Èske w ta renmen konn Bib la pi byen ?

 Rezon pou moun li Labib

PA GEN okenn lòt liv ki tankou Labib. Li gen enstriksyon Bondye ladan l, enstriksyon ki montre nan ki pwen li renmen nou. (1 Tesalonisyen 2:13). Si w mete ansèyman Bib la an pratik, l ap bon pou ou anpil. Lanmou w genyen pou Bondye pral ogmante, w ap vin pi pre li. Dayè se li ki bay “ tout bèl don ak tout kado pafè ”. (Jak 1:17.) Ou pral rive konnen ki jan pou w pwoche bò kote l nan lapriyè. Nan moman pwoblèm, w ap kapab rann ou kont Bondye la avèk ou pou l ede w. Si w viv ann akò ak prensip ki nan Bib la, Bondye pral ba w lavi etènèl. — Women 6:23.

Verite ki nan Bib la la pou bay limyè. Moun ki rive gen konesans Bib la libere anba fo kwayans k ap domine lavi dè milyon moun. Paregzanp, lè nou konnen laverite sou sa ki pase apre lanmò, nou libere anba lakrent kòmkwa mò kapab vin nwi nou, oubyen lakrent kòmkwa fanmi nou, zanmi nou ki mouri kapab ap soufri (Ezekyèl 18:4). Ansèyman Bib la bay sou rezirèksyon pote rekonfò pou moun ki pèdi manm fanmi yo te renmen (Jan 11:25). Lè nou aprann laverite sou zanj mechan yo, sa ouvri je nou sou danje espiritis gen ladan l, e sa ede  nou konprann rezon ki fè gen kantite dezagreman konsa sou tè a.

Prensip Bondye bay nan Bib la montre nou jan pou nou viv pou nou pwoteje kò nou. Paregzanp, lè moun ‘ modere nan abitid yo ’, yo gen plis posiblite viv an sante (1 Timote 3:2). Lè nou “ pirifye tèt nou kont tout salte lachè ak lespri ”, nou pap abime sante nou (2 Korentyen 7:1). Epitou, lè nou mete konsèy nou jwenn nan Bib la an pratik, sa fè nou ere nan maryaj nou e sa fè nou vin gen estim pou tèt nou. — 1 Korentyen 6:18.

Si w mete Pawòl Bondye an pratik, w ap vin yon moun ki pi kontan ak tèt ou. Konesans Bib la ede nou viv ak kè poze, li fè nou santi nou satisfè e li ban nou espwa. Konesans sa a ede nou devlope kalite ki atiran tankou konpasyon, lanmou, lajwa, lapè, labonte ak lafwa (Galat 5:22, 23 ; Efezyen 4:24, 32). Jan de kalite konsa ede nou vin yon pi bon mari oswa yon pi bon madanm, yo ede nou vin yon pi bon papa oswa yon pi bon manman, yon pi bon pitit gason oswa yon pi bon pitit fi.

 Èske w janm poze tèt ou kesyon sou sa ki gen pou rive demen ? Pwofesi biblik yo montre nou ki kote nou ye nan tan k ap avanse a. Yo pa sèlman detaye sitiyasyon ki egziste nan monn jodi a, men yo montre tou, talè konsa, Bondye pral transfòme tè a pou l ka tounen yon paradi. — Revelasyon 21:3, 4.

Èd pou w konprann Labib

Petèt ou te deja eseye li Bib la e ou te twouve li difisil pou w konprann li. Petèt ou pa konnen ki kote pou w chèche nan Bib la pou w jwenn repons kesyon w yo. Si se sa, se pa ou menm sèl ki nan sitiyasyon sa a. Se nou tout ki bezwen èd pou nou konprann Pawòl Bondye a. Nan 235 peyi anviwon, Temwen Jewova yo ap ede plizyè milyon moun aprann Bib la gratis. Yo ta byen kontan ede w tou.

Lè yon moun ap etidye Labib, an jeneral li pi bon pou l kòmanse tikras pa tikras ak ansèyman de baz yo (Ebre 6:1). Tank w ap fè pwogrè, se tank w ap vin pi anmezi pou w absòbe “ nouriti solid ” ki reprezante verite ki pi pwofon yo (Ebre 5:14). Se Bib la ki otorite a. Piblikasyon ki baze sou Bib la, tankou bwochi Ki sa Bondye vle nou fè ? a pral ede w konprann referans Bib la bay sou divès kalite sijè.

 Èske w dispoze pran tan chak semèn pou w konprann Bib la ?

An jeneral, li posib pou yo tabli yon etid biblik avè w lè w vle a e kote ki bon pou ou a. Anpil moun fè etid la lakay yo, an prive. Gen kèk lòt ki konn menm fè etid la pa mwayen telefòn. Pwogram pou etid la se pa yon klas y ap fè ak yon pil moun, men se yon aranjman an patikilye ki adapte ak sikonstans pèsonèl pa w, nivo konesans ou ak nivo enstriksyon w. Pap gen egzamen, e pap gen anyen k ap fè w santi w jennen. W ap jwenn repons pou kesyon biblik ou yo, e ou pral aprann jan pou w pwoche bò kote Bondye.

Ou pa gen pou w peye pou yon etid konsa (Matye 10:8). Se yon etid gratis pou moun tout relijyon ak pou moun ki pa nan relijyon ditou. Akondisyon moun sa yo se moun ki enterese ogmante konesans yo ak tout senserite nan Pawòl Bondye a.

Ki moun ki kapab patisipe ? Tout fanmi w nèt kapab patisipe. Nenpòt ki zanmi ou chwazi envite kapab patisipe tou. Oubyen si w vle, dyalòg la kapab fèt avè w sèlman.

Gen anpil moun ki rezève inèdtan chak semèn pou yo etidye Labib. Si w kapab dispoze plis tan oswa mwens tan chak semèn, Temwen yo ap rann yo disponib pou yo ka ede w.

 Nou envite w aprann

Nou envite w pran kontak ak Temwen Jewova yo. Yon fason pou w fè sa, se ekri pou w ekri nan youn nan adrès ki pi ba a. Konsa y ap fè aranjman pou yon moun vin kondi yon etid biblik gratis avè w.

□ Mwen ta renmen nou fè m jwenn bwochi Ki sa Bondye vle nou fè ? a. Nan ki lang ou vle l ?

□ Kontakte m pou yon etid biblik gratis lakay mwen silvouplè.

Tout referans Bib nou jwenn, sof si yo ta bay lòt, se daprè Bib franse Les Saintes Écritures — Traduction du monde nouveau yo tradui.