Baibel Be Mauri Ia Haidaua

DAHAKA ese taunimanima ia ura henidia lasi punk rock tauna ia durua taunimanima ia lalokau henia bona durua totona? Mexico ai dahaka ese tau ta ia durua ena matabodaga maurina ia haidaua totona? Dahaka dainai Japan ai basikele helulu tauna goadana be helulu karana ia rakatania bona Dirava ia hesiai henia? Mani edia sivarai oi duahia.

“Lau be kara auka, heagi bona dagedage tauna.”—DENNIS O’BEIRNE

VARA LAGANINA: 1958

TANO: ENGLAND

GUNA: ANTISOCIAL PUNK ROCKER

EGU MAURI GUNANA: Egu tamana ena famili be Irish taudia, bona lau be Katolik dubu ai lau bada. Lau be sibona dubu dekenai lau lao, ena be lau ura lasi. To, lau ura dikadika Dirava do lau tomadiho henia. Hanaihanai Lohiabada ena guriguri lau gwauraia, bona hanuaboi ai lau hekure bona ena anina lau laloa loulou. Unai guriguri ena kahana ta ta lau duahia bona edia anina lau tahua.

Lau be tineja neganai, Rastafarian orea lau bamoa. Bona Anti-Nazi League politikol oreana lau ura henia danu. To, punk rock oreana ena gwau-edeede karadia lau karaia badabada. Drag dikadia hegeregere, mariuana be dina ibounai lau ania. Kara kava maurina lau noholaia. Lau inuinu kekero, egu mauri hadikaia karadia lau karaia, bona taunimanima ma haida lau laloa bada lasi. Taunimanima lau tura henidia lasi. Bema haida be lau laloa bada gauna idia kikilaia idia do lau hereva henia. Lau ura lasi haida ese egu laulau idia abia. Unai nega lau lalodia neganai, lau itaia lau be kara auka, heagi bona dagedage tauna. To ta be egu turana korikorina neganai, ia sibona lau kara namo henia.

Egu mauri lagani be 20 neganai, Baibel lau laloa bada matamaia. Egu turana ta, drag dikadia ia hoihoilaia merona, be dibura ruma ai ia noho lalonai Baibel ia duahia matamaia. Ai be hora momo lalodiai tomadiho ai herevalaia, Dubu bona tanobada ai Satani ena kara ai herevalaia. Baibel ta lau hoia bona lau sibona ese lau stadilaia matamaia. Egu turana bona lau ese Baibel ena kahana haida ai duahia, bena ai dibaia gaudia ai herevalaia hebou bona ai lalopararalaia gaudia ai torea. Hua haida lalonai unai bamona ai karaia.

Ai duahia gaudia amo inai ai laloparara: ita be tanobada ena dokona negana ai ita noho; Keristani taudia ese Dirava ena Basileia ena sivarai namona idia harorolaia be namo; idia be tanobada ena lasi, politikol karadia lalonai do idia vareai lasi; bona Baibel ese kara maoromaoro taravatudia ia hahedinaraia. Ai itaia Baibel ena hereva be momokani dainai, ai abia dae tomadiho momokani danu ia noho. To edena? Ai itaia Kerisendom ena dubu badadia be aria badadia idia karaia, dabua hairaidia idia hahedokilaia bona idia heagi bada, to Iesu be unai bamona lasi. Ai laloparara Dirava be idia ia gaukaralaia lasi, unai dainai emai lalona ai hadaia momo idia diba lasi tomadiho dubu orea maragidia edia hahediba herevadia do ai tahua.

Unai dubu dekenai idia lao taudia ida ai hebou bona henanadai haida ai henidia. Baibel ena haere unai henanadai dekenai ai diba, unai dainai ai ura itaia bema edia haere be Baibel ena heregeregerena. Idia ida ai hebou murinai, Dirava lau noia, ‘Bema idia be tomadiho momokani taudia, mani egu lalona oi hamarerea idia ida lau hebou lou totona.’ To idia ida ai hebou bona hua haida murinai, idia ese Baibel amo emai henanadai idia haerelaidia lasi. Bona danu, idia ida do lau hebou lou urana lau abia lasi.

