1-3. (a) Haida ese guna gaudia be edena bamona idia laloa, bona edia hemami be edena bamona? (b) Paulo ena sivarai amo dahaka ita dibaia?

 ANE torea tauna ta ladana J. G. Whittier ia gwau, nega momo ita lalohisihisi neganai, inai bamona hereva ita gwauraia, “guna unai kara lau karaia lasi be namo.” Taunimanima ese unai bamona hereva idia gwauraia, badina idia laloa guna bema abia hidi idauna idia karaia, reana hari edia mauri be do ia namo. Ita ibounai be guna ita karaia gaudia haida ita laloa neganai, unai bamona ita laloa danu. To, haida be guna idia karaia gaudia o idia karaia lasi gaudia dainai, hanaihanai idia lalohisihisi. Oi danu be unai bamona oi lalohisihisi, a?

² Haida be kerere o kara dika badadia idia karaia. Haida be edia mauri lalonai idia karaia abia hidi idia daradaralaidia. Haida be guna idia karaia gaudia idia laloa momo lasi. To, ma haida be idia karaia abia hidi dainai idia lalohisihisi, bona idia gwau, ‘Guna bema unai lau karaia lasi be namo!’ (Sal. 51:3) Emu hemami be edena bamona? Oi ura mai emu goada ibounai ida Dirava oi hesiai henia, bona emu kerere gunadia oi laloa momo lasi, a? Baibel lalonai unai bamona tauna ta ena sivarai ia noho, a? Oibe, ia be aposetolo Paulo.

³ Paulo be kara dika badadia ia karaia, to abia hidi maorodia ia karaia danu. Ia karaia kereredia dainai ia lalohisihisi bada, to ia laloparara namona be ia gaukara goada Dirava ena hesiai gaukara ia karaia totona. Mani ita itaia, edena dala ai Paulo ena sivarai ese ita do ia durua.

4. Paulo be guna dahaka ia karaia dainai ia lalohisihisi?

⁴ Paulo ia matamata neganai, ia be Farisea tauna ta bona ena ladana idia gwauraia Saulo, bona unai negai ia karaia gaudia dainai gabeai ia lalohisihisi. Hegeregere, ia  ese Keriso ena hahediba taudia ia dagedage henia. Baibel ia gwau, Stefano idia hamasea murinai, Saulo ese “kongrigeisen taudia ia dagedage henia bada. Ruma ta ta lalonai ia vareai bona tatau bona hahine ia veridia raka-lasi bona dibura ruma dekenai ia atodia.” (Kara 8:3) Baibel ia diba bada tauna ta ladana, Albert Barnes ia gwau, inai hereva “dagedage henia bada” ena anina be Saulo be “animal dikana ta bamona,” Keristani kongrigeisen taudia ia dagedage henia. Saulo be Iuda tomadiho ia goadalaia tauna ta, bona ia abia dae Dirava ia ura ia ese Keristani kongrigeisen do ia hadikaia ore. Unai dainai, ia ese Keristani taudia ia dagedage henidia, bona ia ura bada “tatau bona hahine” ia hamasea.​—⁠Kara 9:1, 2; 22:4. a

5. Dahaka dainai Saulo ese Keristani taudia dagedage henia karana ia hadokoa, bena Keriso ia harorolaia matamaia?

⁵ Gabeai, Saulo ia ura Damaseko dekenai ia lao bona Keristani taudia be edia ruma amo do ia veridia raka-lasi, Ierusalema dekenai do ia abidia lao, bona Sanhedrin dekenai do idia kota henidia. To Iesu, Keristani kongrigeisen ena Kwarana, ese ia koua. (Efe. 5:23) Saulo be Damaseko dalana ai ia lao lalonai, Iesu be ia dekenai ia hedinarai, bona guba amo ia mai diarina ese Saulo ena matana ia hakepulua. Unai murinai, Iesu ese Damaseko dekenai ia siaia lao, bona unuseniai ia naria ela bona hadibaia hereva ma haida do ia abia. Gabeai idia vara gaudia be ita diba vadaeni.​—⁠Kara 9:3-22.

6, 7. Dahaka ese ia hahedinaraia Paulo ia laloparara ia be kerere badadia ia karaia?

