Kabuhi sa Mahidaiton nga Bag-ong Kalibutan

Kon ginatan-aw mo ang danyag sa sining tract, ano ang imo balatyagon? Wala bala nagakalangkag ang imo tagipusuon sa paghidait, kalipay, kag kabuganaan nga makita diri? Pat-od nga nalangkag ini. Apang isa lamang bala ka damgo, ukon pantasya, ang magpati nga ining mga kahimtangan magaluntad sa duta?

Ayhan amo sina ang ginahunahuna sang kalabanan nga tawo. Ang nagakatabo sa karon amo ang inaway, krimen, gutom, balatian, katigulangon​—⁠pagsambit sa pila lamang. Apang may rason para maglaum. Nagatan-aw sa palaabuton, ang Biblia nagasugid tuhoy sa “bag-ong mga langit kag bag-ong duta nga ginahulat naton suno sa saad [sang Dios], kag sa sini magapuyo ang pagkamatarong.”​—⁠2 Pedro 3:​13; Isaias 65:⁠17.

Ining “bag-ong mga langit” kag “bag-ong duta,” suno sa Biblia, indi isa ka bag-ong materyal nga mga langit ukon bag-ong literal nga duta. Ang pisikal nga duta kag mga langit ginhimo nga himpit, kag ang Biblia nagasiling nga magapabilin ini sing dayon. (Salmo 89:​36, 37; 104:5) Ang “bag-ong duta” mangin amo ang matarong nga katilingban sang mga tawo nga magapuyo sa duta, kag ang “bag-ong mga langit” mangin amo ang himpit langitnon nga ginharian, ukon pangulohan, nga magagahom sa ibabaw sining dutan-on nga katilingban sang mga tawo. Apang realistiko bala ang magpati nga ang “bag-ong duta,” ukon mahimayaon nga bag-ong kalibutan, posible?

Bueno, binagbinaga ang kamatuoran nga inang halandumon nga mga kahimtangan bahin anay sang orihinal nga katuyuan sang Dios para sa sini nga duta. Ginbutang niya ang nahaunang tawhanon nga mag-asawa sa dutan-on nga Paraiso sang Eden kag ginhatagan sila sing matahom nga tulumanon: “Magmabungahon kag magbuad kag magtugob sang  duta kag magpakaagalon sa iya.” (Genesis 1:28) Huo, tuyo sang Dios nga magpanganak sila kag sa ulihi magapalapnag sang ila Paraiso sa bug-os nga duta. Bisan pa ginpili nila sang ulihi ang maglapas sa Dios, sa amo indi na nagakabagay nga mabuhi sing dayon, ang orihinal nga katuyuan sang Dios wala magliwat. Kag tumanon ini sa bag-ong kalibutan!​—⁠Isaias 55:⁠11.

Sa katunayan, kon ginapangamuyo mo ang Pangamuyo sang Ginuo, ukon ang Amay Namon, nga nagapangabay nga magkari ang Ginharian sang Dios, ginapangamuyo mo nga dulaon sang iya langitnon nga pangulohan ang kalautan sa duta kag maggahom sa sining bag-ong kalibutan. (Mateo 6:9) Kag makasalig kita nga sabton sang Dios ina nga pangamuyo, kay ang iya Pulong nagasaad: “Ang mga matarong magapanubli sang duta, kag magapuyo dira sing dayon.”​—⁠Salmo 37:⁠29.

Kabuhi sa Bag-ong Kalibutan sang Dios

Ang Ginharian sang Dios magahatag sing mga benepisyo sa duta nga wala sing kaanggid, magahimo sang tanan nga maayo nga gintuyo sang Dios sa ginsuguran para agumon sang iya katawhan sa duta. Ang dumot kag pagkamaynadampigan wala na, kag sa ulihi ang tagsatagsa sa duta mangin matuod nga abyan sang tanan. Sa Biblia, ang Dios nagasaad nga iya ‘patunungon ang inaway tubtob sa ukbong sang duta.’ “Ang pungsod indi magbayaw sing espada batok sa pungsod, kag indi na sila magtuon sing inaway.”​—⁠Salmo 46:​9; Isaias 2:⁠4.