Bena, lau bona egu turana be Iehova ena Witnes taudia ai hedavari henidia. Idia dekenai henanadai ai henia danu, to edia haere be Baibel amo idia henia. Edia haere be Baibel amo ai dibaia gaudia ida idia hegeregere. Bona Baibel amo haere ai do davaria lasi henanadai haida ai henidia danu, hegeregere Dirava ena lalohadai be dahaka kuku bona drag dikadia ania karana dekenai. Idia ese Dirava ena hereva idia gaukaralaia lou, unai idia haerelaia totona. Ai lalotamona Kingdom Hall dekenai hebou ta do ai lao.

Hebou lau lao be auka. Lau ura lasi taunimanima lau tura henidia, unai dainai lau ura lasi dabua namodia idia hahedokilaia taudia ese lau idia hereva henia. Lau laloa idia haida be mai lalohadai kererena ida lau idia hereva henia, bona lau ura lasi hebou lau lao lou. To vaia lau karaia bamona Dirava lau guriguri henia, bema idia be tomadiho momokani taudia, mani egu lalona do ia hamarerea idia ida lau hebou lou totona. Oibe, lau mamia Witnes taudia ida Baibel stadilaia urana be ia goada momokani.

BAIBEL ESE EGU MAURI IA HAIDAUA DALANA: Lau diba drag dikadia ania karana do lau rakatania, bona unai lau karaia. To, kuku lau rakatania be auka. Nega momo lau rakatania toho, to lau kwalimu lasi. Lau kamonai haida be kuku idia negea bona idia ania lou lasi neganai, Iehova lau guriguri henia. Unai murinai, Iehova ena heduru amo, kuku lau rakatania. Unai nega ai, Iehova lau guriguri henia bona mai momokani ida egu lalona ai idia noho gaudia lau gwauraia hedinarai karana lau dibaia.

Lau karaia senisi badana ta be egu dabua bona toana lau hanamoa. Kingdom Hall ai hebou ginigunana lau lao neganai, egu huina be gulu amo lau ha-aukaia, ena toana be ginigini bamona bona ena kala be bulu. Gabeai, orensi kala lau atoa. Jins bona leda jaketi mai ena toretore lau hahedokilaia. Ena be Witnes taudia be mai hemataurai ida lau idia hereva henia, to lau ura lasi egu dabua bona toana lau haidaua. To, gabeai 1 Ioane 2:15-17 lau laloa: “Tanobada bona ia lalonai idia noho gaudia umui lalokau henia lasi. Bema ta be tanobada ia lalokau henia, Tamana ena lalokau be ia dekenai ia noho lasi.” Lau laloparara egu dabua bona toana amo lau hahedinaraia tanobada lau lalokau henia, to Dirava lalokau henia karana lau hahedinaraia totona, namona be egu dabua bona toana lau hanamoa. Vadaeni, unai lau karaia.

Nega ia hanaia lalonai, lau laloparara Witnes taudia sibona ese Keristani heboudia dekenai lau idia boiria lasi. To Heberu 10:24, 25 ia hahedinaraia, Dirava ia ura unai do lau karaia. Hebou iboudiai lau lao matamaia bona tadikaka taihu lau diba namonamo murninai, egu lalona lau hadaia egu mauri be Iehova dekenai lau gwauhamatalaia bona bapatiso lau abia.

NAMO LAU DAVARIA: Iehova ese lau ia abia dae iena turana namona ai do lau lao karana, lau laloa bada. Iena hebogahisi bona naria karana ese lau ia veria ia lau tohotohoa, bona egu mauri lalonai iena Natuna Iesu Keriso lau badinaia totona. (1 Petero 2:21) Lau dibaia gauna be Keristani kara namodia lau hahedinaraia diba, bona sibona egu abia hidi lau karaia diba danu. Lau gaukara goada lalokau bona hebogahisi karadia lau hahedinaraia totona. Egu adavana bona natuna dekenai lau ura Keriso ena kara lau hahedinaraia. Bona hereva momokani lalonai egu tadikaka taihu lau lalodia bada. Keriso ena kara lau badinaia dainai haida dekenai lalokau lau hahedinaraia bona taunimanima ese lau idia matauraia.

