•  Ebinwa by’Omurhondero 2

•  Obuchire b’omu Chinwa cha Mungu 3-5

  •  Ejambo 3

  •  Obuhirhi bw’Ekiroho 4

  •  Obusomi bwe Biblia 5

•  Ochihaane Loshi omu Kasi k’Okuhubiri 6-14

  •  Okuntu Wakahwanzisa Enganiro 7

  •  Okugenderera Kurhabala Abasimisizwe 8

  •  Okujira Abanafunzi 9

  •  Okufasiriya Obwemere Bwawe 10

  •  Ejambo 11

  •  Ebilimo 12

  •  Obuko bw’Amahubiri 13

  •  Okukolesa Evideo n’Ebitabu 14

•  Akalamo k’Omukristu 15-16

  •  Efunzo lye Biblia lye Chibaga 16

•  Ebinwa by’Okumaliriza 17

•  Okusingiza n’Okuhanula 18

•  Ebisanzi 19

•  Entangulo y’Omwimangizi w’Omuzunguluko 20

•  Eboso lye Mbuganano y’Omuzunguluko changwa ye Eneo 21

•  Eboso ly’Olwibuko 22

•  Omwishingizi we Mbuganano Akasi n’Akalamo k’Omukristu 23

•  Omwimangizi we Mbuganano Akasi n’Akalamo k’Omukristu 24

•  Engabane z’Abanafunzi omu Machumbi Mageke-geke 25

•  Omuhanuzi Mugwasi 26

•  Evideo 27

1. Obwerekezi buli mw’enola dokima, bulolere buli yeshi ogwerhe engabane oku Mbuganano—Akasi n’Akalamo k’Omukristu. Embere y’okuhwaza kurheganya engabane yawe, okwanene kurhanga kulola obwerekezi buli omu Kaye lye Mbuganano Akasi n’Akalamo k’Omukristu n’obuli mw’enola dokima. Bihemere okuhema abahubiri boshi babe tayari kugeza engabane z’abanafunzi. Abandi nabo bakomerene bwenene n’echibaga bakageza engabane akaba bakala bayemerere enyigirizo ze Biblia, banalamire omu kukulikiza amakanuni m’Echikristu. Omwishingizi we Mbuganano Akasi n’Akalamo k’Omukristu, akwanene kuganira na buli yeshi orhaza kuba muhubiri wayerekene okw’agwerhe enyorha y’okuchiyandikisa kugeza engabane oku bihemerweho y’aba mwanafunzi. Eyola nganiro ekwanene kujirwa ey’ali haguma na mwalimu wage we Biblia (changwa haguma n’omuzere wage oli mwemezi). Baganira naye bilala byenabila bihemerwe oku muntu oshondere kuba muhubiri orhaza kubatizwa.—od sura ya. 8 chi. 8.

2. Muniti 1. Buli boso, olwimpo n’esala bimala kugera, omwimangizi we Mbuganano Akasi n’Akalamo aderha ebinwa by’omurhondero oku bilolere ebyaganirirwa oku mbuganano. Omwimangizi akwanene aseze obwenge oku nyigirizo zarhabala echibaga bwenene.

 3.  Ejambo: Miniti 10. Ekaye lye Mbuganano Akasi n’Akalamo lyayinja lyayerekana erhwe ly’omwazi n’epula ya mawazo mabiri makulu changwa masharhu. Elila jambo likwanene kugezwa n’omushamuka changwa omugwasi w’akasi okwanene. Amango eprograme y’obusomi bwe Biblia bwa buli boso kwaba kurhondera echitabu chihyahya che Biblia, byanahema okurhondera n’evideo ederhere oku bugeke ebili mw’echola chitabu. Omwigiriza akayerekana ngahe ebiyerekenwe omu video bibuganene n’erhwe ly’omwazi. Aliko, akwanene kuchizera okw’amalire amawazo moshi mayerekenwe omu kaye lye mbuganano. Echindi, nk’ebisanzi biyemerere, akwanene afasiriye bwinja efoto ziherekeze ogola mwazi, bulala zirheganyizwe omu kuyeneza ebikwanene biderhweko byoshi. Akaderha n’ebirhengere omu zindi referense, nka bili by’akamaro omu kufasiriya amawazo mayerekenwe oku pula y’engabane.

