Biblu Nọ Diọ Gbẹzan Mẹtọn

Nawẹ jọja yọnnu he yin yasana sinsinyẹn to ovu whenu de wá tindo gbẹzan he do zẹẹmẹ nujọnu tọn de gbọn? Etẹwẹ whàn dawe danuwatọ he nọ fọngu sọta tonudọtọ lẹ dai de nado lẹzun wẹndagbe-jlatọ jijọhonọ de? Hia otàn he bọdego lẹ nado mọ gblọndo lọ lẹ.

“N’dín fie n’gán mọ owanyi po mẹdọndogo po te vẹkuvẹku.”—INNA LEZHNINA

OWHE HE MẸ N’YIN JIJI: 1981

OTÒ HE MẸ N’WÁ SỌN: RUSSIE

OTÀN ṢIE: N’YIN YASANA TAUN TO OVU WHENU

NUHE N’YIN DAI: Tókunọ wẹ yẹn po mẹjitọ ṣie lẹ po. Sọn whenue n’yin jiji kakajẹ whenue n’do owhe ṣidopo, gbẹzan ṣie gọ́ na ayajẹ taun. Enẹgodo, mẹjitọ ṣie lẹ wá gbẹ́ yede. Dile etlẹ yindọ yọpọvu pete n’gbẹ́ yin to ojlẹ lọ mẹ, n’yọ́n nue gbẹdai zẹẹmẹdo, podọ e hẹn awufiẹsa sinsinyẹn wá na mi. To gbẹdai lọ godo, otọ́ ṣie po mẹdaho ṣie sunnu po sẹtẹn yì Troitsk, bọ yẹn po onọ̀ ṣie po sẹtẹn yì Chelyabinsk. To nukọn mẹ, e dà asu devo. Asu yọyọ he e dà lọ nọ nùahànmú, bo nọ saba hò yẹn po onọ̀ ṣie po.

To 1993, mẹdaho vivẹ́ ṣie kútọ. Adángbomẹ enẹ hẹn awubla sinsinyẹn wá na whẹndo mítọn. Onọ̀ ṣie wá jẹ ahànnu ji nado duto lẹnpọn ji, enẹ zọ́n bọ ewọ lọsu nọ yasana mi, dile asu etọn nọ wà do. N’jẹ nulẹnpọn ji do nuhe na hẹn gbẹzan ṣie pọnte ji. N’dín fie n’gán mọ owanyi po mẹdọndogo po te vẹkuvẹku. N’gbọn sọṣi voovo lẹ mẹ, nado pọ́n dehe na na mi homẹmimiọn, amọ́ dopo tata to yé mẹ ma wàmọ.

LEHE BIBLU DIỌ GBẸZAN ṢIE DO: Whenue n’do owhe 13, klasigbẹ́ ṣie de he yin Kunnudetọ Jehovah tọn nọ pìntàn Biblu tọn delẹ na mi. N’yiwanna nue n’plọn gando mẹhe go Biblu donù delẹ go taun, taidi Noa po Jobu po, he sẹ̀n Jiwheyẹwhe mahopọnna nuhahun sinsinyẹn he mẹ yé jugbọn lẹ. E ma dẹn bọ n’jẹ Biblu plọn hẹ Kunnudetọ lẹ ji bosọ nọ yì opli yetọn lẹ.

Biblu pinplọn zọ́n bọ nugbo susu he fọnjlodotenamẹ lẹ wá họnwun na mi gblegede. N’ma gán dọ fie e yinuwado ji e jẹ nado plọn dọ Jiwheyẹwhe tindo yinkọ de. (Salm. 83:18) E jiawu na mi taun nado mọdọ Biblu dọ dọdai nuhe na jọ to “azán godo tọn lẹ” mẹ tọn bọ e sọ yinmọ pẹẹ. (2 Timoti 3:1-5) N’sọ gọ́ na ayajẹ nado plọn dọ todido fọnsọnku tọn de tin. E yọ́n taun, dọ n’na wá gọ̀ mẹdaho ṣie mọ!—Johanu 5:28, 29.

Ṣigba, nue n’ṣẹṣẹ to pinplọn bọ e to vivivi na mi ehelẹ ma yin ayajẹnu na mẹlẹpo. Onọ̀ ṣie po asu etọn po gbẹwanna Kunnudetọ Jehovah tọn lẹ taun. Yé tẹnpọn nado gbidikọna mi na ma do hò Biblu pinplọn plá. Amọ́ nue plọn n’te lẹ jẹ ṣie ji sọmọ bọ n’magbe nado zindonukọn.

