TONY, nou te pale de li nan kòmansman atik la, te ka jwi lavi l yon fason ki diferan si sèlman li te jere pwoblèm bwè a. Sepandan, piske l te kapab bwè anpil bwason ki gen alkòl san sa pa gen pyès efè moun te ka wè sou li, li te panse li te gen kontwòl vi l. Poukisa fason l te panse a pa t bon?

Li te gen yon move pwennvi sou alkòl lè l te konn bwè yon fason egzajere. Kit Tony te rann li kont de sa, kit li pa t rann li kont de sa, ògàn ki kontwole kò l, lespri l ak emosyon l, ki se sèvo l, mal fonksyone lè l bwè twòp alkòl. Plis li te bwè, se plis sèvo l te mal fonksyone.

Yon dezyèm rezon ki fè li pa t ka reziste ak anvi li te genyen pou l bwè alkòl, se te fason li panse. Okòmansman, Allen, nou te pale de li nan atik anvan yo, te refize dakò li gen pwoblèm ak alkòl. Men sa l te di: “Mwen te konn bwè an kachèt. Epi, mwen te konn ap bay eskiz pou m eseye minimize kantite alkòl m bwè. Mwen te gen yon sèl objektif, se veye pou moun pa wè kantite alkòl mwen bwè.” Menm si lòt moun ka wè alkòl te gen kontwòl sou Tony ak Allen, yo chak te kontinye ap di tèt yo tout bagay te nòmal. Yo toude te bezwen fè efò pou yo kontwole kantite alkòl yo bwè. Men, ki sa yo te dwe fè?

Poze aksyon!

Anpil moun ki sispann bwè bwason ki gen alkòl aji ann amoni ak pawòl sa yo Jezi te di: “Se sa k fè, si se je dwat ou k ap fè w peche, rache l, voye l jete byen lwen w. Paske, li pi bon pou ou pou w pèdi yon pati nan kò w olye pou yo ta lage tout kò w nan Jeyèn nan.” — Matye 5:29.

Men, an reyalite, Jezi pa t vle di nou dwe rache yon pati nan kò nou. Olye de sa, li te vle montre nou dwe dispoze retire tout sa ki reprezante yon danje nan vi nou nan domèn espirityèl. Se vre, chanjman sa a ka fè nou mal anpil. Men, sa ap pwoteje nou kont bwè bwason ki gen alkòl ak sitiyasyon ki ka mennen nou nan bwè twòp alkòl. Donk, si yon lòt moun di w enkyetid li genyen parapò ak kantite alkòl w ap bwè, fè tout sa w kapab pou w kontwole sa. a Si w pa ka kontwole kantite ou bwè, ou ta dwe sispann bwè. Se vre, sa ka fè w tris, men, sa t ap pi mal si w detwi vi w.

Menmsi w pa yon bwasonyè, men, èske w gen tandans bwè twòp alkòl? Si se sa, ki sa ki ka ede w kite alkòl nan plas li?

Ki kote w ka jwenn èd?

1. Avèk konfyans, priye souvan e fè sa ak tout kè w. Bib la bay tout moun ki vle fè Jewova plezi konsèy sa a: “Fè Bondye konnen demann nou yo nan tout bagay, pa mwayen lapriyè ak siplikasyon toutpandan n ap di l mèsi. E lapè Bondye, ki depase tout sa moun ka konprann, ap pwoteje kè nou ak lespri nou pa mwayen Kris Jezi.” (Filipyen 4:6, 7). Sou ki sa w ka priye pou w gen lapè sa a nan lespri w?

Admèt onètman ou gen yon pwoblèm avèk alkòl, yon pwoblèm ki depann de ou. Di Bondye sa w ta renmen fè, mande l pou l ede w evite pwoblèm ki pi grav, e l ap beni efò w fè. “Moun ki kache peche l pap reyisi, men, moun ki konfese yo e ki pa fè yo ankò, y ap fè l mizèrikòd.” (Pwovèb 28:13). Jezi te di tou nou ka priye konsa: “Pa kite nou tonbe anba tantasyon men sove nou anba Mechan an.” (Matye 6:13; nòt). Men, ki jan w ka aji ann amoni ak priyè sa yo? E ki kote w ka jwenn repons pou siplikasyon w fè yo?

