Kingdom News No. 37

Hereva ta, Tanobada Ibounai Totona

Tomadiho Koikoi be Kahirakahira Do Ia Ore!

▪ Tomadiho koikoi be dahaka?

▪ Edena bamona do ia ore?

▪ Ita dekenai dahaka do ia vara?

 Tomadiho Koikoi be Dahaka?

Tomadiho ena ladanai idia karaia kara dikadia dainai oi lalohisihisi, a? Haida idia gwau Dirava idia tomadiho henia, to idia be tuari, terorist karadia, bona kara gagevadia lalonai idia vareai dainai, oi lalohisihisi, a? Dahaka dainai tomadiho ese hekwakwanai momo herea ia havaraia? Tomadiho ibounai lasi, to tomadiho koikoi sibona ese unai hekwakwanai ia havaraia.

Taunimanima momo ese idia matauraia tauna, Iesu Keriso, ia hahedinaraia tomadiho koikoi ese kara dikadia idia karaia, ‘au dikana ese huahua dikadia ia havaraia bamona.’ (Mataio 7:​15-​17) Tomadiho koikoi ese dahaka huahua dikadia ia havaraia?

◼ TOMADIHO KOIKOI ESE TUARI BONA POLITIKOL KARADIA IA DURUA: Magasin ta (Asiaweek) ia gwau: “Asia bona tano ma haida ai, tomadiho lalonai dagi bada idia tahua taudia ese sibodia edia namo hagugurua totona, idia ese tomadiho taudia idia doria edia ura idia karaia totona.” Unai dainai, unai magasin ia gwau: “Tanobada ia dika ia lao.” United States ai, ladana bada tomadiho tauna ta ia gwau: “Ala-ala karadia hadokoa totona, terorist taudia ibounai hamasedia ore.” Ma ia gwau: “Lohiabada ena ladanai ibounai hamasedia ore.” To Baibel ena hereva be idau, ia gwau “Tau ta bema ia gwau, ‘Lau ese Dirava lau lalokau henia,’ to ia ese iena tadikakana ia badu henia, unai tau be koikoi tauna.” (1 Ioane 4:20) Danu Iesu ia gwau: “Umui dekenai idia badu henia taudia do umui lalokau henia.” (Mataio 5:44) Toana be tomadiho momo be tuari lalonai idia vareai, ani?

◼ TOMADIHO KOIKOI ESE HAHEDIBA HEREVA KOIKOI IA HADIBAIA: Tomadiho momo idia gwau taunimanima be mai edia mase diba lasi laumana, bona ta ia mase neganai, unai lauma be ia mauri noho. Unai hahediba hereva amo idia ese edia dubu taudia idia koia, idia gwau bema moni idia henia, edia mase varavara edia lauma totona idia guriguri diba. To Baibel ena hadibaia hereva be idau. “Mauri taudia idia diba do idia mase, to mase taudia be gau ta idia diba lasi.” (Hadibaia Tauna 9:5) Iesu ia gwau mase taudia be do idia toreisi lou​​—bema taunimanima be mai edia mase diba lasi laumana, vadaeni toreisi lou be anina lasi. (Ioane 11:​11-​25) Emu tomadiho ese mase diba lasi laumana ia hadibaia, a?

◼ TOMADIHO KOIKOI ESE MATABODAGA KARADIA IA ABIA DAE: Tano haida ai, tomadiho haida ese tatau be tatau ida idia mahuta hebou tatau, bona hahine be hahine ida idia mahuta hebou hahine be pris eiava pasto dagi idia henia. Bona gavamani idia noia gwaumaoro idia henia unai bamona taudia idia headava totona. Ena be dubu haida ese matabodaga karadia idia abia dae lasi, to natudia idia sihari henia tomadiho gunalaia taudia be edia dubu amo idia kokia lasi. Unai kara dekenai Baibel ena hereva be dahaka? Ia gwau: “Umui sibona do umui koia lasi: Lebulebu taudia, kaivakuku idia tomadiho henia taudia, heudahanai taudia, o lebulebu hahine edia kara bamona idia karaia tatau, o tatau ese tatau danu hemarai karadia idia karaia taudia . . . inai bamona taudia ta lasi be Dirava ena Basileia do ia davaria diba.” (1 Korinto 6:​9, 10) Matabodaga karana idia abia dae tomadiho orea haida oi diba, a?

