1, 2. (a) Edena kara ese ita do idia durua, hahetoho ita haheaukalaidia totona? (b) Abidadama ena anina be dahaka? Haheitalai ta gwauraia.

 IEHOVA ena hesiai gaukara ese ita dekenai moale ia mailaia. To, ita ese hekwakwanai momo ita davaria danu. Bona reana “kara maoromaoro dainai hisihisi” do ita abia. (1 Kor. 10:13; 1 Pet. 3:14; 5:8, 9) Unai hahetoho ita haheaukalaidia totona, abidadama bona boga-auka ita hahedinaraia be namo.

² Abidadama ena anina be dahaka? Aposetolo Paulo ia gwau: “Abidadama ena anina be inai, oi daradara lasi to oi diba oi naria noho gauna be do ia vara. Bona oi diba momokani, oi abia dae gaudia be momokani, ena be unai gaudia oi itaia lasi.” (Heb. 11:1) Baibel ma ta (The Simple English Bible) ia gwau: “Abidadama be taitol pepana ta bamona, iseda helaro ia hamomokania. Abidadama dainai ita diba momokani ita itaia lasi gaudia be do idia vara.” “Taitol pepana” ese ia hamomokania tau ta be ruma o tano ta ena biaguna. Ita abidadama Iehova be nega ibounai ena gwauhamata ia hagugurudia dainai, unai be hegeregere ita ese “taitol pepana” ta ita abia. Ita abia dae momokani Dirava ese ia gwauhamatalaia gaudia be do idia vara, bona Baibel amo ita ia hadibaia herevadia be hereva momokanidia, ‘ena be unai gaudia ita itaia lasi.’

3, 4. (a) Boga-auka karana ena anina be dahaka? (b) Edena dala ai eda abidadama bona boga-auka karana ita habadaia diba?

³ Ia boga-auka tauna be nega aukadia o dika bada ia davaria neganai, mai gari lasi ida ia kara bona hereva. Danu ia gari lasi, bona ena be nega haida reana ena abidadama dainai dagedage ia davaria diba, to unai ia laloa lasi.​—⁠Mar. 6:49, 50; 2 Tim. 1:7.

⁴ Reana ita mamia ita hegeregere lasi abidadama bona boga-auka ita hahedinaraia totona. Baibel lalonai, idia boga-auka bona abidadama taudia momo edia sivarai ia noho. Eda abidadama bona boga-auka karana ita habadaia totona, unai taudia edia haheitalai ita stadilaia be namo.

5. Dahaka ese Iosua do ia durua, gunalaia tauna namona ai ia lao totona?

⁵ Iehova ese Aigupito amo Israela taudia milioni momo ia hamauria, bena lagani 40 murinai gau ta ia vara. Unai negai, peroveta tauna Mose be Israela besena ia gunalaia. Ena mauri lagani be 120 neganai, Nebo Ororona dekenai ia daekau bona gwauhamata tanona ia itaia, bena unuseniai ia mase. Mose ena gabu ia abia tauna Iosua, be “aonega ena lauma ese ia hahonua.” (Deu. 34:1-9) Israela ena ami taudia be idia hegaegae, Kanana tanona idia abia totona. Iosua be gunalaia tauna namona ai ia lao totona, ia ese Dirava amo aonega ia abia be gau badana. Danu, Iehova do ia abidadama henia, ia boga-auka bona gari lasi be namo.​—⁠Deu. 31:22, 23.

6. (a) Iosua 23:6 ena hereva bamona, mai boga-auka ida dahaka ita karaia be namo? (b) Kara 4:18-20 bona Kara 5:29 amo dahaka ita dibaia?