2. Pran fòs nan Pawòl Bondye a. “Pawòl Bondye a vivan e li pisan, [...] e li kapab rive wè panse ak entansyon ki nan kè yon moun.” (Ebre 4:12). Bib la ede yon pakèt moun ki konn bwè anpil lè yo li l epi medite sou li chak jou. Men sa yon moun ki te ekri nan liv Sòm yo ki te gen lakrentif pou Bondye di: “Byennere moun ki pa suiv konsèy mechan yo, men li plezi nan lwa Jewova a, e li li lwa sa a tou ba lajounen kou lannuit. L ap reyisi nan tout sa l ap fè.” — Sòm 1:1-3.

Allen, Temwen Jewova yo te etidye Labib avè l, te jwenn fòs pou l te sispann bwè alkòl. Men sa l di: “M gen konviksyon si se pa t Bib la ak prensip ki ladan l yo ki te ede m sispann bwè, m t ap mouri.”

3. Chèche gen metriz. Bib la pale de kèk moun ki te bwasonyè ki te vin pwòp gras “ak lespri sen Bondye” e ki te vin nan kongregasyon kretyen an (1 Korentyen 6:9-11). Ki jan sa te rive fèt? Yo te jwenn èd pou yo sispann bwè lè yo te chèche gen metriz, yon kalite yo te vin genyen grasa lespri Bondye. “Pa soule tèt nou ak bwason ki gen alkòl, sa mennen nan debòch, men kontinye ranpli nou ak lespri.” (Efezyen 5:18; Galat 5:21-23). Jezi Kris pwomèt “Papa nou ki nan syèl la ap bay moun lespri sen si yo mande l li”. Donk, “kontinye mande, e l ap ban nou” l. — Lik 11:9, 13.

Moun ki vle adore Jewova fason li mande a kapab chèche gen metriz lè yo li Bib la, yo etidye l e yo priye souvan ak tout kè yo. Olye w dekouraje, aksepte konsèy ou jwenn nan Pawòl Bondye a ki di: “Yon moun ki simen pou lespri a, lespri a ap fè l rekòlte lavi ki pap janm fini an. Donk, annou pa sispann fè sa ki byen, paske lè lè a rive, n ap rekòlte si nou pa kite fatig pote n ale.” — Galat 6:8, 9.

4. Chèche gen bon zanmi. “Moun ki mache ak moun ki gen sajès ap vin gen sajès, men, moun ki annafè ak moun ki sòt, sa ap mal pou li.” (Pwovèb 13:20). Pale ak zanmi w yo sou detèminasyon w pran pou w gen kontwòl sou alkòl. Sepandan, Pawòl Bondye a avèti nou, lè nou sispann lage kò nou “nan bwè twòp bwason ki gen alkòl, nan banbòch, nan gagòt nan bwason”, ‘sa boulvèse yon seri ansyen zanmi nou, e yo pale nou mal’. (1 Pyè 4:3, 4.) Se pou w dispoze kanpe amitye ak moun k ap anpeche w kontwole kantite alkòl w ap bwè.

5. Fikse limit. “Sispann konfòme nou ak sistèm sa a, men transfòme tèt nou, lè nou bay lespri nou yon lòt direksyon dekwa pou nou ka verifye pèsonèlman nan lavi nou sa ki volonte Bondye, yon volonte ki bon ki agreyab e ki pafè.” (Women 12:2). Si w kite prensip ki nan Pawòl Bondye a ede w fikse limit ou yo, olye se move zanmi w yo oubyen monn sa a ou kite fè sa, w ap kontan mennen yon vi ki akseptab pou Bondye. Men, ki jan w ka konnen ki pi bon limit k ap bon pou ou?

Nenpòt kantite alkòl ki gen efè sou ou oswa ki gen efè sou fason w panse, twòp pou ou. Se sa k fè, si w chwazi bwè, li pa t ap saj pou jis fikse yon limit ki vag ki ka lakòz ou pa gen ekilib. Pa twò kwè nan tèt ou nan pwen pou w pa ka rive fikse yon limit. Fikse yon limit byen presi, san w pa pran okenn risk. Mete yon limit nan kantite w ap bwè k ap anpeche w rekòmanse bwè avèk eksè.