 Vadaeni, huahua dikana idia havaraia tomadiho dekenai dahaka do ia vara? Iesu ia gwau: “Au ibounai huahua namona idia havaraia lasi gaudia be do idia utua, lahi dekenai do idia negea.” (Mataio 7:19) Oibe, Dirava ese tomadiho koikoi do ia hadikaia ore momokani! To unai be edena dala ai bona edena negai do ia vara? Baibel bukana Apokalupo karoa 17 bona 18 ese unai henanadai ia haerelaia.

Tomadiho Koikoi be Edena Bamona Do Ia Ore?

Mani emu lalona ena matana amo inai oi itaia. Ariara hahine be dagedage gauna latanai ia helai. Unai dagedage gauna be mai ena kwarana 7 bona doana 10. (Apokalupo 17:​1-4) Unai hahine be daika ia laulaulaia? Ia be “tanobada ena king ibounai” ia biagua. Ia be pepol dabua ia karaia, bonana namona muramura ia gaukaralaia, bona ia be taga bada hahinena. Danu, iena meamea karadia amo ‘bese ibounai ia koia.’ (Apokalupo 17:18; 18:​12, 13, 23) Baibel ena heduru dainai ita laloparara diba, unai hahine be tomadiho oreana ia laulaulaia. Tomadiho oreana tamona sibona lasi, to huahua dikana idia havaraia tomadiho orea ibounai ia laulaulaia.

Ariara hahine be dagedage gauna latanai ia helai, unai dagedage gauna ese tanobada ena politikol oreana ia laulaulaia. * (Apokalupo 17:​10-​13) Laulau dalanai tomadiho koikoi be politikol oreana latanai ia helai bamona, anina be tomadiho koikoi be gavamani ese ia karaia abia hidi ibounai ia biagua bona ia hakaua.

Kahirakahira hoa gauna badana ta do ia vara. “Dagedage gauna mai ena doana 10, oi itaia vadaeni gaudia, ese ariara hahine do idia badu henia. Do idia hadikaia momokani, iena dabua do idia kokia, kopina kavakava do idia rakatania. Vadaeni iena tauanina do idia ania, bona lahi dekenai do idia gabua.” (Apokalupo 17:16) Hoa dalanai, tanobada ena politikol orea badadia ese tomadiho koikoi do idia hadikaia ore momokani! Dahaka ese unai dagedage gauna ena lalona ia veria ariara hahine ia hadikaia totona? Baibel bukana Apokalupo, ia gwau: “Dirava ese iena palani be unai king 10 edia lalona dekenai do ia atoa.” (Apokalupo 17:17) Oibe, tomadiho koikoi be Dirava ena ladanai ia karaia kara dika ibounai dainai, Dirava ese ia do ia panisia. Dirava ese tomadiho koikoi ena politikol turadia do ia gaukaralaia ia do idia hadikaia ore totona, unai amo Iehova ese ena hahemaoro goeva do ia hahedinaraia.

Bema oi ura lasi tomadiho koikoi danu panisi do oi abia hebou, dahaka oi karaia be namo? Dirava ena hesiai tauna, ia gwau: “Lauegu orea taudia e, ia dekena amo do umui raka siri.” (Apokalupo 18:4) Oibe, hari be nega namona tomadiho koikoi amo ita heau siri totona! To edeseniai do ita heau lao? Dirava abidadama henia karana do ita rakatania, a? Lasi, badina bema unai bamona ita karaia, iseda vaira nega do ia dika. (2 Tesalonika 1:​6-9) Namona be tomadiho momokani lalonai ita heau vareai. To, tomadiho momokani be edena bamona ita dibaia diba?