 4. Obuhirhi bw’Ekiroho: Miniti 10. Chili chigabi ch’ebibazo n’ebishubizo buzira binwa by’omurhondero changwa by’okumaliriza. Chikwanene chigezwe n’omushamuka changwa omugwasi w’akasi okwanene. Omwigiriza akwanene abaze abonviriza ebibazo byoshi. Akachishoga akaba bihemere okusoma changwa nanga amandiko moshi maderherwe. Abashubiza oku bibazo bakwanene kushubiza mu segonde 30 changwa zigeke kw’ezo.

 5. Obusomi bwe Biblia: Miniti 4. Eyila ngabane y’omwanafunzi ekwanene kugezwa n’omwanafunzi w’omulume. Owasoma akwanene kusoma echigabi chiyerekenwe buzira binwa by’omurhondero changwa by’okumaliriza. Omwimangizi we mbuganano akwanene kuchihangana arhabale abanafunzi basome eby’obukweri, biyunvikene, bili byahulula, bakazize amawazo makulu bwinja, bayinje bahindamula omulenge, banayuze nk’oku bihemere, kube nka kuganira. Bulala hali engabane z’okusoma zilehere kulusha ezindi, omwishingizi we Mbuganano Akasi n’Akalamo akwanene kugerereza obuhashe bw’abanafunzi amango ali azigaba.

6. Miniti 15. Echila chigabi chiherhe omuhigo g’okuha boshi orozo l’okuchikoomeza n’okukwiza obufundi bwabo b’okuganira n’obuhashe bwabo b’okuhubiri n’okuyigiriza. Nka bihemereko, abashamuka nabo bakahabwa engabane z’abanafunzi. Buli mwanafunzi akwanene akolese esomo bamuhere lili omu katabu Okuyiriza changwa Obuzigire Bukushunike libonekene omu paranteze oku Kaye lye Mbuganano Akasi n’Akalamo. Mango maguma hagenda haba echigabi ch’enganiro oku programe. Ebigabi bili nk’ebyola bikwanene bigezwe n’omushamuka changwa omugwasi w’akasi okwanene.—Olole  echifungo che 15 wabona gurhe wakageza echola chigabi.

 7. Okuntu Wakahwanzisa Enganiro: Omwanafunzi wageza eyila ngabane akaba mulume changwa mukazi. Akaba mulume yewayigeza, ayigeze n’owabo mulume n’akaba arhali ntyo babe eyi ba mulala muguma. Akaba mukazi yewayigeza, ayigeze n’owabo mukazi, n’akaba arhali ntyo babe eyi ba mulala muguma. Abanafunzi bombi bakajira eyola nganiro eyi bayikere changwa eyi bayumangire. Y’omenya myazi minene oku bilolere ebilimo n’obuko bw’amahubiri wajira kw’eyola ngabane, olole  echifungo che 12 n’eche  13.

 8. Okugenderera Kurhabala Abasimisizwe: Eyila ngabane y’omwanafunzi yakagezwa n’omulume changwa omukazi. Akaba mulume yewayigeza, ayigeze n’owabo mulume n’akaba arhali ntyo babe eyi ba mulala muguma. Akaba mukazi yewayigeza, ayigeze n’owabo mukazi, n’akaba arhali ntyo babe eyi ba mulala muguma. (km 5/97 buk. 2) Abanafunzi bombi bakageza eyola nganiro eyi bayikere changwa eyi bayumangire. Omwanafunzi akwanene kuba y’ali ayerekana bichi omuntu akaderha amango amagalukira omuntu walisimisizwe amango baganira naye burhanzi.—Y’omenya myazi minene oku bilolere ebilimo n’obuko bw’amahubiri wakola kw’eyola ngabane, olole  echifungo che 12- 13.