⁶ Paulo ia laloparara ia karaia karana be maoro lasi neganai, ia ese Keristani taudia dagedage henia karana ia hadokoa, bona Iesu ena sivarai ia harorolaia goadagoada. To, Paulo be guna ia karaia gaudia ia laloaboio lasi, bona sibona ia herevalaia ia gwau: “Oibe, guna Iuda tomadiho lau badinaia neganai, lau karaia karadia edia sivarai umui kamonai vadaeni. Lau ese Dirava ena kongrigeisen lau dagedage henia bada bona lau ura lau hadikaia.” (Gal. 1:13) Gabeai ia ese Timoteo, Korinto bona Filipi kongrigeisen ia tore henidia neganai, ena mauri gunana ia herevalaia. (1 Korinto 15:9 duahia; Fili. 3:6; 1 Tim. 1:13) Paulo be guna ia karaia gaudia dainai ia hemarai, to ena kara ia hunia lasi, badina ia laloparara ia be kerere badadia ia karaia.​—⁠Kara 26:9-11.

⁷ Baibel ia diba bada tauna ta ladana, Frederic W. Farrar ia gwau, Paulo ese Keristani taudia ia dagedage henia karana ita laloa neganai, ita laloparara Paulo be ena kara dainai ia lalohisihisi bada, bona reana momo ese ia idia gwauraia dika. Paulo ese kongrigeisen ta ta ia vadivadi henia neganai, reana nega ginigunana ia idia hedavari henia tadikaka idia gwau: ‘So, oi be Paulo, a? Guna oi ese ai oi dagedage henia!’​—⁠Kara 9:21.

8. Iehova bona Iesu edia hebogahisi bona lalokau karana dainai, Paulo be dahaka ia karaia? Paulo ena haheitalai amo dahaka ita dibaia?

⁸ Paulo ia laloparara ia be aposetolo tauna ta ai ia lao, badina Dirava ese ia dekenai hebogahisi hereadaena ia hahedinaraia. Paulo ena revareva 14 lalonai, Dirava ena hebogahisi hereadaena be nega 90 bamona ia herevalaia; Baibel idia torea taudia ma haida be unai bamona lasi. (1 Korinto 15:10 duahia.) Paulo ia moale badina Dirava ese ia hebogahisi henia, bona ia ura ena tanikiu karana ia hahedinaraia. Unai dainai, ia ese Dirava ena hesiai gaukara ia goadalaia; ia be aposetolo taudia ma haida bamona lasi. Paulo ena haheitalai amo dahaka ita dibaia? Bema Keriso ena mauri davalaia boubouna ita abidadama henia, iseda dika ita gwauraia hedinarai, bona unai kara kererena ita hadokoa, Iehova ese eda kara dika do ia gwauatao. Unai dainai, bema oi laloa Keriso ena mauri  davalaia boubouna ese emu dika ia gwauatao diba lasi, Paulo ena sivarai oi laloa be namo. (1 Timoteo 1:15, 16 duahia.) Ena be Paulo ese Iesu ia dagedage henia, to ia gwau Iesu ese ia ia lalokau henia bona ia dainai ia mase. (Gal. 2:20; Kara 9:5) Paulo ia diba, ena be guna kara dika badadia ia karaia, to Dirava ena hesiai gaukara ia goadalaia be namo, unai amo do ia lalohisihisi lasi. Oi danu be unai bamona do oi karaia, a?

9, 10. (a) Dahaka dainai Iehova ena taunimanima haida idia lalohisihisi? (b) Dahaka dainai kerere gunadia ita laloa momo lasi be namo?

⁹ Emu kara gunadia haida dainai oi lalohisihisi, a? Guna mai anina bada gaudia dekenai emu nega bona goada bada oi gaukaralaia lasi dainai, oi lalohisihisi, a? Oi karaia gaudia ese ma haida idia hahisia, a? Eiava, reana guna oi karaia gauna ta dainai oi lalohisihisi, bona oi laloa unai nega ai dala idauna ai oi karaia be namo, a? Dahaka do oi karaia bema emu hemami be unai bamona?

