Ano ang Paglaum sang Napatay nga mga Hinigugma?

“Kon ang tawo mapatay, mabuhi pa bala sia?” pamangkot ni Job sang nagligad. (Job 14:​14, King James Version) Ayhan ikaw, man, namangkot nahanungod sini. Ano ang batyagon mo kon mahibaluan mo nga posible nga magkit-anay kamo sang imo mga hinigugma diri mismo sa duta sa idalom sang labing maayo nga kahimtangan?

Ti, ang Biblia nagasaad: “Ang imo mga patay magakabuhi. . . . Magabangon sila.” Kag ang Biblia nagasiling man: “Ang mga matarong magapanubli sang duta, kag magapuyo dira sing dayon.”​—⁠Isaias 26:​19; Salmo 37:⁠29.

Agod may tunay nga pagsalig sa sinang mga saad, dapat naton masabat ang pila ka sadsaran nga pamangkot: Ngaa ang mga tawo nagakapatay? Diin ang mga patay? Kag paano kita makapat-od nga mabuhi sila liwat?

Kamatayon, kag Kon Ano ang Nagakatabo Kon Mapatay Kita

Ginaathag sang Biblia nga wala pagtuyua sang Dios nga ang mga tawo mapatay. Gintuga niya ang nahaunang tawhanon nga paris nga si Adan kag si Eva, ginbutang sila sa dutan-on nga paraiso nga ginatawag Eden, kag ginsugo sila nga magpanganak kag magpasangkad sang ila puluy-an nga Paraiso sa bug-os nga duta. Mapatay lamang sila kon lapason nila ang iya mga sugo.​—⁠Genesis 1:​28; 2:​15-17.

Kulang sing apresasyon sa kalulo sang Dios, si Adan kag si Eva naglapas kag ginpabayad sang ginhatag nga silot. “Magabalik ka sa duta,” siling sang Dios kay Adan, “kay ginkuha ka sa iya. Yab-ok ka kag sa yab-ok magabalik ka.” (Genesis 3:19) Sang wala pa sia gintuga si Adan wala nagaluntad; yab-ok sia. Kag bangod sang iya pagkadimatinumanon, ukon sala, si Adan ginpamatbatan nga magbalik sa yab-ok, sa kahimtangan nga wala na nagaluntad.

 Kon amo ang kamatayon wala sing kabuhi. Ang Biblia nagahatag sing paanggid: “Ang bayad sang sala kamatayon, apang ang dulot nga ginahatag sang Dios kabuhi nga walay katapusan.” (Roma 6:23) Sa pagpakita nga ang kamatayon amo ang kahimtangan sang bug-os nga pagkawala sing pangalibotan, ang Biblia nagasiling: “Kay ang buhi nakahibalo nga mapatay sila; apang ang patay wala makahibalo sang bisan ano.” (Manugwali 9:5) Kon ang isa mapatay, ang Biblia nagapaathag: “Ang iya espiritu nagaguwa, nagabalik sia sa duta; sa amo nga adlaw nagakawala ang iya mga hunahuna.”​—⁠Salmo 146:​3, 4.

Apang, tungod si Adan kag si Eva lamang ang naglapas sina nga sugo sa Eden, ngaa kita tanan nagakapatay? Bangod kita tanan natawo sa tapos maglapas si Adan, kag gani napanubli naton ang sala kag kamatayon gikan sa iya. Kay ang Biblia nagapaathag: “Paagi sa isa ka tawo [si Adan] nagsulod ang sala sa kalibutan kag paagi sa sala ang kamatayon, kag gani ang kamatayon naglaton sa tanan nga tawo.”​—⁠Roma 5:​12; Job 14:⁠4.

Apang ayhan ang isa mamangkot: ‘Indi bala nga ang mga tawo may dimamalatyon nga kalag nga wala nagakapatay?’ Madamo ang nagatudlo sini, kag nagasiling nga ang kamatayon amo ang ganhaan pakadto sa isa pa ka kabuhi. Apang ina nga ideya wala maghalin sa Biblia. Sa baylo, ang Pulong sang Dios nagatudlo nga ikaw amo ang kalag, nga ang imo kalag amo gid ikaw, upod ang imo tanan nga mga kinaiya sa pisikal kag kaisipan. (Genesis 2:​7; Jeremias 2:​34; Hulubaton 2:10) Ang Biblia nagasiling man: “Ang kalag nga nagapakasala​—⁠mapatay.” (Ezequiel 18:4) Ang Biblia wala nagatudlo nga ang tawo may dimamalatyon nga kalag nga wala nagakapatay.

 Kon Paano ang mga Tawo Mabuhi Liwat

Sa tapos makasulod ang sala kag kamatayon sa kalibutan, ginpahayag sang Dios nga tuyo niya nga ang patay ipasag-uli sa kabuhi paagi sa pagkabanhaw. Busa ang Biblia ­nagapaathag: “Si Abraham . . . nagkabig nga ang Dios makasarang sa pagbanhaw [sang iya anak nga si Isaac] bisan gikan sa mga patay.” (Hebreo 11:​17-19) Husto ang pagsalig ni Abraham, kay ang Biblia nagasiling nahanungod sa Labing Gamhanan: “Indi sia Dios sang mga patay, kundi sang mga buhi, kay ang tanan nagakabuhi sa iya.”​—⁠Lucas 20:​37, 38.