6. Aprann di non. “Se pou Wi nou vle di wi, e se pou Non nou vle di non.” (Matye 5:37). Si yon moun ak tout bon entansyon l ta ensiste pou l ofri w yon bwason ki gen alkòl, aprann di non avèk jantiyès. “Se pou pawòl nou toujou bèl, se pou l sizonnen ak sèl, yon fason pou nou konnen jan nou dwe reponn chak moun.” — Kolosyen 4:6.

7. Chèche èd. Chèche èd nan men zanmi ki ka ede w ranfòse detèminasyon w pran pou w kontwole kantite w ap bwè e ki ka ede w nan domèn espirityèl. “De pi bon pase youn, piske yo gen yon bon rekonpans pou travay di yo fè. Paske si youn nan yo tonbe, lòt la kapab ede zanmi l lan kanpe.” (Eklezyas 4:9, 10; Jak 5:14, 16). Men sa yon òganizasyon Ozetazini (U.S National Institute on Alcohol Abuse and Alcoholism) fè konnen: “Sispann bwè alkòl ka difisil. Mande fanmi w oswa zanmi w pou yo ede w atenn objektif ou fikse.”

8. Rete sou desizyon w. “Men, se pou nou obeyi pawòl la, se pa pou nou ret ap tande l sèlman, pou n ap twonpe tèt nou ak fo rezònman. Men, yon moun k ap gade nan lwa pafè a, lwa libète a, avèk atansyon e ki pèsevere ladan l, ap kontan nan sa l ap fè, paske li pa yon moun ki tande pou l bliye, men li se yon moun k ap fè travay la.” — Jak 1:22, 25.

Libere anba alkòl

Se pa tout moun ki bwè anpil bwason ki gen alkòl ki vin bwasonyè. Men, gen kèk moun ki tèlman kòmanse bwè anpil oswa ki bwè souvan, sa fè yo vin depann de alkòl la. Lè yon moun depann de alkòl, sa gen efè sou kò l ak lespri l. Moun sa a ka bezwen montre plis volonte e l ka bezwen plis èd nan domèn espirityèl pou l ka libere anba alkòl. Men sa Allen di: “Lè mwen t ap sispann bwè alkòl, mwen te gen anpil doulè, se lè sa a mwen te rann mwen kont mwen te bezwen yon tretman medikal mete sou èd mwen t ap resevwa nan domèn espirityèl la.”

Anpil moun ki konn bwè alkòl bezwen yon tretman medikal mete sou efò y ap fè nan domèn espirityèl pou yo libere anba alkòl e pou yo kite abitid sa a nèt. b Genyen ki konn bezwen entène lopital pou yo ka fè fas ak sentòm grav yo genyen yo oubyen pou yo ba yo medikaman pou redui gwo anvi yo genyen pou yo bwè alkòl e pou ede yo sispann bwè. Men sa Pitit Bondye a ki te konn fè mirak te di: “Se pa moun ki an sante ki bezwen doktè, men se moun ki malad ki bezwen doktè.” — Mak 2:17.

Byenfè nou jwenn lè nou suiv prensip ki nan Pawòl Bondye a

Konsèy sou alkòl nou jwenn nan Bib la soti nan vrè Dye a, ki vle sa ki pi bon pou nou. Li vle nou jwenn byenfè nonsèlman kounye a, men tou li vle nou jwenn byenfè k ap dire nètale. Vennkatran apre Allen te sispann bwè alkòl, men sa l di: “Sa vrèman estrawòdinè pou m te konnen lavi m te ka diferan, e Jewova te vle ede m chanje fason m t ap viv la.” Allen fè yon ti poz pou l pa kriye poutèt souvni yo k ap boulvèse l, epi li di: “Hmmm,... mwen pa ka kwè Jewova konprann mwen, li gen sousi pou mwen e li ban m èd ki nesesè.”

Se sa k fè, si w anba kontwòl alkòl oubyen ou depann de li, pa kouri dekouraje, pa kouri di pa gen espwa. Allen ak anpil lòt moun te nan menm sitiyasyon ak ou e yo rive redui nan kantite alkòl yo te konn pran oswa yo sispann bwè nèt. Yo kontan fè chanjman sa yo, ou menm tou w ap kontan.

Kit ou chwazi gen kontwòl sou kantite alkòl w ap bwè, kit ou chwazi pa bwè ditou, koute konsèy sa a ki plen lanmou Bondye bay: “Si w te annik suiv kòmandman m yo! Ebyen, lapè ou t ap genyen an t ap anpil tankou dlo nan yon rivyè ki pa janm seche, e aksyon ki dwat ou t ap fè yo t ap anpil tankou lanm lanmè ki pa sispann fè mouvman.” — Ezayi 48:18.

