Baibel​—Peroveta Hereva Maorona Ia Gwauraia Bukana, Kahana 1

“Lau ese Emu Bese be Bese Badana ai Do Lau Halaoa”

“Noga!” magasin eit ese Baibel ena peroveta herevadia do idia herevalaia. Atikol ese oi do idia durua inai henanadai oi haerelaia totona: Aonega taudia ese Baibel ena peroveta herevadia be sibona edia lalohadai amo idia torea, a? Peroveta herevadia be Dirava ena siahu amo idia torea, a? Oi ai boiria hamomokania gaudia oi stadilaia totona.

HARI, taunimanima haida be idia daradara bona Baibel ena hereva idia abia dae lasi. Bona momo be nega idia atoa lasi Baibel ena hereva idia tahua namonamo totona. Idia be taunimanima amo idia kamonai gaudia idia abia dae. To ai laloa emu lalohadai be unai bamona lasi. Mani ai ida Baibel negadiai idia vara hamomokania gaudia haida ita tahua hebou.

Ita matamaia totona mani Keristani, Jew, bona Muslim tomadiho taudia ese idia matauraia tauna ta ena sivarai ita itaia. Ia be Heberu tauna bona lagani 2018 B.C.E ela bona 1843 B.C.E. a ai ia noho. Ena ladana be Aberahamo. b

Baibel ena peroveta hereva ginigunadia haida be Aberahamo ia herevalaia. Unai peroveta herevadia be mai anina bada ita dekenai danu. (Maua ladana  “‘Tanobada Ena Bese Ibounai’ be Hahenamo Idia Abia” itaia.) Baibel bukana Genese lalonai inai peroveta herevadia idia noho: (1) Aberahamo ena natuna be bese badana ai do ia lao. (2) Bese badana ai ia lao lalonai, idia be igui hesiai taudia bamona tano idauna ai do idia noho. (3) Idia do idia ruhaia bona Kanana tanona do idia abia. Mani unai gaudia ita tahua namonamo.

Peroveta Hereva Badadia Toi

Peroveta Hereva 1: “Lau ese emu [Aberahamo ena] bese be bese badana ai do lau halaoa.”​—Genese 12:2.

Guguru dalana: Aberahamo ena natudia Isako bona Iakobo eiava (idia gwauraia danu Israela) amo idaunega Israela besena ia vara. Ia be bese ta mai ena king.

Histori ese ia hamomokania gauna:

● Baibel ese Aberahamo ena natuna Isako bona Iakobo, bona Iakobo ena natudia 12 edia ladadia ia herevalaia. Israela o Iuda idia lohiaia king momo ia herevalaia danu. King 17 be sivarai ma haida ese idia herevalaia, unai ese Baibel sivarai idia hamomokania. Idia hahedinaraia Aberahamo ena natuna Isako bona tubuna Iakobo amo bese badana ta ia vara. c

Peroveta Hereva 2: “Emu [Aberahamo ena] bese taudia be idau tano dekenai idau taudia bamona do idia noho, bona . . . unai taudia ese idia be igui hesiai taudia ai do idia halaoa, . . . To uru namba 4 ena nega lalonai, emu bese taudia be iniseni do idia giroa mai.”​—Genese 15:13, 16.

Guguru dalana: Kanana dekenai hitolo bada ia vara dainai, Aberahamo ena bese amo uru ibounai foa be Aigupito dekenai idia lao bona unuseni idia noho. Matamanai idia be idau tano taudia bamona idia noho, to gabeai raro bona witi ena momoru amo biriki idia karaia totona igui hesiai taudia ai idia halaoa. Hegeregere Aberahamo ena tubuna mero Levi be ena tamana burukana ida Aigupito dekenai idia lao. Unai uru foa be (1) Levi, (2) iena natuna mero Kohata, (3) Kohata ena natuna mero Amarama, bona (4) Amarama ena natuna mero Mose. (Esodo 6:​16, 18, 20) Lagani 1513 B.C.E. ai, Mose ese Israela besena be Aigupito amo ia hakaua raka-lasi.​—Henunai ia noho  taim laini bona maua ladana  “Nega Maorona Ia Gwauraia” itaia.

Histori ese ia hamomokania gauna:

● Profesa James K. Hoffmeier ia gwau Aigupito toretoredia bona akioleji ena hamomokania gaudia ese idia hahedinaraia Sema taudia (idaunegai Heberu taudia) be hitolo bada negadia ai edia mamoe ida Aigupito taudia ese idia abia dae. To Israela taudia be igui hesiai taudia ai idia lao neganai, biriki karaia gaukara idia henidia, a?