Huo, ang Dios nga Labing Gamhanan wala lamang sing gahom kundi sing handum man nga banhawon ang mga tawo nga ginapakamaayo niya. Si Jesucristo mismo nagsiling: “Dili kamo matingala sini, kay ang takna magaabot nga ang tanan nga yara sa mga lulubngan magapamati sang iya tingog kag magaguwa.”​—⁠Juan 5:​28, 29; Binuhatan 24:⁠15.

Wala madugay sa tapos ini mahambal, nasugata niya ang isa ka lubong paguwa sa Israelinhon nga siudad sang Nain. Ang patay nga pamatan-on nga lalaki amo lamang ang anak sang balo. Sang makita ang iya daku nga kasubo, naluoy si Jesus. Gani, nagahambal sa bangkay, sia nagsugo: “Pama­tan-on,  nagasiling ako sa imo, Bangon ka!” Kag ang patay nagbangon, kag ginhatag sia ni Jesus sa iya iloy.​—⁠Lucas 7:​11-17.

Kaangay sa kaso sinang balo, may daku man nga kasubo sang ginduaw ni Jesus ang puluy-an ni Jairo, ang nagadumala nga opisyal sang Judiyong sinagoga. Ang iya 12-anyos nga dalagita napatay. Apang sang mag-abot si Jesus sa puluy-an ni Jairo, nagpalapit sia sa bangkay kag nagsiling: “Inday, bangon ka.” Kag nagbangon sia!​—⁠Lucas 8:​40-56.

Sang ulihi, ang abyan ni Jesus nga si Lasaro napatay. Sang mag-abot si Jesus sa iya balay, si Lasaro apat ka adlaw na nga patay. Bisan pa nga nasubuan sing daku, ang iya utod nga si Marta nagpabutyag sing paglaum, nga nagasiling: “Nakahibalo ako nga mabanhaw sia sa pagkabanhaw sa katapusan nga adlaw.” Apang nagkadto si Jesus sa lulubngan, nagsugo nga kuhaon ang bato, kag nagsiling: “Lasaro, guwa ka!” Kag nagguwa sia!​—⁠Juan 11:​11-44.

Hunahunaa karon ang nahanungod sini: Ano ang kahimtangan ni Lasaro sa sulod sadtong apat ka adlaw nga patay sia? Wala magsiling si Lasaro nga nagpalangit sia ukon nagpaimpierno sang pag-antos, nga kuntani ginsugid niya kon matuod. Wala, si Lasaro bug-os nga wala sing pangalibotan sa kamatayon kag kuntani nagpabilin nga amo sini tubtob sa “pagkabanhaw sa katapusan nga adlaw” kon wala sia sadto pagbanhawa ni Jesus.

Matuod nga ining mga milagro ni Jesus umalagi lamang ang benepisyo, bangod ang mga ginbanhaw niya napatay liwat. Apang, naghatag sia sing pamatuod 1,900 ka tuig ang nagligad nga, paagi sa gahom sang Dios, ang patay sarang gid mabuhi liwat! Gani paagi sa iya mga milagro ginpakita ni Jesus sa diutay nga kasangkaron kon ano ang matabo sa duta sa idalom sang Ginharian sang Dios.

Kon ang Isa nga Hinigugma Mapatay

Kon ang kaaway nga kamatayon magasalakay, ang imo kasubo mangin daku, bisan pa nga nagalaum ka sa pagkabanhaw. Si Abraham may pagtuo nga ang iya asawa mabuhi  liwat, apang mabasa naton nga “si Abraham nag-abot sa paglalaw kay Sara kag sa paghibi sa iya.” (Genesis 23:2) Kag kamusta si Jesus? Sang mapatay si Lasaro, “natandog sia sing tudok sa espiritu kag nalisang,” kag sang ulihi “naghibi” sia. (Juan 11:​33, 35) Gani, kon ang isa nga hinigugma mo mapatay, indi pagpakita sing kaluyahon ang maghibi.

Kon ang isa ka bata mapatay, mabudlay ini labi na sa iloy. Gani ginakilala sang Biblia ang mapait nga kasubo nga mabatyagan sang isa ka iloy. (2 Hari 4:27) Sa pagkamatuod, mabudlay man ini para sa namatyan nga amay. “O kabay pa kuntani nga ako napatay tungod sa imo,” panalabiton ni Hari David sang mapatay ang iya anak nga si Absalom.​—⁠2 Samuel 18:⁠33.

Apang, bangod may pagsalig ikaw sa pagkabanhaw, ang imo kasubo indi mangin wala sing untat. Subong sang ginasiling sang Biblia, “indi kamo magkasubo subong sang iban nga walay paglaum.” (1 Tesalonica 4:13) Sa baylo, magasuod ikaw sa Dios sa pangamuyo, kag ang Biblia nagasaad nga “sia magaalay-ay sa imo.”​—⁠Salmo 55:⁠22.

Luwas kon tuhay ang ginapakita, ang tanan nga mga kinutlo sa Biblia gikan sa New World Translation of the Holy Scriptures.