•  Eyerste Komentaare 2

•  Wunerliche tinge fon Kot sayn Wort 3-5

  •  Reet 3

  •  Suuch wunerliche tinge fon te Piipel 4

  •  Piipel leesung 5

•  Mach tayn pestes in te preetich 6-14

  •  Kexpreeche aan fange 7

  •  Te interes ferkreesere 8

  •  Tisipele mache 9

  •  Tayn klaape aus leye 10

  •  Reet 11

  •  Sache un tsiil fom kexpreeche 12

  •  Situatsyoone 13

  •  Wiiteos un puplikatsyoone penutse 14

•  Unser kristlich leepe 15-16

  •  Kemaynt Piipel xtuutyum 16

•  Letste komentaare 17

•  Loope un aanreet 18

•  Tsayt 19

•  Pesuuch fom Sirkuyt Superintentent 20

•  Woch fon een konkrës 21

•  Woch fom Aantenke 22

•  Superintentent fon te Unser kristlich leepe un preetich fersamlung 23

•  Presitent fon te Unser kristlich leepe un preetich fersamlung 24

•  Helfer woo aanreete kept 25

•  Ekstra apteelunge fom Saal 26

•  Wiiteos 27

1. Ti oryentiirunge in tiise tokument tuun helfe al tii woo een teel in te Unser kristlich leepe un preetich fersamlung hon. Tii sole ti oryentiirunge fer sayn teel — woo in tëm Unser kristlich leepe un preetich heftche un in tiise tokument xteen — noo kuke eep se sayn teel foer perayte. Al ti puplikatoore sole uf kemuut wëre fer sich aan piite fer ti xtutënte teele mache. Anere layt, woo imer in te fersamlunge sin, khene teele mache wën se ti piiplixe inlërnunge aan nëme un noo ti kristliche funtamente leepe. Wën een persoon woo net puplikatoer is, wil aan fange teele in te fersamlung hale, tuut te Superintentent fon te Unser kristlich leepe un preetich fersamlung mit tëne fertseele iwer was neetich is fer sich kwalifitsiire. Noo heyer, tuut eyer fer ti persoon saan ep se sich kwalifitsiirt orer net. Wën tiise kexpreeche kemacht wëre, mus ti persoon sayn Piipel leerer tepay sin (orer eene fon sayn eltere woo een Yeehoowa sayn Tsayer is). Was neetich is fer sich kwalifitsiire, is tas selwiche wii fer een puplikatoer wëre. (Organizados kapitel 8, apsats 8)

2. 1 minut. Yeete woch, noo te aanfangs liit un kepeet, te presitent fon te Unser kristlich leepe un preetich fersamlung tuut ti layt naykerich fer ti fersamlung lose. Tee mus aach ti haupste phunkte, woo nutslich fer ti kemaynt sin, foer xtele.

 3. Reet: 10 minute. Te theema un tswaay orer tray haupste phunkte tuun in tëm Xtuutyum heftche foer khome. Tiise reet mus kemacht wëre fon een elteste orer een kompetent ministeryaal tiiner. Wën mer in te woch, een naye puuch fon te Piipel leese, wërt een introtutsyoon wiiteo iwer tiise puuch foer kextelt. Te reetner khan tsayche wii etliche phunkte fon tëm wiiteo sich mim theema xtime tuun. Awer, tee mus aach ti haupste phunkte fon tëm Xtuutyum heftche aus leye. Wëns tsayt kept, tee sol aach ti pilter kuut penutse, woo kenau mit te haupste phunkte phase. Tee khan aach informatsyoone fon anere puplikatsyoone penutse, wën se mit te haupste phunkte phase.

 4. Suuch wunerliche tinge fon te Piipel: 10 minute. Tiise teel wërt mit frooche un antworte kemacht. Tas praucht khee introtutsyoon un khee khorts pexprechung am ën hon. Tiise teel mus kemacht wëre fon een elteste orer een kompetent ministeryaal tiiner. Tee mus ti tswaay frooche mache. Tee khan raus suuche op ti wersikele keleest wëre orer net. Ti komentaare fon te priiter sole 30 sekunte orer weenicher tauere.

