Iesu Ena Hoa Karadia Dahaka oi Dibaia?

BAIBEL lalonai Iesu be tanobada ai ia noho ena sivarai oi duahia neganai, reana do oi hoa badina Grik gado herevana (dy’na mis) hari ita hahanaia “hoa karana,” idia gaukaralaia lasi. Unai hereva dy’na mis be nega haida idia hahanaia “hoa karana,” to ena anina korikorina be “siahu.” (Luka 8:46) Nega haida idia hahanaia “diba” eiava “siahu karadia.” (Mataio 11:20; 25:15) Diba bada tauna ta ia gwau, dy’na mis ese “gaukara badana ta, bona unai idia hagugurua totona idia gaukaralaia siahuna ia herevalaia. Idia torea dalana amo idia hahedinaraia unai gaukara be Dirava ena siahu ese ia havaraia.”

Grik gado herevana ma ta (te’ras) be nega momo idia hahanaia “toa” eiava “hoa karadia.” (Ioane 4:48; Kara 2:19) Unai hereva ese idia kamonai taudia edia kara ia gwauraia. Nega momo hutuma bona hahediba taudia ese Iesu ena siahu karadia idia itaia neganai idia hoa bada.​—Mareko 2:12; 4:41; 6:51; Luka 9:43.

Grik gado herevana ihatoina (se mei’on) be Iesu ena hoa karadia ena “toa” ia herevalaia. Diba bada tauna ta, Robert Deffinbaugh ia gwau: unai hereva ese “hoa karana ena anina badana ia hahedinaraia ma ia gwau: Toa ena anina be hoa karana ta, unai ese Lohiabada Iesu ena hereva momokani ta ia hahedinaraia.”

Matahanai eiava Dirava ena Siahu Amo?

Baibel ia gwau lasi Iesu be tricks karadia amo ena hoa karadia ia karaia taunimanima ia hamoalea totona. To, Iesu ena hoa karadia be “Dirava ena siahu bada” idia hahedinaraia, hegeregere Iesu ese mero ta amo demoni ia lulua karana amo unai ia hedinarai. (Luka 9:37-43) Siahu Bada Diravana, iena “goada bona siahu be bada herea,” ese unai bamona hoa karana ta ia karaia be hegeregere lasi, a? (Isaia 40:26) lasi, ia karaia diba!

Evanelia bukadia ai Iesu ena hoa karadia ibounai 35 edia sivarai ia noho. To ena hoa karadia ibounai edia namba ita diba lasi. Hegeregere, Mataio 14:14 ia gwau: “[Iesu ese] taunimanima hutuma ia itaia, bona idia dekenai ia hebogahisi bona gorere taudia ia hanamoa.” To unai siri ia hahedinaraia lasi unai nega ai gorere taudia hida ia hanamoa.

Iesu ese ia karaia hoa karadia ese ia hamomokania ia be Dirava ena Natuna, idia gwauhamatalaia Mesia. Baibel siridia ese idia hahedinaraia goevagoeva Dirava ese Iesu dekenai siahu ia henia dainai, hoa karadia ia karaia. Aposetolo Petero ese Iesu ia herevalaia neganai, ia gwau: “Ia amo umui huanai hoa bona toa karadia ia karaia, bona umui be unai umui diba.” (Kara 2:22) Ma nega ta ai Petero ia gwau: “Dirava ese lauma helaga amo ia [Iesu ia] horoa bona siahu ia henia. Vadaeni gabu ibounai dekenai ia lao bona kara namodia ia karaia bona Diabolo ese ia hahisia taudia ibounai ia hanamoa, badina Dirava be ia ida ia noho.”​—Kara 10:37, 38.

