Sọn ovu whenu gbọ́n wẹ n’yiwanna nudida lẹ. Whẹndo ṣie nọ disa whẹwhẹ yì zungbo whanpẹnọ lẹ mẹ gọna tọ̀sisa dagbedagbe he to lẹdo mítọn mẹ lẹ tó, to tòdaho mítọn Jyväskylä mẹ, to ṣẹnṣẹn Finlande tọn. N’sọ yiwanna kanlin lẹ taun. To pẹvi ṣie, eyin n’mọ asé kavi avún de, n’nọ yiwanna nado nọ ze e bo daihun hẹ ẹ! Dile n’to whinwhẹ́n, e nọ vẹna mi taun eyin n’mọ bọ mẹlẹ to okà ṣì do kanlin lẹ go. To ojlẹ de godo, n’wá biọ ogbẹ́ he nọ yiavùnlọna jlọjẹ kanlin lẹ tọn de mẹ, fihe n’mọ mẹhe tindo linlẹn dopolọ hẹ mi lẹ te.

Mí nọ yí zohunhun do yiavùnlọna jlọjẹ kanlin lẹ tọn. Mí nọ na nudọnamẹ mẹlẹ bosọ nọ fọngu sọta kanlin-núdùdù satẹn lẹ po dodinnanutọ he nọ yí kanlin lẹ zan lẹ po. Mí tlẹ do pipli yọyọ devo ai nado nọ bayi hihọ́na kanlin lẹ. Afọdide egblemaku tọn he mí ze nado jẹ yanwle mítọn kọ̀n lẹ zọ́n bọ aṣẹpatọ lẹ ma nọ mọ mí gbọ. Whlasusu wẹ n’yin wiwle bo yin hinhẹn yì whẹnukọn.

Gbọnvona dọ n’nọ hòkàn do kanlin lẹ tamẹ, nuhahun gbẹ̀mẹ tọn devo lẹ sọ nọ duahunmẹna mi. To godo mẹ, n’wá biọ pipli devo lẹ mẹ, taidi Amnesty International po Greenpeace po. Huhlọn ṣie lẹpo wẹ n’yí do nọgodona nuwiwa yetọn lẹ. N’nọ yiavùnlọna hẹntọnọ lẹ, mẹhe to huvẹ lẹ gọna agbátọnọ lẹ.

Ṣigba, vudevude, e wá họnwun na mi dọ n’ma gán diọ ogbẹ̀ lọ. Dile etlẹ yindọ pipli enẹlẹ nọ kàn ayiha nado didẹ nuhahun flinflin delẹ poun, nuhahun sinsinyẹn lẹ gbẹ́ nọ to yinylan deji janwẹ. E nọ taidi dọ huhlọn ylankan delẹ to aihọn-gbẹ̀ lọ husudo wẹ nkọ bọ mẹde ma kiyana. N’wá mọdọ huhlọn ṣie ma sọtẹ́n.

Na numọtolanmẹ nugomape tọn he n’tindo hẹn mi jẹflumẹ wutu, n’jẹ nulẹnpọn ji gando Jiwheyẹwhe po Biblu po go. N’ko plọn Biblu hẹ Kunnudetọ Jehovah tọn lẹ to ojlẹ de mẹ wayi. Dile etlẹ yindọ n’yọ́n pinpẹn homẹdagbe po ojlo nujọnu tọn he Kunnudetọ lẹ nọ dohia mi po tọn, n’ma ko wleawufo to whenẹnu nado diọ aliho gbẹninọ tọn ṣie. Ṣigba todin, nulẹ diọ pete.

N’yì de Biblu ṣie tọ́n bo gọjẹ hihia ji. E miọnhomẹna mi taun. N’doayi wefọ Biblu tọn susu go he plọn mí dọ mí dona nọ wlebòna kanlin lẹ. Di apajlẹ, Howhinwhẹn lẹ 12:10 dọ dọ “gbẹtọ dodonọ de [nọ] hò ogbẹ̀ kanlin etọn tọn pọ́n.” (Biblu Gun-Alada) N’sọ doayi e go dọ e ma yin Jiwheyẹwhe wẹ nọ hẹn nuhahun he to gbẹ̀mẹ lẹ wá. Kakatimọ, nuhahun mítọn lẹ fọ́n bo to yinylan deji na mẹsusu ma nọ hodo anademẹ etọn lẹ wutu. To whenue n’plọnnu do owanyi Jehovah tọn po homẹfa etọn po ji, e yinuwado ji e taun.​—Salmu lẹ 103:8-14.

