Pọngbọ Dagbe Hugan Na Nuhahun Lẹdo Aihọn Pé Tọn De

FILẸPO wẹ gbẹtọ lẹ to yaji te, podọ mẹsusu wẹ nọ gbọn homẹdagbe dali gọalọna mẹhe to yaji lẹ. Di apajlẹ, doto lẹ nọ wazọ́n na gànhiho susu bo nọ to yede diọ nado gọalọna mẹhe to awutujẹ kavi mẹhe gbleawu lẹ. Miyọ́nṣitọ, ponọ, osẹ́ndoaitọ po mẹhe nọ gọalọ to owùnu-jijọ whenu lẹ po nọ dovivẹnu nado de yajiji mẹdevo lẹ tọn pò kavi glọnalina ẹn. Vivẹnudido mọnkọtọn lẹ nọ wà dagbe na mẹhe tin to nuhudo mẹ lẹ, ṣigba gbẹtọvi kavi titobasinanu depope ma sọgan de yajiji sẹ̀ lẹdo aihọn pé. To vogbingbọn mẹ, Jiwheyẹwhe penugo nado hẹn pọngbọ dagbe hugan wá, podọ e na wàmọ.

Owe Biblu tọn he gbọngodo na mí jide dọmọ: “[Jiwheyẹwhe] nasọ súnsún dasin lẹpo sẹ̀ sọn nukun yetọn mẹ, okú ma nasọ tin ba, mọjanwẹ aluẹmẹninọ kavi avi kavi awufiẹsa ma nasọ tin ba. Onú hoho lẹ ko juwayi.” (Osọhia 21:4, NW) Lẹnnupọndo obá he mẹ opagbe enẹ gbloada jẹ ji. E basi bladopọ lẹndai Jiwheyẹwhe tọn nado hẹn yajiji lẹpo wá opodo. Jiwheyẹwhe na wàmọ gbọn awhàn, huvẹ, azọ̀n, whẹdida mawadodo, po mẹylankan lẹpo didesẹ sọn aigba ji po dali. Gbẹtọvi depope ma sọgan wà enẹ.

Nuhe Ahọluduta Jiwheyẹwhe Tọn Na Wà

Jiwheyẹwhe na hẹn opagbe etọn di gbọn omẹ awetọ he tindo huhlọn hugan to wẹkẹ mẹ gblamẹ—yèdọ Jesu Klisti he yin finfọnsọnku lọ. Ojlẹ lọ ja whenue Jesu na dugán taidi Ahọlu do aigba blebu ji matin  agọjẹdomẹtọ. Gbẹtọvi depope ma nasọ dugán do hatọ etọn ji taidi ahọlu, togán kavi tonudọtọ ba. Kakatimọ, Ahọlu dopo podọ gandudu dopo gee, yèdọ Ahọluduta Jiwheyẹwhe tọn wẹ na dugán do gbẹtọvi lẹpo ji.

Ahọluduta enẹ na và gandudu gbẹtọvi tọn lẹpo sudo. Biblu dọ dọdai sọn ojlẹ dindẹn die dọmọ: “Jiwheyẹwhe olọn tọn na ze ahọludu de daga, he ma na yin viva gbede, mọ yè ma na jo ahọludu etọn dai hlan gbẹtọ devo lẹ gba; ṣigba e na gbà ahọludu do flinflin bo sú ahọludu he lẹpo do, ewọ bo nasọ nọte kakadoi.” (Daniẹli 2:44) Mẹhe tin to aigba ji lẹpo na yin kinkọndopọ to gandudu dodo tọn dopo glọ—enẹ wẹ Ahọluduta Jiwheyẹwhe tọn.

Whlasusu wẹ Jesu dọho gando Ahọluduta enẹ go to whenuena e tin to aigba ji. E dọho gandego to odẹ̀ apajlẹ tọn etọn mẹ bo na anademẹ devi etọn lẹ nado nọ hodẹ̀ dole: “Na ahọluduta towe ni wá. Na ojlo towe ni yin wiwà, kẹdẹdi to olọn mẹ, mọdopolọ to aigba ji.” (Matiu 6:10, NW) Doayi e go dọ Jesu dohia dọ Ahọluduta lọ tindo kanṣiṣa hẹ ojlo Jiwheyẹwhe tọn he na yin wiwà to aigba ji, podọ ojlo Jiwheyẹwhe tọn wẹ nado de yajiji sẹ̀ lẹdo aihọn pé.

Gandudu dodo Jiwheyẹwhe tọn na kọ̀n dona he gandudu gbẹtọvi tọn depope ma sọgan hẹnwa pọ́n gbede lẹ do mí ji. Flindọ Jehovah ze Ovi etọn jo taidi ofligọ na gbẹtọvi lẹ nido sọgan mọ ogbẹ̀ madopodo yí. To gandudu dagbe Ahọluduta lọ tọn glọ, gbẹtọvi lẹ na yin hinhẹn jẹ pipé kọ̀n. Etẹwẹ na yin kọdetọn lọ? Jehovah “na ze okú mì to awhàngbigba mẹ; Oklunọ Jiwheyẹwhe nasọ súnsún dasin sọn nukun lẹpo mẹ.”—Isaia 25:8.