E ma bọawuna mi paali nado dọakọnna nukundiọsọmẹ whẹndo tọn. Ninọmẹ awubla tọn devo he n’sọ dona doakọnna wẹ whenue nọvisunnu ṣie, yèdọ visunnu he onọ̀ ṣie ji na asu yọyọ he e dà lọ lọsu kútọ. E nọ hodo mi dai yì opli Kunnudetọ Jehovah tọn lẹ tọn. Amọ́, Kunnudetọ lẹ nọgodona mi to ojlẹ enẹ lẹpo mẹ. Dile n’topọ hẹ yé, n’mọ owanyi gọna mẹdọngodo he n’ko dín vẹkuvẹku to gbẹzan ṣie blebu mẹ lọ. E họnwun na mi dọ sinsẹ̀n nugbo lọ ján ko die. To 1996, n’yí baptẹm bo lẹzun dopo to Kunnudetọ Jehovah tọn lẹ mẹ.

ALE HE N’MỌYI LẸ: E ko yì owhe ṣidopo din he n’wlealọ hẹ sunnu dagbedagbe de he nọ yin Dmitry. Mí omẹ awe lẹ to sinsẹ̀n to alahọ Kunnudetọ Jehovah tọn lẹ tọn he to Saint-Pétersbourg mẹ. To nukọn mẹ, nuyiwa mẹjitọ ṣie lẹ tọn hẹ mi na nuyise ṣie lẹ wutu wá diọ taun.

N’dopẹ́ taun dọ n’wá yọ́n Jehovah! Sinsẹ̀n-bibasi hlan ẹn zọ́n bọ gbẹzan ṣie tindo zẹẹmẹ nujọnu tọn.

“Kanbiọ Susu lẹ Wẹ Dotukla Mi.”—RAUDEL RODRÍGUEZ RODRÍGUEZ

OWHE HE MẸ N’YIN JIJI: 1959

OTÒ HE MẸ N’WÁ SỌN: CUBA

OTÀN ṢIE: N’NỌ FỌNGU SỌTA TONUDỌTỌ LẸ

NUHE N’YIN DAI: N’yin jiji to tòdaho Havane tọn mẹ to Cuba, podọ to lẹdo wamọnọ tọn he mẹ n’yin pinplọn whẹ́n te, mẹlẹ nọ saba nudọn kavi to avùnho to aliji. Dile n’to whinwhẹ́n, n’wá yiwanna akotokún-yinyin he nọ yin judo gọna aihundida agbàwhinwhlẹn tọn devo lẹ.

N’nọ wazọ́n taun to wehọmẹ, bọ mẹjitọ ṣie lẹ na tuli mi nado zindonukọn yì wehọmẹ alavọ tọn. Whenue n’to dọ́n n’jẹ ayidego ji dọ tito tonudidọ tọn otò ṣie tọn dona yin didiọ. N’magbe nado fọngu. Yẹn po klasigbẹ́ ṣie de po tọ́navùn ponọ de nado hò osò etọn yí. Mí hoavùn hẹ ponọ lọ bọ e gbleawu sọn ota wlúwlú. Yẹn po klasigbẹ́ lọ po yin wiwle do gànpamẹ na mí tọ́navùn ponọ lọ wutu, podọ yè dá okú-whẹ̀ na mi bọ mí dona yin osò dedo hù. Owhe 20 poun janwẹ n’do bo ka ko tin to kúdonu!

Whenue n’to ṣokẹdẹ to gànhọ ṣie mẹ, n’lẹnnupọndo nuhe na yin nuyiwa ṣie ji eyin yè ja osò lọ dedo mi gbè. N’ma jlo paali nado dibu. Amọ́, to ojlẹ dopolọ mẹ, kanbiọ susu lẹ to tuklado mi to ayiha ṣie mẹ. N’kanse dee dọ: ‘Naegbọn whẹdida agọ̀ gbayipe sọmọ to aihọn lọ mẹ? Be le janwẹ ogbẹ̀ na nọ ya?’

LEHE BIBLU DIỌ GBẸZAN ṢIE DO: Okú-whẹ̀ he yè dá na mí lọ wá diọ, bọ mí yin whẹdana nado sẹ̀ngàn na owhe 30. Ojlẹ enẹ mẹ wẹ n’dukosọna Kunnudetọ Jehovah tọn delẹ he yin wiwle do gànmẹ na nuyise sinsẹ̀n tọn yetọn lẹ wutu. Whenue n’mọ adọgbigbo he Kunnudetọ lọ lẹ dohia ṣogan bo gbẹ́ to nuyiwa po jijọho po, e yinuwado ji e taun. Dile etlẹ yindọ okà ji wẹ yé yin wiwle do, yé ma gblehomẹ kavi to apọ̀ mọ do mẹde go.

