Ang Gugma nga Mas Mabaskog Pa sa Bagyo!
Ang Gugma nga Mas Mabaskog Pa sa Bagyo!
Sang gindalasa sang Bagyo Katrina kag Rita ang Gulf Coast sang Estados Unidos sang 2005, daku gid ang halit kag madamo nga tawo ang napatay. Lakip sa mga nabiktima amo ang linibo ka Saksi ni Jehova.
Sa direktiba sang sanga talatapan sang mga Saksi ni Jehova sa Estados Unidos, nanghikot gilayon ang mga komite nga magabulig sa mga biktima. Sa Louisiana, nagpahamtang sila sing 13 ka tilipunan sang mga boluntaryo, 9 ka bodega, kag 4 ka gasolinahan. Mga 80,000 kilometros kuadrados ang kalaparon sang duog nga ila buligan. Nag-abot ang mga 17,000 ka Saksi gikan sa tanan nga bahin sang Estados Unidos kag sa 13 ka iban pa nga pungsod sa pagbulig kag pagkay-o sang mga naguba. Ang mga resulta sini nagapakita nga mas mabaskog pa ang Cristianong gugma sa mga puersa sang kinaugali.—1 Corinto 13:1-8.
Ginkay-o sang mga boluntaryo ang kapin sa 5,600 ka balay sang mga Saksi kag 90 ka Kingdom Hall, nga amo ang duog tilipunan sang mga Saksi ni Jehova. Ginapakita sini nga kadamuon nga nakay-o ang halos tanan nga balay sang mga Saksi kag mga Kingdom Hall nga naguba. Bilang pagtuman sa Galacia 6:10, nga nagapalig-on sa mga Cristiano nga ‘maghimo kon ano ang maayo sa tanan,’ ginbuligan man sang mga Saksi ni Jehova ang madamo nga indi Saksi.
KINAHANGLAN ang personal nga sakripisyo sa pagbulig sa mga biktima, apang madamo man ini sing padya. Binagbinaga ang mga komento sang pito ka Saksi nga amo ang nagadumala sa nanuhaytuhay nga bahin sang hilikuton.
“Pinasahi nga Bahin sang Akon Kabuhi”
Robert: Pinasahi nga bahin sang akon kabuhi ang pag-alagad subong katapo sang komite sa pagbulig sa mga biktima. Sa edad nga 67, ako ang pinakatigulang nga katapo sang komite. Nagaalagad ako upod sa daku nga grupo sang mga boluntaryo, nga ginalakipan sang madamo nga pamatan-on nga Saksi nga aktibo sa pag-alagad sa Dios. Makapalig-on gid nga makita ang mga pamatan-on nga nagasakripisyo kag nagapakita sang ila gugma kay Jehova nga Dios kag sa ila mga masigka-Cristiano!
Maayo gid nga bulig ang akon asawa nga si Veronica. Agod makaboluntaryo kami, ginsuportahan niya ang akon desisyon nga mag-untat sa trabaho nga ginahimo ko sa sulod sang 40 ka tuig. Ang amon obra subong amo ang pagpaninlo sing mga opisina sing isa ka gab-i kada semana. Nakatuon kami sa pagpaigo sang amon diutay nga kinitaan kag ginpasimple namon ang amon kabuhi. Sang nagtrabaho kami upod sa pareho namon nga nagasimba kay Jehova, labi namon nga naapresyar ang kahulugan sang pag-una sang Ginharian sang Dios sa amon kabuhi. (Mateo 6:33) Pirme namon masaksihan ang pag-atipan ni Jehova sa iya katawhan.
Frank: Ako ang nagatatap sa paghanda sing mga pagkaon sa tilipunan sang mga boluntaryo sa Baton Rouge. Sang primero, agod mapakaon ang mga boluntaryo, kinahanglan kami magtrabaho sing 10 tubtob 12 oras kada adlaw sa bug-os nga semana. Apang, madamo ang pagpakamaayo. Lakip sa sini amo nga makita namon sing personal ang gahom sang Cristianong gugma.