 5. Piipel leesung: 4 minute. Eene man sol tiise xtutënte teel mache. Te xtutënt sol tas xtik leese, awer praucht khee introtutsyoon un khee khorts pexprechung am ën mache. Te presitent fon te fersamlung sol te xtutënte helfe richtich un natiirlich leese, in een aat woo ti anere ferxteen, ti haupste phunkte foer xtele, ti xtim kontroliire, un ti phause ufm richtich plats mache. Etliche leesunge fon te Piipel sin kreeser wii ti anere, tan, te superintentent fon te Unser kristlich leepe un preetich fersamlung tuut ti apiliteete fon te xtutënte peopachte eep eyer ti xtutënte raus suucht fer ti teele mache.

6. 15 minute. Tiise teel fon te fersamlung is kemacht woer fer al ti keleechenheet kepe fer sayn apiliteete in te preetich un inlërnung aarwayt un in te kexpreeche iipe un ferpesere. Wëns neetich is, ti elteste khene aach xtutënte teele kriin. Yeete xtutënt sol sich aan xtrenge fer ti lisyoon fon te piichelcher Leeser un Leerer orer Liip ti Layt lërne un aan wëne, woo neewich sayn teel, in tëm Xtuutyum heftche, tswixich parentesis xteet. Als mool, wërt een reet mit etliche antworte fon te kemaynt kehal. Tiise teel mus kemacht wëre fon een elteste orer een kompetent ministeryaal tiiner. (Kuk te  apsats 15 fer mee too triwer wise.)

 7. Kexpreeche aan fange: Eene man orer een fraa khan tiise teel mache. Eene man khan net te helfer fon een fraa sin, un een fraa khan net te helfer fon eene man sin, ploos wën se fon te selwich familye sin. Ti tswaay khene sich setse orer xteen plaype. (Fer mee wise iwer ti sache, tsiil un situatsyoone fer tiise teel, kuk ti  apsetse 12 un  13.)

 8. Te interes ferkreesere: Eene man orer een fraa khan tiise teel mache. Eene man khan net te helfer fon een fraa sin, un een fraa khan net te helfer fon eene man sin. (Ministério do Reino 05/97 sayt 3) Ti tswaay khene sich setse orer xteen plaype. Te xtutënt mus tsayche was saan wën tee, yemant woo interes ketsaycht hot, noch mool pesuucht. (Fer mee wise iwer ti sache, tsiil un situatsyoone fer tiise teel, kuk ti  apsetse 12 un  13.)

 9. Tisipele mache: Eene man orer een fraa khan tiise teel mache. Eene man khan net te helfer fon een fraa sin, un een fraa khan net te helfer fon eene man sin. (Ministério do Reino 05/97 sayt 3) Ti tswaay khene sich setse orer xteen plaype. Tiise teel sol een xtik fon een Piipel xtuutyum tsayche woo xon aan kefang hot. Te xtutënt praucht khee introtutsyoon un khee khorts pexprechung am ën mache, ploos wën tee in tiise spetsiifix phunkte am xafe is. Es is net neetich ti kans informatsyoon in een hart xtim leese, awer tee khan tas mache.

 10. Tayn klaape aus leye: Wën tas een reet is, sol een man tas mache. Wën tas een foerxtelung is, khan een man orer een fraa tas mache. Eene man khan net te helfer fon een fraa sin, un een fraa khan net te helfer fon eene man sin, ploos wën se fon te selwich familye sin. Te xtutënt sol mit kexik een taytlich antwort kepe fer ti frooch fom theema; tee sol ti informatsyoone penutse woo in te referëns foer khome. Tee khan ëntxlise ep eyer iwer ti puplikatsyoon in te referëns xpreche tuut orer net.

