Levitico 27:1-34
27 Nagsiling pa si Jehova kay Moises:
2 “Isiling mo sa mga Israelinhon, ‘Kon ang isa ka tawo maghimo sing pinasahi nga panaad+ nga maghatag sia sing kantidad nga katumbas sang husto nga bili sang isa ka tawo* para kay Jehova,
3 ang husto nga bili sang isa ka lalaki nga 20 tubtob 60 ka tuig ang edad, 50 ka siklo* nga pilak suno sa talaksan nga timbangan sang balaan nga duog.*
4 Apang kon babayi, ang husto nga bili, 30 ka siklo.
5 Kon ang edad 5 tubtob 20 ka tuig, ang husto nga bili sang lalaki, 20 ka siklo, kag ang babayi, 10 ka siklo.
6 Kon ang edad isa ka bulan tubtob lima ka tuig, ang husto nga bili sang lalaki, lima ka siklo nga pilak, kag ang babayi, tatlo ka siklo nga pilak.
7 “‘Kon ang edad 60 ka tuig pataas, ang husto nga bili sang lalaki, 15 ka siklo, kag ang babayi, 10 ka siklo.
8 Apang kon ang nagapanaad imol kag indi niya masarangan ang husto nga bili,+ magtindog sia sa atubangan sang saserdote kag isiling sang saserdote kon pila ang iya bili. Sumahon sang saserdote kon pila ang masarangan sang tawo nga nagapanaad.+
9 “‘Kon ang ginpanaad isa ka sapat nga mahimo ihalad kay Jehova, ang bisan ano nga ihatag kay Jehova mangin balaan.
10 Indi niya pag-islan ukon bayluhan ang maayo sing malain ukon ang malain sing maayo. Apang kon islan gid man niya ang sapat sing isa pa ka sapat, ang orihinal nga sapat kag ang gin-ilis sa sini mangin balaan.
11 Kon ang sapat indi matinlo+ kag indi ini mahalad kay Jehova, dalhon niya ang sapat sa atubangan sang saserdote.
12 Ang saserdote ang magasiling kon pila ang bili sini, kon bala maayo ini ukon malain. Ang bili nga isiling sang saserdote amo ang sundon.
13 Apang kon luyag niya ini gawaron, bayaran niya ang husto nga bili kag madugang pa sia sing 20 porsiento sang bili sini.+
14 “‘Kon pakabalaanon sang isa ka tawo ang iya balay bilang butang nga balaan para kay Jehova, isiling sang saserdote kon pila ang bili sini, kon bala maayo ini ukon malain. Ang saserdote ang magasiling kon pila ang bili sini.+
15 Apang kon luyag gawaron sang tawo ang iya balay nga ginpakabalaan niya, bayaran niya ang husto nga bili sini kag madugang pa sia sing 20 porsiento sang bili sini, kag mabawi na niya ini.
16 “‘Kon pakabalaanon sang isa ka tawo ang bahin sang iya uma para kay Jehova, ang bili sini magadepende sa kadamuon sang binhi nga ginasab-ug sa sini: 50 ka siklo nga pilak ang bili sang isa ka homer* sang sebada.
17 Kon pakabalaanon niya ang iya uma sa Tuig sang Kahilwayan,+ ang ginsuma nga bili sini amo ang sundon.
18 Kon pakabalaanon niya ang iya uma pagligad na sang Tuig sang Kahilwayan, sumahon sang saserdote ang bili depende sa mga tinuig nga nabilin tubtob sa masunod nga Tuig sang Kahilwayan, dayon buhinan niya ang husto nga bili sini.+
19 Apang kon gawaron sang isa ka tawo ang uma nga iya ginpakabalaan, bayaran niya ang husto nga bili sini kag madugang pa sia sing 20 porsiento sang bili sini, kag iya gihapon ang iya uma.
20 Kon indi niya paggawaron ang uma kag ginbaligya ang uma sa iban nga tawo, indi na ini magawad.
21 Sa Tuig sang Kahilwayan, ang uma idedikar kay Jehova kag mangin balaan ini para sa iya. Mangin propiedad ini sang mga saserdote.+
22 “‘Kon pakabalaanon sang isa ka tawo para kay Jehova ang uma nga ginbakal niya gani indi ini bahin sang iya palanublion,+
23 sumahon sang saserdote ang bili sini tubtob sa Tuig sang Kahilwayan, kag bayaran niya ang husto nga bili sa sina nga adlaw.+ Balaan ini para kay Jehova.
24 Sa Tuig sang Kahilwayan, ibalik ang uma sa tawo nga ginbaklan niya sini, nga amo ang tag-iya sang duta.+
25 “‘Ang tagsa ka bili sumahon suno sa talaksan nga timbangan sang balaan nga duog. Ang isa ka siklo katumbas sang 20 ka gerah.*
26 “‘Apang, indi dapat pagpakabalaanon sang bisan sin-o ang panganay sang mga sapat, bangod ang panganay para kay Jehova.+ Baka man ini ukon karnero, iya na ini ni Jehova.+
27 Kon halin ini sa indi matinlo nga mga sapat kag gawaron niya ini suno sa husto nga bili, bayaran niya ang bili sini kag madugang pa sia sing 20 porsiento sang bili sini.+ Apang kon indi ini paggawaron, ibaligya ini suno sa husto nga bili sini.
28 “‘Apang indi mahimo ibaligya ukon gawaron sang isa ka tawo ang butang nga gindedikar niya sing bug-os* kay Jehova, tawo man ini ukon sapat ukon uma niya. Ang tanan nga butang nga gindedikar kay Jehova balaan gid para iya.+
29 Kag indi man magawad ang ginpakamalaut* nga tawo nga dapat laglagon.+ Dapat sia patyon.+
30 “‘Iya ni Jehova ang kada ikanapulo nga bahin* sang duta,+ bisan ang halin sa patubas sang uma ukon sa bunga sang kahoy. Balaan ini para kay Jehova.
31 Kon luyag gawaron sang isa ka tawo ang iya ikanapulo nga bahin, bayaran niya ang bili sini kag madugang pa sia sing 20 porsiento sang bili sini.
32 Ang ikanapulo nga bahin sang mga baka kag mga karnero dapat ihatag kay Jehova. Kon ginaisip sang manugbantay ang iya mga sapat* dapat niya painon ang tagsa ka ikanapulo nga sapat* para sa Dios. Ang tagsa ka ikanapulo nga sapat butang nga balaan.
33 Indi niya pagtan-awon kon bala maayo ini ukon malain, kag indi niya ini pag-islan. Apang kon islan gid man niya ini, ang orihinal nga sapat kag ang gin-ilis sa sini mangin balaan.+ Indi ini magawad.’”
34 Amo ini ang mga sugo nga ginhatag ni Jehova kay Moises para sa mga Israelinhon sa Bukid Sinai.+
Footnote
^ Ukon “kalag.”
^ Ang isa ka siklo katumbas sang 11.4 ka gramo. Tan-awa ang Apendise B14.
^ Ukon “suno sa balaan nga siklo.”
^ Ang isa ka homer katumbas sang 220 ka litro. Tan-awa ang Apendise B14.
^ Ang isa ka gerah katumbas sang 0.57 ka gramo. Tan-awa ang Apendise B14.
^ Ukon “gindedikar sa kalaglagan.”
^ Ukon “gindedikar.”
^ Ukon “kada diesmos.”
^ Sa pag-isip sang manugbantay sang iya mga sapat, ginapaagi niya sila sa idalom sang iya sungkod.
^ Ukon “ulo.”