Iesu ese ia karaia hoa karadia be ena sivarai namona ena kahana ta. Mareko 1:21-27 ese ia hahedinaraia Iesu ese ia karaia hoa karana ta bona ena hadibaia hereva dainai taunimanima idia hoa. Mareko 1:22 ia gwau, taunimanima be “ena hahediba dalana dekenai idia hoa bada,” bona siri 27 ese ia hahedinaraia demoni ta ia lulua neganai, taunimanima ibounai idia “hoa bada.” Iesu ena hoa karadia bona ia gwauraia sivarai namona ese idia hahedinarai ia be idia gwauhamatalaia Mesia.

Iesu ia gwau lasi ia be Mesia, to ia gwauraia sivaraina bona ena hoa karadia ese idia hamomokania Dirava ese siahu ia henia bona ia be Mesia. Taunimanima ese ena gaukara bona ena siahu totona henanadai idia henia neganai, Iesu be mai gari lasi ida ia gwau: “Ioane [Bapatiso] be taunimanima ia hamaoroa Tamana ese lau ia siaia. To lau ese gau ta amo lau hamomokania Tamana ese lau ia siaia. Gauna be inai: Ia ese lau dekenai ia henia gaukaradia lau hagugurua noho.”​—Ioane 5:36

Iesu Ena Hoa Karadia be Momokani

Dahaka dainai ita abia dae diba Iesu ena hoa karadia be momokani? Mani hamomokania gaudia ita itaia.

Iesu be hoa karana ta ia karaia neganai, unai ia karaia dainai ia hekokoroku lasi. Ena ura be taunimanima ese unai idia itaia neganai Dirava sibona idia hanamoa. Hegeregere, matakepulu tauna ta ia do hanamoa lasi neganai, Iesu ia gwau, unai hoa karana do ia karaia “unai amo taunimanima ese Dirava ia karaia diba gauna do idia itaia.”​—Ioane 9:1-3; 11:1-4.

Iesu be koikoi taudia, meamea taudia bona guriguri amo gorere idia hanamoa taudia bamona lasi. Koikoi karadia, toa idauidau, meamea eiava taunimanima edia lalona idia veria karadia ia karaia lasi. Iesu be taunimanima ese idia garilaia gaudia eiava kaivakuku ia gaukaralaia lasi. Iesu be mai manau ida matakepulu taudia rua ia hanamoa dalana mani ita laloa. Baibel ia gwau: “Iesu ese ia hebogahisi henidia, bena edia matana ia daua toho bona maoromaoro idia itaia diba, bena ia murinai idia raka.” (Mataio 20:29-34) Hoa karadia ia karaia neganai, mai heagi ida ia guriguri eiava kastom karana ta ia kara lasi. Iesu ese ena hoa karadia be taunimanima vairanai ia karaia bona momo ese idia itaia. Ia be steij dekenai hoa karadia ia karaia lasi, laiti idauidau eiava kohu ma haida ia gaukaralaia lasi. To hari, hoa karadia idia karaia taudia be idia ura lasi buka ta idia torea edia hoa karadia idia hamomokania totona.​—Mareko 5:​24-​29; Luka 7:​11-​15.

Nega haida Iesu be taunimanima ia hanamodia neganai, ia gwau edia abidadama dainai idia namo. To ena be ta be abidadama lasi, Iesu ese ia dekenai hoa karana ia karaia danu. Kaperanauma ai Galilea dekenai ia noho neganai, “taunimanima be Iesu dekenai demoni ese idia biagua taudia momo idia hakaua mai. Bona ia ese oda herevana ta amo lauma dikadia ia lulua bona gorere taudia ibounai ia hanamoa.”​—Mataio 8:16.

Iesu be hoa karadia ia karaia kava lasi, to ia karaia badina ia ura gorere taudia ia hanamoa. (Mareko 10:46-52; Luka 23:8) Bona Iesu be hoa karadia ia karaia neganai, moni totona ia noinoi lasi.​—Mataio 4:2-4; 10:8.

Evanelia Bukadia Edia Hereva be Edena Bamona?

Evanelia bukadia 4 lalonai Iesu ese ia karaia hoa karadia edia sivarai ita duahia diba. Iesu ese ia karaia hoa karadia ita hamomokania totona, ita abia dae Evanelia bukadia edia sivarai be momokani, a? Oibe, idia be momokani.