Sa ulihi ang bug-os nga duta himuon nga daw kaangay sang katamnan nga paraiso nga kahimtangan. Ang Biblia nagasiling: “Ang kamingawan kag ang duta nga kigas magakasadya, kag ang desyerto magakalipay kag magapamulak subong sang rosa. . . . Kag ang mga tubig magaguwa sa kamingawan, kag ang mga ilig sa desyerto. Kag ang nagaigpat nga balas mangin linaw, kag ang kigas nga duta mga tuburan sang tubig.”​—⁠Isaias 35:​1, 6, 7.

May rason gid nga magkalipay sa Paraiso nga duta. Indi na paggutumon pa ang mga tawo bangod sang kakulang sing kalan-on. “Ang duta magahatag sang iya patubas,” siling sang  Biblia. (Salmo 67:​6; 72:16) Matigayon sang tanan ang bunga sang ila pagpangabudlay, kay ang aton Manunuga nagasaad: “Magatanum sila sing mga ulubasan kag magakaon sang bunga nila. . . . indi sila magtanum kag iban ang magakaon.”​—⁠Isaias 65:​21, 22.

Sa bag-ong kalibutan sang Dios, ang mga tawo indi na magaginutok sa dalagku nga mga apartment ukon sa gubaguba nga mga slum, kay ang Dios nagtuyo: “Magapatindog sila sing mga balay kag puy-an sila . . . Indi sila magpatindog kag iban ang magapuyo.” Ang Biblia nagasaad man: “Indi sila magpangabudlay sa walay pulos.” (Isaias 65:​21-23) Gani ang mga tawo may yara mapatubason kag makaalayaw nga kabuhi. Ang kabuhi indi mangin makatalaka.

Sa ulihi, ipasag-uli sang Ginharian sang Dios ang mahidaiton nga kaangtanan nga nagluntad anay sa katamnan sang Eden sa ulot sang mga sapat, kag sa ulot sang mga sapat kag mga tawo. Ang Biblia nagasiling: “Ang lobo magapuyo kaupod sang kordero, kag ang leopardo magaluko kaupod sang kanding nga tinday, kag ang tinday nga baka kag ang leon nga totoy kag ang pinatambok magatingob; kag ang bata magatuytoy sa ila.”​—⁠Isaias 11:​6-9; Oseas 2:⁠18.

Handurawa lamang, sa Paraiso nga duta ang tanan nga balatian kag mga sablag sa lawas pagaayuhon man! Ang Pulong sang Dios nagapasalig sa aton: “Wala sing pumuluyo ang magasiling: ‘Nagamasakit ako.’ ” (Isaias 33:24) “Pahiran [sang Dios] ang tagsa ka luha sa mga mata nila, kag wala na sing kamatayon, ukon kalisud ukon paghibi ukon kasakit pa. Kay ang nahaunang mga butang nagtaliwan.”​—⁠Bugna 21:⁠4.

Kon Paano Ini Posible Para sa Imo

Pat-od nga ang imo tagipusuon napukaw sang mga saad  sang Dios nahanungod sa kabuhi sa iya bag-ong kalibutan sang pagkamatarong. Kag bisan pa ginakabig sang iban nga imposible ang katumanan sina nga mga pagpakamaayo, posible gid ini paagi sa kamut sang aton mahigugmaon nga Manunuga.​—⁠Salmo 145:​16; Miqueas 4:⁠4.

Sa pagkamatuod, may mga kinahanglanon nga dapat himuon agod mabuhi kita sing dayon sa nagapakari nga Paraiso sa duta. Ginpakita ni Jesus ang panguna, nga nagasiling sa pangamuyo sa Dios: “Ini amo ang kabuhi nga walay katapusan, ang pagkuha nila sing ihibalo tuhoy sa imo, ang lamang matuod nga Dios, kag tuhoy sa isa nga imo ginpadala, si Jesucristo.”​—⁠Juan 17:⁠3.

Gani kon luyag gid naton magkabuhi sa bag-ong kalibutan sang Dios, dapat anay naton ton-an ang kabubut-on sang Dios kag nian himuon ini. Kay ini kamatuoran: Ini nga “kalibutan nagataliwan kag ang kailigbon sini, apang ang nagahimo sang kabubut-on sang Dios magapadayon sa gihapon,” agod agumon sing dayon ang mga pagpakamaayo nga ginapasagahay sang aton mahigugmaon nga Manunuga.​—⁠1 Juan 2:⁠17.

Luwas kon tuhay ang ginapakita, ang tanan nga mga kinutlo sa Biblia gikan sa New World Translation of the Holy Scriptures.