 9. Okujira Abanafunzi : Eyila ngabane y’omwanafunzi yakagezwa n’omulume changwa omukazi. Akaba mulume yewayigeza, ayigeze n’owabo mulume n’akaba arhali ntyo babe eyi ba mulala muguma. Akaba mukazi yewayigeza, ayigeze n’owabo mukazi, n’akaba arhali ntyo babe eyi ba mulala muguma. (km 5/97 buk. 2) Abanafunzi bombi bakageza eyola nganiro eyi bayikere changwa eyi bayumangire. Eyila ngabane ekwanene kuyerekana efunzo lye Biblia lyabaga lyarhondere. Birhahemere mpu habe ebinwa by’omurhondero changwa by’okumaliriza, byakaba ntyo konyine akaba omwanafunzi ali akola oku somo limuhemere ntyo. Birhahemere mpu mpaka asome n’omulenge byoshi bamuhere okw’asome chiro akaba okw’okujira ntyo kurhali kubi.

 10. Okufasiriya Obwemere Bwawe: Eyila ngabane y’omwanafunzi yakagezwa n’omulume amango lili jambo. Aliko amango chili cherekane chakagezwa n’omulume changwa n’omukazi. Akaba mulume ye wayigeza, ayigeze n’owabo mulume n’akaba arhali ntyo babe eyi ba mulala muguma. Akaba mukazi yewayigeza, ayigeze n’owabo mukazi, n’akaba arhali ntyo babe eyi ba mulala muguma. Omwanafunzi akwanene kuhana echishubizo n’obukenge chinayunvikene oku chibazo yibaganirako omu kukulikira obwerekezi ahabirwe. Omwanafunzi nk’alonzeze akakolesa echitabu chihabirwe omu referense changwa nanga.

 11. Ejambo: Eyila ngabane y’omwanafunzi ekwanene kugezwa n’omulume nka kulala ejambo linagezwa omu chibaga. Amango ejambo liyumangire oku apandise A y’akatabu Obuzigire Bukushunike, omwanafunzi akwanene kuyerekana gurhe amandiko makakoleswa omu mahubiri. Omufano, akafasiriya mangochi olwandiko lwakakoleswa, oku lufasiriya, n’okuntu omuntu akalukengerako n’owindi muntu. Amango ejambo liyumangire oku somo liguma omu katabu Obuzigire Bukushunike, omwanafunzi akwanene kukaziza okuntu elyola somo lyakakoleswa omu kasi k’amahubiri. Akakolesa omufano guli omu ngingo y’oburhanzi y’esomo, changwa akakolesa amandi-mandi mandiko mali omu somo akaba makamurhabala.

   12.  Ebilimo: Ebili mw’echila chifungo n’omu chikulikire byakakoleswa omu chigabi “Okuntu Wahwanzisa Enganiro” n’omu chigabi “Okugenderera Kurhabala Abasimisizwe.” Olekere nantyo, omuhigo g’omwanafunzi kuli kumenyesa okuli kwe Biblia omu binwa birhakomere byarhuma oli wamunyunviriza agenderere kugwarha eyola nyorha, n’okuheba omusinji gw’enganiro y’amango mayinjire. Omwanafunzi akwanene kuchishoga omwazi gupatene n’akasanzi n’ehali ye eneo y’omunviriza. Akachishoga akaba akolesa Chiguma omu Bikoleso Byerhu By’okuyigiriza changwa evideo. Ahali h’okuderha ebintu wafarhire omu bwenge konyine, okwanene kuchikoomeza bwinja ebiwayigiriza, wanabiderha omu byawe-byawe binwa, n’okuyerekana oku osimisizwe n’omunviriza wawe onaderhe buzira kuchijirisa.

   13. buko bw’Amahubiri: Omwanafunzi akwanene kukolesa obuko bw’amahubiri ahemerwe akolese. Omufano:

1.  (1) Amahubiri ma Nju oku Nju: Maheberwe mw’amahubiri ma mulyango oku gwindi; kube kuganira n’omuntu masu oku masu, oku telefone changwa kugerera amaruba, n’okugalukira omuntu walisimisizwe mwaganiraga naye omu mahubiri ma nju oku nju.

