DAHAKA hereva momokani? Unai be taunimanima ese idia laloa momo henanadai badadia edia haere. Reana oi be inai henanadai oi lalodia danu:

• Dirava be ita ia laloa, eiava?

• Tuari bona hisihisi be do idia ore, eiava?

• Ita mase neganai dahaka ia vara?

• Mase taudia totona helaro ia noho, a?

• Edena bamona do lau guriguri bona Dirava do ia kamonai?

• Edena bamona egu mauri lalonai lau moale diba?

Unai henanadai edia haere be edeseniai do oi tahua? Bema taunimanima idauidau oi nanadaia, haere idauidau do oi abia. Ena be dubu idia lao taudia eiava haroro taudia oi nanadaia, to haere idauidau do oi abia danu. Toana be haere haida be maoro, to gabeai idia be anina lasi.

To, buka ta ia noho bona ia sibona ese haere maorodia ia henia. Unai buka ese hereva momokani ia gwauraia. Iesu Keriso be Dirava dekenai ia guriguri, ia gwau: “Oiemu hereva be hereva momokani.” (Ioane 17:17) Hari, unai buka ita gwauraia, Baibel. Inai pepapepa ese Baibel amo ataiai idia noho henanadai edia haere do ia hahedinaraia goevagoeva.

HENANADAI ENA BADINA: Ita be dagedage bona kara dika tanobadana lalonai ita noho. Tomadiho orea momo idia gwau Dirava ese hisihisi ia havaraia.

BAIBEL ENA HAERE: Dirava be dika ia havaraia diba lasi. Iobu 34:10 ia gwau: “Dirava be nega ta do ia kara dika diba lasi. Siahu Ibounai Dirava be do ia kerere lasi, lasi bona lasi momokani.” Dirava be mai ena palani namona taunimanima totona. Unai dainai Iesu ese ita ia hadibaia inai bamona do ita guriguri: “Aiemai Tamana e, guba dekenai oi noho, . . . oiemu Basileia do ia mai, oiemu ura gauna tanobada dekenai do ai karaia, guba dekenai idia karaia bamona.” (Mataio 6:​9, 10) Dirava be ita ia laloa bada dainai, iena gwauhamata ia hamomokania totona kara ta ia karaia vadaeni.​​—Ioane 3:​16.

Genese 1:​26-​28; Iamesi 1:13; bona 1 Petero 5:​6, 7 itaia danu.

HENANADAI ENA BADINA: Tuari lalonai taunimanima milioni momo idia mase noho. Ita ibounai be hisihisi bona hekwakwanai ita davaria.

BAIBEL ENA HAERE: Dirava ia gwau vaira negana ai ia ese tanobada hegegemadai maino do ia havaraia. Iena Basileia, guba gavamani henunai, taunimanima ese “tuari dalana be do idia hadibaia lou lasi.” To, idia ese tuari kaia amo “tano geia auri do idia karaia.” (Isaia 2:4) Dirava ese kara dika bona hisihisi ibounai do ia haorea. Baibel ena gwauhamata be: “[Dirava] ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia [hari inai negai idia vara dika bona hisihisi] be idia ore vadaeni.”​​—Apokalupo 21:​3, 4.

Salamo 37:​10, 11; 46:9; bona Mika 4:​1-4 itaia danu.

HENANADAI ENA BADINA: Tanobada ena tomadiho orea momo idia gwau tau ta ia mase neganai, ena lauma be ia mauri noho. Haida idia gwau mase tauna ese idia mauri noho taudia ia hadikaia diba, eiava Dirava ese kara dika taudia be hel ena lahi dekenai ia negea bona hisihisi idia abia hanaihanai.

BAIBEL ENA HAERE: Taunimanima idia mase neganai, idia mauri noho lasi. Hadibaia Tauna 9:5 ia gwau: “Mase taudia be gau ta idia diba lasi.” Mase taudia be gau ta idia diba lasi, idia laloa lasi bona idia mamia lasi dainai, idia be mauri taudia idia durua eiava hadikaia diba lasi.​​—Salamo 146:​3, 4.

Genese 3:​19 bona Hadibaia Tauna 9:​6, 10 itaia danu.

HENANADAI ENA BADINA: Ita ura ita mauri noho bona iseda lalokau taudia ida mauri do ita moalelaia. Unai dainai, vaia taunimanima edia ura badana be edia lalokau mase taudia do idia itaia lou.