“Idia ese lau idia matauraia.”​—GUADALUPE VILLARREAL

VARA LAGANINA: 1964

TANO: MEXICO

GUNA: MATABODAGA MAURINA

EGU MAURI GUNANA: Emai famili lalonai natudia ibounai be 7 bona ai be Hermosillo hanua, Sonora, Mexico dekenai ai noho, unai be ogogami gabuna. Lau be mero maragi neganai, egu tamana ia mase, unai dainai egu sinana ia gaukara goada ai ia naria totona. Lau be aena kavakava lau loaloa badina ai be moni lasi tamaka ai hoia totona. Lau be do matamata neganai, emai famili durua totona moni gaukara lau karaia. Famili momo hegeregerena, emai ruma be maragi, to ai ibounai be unuseni ai noho.

Nega momo dina lalonai emai sinana be ai ida ia noho lasi ai ia gimaia totona. Egu mauri lagani be 6 neganai, mero ta ena mauri lagani be 15 ese lau ia matabodaga henia matamaia. Lagani momo lalonai unai ia karaia. Unai dainai lau daradara bada, bona lau laloa tatau ida mahuta hebou karana be maoro. Doketa taudia bona prist taudia lau hereva henidia neganai, idia gwau unai be hekwakwanai lasi bona unai hemami lau abia be kerere lasi.

Egu mauri lagani be 14 neganai, abia hidi lau karaia hahine edia kara lau tohotohoa bona edia dabua lau hahedokilaia. Lagani 11 lalonai unai mauri lau badinaia bona tatau idauidau ida lau noho. Gabeai, huina sitaeloa kosi ta lau karaia bona sitoa ta lau naria. To, lau moale lasi. Unai tatau ese lau idia hahisia bona dadaraia. Lau mamia egu mauri dalana be maoro lasi. Sibona lau nanadaia, ‘Kara namo bona kara goeva taudia idia noho, eiava?’

Egu taihuna badana lau laloa. Ia be Iehova ena Witnes taudia ida Baibel ia stadilaia bona ia bapatiso. Ia dibaia gaudia be lau dekenai ia herevalaia, to lau laloa bada lasi. To, iena mauri dalana bona headava lau matauraia. Lau itaia ia bona ena adavana be ta ta idia lalokau henia bona matauraia. Ta ta idia kara namo henia. Bena, Iehova ena Witnes hahine ta ese lau ida Baibel ia stadilaia. Matamanai, lau stadi sibona, to lau moalelaia lasi. To gaudia idia idau.

BAIBEL ESE EGU MAURI IA HAIDAUA DALANA: Witnes taudia ese edia hebou dekenai lau idia boiria bona lau lao. Unai be gau matamata lau dekenai. Taunimanima be lau idia hevasehalaia, to Witnes taudia be unai idia karaia lasi. Mai moale ida lau idia welkam henia bona lau idia matauraia. Unai ese egu kudouna ia hamarerea.

Hebouhebou badana ta ai lau lao neganai Witnes taudia edia kara namo lau ura henia bada. Lau itaia ena be hutuma idia hebou, to edia kara be namo bona momokani, egu taihuna bamona. Sibona lau nanadaia, bema idia be lau tahua noho kara namo bona kara goeva taudia. Baibel amo henanadai ibounai idia haerelaia bona edia lalokau bona lalotamona karana lau hoalaia. Lau laloparara Baibel ena hereva dainai edia mauri lalonai kara namo idia hahedinaraia. Bona lau itaia, idia bamona lau lao totona, namona be egu kara momo do lau haidaua.

Oibe, lau be hahine edia kara lau tohotohoa dainai, egu mauri dalana do lau haidaua momokani. Egu hereva, kara, dabua, huina ena sitaelo, bona turadia do lau haidaua. Egu tura gunadia ese lau idia kirikirilaia, idia gwau: “Dahaka dainai inai oi karaia noho? Guna oi noholaia maurina be namo. Baibel oi stadilaia lasi. Gau ibounai dekenai oi be hegeregere.” To, egu matabodaga karadia lau rakatania be auka momokani.