⁶ Israela taudia be lagani momo lalonai Kanana tanona abia totona idia tuari. Unai nega lalodiai, Iosua ena aonega, boga-auka bona abidadama karana ese idia ia durua bada. Idia tuari noho bona Dirava idia badinaia noho totona, idia boga-auka be gau badana. Iosua be kahirakahira ia mase neganai, Israela taudia ia hamaoroa: “Mose ena Taravatu Buka lalonai idia torea hereva ibounai do umui badinaia, idia dekena amo do umui raka siri lasi, idiba kahana dekenai, o lauri kahana dekenai.” (Ios. 23:6) Ita danu, ena be taunimanima ese ita idia doria Dirava ena taravatu ita utua totona, to namona be nega ibounai mai boga-auka ida Iehova ita badinaia. (Kara 4:18-20; 5:29 duahia.) Bema Iehova amo heduru totona ita noinoi bona ia ita abidadama henia, ita do ia durua ita boga-auka totona.

7. Iosua be mai gari lasi ida ia gaukara bona ia kwalimu totona, dahaka ia karaia be namo?

⁷ Mai gari lasi ida Iehova ena ura ita karaia noho totona, namona be Dirava ena Hereva ita stadilaia bona ita dibaia gaudia ita badinaia. Iosua be Mose ena gabu ia abia neganai, Iehova ese ia hamaoroa unai bamona do ia karaia, ia gwau: “Do oi goada bona boga auka. Lauegu hesiai tauna Mose umui dekenai ia henia taravatu ibounai do oi badinaia, bona ena kara do oi karaia. . . . Unai neganai do oi lao gabudia ibounai dekenai oiemu kara ena anina do ia vara momokani. Inai Taravatu Buka be nega ibounai emui guriguri heboudia lalonai do umui duahia. Dina bona hanuaboi do oi tahua, bona iena torea herevadia ibounai do oi kamonai henia. Unai neganai oiemu raka do ia namo, bona oiemu kara ena anina do ia vara momokani.” (Ios. 1:7, 8) Iosua ia kwalimu badina unai sisiba ia badinaia. Bema ita danu be unai bamona ita karaia, ita be mai gari lasi ida Dirava ena hesiai gaukara do ita karaia bona do ita kwalimu.

8. Lagani 2013 ena siri badana be dahaka? Oi laloa, edena dala ai unai siri ese oi do ia durua?

⁸ Iehova ese Iosua ma ia hamaoroa: “Do oi goada bona do oi boga auka. Do oi gari lasi, bona oiemu lalona do ia manoka lasi, badina be lau Lohiabada, oiemu Dirava, ese oi loaloa gabudia ibounai dekenai oi do lau bamoa noho.” (Ios. 1:9) Iehova ese ita ia bamoa danu. Unai dainai, herevana edena hahetoho ita davaria ita gari lasi be namo. Inai hereva ita laloatao: Oi goada bona boga-auka . . . Iehova emu Dirava ese oi ia bamoa. Unai hereva be Iosua 1:9 amo bona ia be lagani  2013 ena siri badana. Unai siri ena hereva, bona abidadama bona gari lasi karana idia hahedinaraia taudia ma haida edia haheitalai, ese vaira huadia ai eda abidadama do idia hagoadaia.

9. Edena dala ai Rahaba ese abidadama bona gari lasi karana ia hahedinaraia?

⁹ Iosua ese spai taudia rua be Kanana dekenai ia siaidia neganai, ariara hahinena Rahaba ese idia ia hunia bona edia inai taudia be dala idauna ai ia siaidia. Rahaba ena abidadama bona gari lasi karana dainai, Israela taudia ese Ieriko idia hadikaia neganai, ia bona ena ruma bese idia roho mauri. (Heb. 11:30, 31; Iam. 2:25) Oibe, Rahaba ese ena matabodaga karadia ia rakatania, unai amo Iehova ia hamoalea diba. Keristani taudia ai idia lao taudia haida danu be abidadama bona gari lasi karana idia hahedinaraia, bona edia mauri idia haidaua unai amo Dirava idia hamoalea diba.

