“Ngöbö kä kwinbiti käkwe gobran ükaite abokän ñaka gaite jire chi.” (Daniel 2:44, Traducción del Nuevo Mundo.)

“Monso biani nie; aune gobran ye mikai niara kötärä.” (Isaías 9:6.)

• Ye gobran kwin krubäte abokän raba ni itire itire dimike (Isaías 48:17, 18).

• Gwäune, kä bä nuäre yete, ni mikai nüne kä jutobiti kwe aune ni ñaka rabaira bren (Apocalipsis 21:3, 4).

Jän, kukwe ketebubätä:

• Gobran Ngöbökwe yekwe dre nuaindi ye Jesukwe bämikani. Gobran Ngöbökwe ye jatadre aune Ngöbö töita ño ye erere rabadre bare Kä tibienbätä ye nitre nänkä niarabe käkwe kärädre orasionte driebare kwe ietre (Mateo 6:9, 10). Kukwe käräta ye rabai bare ño ye bämikani kwe arato.

  Jesús nämene Kä tibienbätä ye ngwane, nitre nämene mrö nike ye bukani kwe, nitre bren mikaninta kwin kwe aune nitre krütanina mikaninta nire kwe (Mateo 15:29-38; Juan 11:38-44). Niara rabai Reire Gobran Ngöbökwe yete, ye medenbätä Gobran ye käkwe dre dre kwin nuaindi nitre gobrandi kwe ye kräke ye bämikani kwe (Apocalipsis 11:15).

• Kukwe tare tä nemen bare käbiti tibien ye tä mike gare metre Gobran Ngöbökwe ye köböra nüke. Gobran Ngöbökwe ye jämi kä jäme ye ükete Kä tibienbätä känenkri, rüdi, mrö nikai aune dobo krikri rabai krubäte käbiti tibien Jesukwe mikani gare (Mateo 24:3, 7).

  Nita kukwe tare ye jökrä tuin kä nengwane. Ye medenbätä gwäune Gobran Ngöbökwe käkwe kukwe ye ükaite yei ni raba tö ngwen metre.