To lau diba senisi badadia do lau karaia badina 1 Korinto 6:9-11 ena hereva lau abidadama henia: “Umui diba lasi, a? Kara dika taudia be Dirava ena Basileia do idia abia lasi. Umui sibona do umui koia lasi: Matabodaga taudia, kaivakuku tomadiho henia taudia, heudahanai taudia, hahine edia kara bamona idia karaia tatau, tatau ida idia mahuta hebou tatau . . . be Dirava ena Basileia do idia abia lasi. Bona guna umui haida be unai bamona. To Dirava ese umui ia hagoevaia.” Idaunegai Iehova ese unai taudia ia durua edia mauri idia haidaua totona, bona lau ia durua danu. Lagani haida lalonai lau hekwarahi bada, to Witnes taudia edia sisba bona lalokau ese lau ia durua bada.

NAMO LAU DAVARIA: Hari, egu mauri be idau. Lau headava, bona lau bona egu hahine be emai natuna mero ai hadibaia Baibel ena hakaua herevadia ia badinaia totona. Egu mauri gunana be lau rakatania vaitani bona hari Dirava amo hahenamo idauidau lau moalelaia. Kongrigeisen lalonai elda gaukara lau karaia bona haida lau durua Dirava ena hereva momokani idia diba totona. Egu mauri ai senisi lau karaia dainai egu sinana ia moale bona Baibel stadi ia abia dae bona ia bapatiso. Egu taihuna ta, guna ia danu be matabodaga maurina ia noholaia be Iehova ena Witnes ta ai ia lao.

Egu mauri gunana ai lau idia diba turadia haida idia itaia lau be senisi namodia lau karaia. Lau diba daika ese lau ia durua unai senisi lau karaia totona. Guna heduru totona aonega taudia dekenai lau lao, to edia sisiba be namo lasi. To, Iehova ese lau ia durua. Ena be lau mamia lau be anina lasi, to lau ia abia dae bona mai lalokau bona haheauka ida lau ia kara henia. Oibe, lau ia durua bada gauna be, Dirava hereadaena, mai ena aonega bona lalokau be lau ia abia dae bona ia ura mauri namona do lau noholaia.

“Lau mamia lau moale lasi, sibona lau noho bona egu mauri be anina lasi.”​—KAZUHIRO KUNIMOCHI

VARA LAGANINA: 1951

TANO: JAPAN

GUNA: BASIKELE HELULU TAUNA

EGU MAURI GUNANA: Lau be davara badinai ia noho taoni ladana Shizuoka Distrik, Japan ai lau bada. Emai famili lalonai ai be 8, bona ruma maragina dekenai ai noho. Egu tamana be basikele sitoa ia naria. Lau maragi negana amo, basikele helulu dekenai lau ia abia lao bona unai gadara lau ura henia. Bena egu tamana ese palani ia karaia unai gadara lau diba totona. Greid 7 lau karaia neganai, egu tamana ese egu treinini ia hamatamaia. Haisikuli ai lagani toi lalonai basikele helulu ai namba 1 ahuna lau abia. Gwaumaoro lau abia iunivesiti lau lao totona, to lau be basikele helulu ena sikuli dekenai lau lao. Egu mauri lagani be 19 neganai, moni totona basikele helulu gadara lau karaia.

Unai nega ai, egu ura badana be Japan ena basikele helulu tauna namba 1 ai do lau lao. Egu palani be moni momo do lau abia unai amo egu famili edia noho maurina do lau hanamoa. Lau treinini goadagoada. Bema treinini o helulu ena kahana ta be ia auka momokani, sibona lau hamaoroa lau be basikele helulu totona lau vara bona do lau hadokoa lasi! Bona unai lau karaia. Egu hekwarahi ena anina namona lau itaia. Lagani ginigunana ai, basikele helulu ai karaia neganai idia ibounai lau halusia. Lagani iharuana ai, lau idia abia hidi helulu ta lalonai lau vareai totona, unai helulu amo Japan ena basikele helulu tauna namba 1 do idia makaia. Unai helulu idauidau 6 lalonai, lau mai namba 2.