10. Ruta dekenai dahaka ia vara, to ia be tomadiho momokanina ia abia hidi? Bona edena dala ai Iehova ese ia hanamoa?

¹⁰ Iosua ia mase murinai, Moaba hahinena Ruta be mai gari lasi ida tomadiho momokanina ia abia dae. Reana ia be Iehova ena sivarai sisina ia diba, badina guna ia be Israela tauna ta ia adavaia. Ia be mai gari lasi ida Iehova ia tomadiho henia. Naomi, Ruta ena ravana, be Moaba dekenai ia noho, to ena adavana bona natuna memero rua idia mase neganai, ia ura Betelehema hanua, Israela dekenai ia giroa lou. Dala ai, Naomi ese Ruta ia hamaoroa ena taunimanima dekenai ia giroa lou totona, to Ruta ia ura lasi ia giroa lou. Ia gwau: “Oiemu bese be lauegu bese do idia lao, bona oiemu Dirava be lauegu Dirava do ia lao.” (Ruta 1:16) Gabeai, Ruta be Naomi ena famili tauna ta, Boasi ia adavaia. Idia ese natuna mero ta idia havaraia, bona iena bese amo Davida bona Iesu idia vara. Oibe, Iehova ese abidadama bona gari lasi karana idia hahedinaraia taudia ia hanamoa.​—⁠Ruta 2:12; 4:17-22; Mat. 1:1-6.

11. Edena dala ai Iehoiada bona Iehoseba ese gari lasi karana idia hahedinaraia? Edia gari lasi karana dainai dahaka ia vara?

¹¹ Dirava ena ura idia karaia bona edia tadikaka idia gimaia totona, kahirakahira edia mauri idia haboioa taudia be Dirava ese ia durudia. Unai ita itaia neganai, iseda abidadama bona gari lasi karana ia goada. Hegeregere, Hahelaga Tauna Badana, Iehoiada bona ena adavana Iehoseba mani oi laloa. King Ahasaia ia mase murinai, ena sinana Atalaia be sibona kwini ai ia halaoa. Ia ese king Ahasaia ena natuna ibounai ia hamasea, to Ioasa ia hamasea lasi. Badina Iehoiada bona Iehoseba ese Ioasa idia abia mauri bona lagani siks lalonai ia idia hunia​—⁠idia be kwini ese do ia hamasedia garina idia gari lasi. Lagani namba seven ai, Iehoiada ese Ioasa be king ai ia halaoa bona oda ia henia Atalaia idia hamasea totona. (2 Kin. 11:1-16) Iehoiada ese King Ioasa ia durua dubu helaga idia hanamoa lou totona. Iehoiada ena mauri lagani be 130 neganai, ia mase bona ia be king edia gara gabuna dekenai idia guria, “badina ia ese kara namodia Israela taudia totona, Dirava totona, bona Dubu Helaga totona ia karaia.” (2 Siv. 24:15, 16) Oibe, Iehoiada bona ena adavana edia gari lasi karana dainai, idia ese Mesia do ia mai besena idia gimaia.

12. Edena dala ai Ebede Meleke ese gari lasi karana ia hahedinaraia?

¹² King Sedekaia ena hesiai tauna, Ebede Meleke be Ieremia durua totona, kahirakahira ena mauri ia haboioa. Hanua ena tau badadia ese king idia hamaoroa, Ieremia ena hereva dainai Israela ena tuari taudia bona hanua taudia idia lalomanoka. King ese idia ia hamaoroa edia ura hegeregerena Ieremia do idia kara henia. Idia ese Ieremia be kopukopu amo ia honu ranu guri lalonai idia negea, bena idia rakatania ia mase totona. (Ier. 38:4-6) Ebede Meleke ese King Sedekaia amo gwau maoro ia abia Ieremia ia durua totona. Ebede Meleke be ia karaia karana dainai ena mauri ia haboioa diba, badina momo ese Ieremia idia inai henia. King ese Ebede Meleke ena  noinoi ia abia dae, bona ia hamaoroa tatau 30 do ia abia bona do idia lao Ieremia be guri amo idia veria daekau. Iehova ese Ieremia amo Ebede Meleke ia gwauhamata henia, Babulonia taudia ese Ierusalema idia hadikaia ore neganai, ia be do ia mase lasi. (Ier. 39:15-18) Dirava ese mai gari lasi ida ena ura idia karaia taudia ia hanamoa.