● Ena be Aigupito ena rekodi ese Israela taudia ia gwauraia lasi, to Aigupito taudia idia guria gabuna ai idia penia laulau bona lokua toretore ese idia hamomokania, idau tano taudia idia gaukaralaia kopukopu bona witi ena momoru amo biriki idia karaia totona. Baibel ena hereva hegeregerena, Aigupito ena rekodi ese ia hahedinaraia gaukara biagudia be igui hesiai taudia ese do idia karaia biriki ena namba idia torea. (Esodo 5:14, 19) Hoffmeier ia gwau, “Aigupito edia rekodi ese ia hamomokania idau tano taudia idia doria gaukara metaudia idia karaia totona . . . unai nega ai Israela besena hahisia karana ia vara. Unai dainai ita gwau diba, idaunegai Heberu taudia be hitolo bada ia vara negana ai Aigupito dekenai idia lao . . . bena gabeai igui hesiai taudia ai idia lao ena sivarai be momokani.”

Peroveta Hereva 3: “Kanana tanona ibounai unai, be oi bona emu tubudia dekenai do lau henia.”​—Genese 17:8.

Guguru dalana: Ena be Mose ese Israela bese matamatana be Aigupito amo ia hakaua raka-lasi, to Nunu ena natuna Iosua ese 1473 B.C.E. ai, Kanana tanona dekenai ia hakaudia vareai.

Histori ese ia hamomokania gauna:

● Akioleji taudia be deit idauidau idia torea, to K. A. Kitchen, Egypt besena ena histori ia stadilaia profesa ia gwau, “Israela besena be Kanana tanona ia abia bona ia vareai ena sivarai sibona ita herevalaia be namo.”

● Baibel ia gwau, Iosua ese “[Kanana ena siti] Hasoro be lahi amo ia gabua.” (Iosua 11:10, 11) Akioleji taudia ese unai siti gunana idia geia neganai, idia davaria Kanana taudia edia dubu toi be idia hadikaia momokani. Danu idia davaria gaudia haida amo idia hamomokania, 1400  B.C.E. bamona ai unai siti be lahi ese ia gabua. Unai be Baibel ena hereva ida ia hegeregere.

● Kanana ena siti ma ta be Gibeona, Ierusalema amo ena daudau be kilomita 9.6 bamona. Akioleji taudia ese idia davaria hodu ena imana 30 dekenai unai siti ena ladana ia noho, unai amo idia diba idia be Gibeona siti idia davaria. Idaunegai Gibeona taudia be Hasoro taudia bamona lasi, badina Iosua ida maino idia karaia. Bena Iosua ese idia be ‘ranu utua’ taudia ai ia halaodia. (Iosua 9:3-7, 23) Dahaka dainai unai gaukara ia henidia? Samuela Iharuana 2:​13 bona Ieremia 41:12 idia hahedinaraia Gibeona be ranu momo gabuna. Unai dainai Baibel ena hereva hegeregerena, Archaeological Study Bible, New International Version ia gwau: “Gibeona siti be ranu momo gabuna: ranu lohilohi badana tamona bona maragidia be 7 idia noho.”

● Histori bukadia haida be Baibel ese ia herevalaia taudia momo edia ladadia ia hamomokania. Matamanai ita herevalaia lista dekenai, Aberahamo ena bese amo idia vara bona Israela o Iuda idia lohiaia king 17 edia ladana idia noho. Idia haida be Ahaba, Ahasa, Davida, Hesekaia, Manase, bona Usaia. Unai king taudia edia ladana ese ia hamomokania, bese ta ladana Israela be Kanana tanona ia abia bona ia noholaia.

● Lagani 1896 ai, tahua gaukara idia karaia taudia ese Thebes, Egypt ai, nadi toretore ta ladana Merneptah Stele idia davaria. Unai toretore ese Pharaoh Merneptah ena ami ese lagani 1210 B.C.E. bamona ai Kanana dekenai idia tuari ena sivarai ia herevalaia. Unai be nega ginigunana nadi toretore ta ese Israela besena ia herevalaia, bona ia hamomokania unai bese be ia noho momokani.

Hamomokania Gaudia Idauidau Edia Namo

Ita itaia bamona, Baibel ese taunimanima bona gabu ladadia bona idia vara gaudia edia sivarai momo ia herevalaia. Unai gaudia dainai, Baibel ena hereva be histori toretore ma haida ida ita hahegeregerea diba, unai amo ita hamomokania Baibel ena peroveta herevadia be idia guguru. Hegeregere, Aberahamo bona ena bese totona, Dirava ena gwauhamata be idia guguru. Aberahamo ena tubudia be bese badana ta ai idia lao, Aigupito ai igui hesiai taudia bamona idia noho, bena gabeai Kanana tanona idia abia. Unai dainai Baibel torea tauna Petero ena hereva ita laloatao, mai manau ida ia gwau: “Peroveta herevadia be tau ta ese sibona ena ura dekenai ia gwauraia lasi, to lauma helaga ese taunimanima ia hasiahua hegeregerena, idia ese Dirava amo idia mai hereva idia gwauraia.”​—2 Petero 1:​21.