2.  (2) Amahubiri Marhalipangirwe: Mahubiri maheberwe mw’okukolesa orozo rhwapatire, rhwanahindamula enganiro rhwalirimo manaba mahubiri. Kwakaba kuganira oku lwandiko n’abantu wabuganene nabo oku kasi, oku masomo, abaturanyi bawe, abamuli mwabalama nabo, changwa hoshi hoshi wakaba washibire.

3.  (3) Amahubiri m’oku Mugaragaro: Mahubiri makajirwa oku prezantware, okuhubiri abantu ahabali bajirira amakasi mabo, omu mabarabara, ah’abantu banaja kuhumukira, okuhubiri ah’emitugari n’amamoto binazigana kuyumanga, na hoshi hoshi wakabona abantu.

 14. Okukolesa Evideo Changwa Ebitabu: Nk’oku ehali enali, omwanafunzi akwanene kuchishoga akaba ayerekana evideo changwa kukolesa ebitabu. Akaba engabane y’omwanafunzi eli mw’evideo changwa akaba hali evideo omwanafunzi alonzeze kuderhako, akwanene kuyiganirako aliko arhayizihaga.

15. Olwimpo luyusa kuhwa, miniti 15 yakulikiraho mw’echila chigabi yakaba ngabane nguma changwa ebiri z’okurhabala abonviriza babone gurhe bakakolesa Echinwa cha Mungu omu kalamo kabo. Olekere nkabaga bibe eyi biyerekenwe okwindi-kwindi, ezila ngabane zakagabirwa abashamuka changwa abagwasi b’akasi bakwanene. Obulagirire bwe chibaga bowe bukwanene kugezwa n’omushamuka. Akaba echigabi eli nganiro, oli wageza echola chigabi akwanene kubaza ebibazo bihabirwe ahola. Akwanene kujira omurhondero guyufuhire, y’agwarha ebisanzi bitosheze by’okuganira oku binwa bikulu y’ahereza n’abonviriza orozo l’okushubiza oku bibazo. Akaba byahemerwe ok’omuntu abazwe ebibazo, kuli kwinja ashonere oku estrade ahali h’okumubaziza ahaliyikere.

  16. Efunzo lye Biblia lye Chibaga: Miniti 30. Eyila ngabane ekwanene kugezwa omushamuka okwanene. (Ah’abashamuka bagehere, yakahabwa omugwasi w’akasi okwanene, nka kubyahemere.) Ebaraza ly’abashamuka likwanene lilole bande bakwanene kuongoza Efunzo lye Biblia lye Chibaga. Abayemererwe bakwanene kuba eyi bakagala kuyimangira bwinja eyola nganiro omu kuntu egwarhe ech’emalire, ebisanzi ekwanene egezwemo bikengwe, akazize amandiko m’omusinji, n’okurhabala buli yeshi asiimire akachiro k’amawazo maganirwako moshi. Abayemererwe oku balema bageza eyola ngabane bayunguka n’obwerekezi bwahanirwe oku bilolere obulyo b’okuongoza echigabi ch’ebibazo n’ebishubizo. (w23.04 Echisanduku chili oku bukurasa bwa  24) Amango ebyalipangirwe kuyigwa omu boso byoshi byashamberweko, ahola eyi birhachihemere okulehya efunzo. Aha byakashobokana, ab’okuongoza efunzo n’ab’okusoma bakwanene kuyinja bagombolwa buli boso. Nk’omwimangizi we Mbuganano Akasi n’Akalamo abwene oku bihemere okuyufuhya efunzo, ahola ey’owayiongoza ye walola gurhe akayiyufuhya. Akachishoga oku bifungo biguma birhasomwaga.