[Nòt]

[Kare/Foto]

 Èske se alkòl ki gen kontwòl la?

Ou ka mande tèt ou:

• Èske m bwè plis alkòl pase sa m konn bwè anvan?

• Èske m bwè pi souvan pase jan m konn bwè anvan?

• Èske kantite m konn bwè a ogmante plis?

• Èske m bwè alkòl pou m fè fas ak strès, oubyen pou m evite pwoblèm?

• Èske m gen yon zanmi m oubyen yon fanmi m ki di m enkyetid li akoz m bwè?

• Èske lefètke m bwè sa lakòz mwen gen pwoblèm lakay mwen, nan fanmi m, ak lè m ap vwayaje?

• Èske l difisil pou m fè yon wikenn san alkòl?

• Èske m santi m malalèz lè m ak moun ki pa bwè alkòl?

• Èske m kache lòt moun kantite alkòl mwen bwè?

Si w reponn wi pou youn oubyen plizyè nan kesyon sa yo ou mèt kòmanse mete kontwòl sou kantite bwason ki gen alkòl ou bwè.

[Kare/Foto]

Pran bon desizyon anrapò ak alkòl

Anvan w bwè alkòl, mande tèt ou:

• Èske l saj pou m bwè alkòl oswa èske l t ap pi saj pou m pa bwè?

Konsèy: Yon moun ki pa ka kontwole kantite l ap bwè pa dwe bwè.

• Ki kantite pou m bwè?

Konsèy: Chèche konnen ki kantite ki limit ou anvan w bwè pou w pa sou.

• Ki lè m ka bwè?

Konsèy: Pa bwè anvan w kondui oswa anvan w fè yon seri aktivite ki mande pou w byen konsantre; pa bwè anvan w patisipe nan aktivite relijye; pa bwè lè w ansent; pa bwè si w ap pran kèk medikaman.

• Ki kote m ka bwè?

Konsèy: Nan yon bon anviwònman, pa fè sa an sekrè pou moun pa wè w ap bwè; pa fè sa devan moun ki pa alèz pou moun bwè.

• Ak kiyès mwen ka bwè?

Konsèy: Ak zanmi oswa ak fanmi ki ka gen bon enfliyans sou ou; pa bwè ak moun ki toujou ap bwè.

[Kare/Foto]

Pawòl Bondye a ede yon mesye ki te konn bwè pou l sou

Nan peyi Taylann, Supot te konn bwè anpil. Okòmansman, li te konn bwè sèlman nan aswè. Tikras pa tikras, li te kòmanse bwè ni maten, ni midi. Li te konn annik bwè jis pou l sou. Epi, li te kòmanse etidye Labib ak Temwen Jewova yo. Lè Supot vin aprann Jewova pa dakò pou moun bwè pou yo sou, li te sispann bwè. Men, apre yon ti tan, li te rekòmanse nan move abitid li te genyen an. Sa te fè fanmi l mal anpil.

Men, Supot te toujou renmen Jewova e l te vle adore Jewova jan Jewova mande a. Zanmi Supot yo te kontinye ede l e yo te ankouraje madanm li ak pitit li yo pou yo pase tan avè l e pou yo pa dekouraje avè l. Nan epòk sa a, pawòl klè ki nan 1 Korentyen 6:10 la ki fè konnen ‘moun ki bwasonyè pap benefisye Wayòm Bondye a’ te ede Supot wè jan sitiyasyon l lan te grav. Li te rann li kont li bezwen fè yon gwo efò pou l kite zafè bwè a.

Fwa sa a, Supot te detèmine pou l kite bwè nèt. Grasa pouvwa lespri sen Bondye, direksyon li te jwenn nan Pawòl Bondye a ak èd fanmi l ansanm ak kongregasyon an, li te rive jwenn fòs li te bezwen pou l venk anvi l genyen pou l bwè. Fanmi l te kontan anpil lè l te batize pou l montre li te vwe Bondye lavi l. Kounye a, Supot gen yon relasyon sere sere ak Bondye, yon bagay li te toujou anvi genyen e l ap sèvi ak tan l pou l ede lòt moun fè menm bagay la.