Mẹdelẹ sọgan kanse dọmọ: ‘Etẹwutu Jiwheyẹwhe ma ko yinuwa kakajẹ din? Etẹ nọtepọn wẹ e te?’ Nugbo wẹ dọ Jehovah sọgan ko yinuwa sọn ojlẹ dindẹn die nado de yajiji sẹ̀ kavi glọnalina ẹn. Etomọṣo, e jotẹnna ẹn nado zindonukọn, e ma yin na whẹwhinwhẹ́n ṣejannabi tọn lẹ wutu gba, ṣigba na ale madopodo ovi etọn he tin to aigba ji lẹ tọn wutu. Mẹjitọ owanyinọ lẹ na dike bọ ovi yetọn na jugbọn awusinyẹnnamẹnu lẹ mẹ eyin yé yọnẹn dọ ehe na hẹn ale dẹn-to-aimẹ lẹ wá na ẹn. Mọdopolọ, whẹwhinwhẹ́n dagbe lẹ wutu wẹ Jehovah dike bọ gbẹtọvi lẹ to yaji todin whẹ́, podọ Biblu basi zẹẹmẹ yetọn. Whẹwhinwhẹ́n ehelẹ bẹ onú delẹ hẹn taidi mẹdekannujẹ nudide bibasi tọn, ylando, po whẹho he gando jlọjẹ Jehovah tọn nado dugán po go. Biblu sọ basi zẹẹmẹ dọ Jiwheyẹwhe ko na dotẹnmẹ nudida gbigbọnọ ylankan de nado dugán do aihọn ji na ojlẹ de. a

Dile etlẹ yindọ tẹnmẹ ma na pé mí tofi nado dọhodo whẹwhinwhẹ́n enẹlẹ ji, nugbo titengbe awe delẹ tin he sọgan na mí todido po tuli po. Tintan wẹ yindọ: Jehovah na dona mí sọmọ bọ yajiji depope he mí sọgan ko doakọnna ma nasọ di nude na mí ba. Humọ, Jiwheyẹwhe na mí jide dọmọ: “Yè ma na flin [onú hoho lẹ ba], mọ yé ma na wá linlẹn mẹ.” (Isaia 65:17) Dotẹnmẹ he Jiwheyẹwhe jodona oylan na ojlẹ de ko dekọtọn do awubla po yajiji po mẹ, ṣigba ewọ na hẹn popolẹpo wá opodo, podọ kakadoi.

Nugbo awetọ lọ die: Jiwheyẹwhe ko de ojlẹ tangan de nado hẹn yajiji wá opodo. Flindọ yẹwhegán Habbakuk kanse lehe e na dẹnsọ bọ Jehovah na jo dotẹnmẹ do na huhlọnnu kavi danuwiwa po nudindọn po. Jehovah gblọn dọmọ: “Numimọ lọ gbẹsọ tin na ojlẹ dide lọ . . . e ma na gọ̀n gba.” (Habbakuk 2:3) Dile mí na mọ do to hosọ he bọdego mẹ, “ojlẹ dide” enẹ ko sẹpọ.

[Nudọnamẹ odò tọn]

 [Apotin to weda 7]

Wefọ Delẹ He Dọhodo Sọgodo Ayajẹ Tọn de Ji

AWHÀN MA NA TIN BA:

“Mì wá pọ́n azọ́n OKLUNỌ tọn, hẹngble he e ko basi to aigba ji. E hẹn awhàn gbọ kakajẹ aigba pòdo.”—Psalm 46:8, 9.

MẸYIWANNA MÍTỌN LẸ NA GỌWÁ OGBẸ̀:

“Fọnsọnku dodonọ lẹ po mawadodonọ lẹ tọn po de na tin.”—Owalọ lẹ 24:15, NW.

NÚDÙDÙ NA TIN NA MẸLẸPO:

“Gbado susugege na tin finẹ to osó lẹ ji.”—Psalm 72:16.

AZỌ̀N MA NA TIN BA:

“Finẹnu lẹ ma to na dọmọ, yẹn to azọ̀njẹ.”—Isaia 33:24.

MẸYLANKAN LẸ NA BUSẸ:

“Mẹylankan lẹ wẹ yè na sán sọn aihọn mẹ, sẹ́nmẹjẹtọ lẹpo wẹ yè na dọ̀nsún sọn e mẹ.”—Howhinwhẹn lẹ 2:22.

WHẸDIDA DODO NA GBAYIPE:

“Doayi e go, ahọlu de [Klisti Jesu] na dù to dodo mẹ, ahọvi lẹ na dugán to whẹdida [dodo] mẹ.”—Isaia 32:1.

[Yẹdide to weda 7]

Ahọluduta Jiwheyẹwhe tọn na súdo yajiji he mí sọgan ko doakọnna lẹpo tọn