“Ang ginabakal nga gatas para sa lapsag indi gid makatupong sa gatas sang iloy,” siling sang isa ka libro para sa mga midwife. Ang isa ka rason ngaa maayo gid ang gatas sang iloy para sa iya lapsag amo nga ginabag-o ini sang iya lawas depende sa kinahanglanon sang lapsag.

 Binagbinaga: Kada magpatiti ang iloy sa iya lapsag, ang iya gatas nagabag-obag-o halin sa umpisa asta matapos ini. Ang gatas sa umpisa sang pagpatiti, may mas madamo nga protein, vitamins, mineral, kag tubig. Pero kon manugtapos na ang pagpatiti, mas madamo na ang fat sang gatas gani mabatyagan sang lapsag nga busog sia. Nagabag-obag-o man ang gatas sang iloy depende sa edad sang lapsag kag sa panahon.

 Kon gab-i, mas nagadamo ang pila ka hormone, pareho sang melatonin, sa gatas sang iloy. Kag kon adlaw, lain naman nga mga hormone ang nagadamo. Depende sa oras, ining mga hormone nagapatuyo ukon nagapaalisto sa lapsag gani may skedyul sia sa pagtulog kag pagbugtaw.

 Sa una nga mga adlaw pagkatapos nga makabata ang iloy, nagagua sa iya ang gatas nga colostrum nga yellow ang kolor. Mahapos tunawon ang colostrum kag madamo ini sang sustansia. Gani bisan diutay lang ang matiti sang lapsag kay gamay pa ang iya tiyan, may bastante sia nga sustansia sa lawas. Madamo sing antibody ang colostrum kag nagabulig ini para indi dali magmasakit ang lapsag. Nagapahapos man ini sa pagpamus-on sang lapsag para mangin matinlo pirme ang iya tiyan.

 Indi dapat magkabalaka ang mga iloy nga basi kulangon ang ila gatas para sa ila lapsag. Kay man, nagadamo ang gatas base sa kinahanglan kag bastante ini bisan kapid pa ang lapsag.

 Ano sa banta mo? Ang gatas bala sang iloy kag ang mga sustansia sini resulta sang ebolusyon? Ukon gindesinyo ini?