17. Miniti 3. Omwimangizi we Mbuganano Akasi n’Akalamo akwanene kugalukira amawazo maganirirweko omu mbuganano makarhabala bwenene omu kalamo. Anakwanene kuderha oku bugeke ebyayigwa omu boso lyakulikiraho. Akaderha amazino m’abanafunzi bageza ebipindi omu boso lyakulikiraho, akaba hachili ebisanzi. Olekere nkabaga habe obwindi bwerekezi, omwimangizi akwanene kutangaza etangazo lyoshi ly’akaba ly’akamaro, na nka hali amaruba, akwanene kumasomera echibaga, omu binwa by’okumaliriza. Amatangazo m’ebindi abantu bakoomere kujira, nk’ebilolere emipango y’eneo z’amahubiri, emipango y’okukola obusafi, birhakwanene kutangazwa oku estrade, s’ahubwe bihemere okubibandika oku tabulo y’amatangazo. Nka bibonekene oku birhashobokana okusoma amatangazo n’amaruba moshi bihemere okusoma omu bisanzi bihaanirwe omu binwa by’okumaliriza byonyine, omwimangizi akahema abaherhe engabane omu chigabi Akalamo k’Omukristu baleke miniti migeke oku ngabane zabo nka kubihemere. (Olole  echifungo che 16 n’eche  19). Embuganano ekwanene kuhwa n’olwimpo n’esala.

18. Ku buli ngabane y’omwanafunzi, omwimangizi we Mbuganano Akasi n’Akalamo aherhe hofi muniti muguma g’okusingiza n’okuhanula omu kukulikiza esomo alihabirwe. Amango omwimangizi amayegereza engabane y’omwanafunzi, arhakwanene kuba aderha esomo lyage. Aliko, ey’omwanafunzi amala kugeza engabane yage, omwimangizi ayusa kuderha ebinwa bikwanene by’okumusingiza, anaja aderha esomo ly’omwanafunzi n’okuyerekana nka gurhe akolere bwinja elyola somo, changwa anayerekana omu bulyo bwinja bulagurhe na nka gurhe bihemere omwanafunzi ashube achihanganire elyola somo. Omwimangizi akashuba kuderha oku rhuntu rhuguma-rhuguma rhwagerere omu ngabane nk’abwene oku rhwakalerhera omwanafunzi changwa abonviriza enyungu. Ezindi mpanulo z’engenzi zirhengerere omu katabu Obuzigire Bukushunike, Okuyigiriza n’omu chitabu Shule ya Huduma, zakahaanwa oku mwanafunzi bwihunze enyuma w’embugunano changwa amandi mango. Zakaba mpanulo zilolere esomo aliri akola changwa elindi-lindi.—Y’obona eyindi myazi elolere akasi k’omwimangizi we Mbuganano Akasi n’Akalamo n’omuhanuzi mugwasi, olole   echifungo che 19,  24, na  25.

19. Nta chigabi chikwanene chirhalusye ebisanzi, chiro n’ebinwa by’omwimangizi we Mbuganano Akasi n’Akalamo. Chiro akaba okw’ebisanzi bya buli ngabane biyerekenwe omu Kaye lye Mbuganano Akasi n’Akalamo k’Omukristu​, birhali by’engenzi okugendereza kulehya engabane n’obola byoshi byalipangirwe byaderherwe chiro akaba okw’ebisanzi byalihaanirwe byowe birhahwere. Engabane z’abanafunzi zikwanene kuyimanzwa n’amayeri amango esa zachubukire. Nk’ezindi ngabane nazo zachubusize ebisanzi, Omwimangizi we Mbuganano Akasi n’Akalamo k’Omukristu changwa omuhanuzi mugwasi akwanene ahanule omu bwihunze abachubusaga ebisanzi. (Olole   echifungo cha 24 n’echa  25). Embuganano yoshi kuhira mu n’enyimpo n’esala ekwanene ehwere ku sa 1 na miniti 45.