 11. Reet: Een man sol tiise xtutënte teel mache. Wën tiise reet fer ti kemaynt sich xtaype tuut uf een phunkt fon tëm ekstra teel A fom piichelche Liip ti layt, sol te xtutënt tsayche wii tiise Piipel tekste in te preetich aarwayt penutst wëre khene. Tee khan, tsum payxpiil, aus leye wanee tas penutse, ti petaytung fom tekst un wii too triwer mit te layt fertseele. Wën ti reet sich xtaype tuut uf een phunkt fon een lisyoon fom piichelche Liip ti layt, sol te xtutënt sich traan hale aan wii tas in te preetich aarwayt penutse. Tee khan acht pringe fer tas payxpiil woo foer khomt im 1^te phunkt fon te lisyoon orer anere wersikele woo in te lisyoon sin, wën tas helft te phunkt aus leye.

12. Sache un tsiil fom kexpreeche: Was in tiise un im neekste apsats foer khomt, phast tsu te teele “Kexpreeche aan fange” un “Te interes ferkreesere”. Wën niks aneres xteet, tas tsiil fom xtutënt is een keweenlich woerheet fon te Piipel mit te persoon teele, woo wichtich fer tëne is un woo te weech uf macht fer im futuer wayter fertseele. Te xtutënt sol een sache raus suuche woo xtimt mit was ti layt in te rechyoon tenke un mit was am pasiire is uf te welt. Tee khan raus suuche ep eyer penutse tuut orer net een puplikatsyoon orer wiiteo fon unser Inlërnung Kit. Ti xtutënte sole sich aan xtrenge fer sayn apiliteet in te kexpreeche ferpesere — soo wii perseenlich interes tsayche un natiirlich fertseele —, xtats teele mache woo se ausm khop kelërnt hon.

      13. Situatsyoone: Te xtutënt sol tiise situatsyoone aan phase fer sayn rechyoon. Tsum payxpiil:

1.  (1) Haus tsu haus: Too tepay is ti preetich aarwayt haus tsu haus, torich telefoon un torich priife un aach situatsyoone wën ma ti interes ferkreest fon yemant woo mer xon friier kontaktiirt hon — ekaal wii tas waar.

2.  (2) Informaal tsaye: Es hot se tuun mit een keweenlich kexpreeche penutse fer een tsaye kepe. Too tepay is een piiplix itee aus teele mit te layt in te aarwayt, in te xuul, in te nochperxaft, in te puuplix transport orer in een aner plats soo lang wii mer unser taach tsu taach aktiwiteete mache.

3.  (3) Puuplix tsaye: Too tepay is preetiche mit puplikatsyoone khareche, in te kexefts pletse, uf te xtroose, in een park, in een plats woo ti layt ti khare lose orer kwalkee plats woo ma layt fine khan.

 14. Wiiteos un puplikatsyoone penutse: Wën es phast, khan een xtutënt raus suuche een wiiteo orer een puplikatsyoon foer xtele. Wën een wiiteo in tëm teel tepay is, orer wën te xtutënt raus suucht een wiiteo tsayche, sol eyer iwer te wiiteo xpreche; awer te wiiteo sol net ketsaycht sin.

15. Noom liit, in te neekste 15 minute, khome eene orer tswaay teele. Tii tuun ti asistens helfe Kot sayn Wort aan wëne. Heechstens wëns een aner spetsiifix oryentiirung kept, tiise teele sole kemacht wëre fon een elteste orer een kompetent ministeryaal tiiner. Awer, tas teel “Phunkte fer ti kemaynt se helfe” mus fon een elteste kemacht wëre. Wën tas teel een reet is mit etliche antworte fon te kemaynt, khan te pruuter torich te reet ekstra frooche mache, net ploos tii woo im Xtuutyum heftche xteen. Ti introtutsyoon sol khorts sin tas es kenuuch tsayt kept fer iwer ti haupste phunkte xpreche un fer ti kemaynt komentiire. Wën een entrewist tepay is, es is peser tas tii woo entrewistiirt wëre tas im palk mache, net fon sayn xtuul, wën tas meechlich is.