 Tomadiho Momokani Dibaia Dalana.

Tomadiho momokani ese dahaka huahua namona ia havaraia be namo?​​—Mataio 7:​17.

◼ TOMADIHO MOMOKANI ESE LALOKAU IA HAHEDINARAIA: Tomadiho momokani taudia be inai “tanobada ena lasi,” bona bese eiava kastom ese idia ia hapararaia lasi, to ‘ta ta dekenai lalokau idia hahedinaraia.’ (Ioane 13:35; 17:16; Kara 10:​34, 35) Idia ala-ala heheni lasi, to idia noho hegaegae edia tadikaka totona edia mauri idia atoa diho.​​—1 Ioane 3:​16.

◼ TOMADIHO MOMOKANI ESE DIRAVA ENA HEREVA IA HAHEDIBALAIA: Tomadiho momokani ese “taunimanima edia taravatu” ia hadibaia lasi, to ia hadibaia gaudia ibounai be Dirava ena Hereva, Baibel amo. (Mataio 15:​6-9) Dahaka dainai? Badina “Buka Helaga ena hereva ibounai be Dirava ena Lauma ese ia havaraia. Bona inai hereva be mai ena siahu, Dirava ena hereva momokani ita dekenai do ia hadibaia. Ia be mai ena siahu danu iseda kara dika do ia hedinaraia, iseda kerere do ia hamaoromaoroa.”​—2 Timoteo 3:16.

◼ TOMADIHO MOMOKANI ESE RUMA BESE IA HAGOADAIA BONA KARA MAOROMAORO TARAVATUDIA IA BADINAIA: Tomadiho momokani ese tatau ia hadibaia edia ‘adavana idia lalokau henia, idia sibona idia lalokau henia bamona,’ bona natudia ia hadibaia ‘edia tama sina idia kamonai henia’ totona. (Efeso 5:​28, 33; 6:1) Danu, maduna idia huaia taudia ese kara maoromaoro taravatu badinaia karana dekenai, haheitalai namona idia hahedinaraia.​—1 Timoteo 3:​1-10.

Tomadiho ibounai ese lalokau idia hahedinaraia, Dirava ena Hereva idia hadibaia eiava kara maoromaoro taravatudia idia badinaia, a? Lagani 2001 ai idia halasia bukana (Holocaust Politics) ia gwau: “Bema taunimanima momo be Iehova ena Witnes taudia ese idia harorolaia bona idia badinaia hahediba herevadia idia badinaia, Hitler ese ia gunalaia ala-ala karana badana do ia vara lasi, bona tanobada ai bese tamona ala-ala heheni karana danu do ia vara lasi.”

Tano 235 ai, Iehova ena Witnes taudia ese Baibel ena kara maoromaoro taravatu idia hadibaia sibona lasi, to idia badinaia danu. Oi ai hagoadaia Iehova ena Witnes taudia oi noia oi idia durua Dirava ena ura oi dibaia totona, unai amo Dirava ese ia moalelaia dalana ai ia oi tomadiho henia diba. Harihari kara ta oi karaia be namo. Oi naria lasi. Badina tomadiho koikoi be kahirakahira do ia ore!​—Sepanaia 2:​2, 3.

Bema oi ura Iehova ena Witnes taudia ese Baibel amo idia hadibaia hereva haida oi diba, namona be henunai ia noho adres dekenai Iehova ena Witnes taudia oi tore henidia.

□ Lau ura Gima Noho! buklet ena kopi ta lau abia.

□ Mani dala umui karaia davana lasi Baibel stadi lau abia totona.

[Footnote]

[Blurb on page 3]

Tomadiho koikoi ese “tanobada ena king ibounai” ia biagua

[Blurb on page 3]

“Lauegu orea taudia e, ia dekena amo do umui raka siri”