20. Amango omwimangizi w’omuzunguluko amarhangula echibaga, embuganano ekwanene kugera nk’oku binayerekenwe oku Kaye lye Mbuganano Akasi n’Akalamo. Aliko Efunzo lye Biblia lye Chibaga ly’omuchigabi Akalamo k’Omukristu lyanagombolwa n’ejambo ly’akasi lya miniti 30 ly’omwimangizi w’omuzunguluko. Embere elyola jambo ly’akasi ligere, omwimangizi we Mbuganano Akasi n’Akalamo, akwanene kurhanga kuderha ebinwa by’okumaliriza oku byayigirwe kugerera ahola, anaderha oku bugeke ebinji bayiga omu boso lyakulikiraho, anageza amatangazo m’engenzi, anasoma amaruba mahemerwe okusoma; naho anaja ayegereza omwimangizi w’omuzunguluko. Hano ejambo ly’akasi, lihwa omwimangizi w’omuzunguluko anamalisa embuganano n’olwimpo achishogere. Akahamagala owindi-windi mwene-werhu yemalisage n’esala. Abanafunzi barhakwanene kugeza engabane omu mandi machumbi mageke-geke (salles secondaires) omu lulimi echibaga chinakolesa, amango m’entangulo y’omwimangizi. Nka hali echigusho, chakanajira embuganano chiro akaba omwimangizi alambagirire echibaga chiburhire echo chigusho. Aliko sasa, echola chigusho chikwanene kuba haguma n’echibaga amango m’ejambo ly’akasi ly’omwimangizi w’omuzunguluko.

21. Omu boso lye mbuganano y’omuzunguluko changwa ye eneo, nta mbuganano z’echibaga zikwanene kuba. Mukwanene kuyibusa echibaga okw’ebyalipangirwe kuyigwa oku mbuganano omu maboso mali nk’amola bikwanene kuyigwa omu funzo lya muntu yenyine changwa ly’omulala.

22. Amango olwibuko lwamarhogera omu lusiku lurhali lweboso, ahola eyi nta Mbuganano Akasi n’Akalamo yapangwa.

23. Omushamuka ebaraza ly’abashamuka lyachishogere ye kwanene kuba mwishingizi we Mbuganano Akasi n’Akalamo. Akwanene kuchihangana omu kuntu eyila mbuganano epangwe bwinja, enagezwe omu kukulikiza bunola bwerekezi. Akwanene kuganira bwinja haguma n’omuhanuzi mugwasi. Amango Ekaye lye Mbuganano Akasi n’Akalamo likala liliho, aho han’ahola anagaba engabane z’abanafunzi za myezi ebiri. (Olole  echifungo cha 3-16 n’echa  24) Amango ali agabira omwanafunzi engabane, akwanene kukengera oku myaka, obumenyi akaba agwerhe, n’okuntu agala kuganira bwinja oku bilolere omwazi ahabirwe. Akwanene kujira oko kon’oko amango ali agaba ebindi bigabi bye ngabane z’embuganano. Abanafunzi boshi bakwanene kuhabwa engabane zabo chiro ahubwe maboso masharhu embere olusiku bageza engabane luhike. Bazihabwa kugerera edokima Utumishi na Maisha ya Mukristo Karatasi ya Mugao (Engabane oku Mbuganano Akasi n’Akalamo k’Omukristu) (S-89). Omwishigizi we mbuganano akasi n’akalamo akwanene kuchizera okw’ekopi ye programe eli oku tabulo y’amatangazo. Ebaraza ly’abashamuka likwanene kuchishoga owindi mushamuka changwa omugwasi w’akasi w’okumugwasa kw’eyola ngabane. Aliko, abashamuka bonyine babakwanene kugaba engabane zirhali z’abanafunzi.

