Marhegesi manene oku gulu bahemere oku abuntu baleme balekerana entambu, banalahiza okubuganana omu bigusho. Abahamirizi ba Yehova bahigirire okukenga amola marhegeko, aliko banagenderere kuharamya Yehova haguma eyi banakengere amahano m’okurhayahukizanya. Yi bigalikana ntyo, ebibaga bili byakolesa amaaplikasyo m’evideo conference, nka Zoom, omu kujira embuganano.

Yi rhugenderera kujira embuganano zerhu oku kahunda, Ebaraza Lirhambwire lyayemera okukolesa enshololo omu kufungulira ebibaga amakonte oku zoom. Echola charhabere bibaga biguma birhakagalire kupata efuranga z’okujuha banyin’ezola video conference zinagulwa dolare 15 kugera ku 20 changwa kurhaluka. Ebyola bibaga byaliri byakolesa amandi maaplikasiyo ma busha maheba haguma bantu bageke bonyine, changwa marhali gwerhe obulanzi bukomere. Ebibaga byoshi bili byakolesa ekonte y’olubaga lwa Yehova ya Zoom, byakagala kulanga eyola konte, na bantu banene bakachikonekte ku buli mbuganano. Kugera buno, bibaga birhalukire 65 000 omu bihugo birhalukire 170 bili byakolesa eyola konte.

Echibaga che Kairagi ch’omu Manado, Enoro ye Sulawesi, omu Indonesie, balekere kukolesa eaplikasiyo y’evideo conference, yi bakolesa ekonte y’olubaga lwa Yehova ya Zoom. Mwene-werhu Hadi Santoso aderhere ntya: “Chiro na bene-berhu na bali-berhu barhaliyinji kukolesa bwinja ebikoleso by’echielektronike, bali basiimira embuganano, ahanene bulala birhali byabahema mpu bachikonekte kabiri-kabiri oku mbuganano nguma.”

Buzinda mwene-werhu Jijón, mushamuka w’echibaga che Guayacanes Oeste omu Guayaquil, e Equateur, aderhere ntya: “Bulala bene-berhu na bali-berhu barhagwerhe furanga zinene, kweri byakakomerere bibaga biguma okulema byajuha banyina eaplikasiyo Zoom y’echibaga choshi chigale kuja oku mbuganano. Lero, kugerera ekonte y’olubaga lwa Yehova ya Zoom, bili byagalikana oku bantu banene bachikonekte oku mbuganano. Rhwakalalika ngasi yeshi olonzeze eyi rhurhanayubahire mpu balahirira baguma kuchikonekte.”

Mwene-werhu Johnson Mwanza, mushamuka omu chibaga che Ngwerere Noro e Lusaka, omu Zambie, ayandikire: “Bene-berhu na bali-berhu banene bali bazigana kuderha mpu: ‘omupango gw’ekonte y’olubaga lwa Yehova ya Zoom, gurharhumaga rhwachiyunva rhuli hofi na bene-berhu na bali-berhu konyine, si byanarhumire rhwabona oku Yehova arhuzigiire anarhulagireko.’”

Eyila konte y’olubaga lwa Yehova eli yakolesa efuranga zasigere oku zirhwakoseze omu kurhabala abali omu chinjira. Ezola furanga zili zabonekana kugerera enshololo z’oku bulonza zili zahaanwa omu kukola akasi oku gulu lyoshi. Zinene mw’ezola nshololo zili zahaanwa kugerera donate.pr418.com. Koko bwenene k’ogola murhima gwinja mugwerhe g’okuhaana nshololo, zinali zarhabala bene-berhu bapatirwe n’echinjira omu gulu lyoshi.—2 Wakorinto 8:14.