  16. Kemaynt Piipel xtuutyum: 30 minute. Eene kompetent elteste sol tiise xtuutyum fiire. (Ti kemaynte mit weenicher elteste, khene kompetente ministeryaale tiiner penutse, wëns neetich is.) Ti elteste khërperxaft tuut saan weer khan ti Kemaynt Piipel xtuutyum fiire. Ti priiter woo tas mache, sole tas xtuutyum nutslich lose, ti haupste phunkte un tekste foer pringe, in te richtich tsayt am ën keen, un fer al tsayche wii tas aan wëne. Fer tas hin kriin, es wërt nutslich noch mool kuke ti informatsyoone iwer wii teele fiire woo mit frooche un antworte kemacht sin. (Wachthorm 04/23 khaste in te sayt 24) Wën ti kanse informatsyoone fer ti woch xon kuut xtutiirt sin, is es net neetich ti kanse 30 minute penutse. Wëns meechlich is, unerxiitliche fiirer un leeser sole yeete woch penutst wëre. Wën te presitent fon te Unser kristlich leepe un preetich fersamlung ferlangt fer te fiirer tas xtuutyum ferkhërtse, te fiirer mus raus suuche wii tas mache. Een aat is im xtant etliche apsetse net leese.

17. 3 minute. Te presitent fon te Unser kristlich leepe un preetich fersamlung tuut etliche ekstra nutsliche phunkte fon te fersamlung erinere. Tee tuut aach ti layt naykerich fer ti neekst fersamlung lose. Wëns tsayt kept, khan tee ti naame saan fon te xtutënte woo in ti neekst woch teel mache. Wëns neetich is een pekhantmachung kepe orer een priif leese, te presitent sol tas in te letste komentaare mache, heechstens wëns een aner spetsiifix oryentiirung kept. Keweenliche informatsyoone, soo wii tas prokram fon te preetich aarwayt orer tas prokram fon te sauwermachung, sole net fon te tripuun pekhant kemacht wëre, awer tii sole ufm pekhantmachunge thaafel ketuun wëre. Wëns net kenuuch tsayt kept fer ti pekhantmachunge kepe orer ti priife leese, te presitent sol fer ti priiter ferlange woo teele in te sesyoon Unser kristlich leepe hon, sole tas in weenicher tsayt mache. (Kuk ti  apsetse 16 un  19.) Ti fersamlung keet aans ën mit liit un kepeet.

18. Noo yeete teel fon te xtutënte, te presitent fon te Unser Kristlich leepe un preetich fersamlung hot pis een minut fer te xtutënt uf muute un aanreete kepe, tëm noo te phunkt woo te xtutënt noo kuke solt. Wii te presitent te xtutënt ruufe tuut, tee sol net iwer te phunkt xpreche woo te xtutënt noo kekukt wërt. Wën te xtutënt sayn teel kemacht hot, un noo eerliche loope kepe, te presitent khan iwer ti phunkt xpreche woo te xtutënt noo kekukt waar, un tsayche warom eyer tas kuut kemacht hot, orer liiplich aus leye warom un wii te xtutënt sol mee acht fer te phunkt kepe. Te presitent khan aach iwer anere kleenichkheete fon te foerxtelung xpreche woo khene te xtutënt orer ti kemaynt helfe. Wën tee es wil, khan eyer anere nutsliche aanreete kepe, woo in tëm piichelche Liip ti layt orer Leeser un Leerer orer in tas puuch Beneficie-se xteen, iwer ti lisyoon woo te xtutënt noo kekukt waar, orer iwer een aner lisyoon. Tas sol kemacht wëre noo ti fersamlung orer in een aner xtun, awer net foer te anere. (In te  apsetse 19,  24, un  25 tuust tuu anere informatsyoone iwer was te presitent fon te Unser kristlich leepe un preetich fersamlung mache sol, un iwer te Helfer woo aanreete kept.)

