Toupatou sou tè a, Temwen Jewova yo gen plizyè milyon fi k ap patisipe nan travay predikasyon Wayòm Bondye a. Yo tankou yon gwo foul k ap patisipe nan travay sa a. Men sa Sòm 68:11 te anonse konsènan medam sa yo: “Jewova bay lòd la. Medam k ap fè konnen bon nouvèl la se yon gwo lame.”

Men, pa konfonn travay predikasyon fi ki Temwen Jewova yo ap fè a ak travay yon seri medam ki chèf relijye nan lòt relijyon ap fè. Gen yon gwo diferans ant de kalite travay sa yo. Nan ki sans?

Moun k ap koute yo diferan. Medam ki chèf relijye yo, sitou nan relijyon ki di yo se kretyen yo, pran latèt nan legliz yo, e prensipal moun ki koute yo se moun ki nan legliz sa yo. Tandiske, prensipal moun ki koute fi ki Temwen Jewova yo pa nan kongregasyon an, se moun yo rankontre nan travay predikasyon y ap fè pòt an pòt la ak lòt kote.

Yon lòt bagay ki fè fi ki Temwen Jewova yo diferan ak fi ki nan lòt relijyon yo, se travay yo fè nan kongregasyon an. Fi ki chèf relijye nan relijyon ki di yo se kretyen yo ak nan lòt legliz ankò se yo menm ki alatèt manm legliz yo e fi sa yo anseye moun nan legliz yo kwayans relijyon yo ladan l lan. Men, fi ki Temwen Jewova yo pa anseye nan kongregasyon yo lè gen gason ki batize ki la. Se gason ki nome kòm anseyan yo ki fè travay sa a. — 1 Timote 3:2; Jak 3:1.

Bib la fè konnen se gason sèlman ki gen responsablite pou yo pran latèt nan yon kongregasyon. Gade ki sa apot Pòl te di yon siveyan menm jan avè l pou l fè: “Mwen te kite w Krèt pou w ka [...] nome ansyen nan chak vil.” Mete sou sa, Pòl te fè konnen moun y ap nome a pa dwe ‘gen akizasyon sou do l, li dwe mari yon sèl fi’. (Tit 1:5, 6.) Pòl te bay Timote menm enstriksyon sa yo nan yon lèt li te voye ba li. Men sa l te di l: “Si yon moun ap chèche vin siveyan, se yon bèl travay li ta renmen genyen. Se poutèt sa, yon siveyan dwe san repwòch, li dwe gen yon sèl madanm, [...] li dwe gen kapasite pou l anseye.” — 1 Timote 3:1, 2.

Poukisa se gason sèlman ki responsab pou yo pran latèt nan kongregasyon an? Men sa Pòl di: “Mwen pa pèmèt fi anseye, ni mwen pa pèmèt yo gen otorite sou gason, men se pou yo ret an silans. Paske se Adan ki te fèt an premye, Èv te fèt annapre.” (1 Timote 2:12, 13). Donk, se paske Bondye te kreye gason an an premye ki fè se gason ki gen responsablite pou l anseye e pou l pran latèt.

Sèvitè Jewova yo suiv egzanp Jezi Kris, Chèf yo a. Men sa disip Lik te ekri konsènan travay predikasyon Jezi te fè a: “Li vwayaje sot nan yon vil al nan yon lòt, sot nan yon bouk al nan yon lòt, l ap preche e l ap anonse bon nouvèl Wayòm Bondye a.” Annapre, Jezi te voye moun k ap suiv li yo pou yo fè menm travay la: “Y al nan tout tèritwa yo, yo sot nan yon bouk al nan yon lòt, yo t ap anonse bon nouvèl la.” — Lik 8:1; 9:2-6.

Jodi a, sèvitè Jewova yo, gason kou fi, patisipe nan fè sa Jezi te anonse lè l te di: “Yo pral preche bon nouvèl sa a konsènan Wayòm nan sou tout tè a, kòm yon temwayaj pou tout nasyon. Apre sa, lafen an ap vini.” — Matye 24:14.