BAIBEL ENA HAERE: Idia mase taudia momo be do idia toreisi lou. Iesu ia gwauhamata “mase guria gabu dekenai idia noho taudia ibounai ese . . . guria gabu dekena amo do idia toreisi.” (Ioane 5:​28, 29) Dirava ena ura hegeregerena, tanobada ai do idia toreisi lou mase taudia be paradaiso ai do idia noho. (Luka 23:43) Unai ena anina be Dirava idia kamonai henia taudia be do idia gorere lasi bona mauri hanaihanai do idia abia. Baibel ia gwau: “Kara maoromaoro taudia ese, Dirava ia henidia tano dekenai do idia noho ela bona hanaihanai.”​​—Salamo 37:29.

Iobu 14:​14, 15; Luka 7:​11-​17; bona Kara 24:15 itaia danu.

HENANADAI ENA BADINA: Tomadiho oreadia ibounai lalonai taunimanima idia guriguri. To, momo idia laloa Dirava ese edia guriguri ia haere henia lasi.

BAIBEL ENA HAERE: Iesu ese ita ia hadibaia guriguri lalonai hereva haida do ita gwauraia loulou lasi. Iesu ia gwau: “Umui guriguri neganai, hereva kava momo do umui gwauraia lou, gwauraia lou lasi.” (Mataio 6:7) Bema ita ura Dirava ese iseda guriguri do ia kamonaia, namona be ia abia dae dalanai do ita guriguri henia. Unai ita karaia totona, Dirava ena ura do ita diba, bena unai hegeregerena do ita guriguri. Ioane Ginigunana 5:​14 ia gwau: “Ita diba momokani, bema gau ta iena ura hegeregerena ita noia neganai, ia ese ita dekenai do ia kamonai.”

Salamo 65:2; Ioane 14:​6, 14; bona 1 Ioane 3:​22 itaia danu.

HENANADAI ENA BADINA: Taunimanima momo idia laloa moni, ladana bada, bona hairai ese moale do ia havaraia. Unai dainai, unai gaudia idia tahua, to idia moale lasi.

BAIBEL ENA HAERE: Iesu ese moale davaria dalana ia herevalaia, ia gwau: “Dirava ena hereva idia kamonaia bona idia badinaia taudia be idia moale bada.” (Luka 11:28) Moale korikorina do ita davaria dalana tamona be hereva momokani, Dirava bona iena ura taunimanima totona, do ita dibaia. Unai hereva momokanina be Baibel lalonai do ita davaria. Hereva momokani ita dibaia neganai, do ita laloparara dahaka be mai anina bada bona dahaka be anina bada lasi. Abia hidi ta eiava kara ta ita ura karaia neganai, Baibel ena hereva momokani ita badinaia karana amo moale do ita davaria.

Aonega Herevadia 3:​5, 6, 13-​18 bona 1 Timoteo 6:​9, 10 itaia danu.

 Hari oi duahia herevadia be Baibel ena haere kwadogidia. Oi ura hereva ma haida oi diba, a? Bema oi be ‘Dirava ena hereva oi kamonaia bona oi badinaia tauna ta,’ do oi ura hereva ma haida oi diba. Reana, henanadai ma haida hegeregere, ‘Bema Dirava be ita ia laloa, dahaka dainai taunimanima edia mauri ibounai lalonai kara dika bona hisihisi ia koua lasi? Edena dala ai egu ruma bese maurina lau hanamoa diba?’ Baibel be unai bamona henanadai momo dekenai haere maorodia ia henia.

To, hari inai negai, momo idia ura lasi Baibel idia duahia. Idia gwau ia be buka badana bona nega haida idia lalopararalaia diba lasi. Oi ura emu henanadai edia haere be Baibel lalonai oi tahua, a? Iehova ena Witnes taudia be dala rua amo oi idia durua diba.

Ginigunana be Baibel be Dahaka Ia Hadibaia? bukana ese idia bisi taudia ia durua henanadai badadia edia haere be Baibel lalonai idia davaria totona. Iharuana be davana lasi Baibel stadi kosi. Oiemu gabu kahirakahira ia noho Iehova ena Witnes tauna ta ese wiki ta ta lalonai, oi abia hidi negana ai, oi ia vadivadi henia bona Baibel umui stadilaia hebou diba. Davana be lasi. Tanobada hegegemadai taunimanima milioni momo be unai kosi amo namo bada idia davaria. Idia momo be inai bamona idia hereva: “Hereva momokanina lau davaria vadaeni!”

Unai ese dava bada kohu ibounai ia hereaia. Baibel ena hereva momokani ese ita daradaralaia, garilaia gaudia, meamea bona babalau karadia amo ita ia ruhaia. Unai amo ita davaria iseda mauri be mai ena anina, ita be mai eda helaro bona ita moale. Iesu ia gwau: “Hereva momokani be do umui diba, bona hereva momokani ese umui do ia ruhaia.”​​—Ioane 8:​32.