19. Khee teel sol mee wii ti pextimte tsayt tauere, soo kaar ti presitent fon te Unser kristlich leepe un preetich fersamlung sayn komentaare. Opwool ti tsayt fer yeete teel im Xtuutyum heftche xteet, wën te kans materyaal xon kuut xtutiirt is, is es net neetich ti teele lënger lose, ploos fer ti tsayt teke. Wën ti teele tuun mee wii ti pextimte tsayt tauere, te presitent fon te Unser kristlich leepe un preetich fersamlung orer te Helfer woo aanreete kept tuut mit te priiter xpreche, awer net foer ti anere. (Kuk ti  apsetse 24, un  25.) Ti kans fersamlung, tepay ti liiter un kepeete, sol 1 xtun un 45 minute tauere.

20. Wën ti kemaynt te pesuuch fom sirkuyt superintentent kriit, ti fersamlung tuut noo tëm Xtuutyum heftche pasiire, mit etliche ënerunge: xtats te Kemaynt Piipel xtuutyum hon, tuut te sirkuyt superintentent een tiinst reet mache, woo 30 minute tauert. Foer te reet, te presitent fon te Unser kristlich leepe un preetich fersamlung tuut een khorts pexprechung fon te fersamlung mache, ti layt naykerich fer ti neekst fersamlung lose, ti neetiche pekhantmachunge un priife leese un tan, te sirkuyt superintentent ruufe. Noo te tiinst reet, tuut te sirkuyt superintentent ti fersamlung tsum xlus nëme mit een liit woo eyer selepst raus kesuucht hot. Tee khan een aner pruuter in laate fer tas xlus kepeet mache. In te pesuuch, kepts khee xtutënte teele in te xprooch fon te kemaynt, woo in ekstra apteelunge fom saal kemacht wëre. Ti krupe in anere xprooche khene sayn fersamlunge hon in te pesuuch fon tëm sirkuyt superintentent. Awer, tii tuun te tiinst reet fom sirkuyt superintentent mitsamer mit tëm rest fon te kemaynt heere.

21. In een woch woos een konkrës kept, khee fersamlung wërt kehalt. Ti kemaynt sol erinert wëre tas ti informatsyoone fer ti fersamlunge fon tiise woch sole aleen orer wii familye xtutiirt wëre.

22. Wën tas Aantenke wërt in mite woch kehalt, kepts khee Unser kristlich leepe un preetich fersamlung.

23. Te superintentent fon te Unser kristlich leepe un preetich fersamlung is eene elteste woo ti elteste khërperxaft raus kesuucht hot. Tëm sayn flicht is uf phase tas tiise fersamlung in ortnung un noo ti instrutsyoone pasiirt. Tee sol ticht paysamer mit tëm Helfer woo aanreete kept xafe. Klaych tas een naye Xtuutyum heftche aus khomt, tuut te superintentent fon Unser kristlich leepe un preetich fersamlung layt in setse fer al ti teele in tiise tswaay moonate mache. Too tepay is ti insetsung fom presitent fon te fersamlung (tswixich tëne woo fon te elteste khërperxaft aprowiirt sin), ti teele fon xtutënte un al ti anere teele. (Kuk ti  apsetse 3-16 un  24.) Wën eyer ti insetsunge macht, sol eyer tenke aan te xtutënt sayn elter un speryens; tee sol aach tenke ep te xtutënt fray xpreche khan iwer te sache woo foer kextelt wërt. Tas selwiche kilt fer ti anere teele fon te fersamlung. Yeete eene mus es wise kriin tas eyer een teel hot tsum xpeeter tray woche friier wii tas teel. Tas formulaar Inxtelung fer ti fersamlung Unser kristlich leepe un preetich (S-89) sol fer ti teele fon te xtutënte penutst wëre. Te superintentent fon Unser kristlich leepe un preetich fersamlung sol sich sicher lose tas een kopye fon te tapëla mit te insetsunge fer ti kans fersamlung in te pekhantmachunge thaafel ketuun wërt. Ti elteste khërperxaft khan een aner elteste orer ministeryaal tiiner in setse fer tëm helfe. Awer ploos elteste sole raus suuche layt fer ti teele woo net fon te xtutënte sin, mache.