13. Edena dala ai Heberu memero toi ese gari lasi karana idia hahedinaraia? Edia sivarai amo dahaka ita dibaia?

¹³ Lagani 600 B.C.E. bamona ai, Heberu memero toi be edia abidadama bona gari lasi karana dainai Dirava ese ia hanamodia. King Nebukanesa ese Babulonia ena dagi bada taudia ia oda henia, golo kaivakuku badana do idia tomadiho henia. Unai oda ia badinaia lasi tauna be lahi siahu masemase lalonai do idia negea. Heberu memero toi be mai hemataurai ida Nebukanesa idia hamaoroa: “Aiemai Dirava ese inai lahi siahu herea dekena amo ia hamauria diba ai, bona king e, oiemu imana dekena amo do ia hamauria ai. To bema lasi, king e, inai do oi diba namo, oiemu dirava bona inai golo kaivakukuna oi haginia gauna, be do ai tomadiho henia lasi.” (Dan. 3:15-18) Daniela 3:19-30 lalonai, Iehova ese unai Heberu memero toi ia hamauria ena sivarai ita duahia diba. Reana ita be lahi siahu masemase lalonai do idia negea lasi, to nega haida hahetoho badadia do ita davaria. To, bema ita gari lasi bona Dirava ita abidadama henia, ita diba momokani Dirava ese ita do ia hanamoa.

14. Daniela karoa 6 ai, edena dala ai Daniela be gari lasi karana ia hahedinaraia? Bona dahaka ia vara?

¹⁴ Daniela ena inai taudia be ia idia hadikaia totona, King Dariuse ena lalona idia veria taravatu ta do ia atoa. Idia ese king idia hamaoroa: “Dina 30 lalonai be tau ta ese gau ta do ia noia lasi dirava ta dekenai, o tau ta dekenai, to oi dekenai sibona do ia noia. Bema tau ta ese inai hereva ia utua, be do idia negea laiona ena guri dekenai.” Unai nega lalonai, Daniela be abidadama bona gari lasi karana ia hahedinaraia. Daniela be unai ia kamonai neganai, “ia lao iena ruma dekenai. Ataiai daiutuna ta dekenai be uindo toi idia noho Ierusalema itaia lao ena kahana dekenai. Nega ibounai ia karaia bamona, unai uindo dekenai ia tui diho dina ta nega toi, bona Dirava dekenai ia guriguri.” (Dan. 6:6-10) Daniela be laiona ena guri dekenai idia negea, to Iehova ese ia hamauria!​—⁠Dan. 6:16-23.

15. (a) Edena dala ai Akwila bona Prisikila ese abidadama bona gari lasi karana idia hahedinaraia? (b) Ioane 13:34 ena anina be dahaka? Edena dala ai Keristani taudia momo be unai lalokau idia hahedinaraia?

¹⁵ Baibel ese Akwila bona Prisikila edia sivarai ia gwauraia, idia be Paulo totona kahirakahira idia mase. (Kara 18:2; Roma 16:3, 4) Idia ese gari lasi karana idia hahedinaraia bona Iesu ena hereva idia badinaia: “Umui dekenai taravatu matamata lau henia inai, do umui lalokau heheni, lau ese umui lau lalokau henia hegeregerena, umui danu do umui lalokau heheni.” (Ioa. 13:34)  Mose ena Taravatu henunai, tau ta be ena dekena tauna do ia lalokau henia, sibona ia lalokau henia hegeregerena. (Lev. 19:18) Dahaka dainai Iesu ena taravatu be taravatu “matamata”? Badina unai taravatu ese ita ia hagoadaia, Iesu ia karaia bamona, eda mauri do ita henia ma haida ita hamauria totona. Keristani taudia momo be lalokau dainai inai taudia amo edia tadikaka idia gimaia, bona kahirakahira idia mase.​—⁠1 Ioane 3:16 duahia.

16, 17. Edena dala ai Keristani taudia ginigunadia be edia abidadama dainai hahetoho idia davaria? Edena dala ai, hari Keristani taudia haida be edia abidadama dainai hahetoho idia davaria?