¹⁰ Taunimanima haida be idia laloa momo! Haida be edia kerere idia laloa loulou dainai, idia lalohisihisi bada. Oi laloa momo neganai, emu hekwakwanai oi hanamoa diba, a? Lasi! Mani oi laloa, oi ura gabu ta oi lao dainai, vanagi ta lalonai hora momo oi bara. To, vanagi be au ta dekenai idia kwatua dainai, ena be oi bara goadagoada to gabu ta oi lao lasi. Unai hegeregerena, namo lasi oi laloa momo, to oi gaukara goada emu hekwakwanai oi hamaoromaoroa totona. Oi habadua tauna dekenai sori herevana oi gwauraia, bona ia ida maino oi karaia be namo. Namona be unai kerere ena badina oi laloa namonamo, unai amo gabeai do oi karaia lou lasi. Nega haida, emu kerere dainai idia vara hekwakwanai do oi haheaukalaia sibona. To, emu kerere gunadia oi laloa momo karana ese oi do ia durua lasi. Bema oi laloa momo, Iehova ena hesiai gaukara do oi karaia namonamo lasi.

11. (a) Bema ita ura Iehova ese ita dekenai hebogahisi bona lalokau ia hahedinaraia, dahaka ita karaia be namo? (b) Baibel ena hereva bamona, eda kerere gunadia ita lalohisihisilaia lasi totona, dahaka ita karaia be namo?

 ¹¹ Haida idia laloa idia karaia kerere be dika momokani dainai, Dirava ese idia do ia hebogahisi henia lasi. Reana idia laloa edia kerere be bada herea, eiava idia ese kerere momo herea idia karaia. Herevana guna dahaka kerere idia karaia, to namona be edia dika idia gwauraia hedinarai, edia kara idia haidaua, bona Dirava idia noia edia dika ia gwauatao totona. (Kara 3:19) Iehova ese idia dekenai hebogahisi bona lalokau do ia hahedinaraia, ma haida dekenai ia karaia bamona. Ia manau, kara momokani bona ena dika dainai ia sori tauna, be Iehova ese ena dika do ia gwauatao. Hegeregere, Dirava ese Iobu ena kerere ia gwauatao, badina Iobu ena ‘lalona ia giroa momokani.’ (Iobu 42:6) Baibel ese ita ia hadibaia dahaka do ita karaia, unai amo eda kerere gunadia ita lalohisihisilaia lasi bona maino do ita davaria. Baibel ia gwau: “Bema oiemu kara dika oi hunia noho neganai, namo ta do oi davaria lasi. Oiemu kara dika do oi gwauraia hedinarai, bona dika do oi rakatania, unai neganai Dirava ese oi do ia bogahisihisi henia.” (Aon. 28:13; Iam. 5:14-16) Namona be Dirava dekenai eda dika ita gwauraia hedinarai, ita noia iseda dika do ia gwauatao, bona ita hahedinaraia ita sori momokani. (2 Kor. 7:10, 11) Unai amo dika ia “gwauatao momokani” Diravana, Iehova, ese ita dekenai hebogahisi do ia hahedinaraia.​—⁠Isa. 55:7.

12. (a) Bema eda kerere dainai ita lalohisihisi, edena dala ai Davida ita tohotohoa diba? (b) Dahaka dainai Baibel ia gwau Iehova be “ena lalona ia giroa,” bona edena dala ai unai ese ita ia durua? (Maua itaia.)

¹² Iehova ese ita ia durua dala badana ta be guriguri karana. Salamo bukana lalonai Davida ia hahedinaraia, Iehova ese ena guriguri ia haerelaia. (Salamo 32:1-5 duahia.) Davida ese ena kara dika be Dirava dekenai ia do gwauraia hedinarai lasi neganai, ena lalomamina ia dika dainai ia lalohisihisi bada. Ia lalohekwarahi, ia gorere bona ia lalomanoka danu. Davida be Dirava dekenai ena dika ia gwauraia hedinarai murinai, Dirava ese ena dika ia gwauatao bona ena lalomamina ia namo lou. Iehova ese Davida ena guriguri ia haerelaia bona ia durua ena kerere gunadia ia laloa momo lasi, to kara namodia do ia karaia noho. Unai hegeregerena, bema oi karaia kerere ta oi laloa momo, namona be Dirava oi noia emu dika ia gwauatao, bona oi hekwarahi emu kara oi haidaua totona. Bona namona be oi abia dae, Iehova ese emu guriguri ibounai ia kamonai bona emu dika ia gwauatao vadaeni.​—⁠Sal. 86:5.

13, 14. (a) Hari inai negai dahaka ita laloa bada be namo? (b) Edena henanadai ese ita idia durua, hari ita karaia gaudia ita laloa namonamo totona?

