀n lẹpo wẹ Jiwheyẹwhe kẹalọyi.

Nugbo lọ die: Jesu dọmọ: “Eyin mì gbọṣi ohó ṣie mẹ, be devi ṣie wẹ mì yin nugbonugbo, mìwlẹ nasọ yọ́n nugbo lọ, nugbo lọ nasọ hẹn mì jẹ mẹdekannu.” (Johanu 8:31, 32, NW) Eyin sinsẹ̀n lẹpo wẹ Jiwheyẹwhe kẹalọyi, be hagbẹ yetọn lẹ na gbẹ́ tindo nuhudo nado yin hinhẹn jẹ mẹdekannu ya? Na nugbo tọn, Jesu plọnmẹ dọ omẹ vude poun wẹ to “aliho lọ he nọ planmẹ yì ogbẹ̀ mẹ” ji.—Matiu 7:13, 14, NW.

◼ Lalo: “Alẹnu Hoho” lọ masọ yọ́n-na-yizan na Klistiani lẹ ba.

Nugbo lọ die: “Owe-wiwe lẹpo wẹ yin gbigbọdo sọn Jiwheyẹwhe dè bo yin alenu.” (2 Timoti 3:16, 17, NW) “Nuhe ko yin kinkàndai jẹnukọn lẹpo yin kinkàndai na oplọn mítọn, na míwlẹ nido sọgan tindo todido gbọn akọndonanu mítọn gblamẹ podọ gbọn homẹmimiọn sọn Owe-wiwe lẹ mẹ gblamẹ.” (Lomunu lẹ 15:4, NW) “Alẹnu Hoho” lọ, yèdọ Owe-wiwe Heblu tọn lẹ yin asisa dagbe anademẹ gbigbọmẹ tọn de bo nọ gọalọna mí nado tindo yise to “Alẹnu Yọyọ” lọ, kavi Owe-wiwe Glẹki tọn lẹ mẹ.