24. Yeete woch, tuut eene elteste wii te presitent fon te Unser kristlich leepe un preetich fersamlung tiine. (Ti kemaynte mit weenicher elteste, khene kompetente ministeryaal tiiner penutse, wëns neetich is.) Tëm sayn flicht is ti eyerste un ti letste komentaare foer perayte. Tee tuut al ti teele pekhant mache, un wën ti kemaynte weenicher elteste hot, fiilaycht mus tee aach anere teele mache, hauptseechlich wën tas ploos een wiiteo is, un es wërt net too triwer kexproch. Ti komentaare tswixich ti teele sole khorts sin. Ti elteste khërperxaft ëntxlist was fer elteste khene wii presitent tiine. Tiise elteste tuun reeklich wii presitent tiine. Weeche ti situatsyoon fon te kemaynt, fiilaycht te superintentent fon te Unser kristlich leepe un preetich fersamlung tuut mee wii presitent fon te fersamlung tiine wii ti anere elteste. Ti meyerste tsayt, ti elteste woo kompetent sin fer ti Kemaynt Piipel xtuutyum fiire sin aach kompetent fer wii presitent fon te fersamlung tiine. Eriner tich, awer, tas te presitent fon te fersamlung mus ti xtutënte liiplich uf muute un, wëns neetich is, nutsliche aanreete kepe. Tee mus aach uf phase tas ti fersamlung aan te richtich tsayt am ën keet. (Kuk ti  apsetse 17 un  19.) Wën te presitent wil un wëns plats kept, tee khan een mikrofoon woo xteen playpt penutse fer tii woo sayn teel mache ruufe, un soo tii khene xon tsu tëne sayn plats in tëm palk keen. Un aach, fiilaycht te presitent teet kërn een xtuul un een tix penutse, woo in tëm palk plaype, torich ti Piipel leesung un ti sesyoon Mach tayn pestes in te preetich. Tas khan tsayt xpaare.   

25. Wëns meechlich is, es is kuut tas eene elteste woo eene speryente reetner is, fer tiise flicht raus kesuucht wërt. Tëm sayn responsapiliteet is, wëns neetich is un net foer te anere, aanreete kepe fer ti elteste un ministeryaal tiiner iwer yeete teel woo se in te fersamlung hon, too tepay sin ti teele in te Unser kristlich leepe un preetich fersamlung, ti puuplixe reete, un ti leesung orer fiirung in te Wachthorm xtuutyum orer in te Kemaynt Piipel xtuutyum. (Kuk te  apsats 19.) Wëns kept etliche elteste woo kuute reetner un leerer sin, tan yeetes yoer, khan eene unerxiitliche elteste wii Helfer tiine. Te Helfer praucht net, noo yeete teel, aanreete kepe.

26. Weeche ti numer fon xtutënte, fiilaycht een kemaynt tuut ekstra apteelunge fom saal fer ti xtutënte teele hon. Yeete apteelung sol een kompetent fiirer hon; weyer es peser een elteste sin. Wëns neetich is, een kompetent ministeryaal tiiner khan penutst wëre. Ti elteste khërperxaft sol entxlise weer khan tiise flicht kriin un op unerxiitliche priiter sole yeete woch penutst wëre. Te fiirer sol ti oryentiirunge woo in tëm  apsats 18 xteen, noo keen. Wëns een ekstra apteelung fom saal kept, ti xtutënte sole in kelaat wëre fer pis tat keen noo tëm teel “Suuch wunerliche tinge fon te Piipel”, fon te sesyoon Wunerliche tinge fon Kot sayn Wort. Noo te tas letste teel fon te xtutënte, sole al tsurik khome fer mit tëm rest fon te kemaynt plaype.

27. Etliche wiiteos wëre in te mite woch fersamlung penutst. Tiise wiiteos khene in te aplikatiiw JW Library® kefun wëre un khene in unerxiitliche eletroonixe aparate kekukt wëre.

© 2023 Watch Tower Bible and Tract Society of Pennsylvania

S-38-HSK 11/23