¹³ Momokani, kara gunadia amo gau haida ita dibaia diba, to namo lasi ita lalohisihisi noho. Namona be hari bona vaira negana ita laloa be namo. Sibona oi nanadaia: ‘Hari lau karaia eiava lau karaia lasi gaudia dainai, gabeai do lau lalohisihisi, a? Hari lau be Dirava lau hesiai henia noho dainai, vaira negana ai do lau moale, a?’

¹⁴ Hisihisi badana be kahirakahira. Sibona oi nanadaia be namo: ‘Egu hesiai gaukara lau habadaia diba, a? Painia gaukara lau karaia diba, a? Dahaka ese lau ia koua dainai hesiai tauna ena maduna lau do abia lasi? Lau hekwarahi Keristani kara namodia lau hahedinaraia totona, a? Lau hegeregere Iehova ena tanobada matamatana ai lau noho totona, a?’ Guna oi karaia lasi gaudia dainai oi lalohisihisi lasi, to hari oi karaia noho gaudia oi laloa bada, bona Iehova ena hesiai gaukara oi goadalaia be namo. Namona be hari abia hidi maorodia oi karaia, unai amo nega vairai do oi lalohisihisi lasi.​—⁠2 Tim. 2:15.

15, 16. (a) Iehova hesiai henia totona momo ese dahaka gaudia idia dadaraia? (b) Dahaka dainai Dirava hesiai henia totona ita dadaraia gaudia dainai, ita lalohisihisi lasi be namo?

¹⁵ Emu mauri lalonai gau haida oi dadaraia, unai amo ful-taim hesiai gaukara oi karaia diba, a? Reana moni gaukara namona, eiava emu bisinesi oi rakatania Iehova ena hesiai gaukara oi goadalaia totona. Eiava reana abia hidi oi karaia do oi headava lasi, eiava natuna do oi havaraia lasi, unai amo Betele, intanesinol konstraksen, sekit o misinari gaukara oi karaia diba. Hari oi buruka oi lao dainai, oi laloa Iehova hesiai henia totona oi karaia abia hidi be kerere, a? Unai abia hidi be nega kererena ai oi karaia bona ia be anina lasi, a? Namo lasi unai bamona oi laloa!

¹⁶ Unai abia hidi oi karaia badina Iehova oi lalokau henia bada, bona oi ura ma haida oi durua Dirava idia hesiai henia totona. Namo lasi oi laloa bema guna abia hidi idauna oi karaia, hari mauri namona do oi moalelaia. Namona be oi karaia abia hidi dainai oi moale! Badina oi ese abia hidi maorona oi karaia, bona emu noho dalana hegeregerena Iehova oi hesiai henia. Iehova hesiai henia totona oi dadaraia gaudia ibounai be Ia ese do ia laloaboio lasi. Vaira negana ai “mauri korikorina” oi abia neganai, Iehova ese oi dekenai hahenamo momo do ia henia!​—⁠1 Tim. 6:19; Sal. 145:16, NW.

17, 18. (a) Paulo be dahaka ia karaia ena kerere gunadia ia laloa momo lasi totona? (b) Edena dala ai Paulo ena haheitalai oi tohotohoa diba?

¹⁷ Paulo be gabeai ena mauri lalonai lalohisihisi karana ia dadaraia totona, dahaka ia karaia? Paulo ia gwau ena mauri gunana ia laloa momo lasi, to hahenamo ia davaria totona ia gaukara goada. (Filipi 3:13, 14 duahia.) Paulo be Iuda tomadiho lalonai ia noho neganai, ia karaia kereredia ia laloa momo lasi. To, ena goada ibounai ia gaukaralaia Dirava ia abidadama henia noho totona, unai amo davana namona, mauri hanaihanai ia abia diba.

¹⁸ Paulo ena hereva amo dahaka ita dibaia? Namona be ita haidaua diba lasi gaudia ita laloa momo lasi, to hari ita karaia gaudia ita laloa, unai amo nega vairai hahenamo ita abia diba. Momokani, eda kerere gunadia do ita laloaboio be auka, to namo lasi unai kerere dainai ita lalohisihisi noho. Namona be mai goada ida Dirava ita hesiai henia, bona nega vairai do ita davaria gau namodia ita laloa noho!