Madamo ang nagboluntaryo sa paghanda sing pagkaon sa sulod sang isa ka semana ukon kapin pa. Kalabanan sa ila luyag magboluntaryo liwat,
kag paagi sa mga postcard kag tawag sa telepono, ang pila nagpabutyag sang ila tinagipusuon nga pasalamat sa sini nga pribilehiyo. Natandog gid kami sang akon asawa nga si Veronica sa ila pagsakripisyo.Natandog Gid Sia
Gregory: Ginbaligya namon sang akon asawa nga si Kathy ang amon balay sa Las Vegas, Nevada, kag nagbakal sing gamay nga salakyan kag isa ka trailer, nga amo ang amon nangin puluy-an. Bangod ginpasimple namon ang amon kabuhi, nakapakigbahin kami sa pagbulig sa mga biktima sa Louisiana sa sulod sang duha ka tuig. Karon pa lang namon naeksperiensiahan ang kamatuoran sang pinamulong sa Biblia sa Malaquias 3:10: “Tilawi ako karon . . . nagasiling ang GINOO sang mga kasoldadosan, [kag tan-awa] kon indi ko pagbuksan sa inyo ang mga talambuan sang langit kag iula sa inyo ang pagpakamaayo sa bagay nga wala na sing masudlan.”
Nagayuhum kami pirme kon magsiling ang mga tawo sing, “Daku gid ang inyo pagsakripisyo!” Sang nagligad nga 30 ka tuig, luyag namon ni Kathy nga mag-alagad sa sanga talatapan sang mga Saksi ni Jehova sa Estados Unidos, apang may mga anak kami nga salaguron. Ang pagbulig sa mga biktima nagtuman sang amon handum nga makaalagad sa Dios sing kapin pa. Pribilehiyo gid ang pagpanghikot upod sa mga Saksi, nga ang pila sa ila madamo sing ikasarang. Halimbawa, ang isa sa amon manugluto isa anay ka kusinero sa isa ka malahalon nga restawran, kag ang isa naman nakaluto para sa duha ka presidente sang Estados Unidos.
Para sa madamo nga boluntaryo, ang pagbulig sa mga biktima may daku gid nga epekto sa ila kabuhi. Ang isa ka 57 anyos natandog gid samtang ginalaragway niya ang iya pagbulig sa mga biktima sang bagyo. Bisan ang iban nga mga Saksi nga wala nakakari nangin tuburan man sang pagpalig-on. Halimbawa, ang duha ka boluntaryo nga nagpaninlo sing mga lumotlumot sa ginbahaan nga mga bilding, naghatag sa amon sing isa ka banner nga ginhimo sang tatlo ka kongregasyon sa ila duog sa Nebraska. Ginpirmahan ini sang tanan nga katapo sang kongregasyon, lakip ang mga kabataan.
‘Nasaksihan Namon ang Pagtatap sang Dios sa mga Nahalitan’
Wendell: Isa ka adlaw pagkatapos magdalasa ang Katrina, ginpangabay ako sang sanga talatapan sa Estados Unidos nga usisaon ang halit sa mga Kingdom Hall kag mga balay sang mga Saksi ni Jehova sa Louisiana kag Mississippi. Diri nagsugod ang akon asaynment kag pagtigayon sing eksperiensia. Nagapuyo kami sang akon asawa nga si Janine sa sulod sang 32 ka tuig sa duog nga nagakinahanglan sing mga manugbantala sang Ginharian, kag nakita ko gid ang pagtatap ni Jehova sa iya katawhan. Apang karon, nakita namon ang pagtatap sang Dios sa mas masangkad nga paagi.
Nakapribilehiyo ako sa pag-alagad subong tsirman sang komite sa Baton Rouge. Bisan pa mabudlay, nalipay gid ako sa sini nga asaynment. Sa pagkamatuod, sa tion sang pagbulig sa mga biktima, ginatos ka beses na nga nakita sang amon komite ang pagsolbar sang Dios sa mga problema, pagbukas sing mga kahigayunan, kag pagtatap sa nagaantos nga mga tawo. Nahimo ini tanan bangod lamang sa bulig sang aton mahigugmaon kag Labing Gamhanan nga Amay.
Madamo ang nagapamangkot, “Paano ninyo napadayon nga mag-asawa ini nga hilikuton sing sobra sa duha ka tuig?” Indi ini pirme mahapos. Kinahanglan namon maghimo sing madamo nga mga pagbag-o sa amon kabuhi. Apang ang maayo sa sini kay nakita namon ang mga benepisyo sa paghupot sang ‘simple nga mata.’—Sang ginsugdan namon ang amon una nga misyon sa New Orleans nga amo ang pagpangita sa mga nakaluwas, halos wala kami sing pahuway. Nangin mabudlay pa ang mga kahimtangan bangod daw napaidalom sa martial law ang siudad. Madamo ang mga soldado kay may kagamo nga nagaluntad kag may panalagsa nga kapintas sa mga kalye. Daw mahapos lang mangampo bangod sa kadaku sang hilikuton nga dapat himuon.