24. Buli boso mushamuka muguma akwanene kuyimangira Embuganano Akasi n’Akalamo. (Ah’abashamuka bagehere omugwasi w’akasi okwanene akayimangira, nka kubihemere.) Yenyine yekwanene kurheganya ebinwa by’omurhondero n’eby’okumaliriza, n’eby’okushambalako omu video okuntu wakahwanzisa enganiro. Akwanene kuyinja ayegereza ezindi ngabane zoshi, naye akanageza ezindi ngabane mw’eyola mbuganano nk’abashamuka barhalugire, n’ahanene ez’okuyerekana evideo zirhaganirwako. Buli ngabane emala kuhwa, eby’aderha birhakwanene kuleha. Ebaraza ly’abashamuka likwanene kulola bashamuka bahe bakwanene kuyimangira. Abakwanene banayinja bagombolana. Omu kukulikiza okuntu ehali y’echibaga eli, omwishingizi we Mbuganano Akasi n’Akalamo akayinja ayimangira kanene kulusha abandi bashamuka bakwanene. Akaba omushamuka akwanene kuongoza Efunzo lye Biblia lye Chibaga, ahola byakashoboka ey’akanaba mwimangizi. Aliko, berhu we, mubike omu bwenge ku bihemere omwimangizi we mbuganano asingize anahanule oku buzigire n’omu kuntu kwakarhabala bwenene abanafunzi bagezeze engabane. Kandi bihemere omwimangizi achihangane embuganano ehwe oku kasanzi. (Olole  echifungo che 17 n’eche  19). Nk’omwimangizi alonzeze, na nka hali efasi etosheze, eyindi mikro yakayimanzwa eburhambi oku estrade, analema ahamagalira k’owageza engabane ekulikireho. Mwene-werhu okala geza engabane naye anaba achirheganya oku chinara ch’omwigiriza. Kandi, omwimangizi akachishoga akaba ayikala haguma n’ameza oku estrade, amango m’obusomi bwe Biblia b’omwanafunzi, n’omuchigabi Ochihaane Loshi omu Kasi k’Okuhubiri. Okujira ntyo kwakachungula ebisanzi.

25. Nka bishobokene, kuli kwinja okukolesa omushamuka okomeere okuyigiriza bwinja yebage muhanuzi mugwasi. Akasi kage kali k’okuhanula abashamuka n’abagwasi b’akasi omu bwihunze nka bihemereko, oku bilolere engabane zoshi bakageza oku Mbuganano Akasi n’Akalamo, ejambo ly’abantu boshi, okuongoza changwa okusoma oku Funzo lye Biblia lye Chibaga changwa Efunzo ly’Omunara g’Omulanzi. (Olole  echifungo che 19.) Nk’omu chibaga muli bashamuka banene bayinji kuderha n’okuyigiriza bwinja, buli mwaka abashamuka bakayinja bahira h’owindi-windi muhanuzi mugwasi. Birhali mpu mpaka omuhanuzi mugwasi ayinje ahanula ku buli ngabane yanagerere.

26. Omu kulola gurhe abanafunzi bali bangana, echibaga chakapanga ngabane ziguma z’abanafunzi zi- yinje zagezwa omu mandi machumbi mageke-geke (salles secondaires). Buli chumbi ligeke-geke likwanene kugwarha omuhanuzi okwanene, na nka bishobokene kwakaba kwinja abe mushamuka. Nka bihemereko omugwasi w’akasi okwanene akakoleswa. Ebaraza ly’abashamuka lye likwanene kuchishoga bande baherhe obuhashe b’okujira ntyo, n’akaba bihemere abakoleswa bayinje bagombolana. Omuhanuzi akwanene akolese obwerekezi buhanirwe omu  chifungo che 18. Nka hali abanafunzi bahabirwe engabane z’okugeza omu machumbi mageke-geke, bakwanene kubwirwa bajemo enyuma w’engabane Obuhirhi bwe Kiroho y’omu chigabi Obuchire b’omu Chinwa cha Mungu. Bakwanene kugaluka haguma n’abandi omu chumbi lizibu-zibu, echigabi Ochihaane Loshi omu Kasi k’Okuhubiri chiyusa kuhwa. Nka hali evideo yaganirwako, akaba byakashobokana, abanafunzi bali omu machumbi mageke-geke bakwanene kulola changwa banayunviriza evideo n’enganiro eli yagera omu chumbi lizibu-zibu eyi bowe banali omu chumbi ligeke. Nka birhashobokene, omuhanuzi akwanene ayerekane evideo kugerera echikoleso aherhe ch’okuyerekana evideo, naho banayiganirako. Amango omwanafunzi w’obuzinda amamala kugeza engabane yage, boshi bakwanene kushuba kugaluka omu chumbi lizibu-zibu yibamaliriza embuganano.

27. Evideo zachishogerwe zagenda zakoleswa kw’eyila mbuganano. Evideo z’oku mbuganano y’omu boso zayinja zabonekana kugerera aplikasiyo JW Library JW Library^®.

© 2023 Watch Tower Bible and Tract Society of Pennsylvania

S-38-HVU 11/23