Plọn Ovi Towe Lẹ

Nuhewutu Mẹdevo lẹ Do Yiwanna Dọlka

MÍMẸPO wẹ nọ jlo dọ gbẹtọ lẹ ni yiwanna mí. Be hiẹ lọsu nọ tindo numọtolanmẹ enẹ ya?— a Biblu dọho gando Dọlka go, yèdọ yọnnu de he mẹsusu yiwanna.

Dọlka nọ nọ̀ Jọppa, yèdọ tòdaho de he sẹpọ Ohù Meditelane. Jelusalẹm dẹn do Jọppa na nudi kilomẹtlu 56. Dọlka yin dopo to devi tintan Jesu tọn lẹ mẹ.

Na hiẹ tọn, etẹwẹ na ko zọ́n bọ gbẹtọ lẹ do yiwanna Dọlka taun?— Biblu dọ dọ e wà onú dagbe susu lẹ bosọ nọ basi nunina dagbe lẹ. Ewọ na ko nọ basi avọ̀ dagbe lẹ na asuṣiọsi lẹ, yèdọ yọnnu he asu yetọn ko kú lẹ. E sọ dọhona mẹsusu gando Jiwheyẹwhe nugbo lọ, Jehovah go, dile Jesu wà do.

Todin, be a yọ́n onú ylankan he jọ do Dọlka go ya?— E jẹazọ̀n sinsinyẹn bo kú. Họntọn  etọn lẹpo wẹ blawu. Enẹwutu, yé do mẹdelẹ hlan fie apọsteli Pita te to nudi kilomẹtlu 16 do finẹ. Omẹ lọ lẹ biọ to e si nado yawu wá. To whenue Pita wá, e yì abò aga tọn mẹ to fie Dọlka te. Yọnnu lẹpo wẹ to avivi, podọ yé do avọ̀ he Dọlka basi na yé lẹ hia ẹ.

Enẹgodo, Pita dọna mẹlẹpo nado tọ́n sọn abò lọ mẹ. Pita po apọsteli devo lẹ po ko wà azọ́njiawu delẹ wayi, ṣigba depope to yé mẹ ma ko hẹn mẹhe kú de gọwá ogbẹ̀ pọ́n. Todin, etẹwẹ a lẹndọ Pita wà?—

Pita jẹklo to oṣiọ lọ pá bo hodẹ̀ hlan Jehovah. Enẹgodo, e dọna Dọlka nado fọ́n. Podọ Dọlka fọ́n! Pita hẹn alọ na ẹn bo gọalọna ẹn nado fọnṣite. Enẹgodo, e ylọ asuṣiọsi lẹ po mẹhe pò lẹ po bo do e hia yé. Be a sọgan yí nukun homẹ tọn do pọ́n lehe yemẹpo gọ́ na ayajẹ do sọ ya?—

Todin, gbọ mí ni lẹnnupọndo nuhe a sọgan plọn sọn otàn fọnsọnku Dọlka tọn ehe mẹ ji. Dopo to nuhe e dohia lẹ mẹ wẹ yindọ, eyin a nọ gọalọna mẹdevo lẹ, susu yetọn na yiwanna we. Ṣigba nujọnu hugan lọ wẹ yindọ, Jiwheyẹwhe na yiwanna we bo nasọ flin we. E ma na wọn onú dagbe he hiẹ wà na mẹdevo lẹ gbede. Podọ e na yí ogbẹ̀ madopodo he gọ́ na ayajẹ to aihọn yọyọ dodowiwa tọn etọn mẹ do suahọ we.

Hia to Biblu towe mẹ

Owalọ lẹ 9:36-43

Osọhia 21:3-5

[Nudọnamẹ odò tọn]

[Yẹdide to weda 6]

[Yẹdide to weda 6]

[Yẹdide to weda 7]

[Yẹdide to weda 7]