Nasalapuan namon ang linibo ka Saksi nga nadulaan sing mga propiedad. Nangamuyo kami upod sa ila kag ginlugpayan namon sila. Nian, sa bulig ni Jehova, nasugdan namon ang hilikuton. Kon kaisa, nagabatyag ako nga daw natawo sing duha ka beses sa sulod sang duha ka tuig nga pagboluntaryo ko.
May tion nga daw kapoy na gid ako, apang may nagaabot naman nga bag-o nga mga boluntaryo—ang pila magaboluntaryo sing pila ka bulan, ang iban naman wala sing pat-od kon tubtob san-o. Ang pagtan-aw sa madamo, malipayon, kag handa nga mga boluntaryo, lakip ang madamo nga pamatan-on, naghatag gid sa amon sing kusog nga magpadayon.
Pirme kami ginabuligan ni Jehova nga Dios. Halimbawa, sang nag-abot kami, nadiskobrehan namon nga natumbahan sing kahoy ang kapin sa 1,000 ka balay sang amon mga kauturan. Wala kami sing kagamitan ukon mga tinawo nga magatrabaho sa sining delikado nga hilikuton nga pagpanguha sing natumba nga mga kahoy. Amo nga ginpangamuyo namon ini. Salmo 65:2.
Pagkaaga, nagtanyag ang utod sang isa ka trak kag sang kagamitan nga amo gid ang kinahanglan para mapanguha ang mga kahoy. Sa isa pa ka higayon, nasabat ang amon pangamuyo sa sulod lamang sang 15 minutos, kag sa isa pa gid ka higayon, nag-abot ang kagamitan nga amon kinahanglan antes pa kami maka-Amen! Huo, napamatud-an namon nga si Jehova “nagapamati sang pangamuyo.”—“Ginapabugal Ko nga Isa Ako sa mga Saksi ni Jehova”
Matthew: Pagkatapos sang adlaw nga nagdalasa ang Katrina, nakabulig ako sa pag-organisar agod madul-ong ang 15 toneladas nga gindonar nga pagkaon, tubig, kag iban pa nga mga kinahanglanon sa naapektuhan nga duog. Maalwan gid ang katawhan ni Jehova!
Agod mangin mas epektibo pa gid kami sang akon asawa nga si Darline, nagsaylo kami sa lugar nga duha ka oras lang ang biyahe pakadto sa naapektuhan nga lugar. Didto, ginhatagan kami sing part-time nga obra sang isa ka Saksi agod mahinguyang namon ang amon daku nga tion sa pagbulig sa mga biktima. Ginpangitaan man kami sang isa ka Saksi sing apartment. Ang mangin bahin sa sining mahigugmaon nga paghiliutod nagpuno sa akon tagipusuon sing pasalamat, kag ginapabugal ko nga isa ako sa mga Saksi ni Jehova.
Ted: Wala lang madugay pagkatapos magdalasa ang Bagyo Katrina, kami sang akon asawa nga si Debbie nagboluntaryo sa pagbulig sa mga biktima. Pagligad sang pila ka adlaw, nakakita ako sing siam ka metro nga trailer nga masarangan guyuron sang amon salakyan kag katunga lang ang presyo sini sa aktual nga balor—masarangan namon ini baklon kag sabat gid ini sa amon mga pangamuyo. Nangin puluy-an namon ini sa kapin sa duha ka tuig.
Sang temporaryo nga nag-untat ang amon hilikuton, ginbaligya namon ang amon puluy-an kag ang kalabanan sang amon mga pagkabutang, amo nga nakahigayon ako sa pagtrabaho sa New Orleans subong manug-organisar sa pagpangay-o sing mga balay kag mga Kingdom Hall. Ang indi gid namon malipatan sa amon eksperiensia amo nga masaksihan kon paano si Jehova nangin “Dios nga may bug-os nga paglugpay” sa iya mga sumilimba. Indi lamang balay kag Kingdom Hall ang nadula sa madamo nga kauturan. Nadulaan man sila sing kongregasyon kag teritoryo nga bantalaan sing maayong balita bangod nag-ibakwit ang mga tawo.—2 Corinto 1:3.