Israela besena be Kanana tanona idia abia, bena lagani momo murinai edia sivarai ia idau bona ia hedinarai dika bada idia davaria. Baibel torea taudia ese unai idia perovetalaia danu. Atikol ma ta ese unai do ia herevalaia.

[Futnout]

 [Box on page 17]

 “TANOBADA ENA BESE IBOUNAI” BE HAHENAMO IDIA ABIA

Dirava ia gwauhamata “tanobada ena bese ibounai” be Aberahamo ena bese amo hahenamo do idia abia. (Genese 22:18) Dirava ese Aberahamo ena natudia be bese ta ai ia halaoa ena badina badana be Mesia be unai bese amo do ia vara. Mesia be tanobada taudia ibounai totona ena mauri do ia henia. d Unai dainai Dirava ena gwauhamata Aberahamo dekenai be oi totona danu! Ioane 3:16 ia gwau: “Dirava ese tanobada ia lalokau henia bada dainai, ena Natuna korikorina ia henia, unai amo ia idia abidadama henia taudia ibounai be do idia mase lasi, to mauri hanaihanai do idia abia.”

[Futnout]

[Box on page 17]

 NEGA MAORONA IA GWAURAIA

Baibel ese nega maorona ia gwauraia ena haheitalai ta be 1 King Taudia 6:1 lalonai ia noho. Unai siri ese King Solomona be Ierusalema ai dubu helagana haginia gaukarana ia hamatamaia negana ia hahedinaraia. Ia gwau: “Israela taudia be Aigupito tanona idia rakatania bena lagani namba 480 ai [479 laganidia], Solomona be Sivi hua (unai be hua iharuana) ai, Iehova ena ruma ia haginia matamaia. Unai nega ai, ia be Israela ai lagani 4 ia lohia vadaeni.”

Baibel ena nega duahia karana ese Solomona ena lohia lagani namba 4 ia gwauraia, unai be 1034 B.C.E. Unai lagani be lagani 479 amo ita duahia giroa neganai, lagani 1513 B.C.E. do ita abia, Israela besena be unai lagani ai Aigupito idia rakatania.

 [Box on page 18]

ABERAHAMO—GUNA IA NOHO MOMOKANI TAUNA

● Idia davaria raro palakadia mai ena toretore be lagani 1800 B.C.E gaudia bona siti haida edia ladadia idia noho. Bona unai siti edia ladana be Aberahamo ena varavara edia ladana ida idia hegeregere. Unai siti haida be Pelega, Seruga, Nahoro, Tera, bona Harana.​—Genese 11:17-32.

● Genese 11:31 ia gwau, Aberahamo bona ena famili be “Kaledea hanua Uru” amo idia mai. Unai gunaguna ia noho siti ena nadi momoru be Iraq ena sautist kahana dekenai idia davaria. Danu Baibel ia gwau Aberahamo ena tamana Tera be Harana ena siti ai ia mase, unai gabu be reana hari Turkey dekenai ia noho. Bona Aberahamo ena adavana Sara be Heberona dekenai ia mase, unai siti gunana be hari Middle East dekenai bona taunimanima idia do noho.​—Genese 11:32; 23:2.

 [Chart on pages 16, 17]

(For fully formatted text, see publication)

 ABERAHAMO ENA BESENA ENA TAIM-LAIN BONA ISRAELA BESENA BE AIGUPITO IA RAKATANIA

Aberahamo ena uru foa

Levi

Kohata

Amarama

Mose

(B.C.E.)

1843 Aberahamo ia mase

1728 Iakobo be famili ida Aigupito dekenai idia lao

1711 Iakobo ia mase

1657 Iosepa ia mase

1593 Mose ia vara

1513 Mose ese Israela besena be Aigupito amo idia ia hakaua raka-lasi

1473 Mose ia mase. Iosua ese Israela besena be Kanana tanona dekenai ia hakaua vareai

Hahemaoro Taudia Edia Nega

1117 Samuela ese Israela ena king ginigunana Saulo ia horoa

1107 Davida ia vara

1070 Davida be Israela ena king ai ia lao

1034 Solomona ese dubu helaga haginia gaukarana ia hamatamaia

[Picture on page 17]

Inai nadi (o stela) ai inai hereva “Davida Ena Iduhu” idia torea, unai ese Aberahamo ena bese amo idia vara natudia be king ai idia lao bona Israela o Iuda idia lohia taudia edia ladadia ia hamomokania

[Credit Line]

© Israel Museum, Jerusalem/​The Bridgeman Art Library International