Lau be prais lau wini momo dainai, Japan ena kahana ta dekenai lau idia boiria Tokai ena aena goadana. Lau be kara helulu tauna. Momo ese lau idia gari henia badina helulu negadiai lau be lau dagedage bada. Egu pei ia bada daekau, bona lau ura gauna lau hoia diba. Ruma ta lau hoia bona daiutu ta be eksais masini namodia sibona lau atoa. Tano ma ta amo motuka lau hoia, bona ena davana be ruma ta ena davana hegeregerena. Egu moni lau habadaia totona, ruma momo lau hoia bona egu moni haida be stock maketi dekenai lau atoa.

To, lau mamia lau moale lasi, sibona lau noho bona egu mauri be anina lasi. Unai nega ai, lau headava vadaeni bona mai egu natudia, to nega momo gau maragidia dainai, egu adavana bona natudia dekenai lau badu. Hanaihanai, egu vairana toana do idia itaia bema lau badu.

To lagani haida murinai, egu adavana be Iehova ena Witnes taudia ida Baibel ia stadilaia. Unai ese lau ia durua senisi momo lau karaia totona. Egu adavana ia ura Witnes taudia edia hebou ia lao, unai dainai disisen lau karaia famili ibounai be hebou do ai lao. Lau laloatao hanuaboi ta elda ta be egu ruma ai ia mai lau ida Baibel stadi ia hamatamaia totona. Lau dibaia gaudia ese egu kudouna idia hamarerea.

BAIBEL ESE EGU MAURI IA HAIDAUA DALANA: Lau laloatao Efeso 5:5 lau duahia neganai lau ia gwadaia momokani. Ia gwau: “Matabodaga tauna eiava kara mirodia ia karaia tauna eiava mataganigani tauna, anina be kaivakuku ia tomadiho henia tauna, be ahuna lasi Keriso bona Dirava edia Basileia lalonai.” Lau itaia basikele helulu gadara be kasi gadara hegeregerena bona spot gadara ese mataganigani urana ia habadaia. Egu lalomamina ese unai ia abia dae lasi. Lau mamia bema lau ura Iehova Dirava lau hamoalea, basikele helulu gadara do lau rakatania. To unai disisen lau karaia be auka.

Unai lagani ai egu basikele helulu gadara lau moalelaia bona lau ura do lau karaia noho. To lau davaraia, Baibel lau stadi dainai, egu lalona be ia maino bona lau ura lasi ma haida ida do lau helulu—guna basikele helulu ai lau ura lau wini sibona ena lalohadai amo ia idau momokani! Baibel lau stadi lalonai, helulu gadara toi sibona lau lao, to egu kudouna ai unai gadara lau rakatania be auka. Danu egu famili be edena bamona do lau naria lau laloa momo. Lau daradoko, bona egu varavara ese egu tomadiho matamatana idia gwauraia dika. Egu tamana be lau dekenai ia badu dikadika. Lau lalometau bada bona egu bogana lalonai toto badana ia vara.

Iehova ena Witnes taudia ida Baibel lau stadilaia bona edia hebou lau lao karana ese lau ia durua unai nega aukana lau haheaukalaia totona. Metairametaira egu abidadama ia goada ia lao. Iehova lau noia egu guriguri do ia kamonai bona lau ia durua unai lau abidadama henia totona. Egu adavana ese lau ia hamaoroa, ena be ruma maragina ai ia noho do ia moale. Unai ese egu lalometau ia hamaragia sisina, bona metairametaira lau goada matamaia.

NAMO LAU DAVARIA: Lau davaria Mataio 6:33 dekenai Iesu ena hereva be momokani. Ia gwau: “Nega ibounai Dirava ena Basileia bona ena kara maoromaoro do umui tahua guna, bona unai gaudia ibounai be umui dekenai do ia henia.” Iesu ese ia herevalaia, “gaudia”—​mauri durua gaudia—⁠dekenai ai dabu lasi. Ena be egu pei be maragi, guna basikele helulu gadara amo lau abia pei bamona lasi, to idia hanaia lagani 20 lalonai, lau bona egu famili be gau ta dekenai ai dabu lasi.

Hahenamo ma ta be, egu tadikaka taihu ida lau gaukara neganai, guna lau davaria lasi moale bona maino lau mamia. Nega ia heau haraga badina idia ida Iehova ena hesiai gaukara lau moalelaia. Egu famili maurina be namo herea. Egu natudia toi bona edia adavadia be mai abidadama ida Iehova idia hesiai henia.