‘Ang Ila Pagtuo Nagtandog Gid sa Amon Tagipusuon’
Justin: Sang Oktubre 2005, may pagpanawag sing mga boluntaryo agod buligan ang mga biktima sang kalamidad sa Gulf Coast. Gilayon namon nga ginhatag sang akon asawa nga si Tiffany ang amon aplikasyon. Sang Pebrero 2006, gin-agda kami sa pagbulig sa grupo sang mga utod nga nagapang-atop. Nakabase sila sa tilipunan sang mga boluntaryo sa Kenner nga malapit sa New Orleans.
Kada adlaw, nagatrabaho kami sa isa ka balay kag makilala man namon ang mga Saksi sa sini nga duog. Ang ila pagtuo kag pagsalig sa Dios nagtandog gid sa amon tagipusuon. Makita namon kada adlaw ang makapakumbinsi nga pamatuod nga kabuangan gid ang pagsalig sa materyal nga mga butang. Ang kalipay bangod sang nahimo sang katawhan ni Jehova paagi sa iya bulig, kag ang pagbulig mismo sa mga masigka-Cristiano indi gid malaragway sa mga tinaga.
[Kahon/Retrato sa pahina 18]
Ang Ginahimo sa Tilipunan sang mga Boluntaryo
Mga 4:30 pa lang sang aga, nagasugod na ang trabaho sang mga manugluto sa tilipunan sang mga boluntaryo. Pagka-alas 7:00 sang aga, ang tanan nga boluntaryo nagatipon sa hulot kalan-an para sa napulo ka minuto nga pagbinagbinag sang teksto sa Biblia antes mamahaw. Ini nga tion mahimo man gamiton sang tsirman para abiabihon ang bag-o nga mga boluntaryo kag magpaambit sing bag-o kag makapalig-on nga eksperiensia.
Pagkatapos sang pangamuyo, ang tanan mamahaw. Nian makadto na sila sa ila mga trabaho. Ang pila magapabilin sa tilipunan agod magtrabaho sa mga opisina, kusina, ukon manglaba. Ihanda sang mga manugluto ang palanyagahon, kag sa udto may isa ka tawo gikan sa kada grupo sang mga boluntaryo nga nagakuha sini.
Kada Lunes sang gab-i, ang grupo sang mga boluntaryo magatipon sa pagtuon sang isa ka pasad sa Biblia nga artikulo sa Ang Lalantawan nga magasin, nga ginbalhag sang mga Saksi ni Jehova. Ini nga pagtuon magabulig sa tanan nga mahuptan ang ila maayo nga kaangtanan sa Dios, nga amo ang sekreto agod mangin malipayon sila kag makatigayon sing nagakaigo nga pagtamod sa ila hilikuton.—Mateo 4:4; 5:3.
[Kahon sa pahina 19]
“Nagsala Gid Ako Tuhoy sa Inyo”
Ang isa ka babayi sa New Orleans nagbutang anay sing pahibalo sa iya balay nga mabasa: “Ginadilian Diri ang mga Saksi ni Jehova.” Nian isa ka adlaw, ginkay-o sang mga boluntaryo ang balay nga nahalitan sang bagyo sa tabok sang iya balay. Kada adlaw, makita niya ang masadya kag mainabyanon nga panimuot sang mga nagatrabaho. Sang ulihi, ginkadtuan niya ang mga boluntaryo bangod luyag niya mangusisa. Sang nahibaluan niya nga mga Saksi ni Jehova ang mga boluntaryo, nagsiling sia nga wala gid sing bisan isa sa ila simbahan ang nagtelepono sa iya sugod sang natabo ang bagyo. “Maathag nga nagsala gid ako tuhoy sa inyo,” siling niya. Ano ang resulta? Ginkuha niya ang pahibalo, kag luyag na niya nga kadtuan sia sang mga Saksi.
[Retrato sa pahina 16]
Sanday Robert kag Veronica
[Retrato sa pahina 16]
Sanday Frank kag Veronica
[Retrato sa pahina 17]
Sanday Gregory kag Kathy
[Retrato sa pahina 17]
Sanday Wendell kag Janine
[Retrato sa pahina 18]
Sanday Matthew kag Darline
[Retrato sa pahina 18]
Sanday Ted kag Debbie
[Retrato sa pahina 18]
Sanday Justin kag Tiffany