To ojlẹ enẹ dopolọ mẹ, n’kanwe nado mọ owe lọ Etẹwẹ Biblu Plọn Mí Taun? yí. E ma dẹn bọ asu po asi po Kunnudetọ de wá ohọ̀n ṣie ji bo ze plọnmẹ Biblu de donukọnna mi, bọ n’yigbe. N’sọ jẹ opli Klistiani tọn lẹ yì ji to Plitẹnhọ Ahọluduta tọn mẹ. Taidi kọdetọn de, nugbo Biblu tọn lẹ wá doadọ̀do to ahun ṣie mẹ.

Biblu gọalọna mi nado bayi diọdo susu. N’doalọtena ahànnunu zẹjlẹgo po azọ̀-nùnù po. N’vọ́ awusọhia ṣie jlado bo masọ nọ zan hogbe agbàagba lẹ ba. Podọ n’nọ na sisi aṣẹpatọ lẹ todin. (Lomunu lẹ 13:1) N’sọ doalọtena gbẹzan fẹnnuwiwa tọn he mẹ n’ko tlọ dee do pete dai.

Diọdo he vẹawuna mi hugan wẹ nado kẹalọyi dọ pipli he nọ yiavùnlọna jlọjẹ gbẹtọ po kanlin po tọn lẹ ma gán diọ onú kaka de. E ma fá whẹpo n’wá diọlinlẹn. To tintan whenu, n’nọ mọdọ eyin n’gbà ogbẹ́ yetọn, be n’tafu yé wẹ. Amọ́, n’wá mọdọ Ahọluduta Jiwheyẹwhe tọn wẹ yin pọngbọ nujọnu tọn dopo gee lọ na sọgodo aihọn ehe tọn. N’magbe nado yí huhlọn ṣie lẹpo do nọgodona Ahọluduta enẹ bosọ gọalọna mẹdevo lẹ nado plọnnu gandego.​—Matiu 6:​33.

To dai he n’nọ yiavùnlọna gbẹtọ po kanlin po, n’do aṣa lọ nado nọ má mẹlẹ do ogbẹ́ awe ji—yèdọ mẹdagbe kavi mẹylankan—podọ n’ma nọ yì-bo-wá na mẹhe n’nọ mọ di mẹylankan lẹ. Amọ́, n’dopẹ́ dọ Biblu gọalọna mi ma nado nọ gbẹwanna mẹdevo lẹ ba. Kakatimọ, n’nọ dovivẹnu nado do owanyi Klistiani tọn hia mẹlẹpo. (Matiu 5:​44) Dopo to aliho he mẹ n’nọ do owanyi ehe hia te lẹ mẹ wẹ gbọn wẹndagbe Ahọluduta Jiwheyẹwhe tọn lilá dali. Homẹ ṣie nọ hùn taun nado mọdọ azọ́n mẹdezejotọ tọn ehe nọ hẹn jijọho po ayajẹ po wá na gbẹtọ lẹ bosọ nọ na yé todido nujọnu tọn.

Whẹho lẹ jijodo alọ Jehovah tọn mẹ ko zọ́n bọ n’tindo jijọho ahun mẹ tọn. N’kudeji dọ taidi Mẹdatọ lọ, ewọ ma na dike gbẹtọ lẹ po kanlin lẹ po ni yin nuyiwa hẹ to aliho agọ̀ mẹ kakadoi, mọjanwẹ e ma nasọ dike aigba whanpẹnọ mítọn ni yin huhusudo do niyẹn. Kakatimọ, gbọn Ahọluduta etọn gblamẹ, ewọ na jla nuhe ko yin hinhẹngble lẹpo do to madẹnmẹ. (Isaia 11:​1-9) Homẹ ṣie nọ hùn taun, e ma yin na n’yọ́n nugbo ehelẹ kẹdẹ wutu wẹ gba, amọ́ na n’sọ penugo nado plọn yé mẹdevo lẹ ga. N’masọ nọ lẹndọ n’dona diọ ogbẹ̀ lọ ba.