Kunnudetọ lẹ plọn mi dọ Jiwheyẹwhe tindo lẹndai de na gbẹtọvi lẹ. Yé dohia mi to Biblu mẹ dọ ewọ na diọ aigba he ji mí te zun paladisi de, fie danuwiwa po whẹdida agọ̀ depope po ma na tin te ba. Yé plọn mi dọ aigba na gọ́ na gbẹtọ dagbe lẹ dódó, he na penugo nado nọgbẹ̀ kakadoi to ninọmẹ pipé lẹ mẹ.—Salmu lẹ 37:29.

N’yiwanna nue Kunnudetọ lẹ to pinplọn mi lẹ, amọ́ n’mọdọ n’ma gán penugo bo wleawuna jijọ yewlẹ tọn nkọ gbede. N’nọ lẹndọ e ma na pà mi gbede nado nọ kada bo ma donù tonudidọ-hó mẹ, kavi nado lilẹ́ alaka awetọ na mẹhe hò tómẹ na mi de. Enẹwutu, n’basi dide nado nọ hia Biblu dee ṣo. Whenue n’hia ẹ fó, e wá họnwun na mi dọ Kunnudetọ Jehovah tọn lẹ kẹdẹ wẹ nọ yinuwa dile Klistiani hohowhenu tọn lẹ wà do.

Po nuhe n’ko plọn to Biblu mẹ lẹ po, n’mọdọ e biọ dọ ma bayi diọdo sinsinyẹn delẹ to gbẹzan ṣie mẹ. Di apajlẹ, n’dona vọ́ aliho hodidọ tọn ṣie jlado, na n’do aṣa lọ dai nado nọ zan hogbe gbigble kavi agbàagba lẹ. N’dona sọ doalọtena azọ̀-nùnù. Podọ ga, n’ma dona nọ donù tonudidọ-hó mẹ ba. Alọdide sọn aṣa ehelẹ mẹ ma bọawuna mi paali, amọ́ po alọgọ Jehovah tọn po, e pà mi vudevude.

Diọdo he kàn dẹpẹ biọ hugan lọ wẹ nado nọ duto homẹgble ji. Enẹwutu, n’gbẹ́ nọ hodẹ̀ nado sọgan dava dee. Dopo to wefọ Biblu tọn he gọalọna mi taun lẹ mẹ wẹ Howhinwhẹn lẹ 16:32, he dọ: “Mẹhe nọ whleawu nado gblehomẹ pọnte hú mẹhe yin huhlọnnọ, Podọ mẹhe nọ dava homẹgble etọn pọnte hú mẹhe gbawhàn tòdaho de tọn.”

To 1991, n’yí baptẹm bo lẹzun Kunnudetọ Jehovah tọn de. Gànpamẹ wẹ n’yí baptẹm lọ te to gàngbá osin tọn de mẹ. To owhe he bọdego mẹ, delẹ to míwu gàntọ lẹ mẹ yin tuntundote bo yin didohlan Espagne, na hẹnnumẹ mítọn delẹ to dọ́n wutu. Whenue n’jẹ Espagne, n’yì opli Kunnudetọ Jehovah tọn lẹ tọn de to afọdopolọji. Kunnudetọ he to finẹ lẹ dokuavọna mi bo yí mi taidi dọ n’ko topọ hẹ yé sọn owhe susu die wẹ nkọ, podọ yé nọgodona mi nado vọ́ gbẹzan yọyọ de bẹjẹeji to Espagne.

ALE HE N’MỌYI LẸ: N’do ayajẹ todin taun, bosọ to Jiwheyẹwhe sẹ̀n to pọmẹ hẹ asi e po viyọnnu mítọn lẹ po. N’tindo lẹblanulọkẹyi lọ nado nọ yí gànhiho susu zan do gọalọna mẹdevo lẹ nado plọn Biblu. To whedelẹnu, n’nọ wá flin ojlẹ he mẹ n’to dẹpẹ mẹ bo tin to kúdonu te lọ, podọ n’nọ yọ́n pinpẹn nususu he sin ale dù n’te kakajẹ din lẹ tọn. E ma yindọ n’togbẹ̀ kẹdẹ wẹ gba, amọ́ n’sọ do todido sọgodo tọn de. N’to nukundo Paladisi he Jiwheyẹwhe dopagbe etọn lọ—na to whenẹnu whẹdida dodo na gbọn filẹpo podọ “okú ma nasọ tin ba.”—Osọhia 21:3, 4.

[Nudọnamẹ tangan lẹ]

“N’ma gán dọ fie e yinuwado ji e jẹ nado plọn dọ Jiwheyẹwhe tindo yinkọ de.”

[Yẹdide]

Yẹn po asu ṣie po to zinjẹgbonu he to tókunọ-gbè mẹ de dohia tókunọ de