¹⁶ Iesu bamona, Keristani taudia ginigunadia be Iehova sibona idia tomadiho henia. (Mat. 4:8-10) Idia ura lasi bonana namo muramura idia gabua Roma ena pavapava tomadiho henia totona. Daniel P. Mannix be ena buka (Those About to Die) lalonai ia gwau: “Ena be lahi ia araia noho boubou patana be gadara gabuna dekenai idia atoa, to Keristani taudia momo be bonana namo muramurana idia gabua lasi. Bema dibura tauna ta ese unai muramura sisina ia gabua, vadaeni do idia ruhaia. Danu, idia hamaoroa unai ia karaia neganai, ia be Roma ena pavapava ia tomadiho henia lasi, to ia abia dae Roma ena pavapava be dirava ta. To, Keristani taudia momo be unai kara idia karaia lasi.”

¹⁷ Nazi ena dibura kamepa ai idia atoa Keristani taudia idia hamaoroa, dala ia noho dibura idia rakatania bona idia mauri diba. Idia hamaoroa idia ese pepa ta do idia sainia, unai ese do ia hahedinaraia idia be Iehova ena Witnes taudia lasi. To haida sibona be unai pepa idia sainia. Rwanda ai tuari ta lalonai, Hutu bona Tutsi Witnes taudia be ta ta idia gimaia totona, kahirakahira edia mauri idia haboioa. Unai bamona negadiai, Dirava ena taunimanima idia gari lasi bona abidadama idia hahedinaraia be namo.

18, 19. Edena Baibel sivaraidia ese ita idia durua diba, mai abidadama bona boga-auka ida ita haroro totona?

¹⁸ Hari, ita moale badina Basileia ita harorolaia bona hahediba taudia halaoa gaukarana ita karaia diba. Unai be Dirava ese ena hesiai taudia dekenai ia henia gaukara badana. (Mat. 24:14; 28:19, 20) Ita moale badina Iesu be ita dekenai haheitalai namona ia hahedinaraia. Ia be “taoni ta ta bona hanua ta ta dekenai ia lao, Dirava ena Basileia ena sivarai namona ia harorolaia.” (Luka 8:1) Iesu bamona, Basileia ena sivarai ita harorolaia totona, abidadama bona gari lasi karana be mai anina bada. Dirava ena heduru amo ita be Noa bamona, gari lasi karana ita hahedinaraia diba. “Dirava idia badinaia lasi taudia” huanai Noa ese “kara maoromaoro ia harorolaia.” Gabeai, unai taudia be abata ese ia hamasedia ore.​—⁠2 Pet. 2:4, 5.

¹⁹ Guriguri karana ese ita ia durua haroro gaukara ita karaia totona. Iesu ena hahediba taudia haida be dagedage idia davaria neganai, idia guriguri ‘mai gari lasi ida Dirava ena hereva do idia gwauraia noho totona,’ bona Dirava ese ia kamonai henidia. (Kara 4:29-31 duahia.) Bema oi be ruma-ta-ruma-ta haroro gaukara totona oi gari, namona be Iehova oi noia emu abidadama bona boga-auka karana do ia habadaia bona oi do ia durua.​—⁠Salamo 66:19, 20 duahia. a

20. Daidia ese ita idia durua noho?

²⁰ Inai tanobada dikana ai Dirava ena ura ita karaia be mai ena hekwarahi. To ita be sibona ita noho lasi, badina Dirava be ita ida ia noho. Danu iena Natuna, kongrigeisen ena Kwarana, be ita ia durua noho. Tanobada hegegemadai Iehova ena Witnes taudia 7,000,000 mai kahana idia noho. Namona be ita ibounai ese abidadama ita hahedinaraia, bona sivarai namona ita harorolaia noho. Lagani 2013 ena siri badana ese ita do ia durua unai bamona ita karaia totona, ia gwau: Oi goada bona boga-auka . . . Iehova emu Dirava ese oi ia bamoa.​—⁠Ios. 1:9.