Guna ita hereva bamona, Iesu ese ena hoa karadia be taunimanima vairanai ia karaia bona momo ese idia itaia. Evanelia buka ginigunadia idia torea neganai, unai hoa karadia idia itaia taudia momo be idia do mauri noho. Evanelia bukadia idia torea taudia edia hereva hamomokania totona, buka ta (The Miracles and the Resurrection) ia gwau: “Bema ita gwau Evanelia bukadia idia torea taudia ese histori lalonai idia vara gaudia idia laloa lasi, to edia tomadiho karana idia hahedinaraia totona hoa karadia edia sivarai sibona idia torea, unai be maoro lasi. . . . Idia be hereva momokani sibona idia torea.”

Keristani tomadiho idia inai henia Iuda taudia be Iesu ena hoa karadia idia hakoikoia lasi. To, Iesu danu idia hepapahuahu badina idia ura diba edeseni amo ena siahu ia abia unai hoa karadia ia karaia totona. (Mareko 3:22-26) Danu, gabeai Iesu idia abia dae lasi taudia idia gwau iena hoa karadia be idia vara momokani lasi. To, lagani 1 C.E. amo ela bona lagani 200 C.E. lalonai, buka momo ese Iesu ena hoa karadia edia sivarai idia torea. Unai dainai, ita daradara lasi. Evanelia bukadia lalonai Iesu ese ia karaia hoa karadia edia sivarai be momokani.

Hoa Karadia ia Karaia Tauna

Iesu ena hoa karadia ita herevalaia neganai, ia karaia momokani eiava lasi sibona ita tahua be hegeregere lasi. Evanelia bukadia ese Iesu ena hoa karadia idia herevalaia neganai, idia hahedinaraia Iesu be hebogahisi bada bona taunimanima edia namo ia laloa bada tauna.

Mani lepera tauna ta ita laloa. Ia be Iesu dekenai ia tui diho bona ia noia: “Bema oi ura, lau do oi hanamoa.” Iesu ese “ia hebogahisi henia dainai,” ena imana ia toia roro, unai lepera tauna ia dogoatao, bona ia gwau: “Oibe, lau ura! Harihari oi namo.” Unai tauna be maoromaoro ia namo. (Mareko 1:40-42) Iesu ese ia hahedinarai ia hebogahisi dainai, Dirava ese ia henia siahuna ia gaukaralaia hoa karadia ia karaia totona.

Nega ta Iesu be Naina siti kahirakahira ia ginidae neganai, hutuma be mase tauna ta idia guria totona idia raka lao. Iesu be dahaka ia karaia? Mase tauna be tau matamatana, bona ia be vabu ta ena natuna tamona. Iesu be vabu “ia hebogahisi henia” dainai, ia dekenai ia lao bona ia hamaoroa: “Oi taitai lasi.” Bena ena natuna ia hatorea isi lou.​—Luka 7:11-15.

Iesu ena hoa karadia ita laloa neganai, ita itaia ia be taunimanima ia “hebogahisi henia” dainai ia durudia. To iena hoa karadia be guna sivaraidia sibona lasi. Heberu 13:8 ia gwau: “Iesu Keriso be ia idau lasi, varani, hari, bona ela bona hanaihanai.” Iesu be tanobada dekenai ia noho neganai hoa karadia momo ia karaia, to hari ia be King guba dekenai bona ia hegaegae noho Dirava ese ia henia siahuna be dala hereadaena ai ia gaukaralaia totona. Kahirakahira, Iesu ese ena siahu do ia gaukaralaia kamonai taudia ibounai ia hanamoa totona. Iehova ena Witnes taudia be mai moale bada ida idia ura oi do idia durua unai helaro namona oi diba totona.

[Foto]

Iesu ena hoa karadia be “Dirava ena siahu bada” idia hahedinaraia

[Foto]

Iesu be hebogahisi bada tauna