Ki nits’biy in t’iplabil a Jesús
KI YAJNANCHIJ AXI K’EAT
Kom a Jesús t’okatak yab in ko’oy i k’ibataláb axi in tametnál an atiklábchik, belits antsaná’ in yajnanchij an atiklábchik, tam ti in tsu’uw abal in yajchiknál ani in t’aja’ patal jawa’ in ejtow abal kin tólmiy. A Jesús ets’ey in t’aja’ patal jawa’ in ejtow abal kin tólmiy an atiklábchik kom in yajnanchalak, ani in le’ak kin tólmiy. I éjtowal ki tsu’uw talchik i t’iplab ban capitulos 32, 37, 57 ani 99.
KI JILA’ ABAL AN ATIKLÁBCHIK KA UTEY K’AL WAWÁ’
Patal an atikláb in le’ak ka utey k’al a Jesús kom yab in k’adhatnalak tin ba’ ani in jilalak ka utenchat. An atikláb in lej kulbetnalak ka k’wajiy k’al jajá’. ki tsu’uw jant’ini’ tin tejwamédha’ ban capítulos 25, 27 ani 95.
ETS’EY KU OLÁTS
A Jesús ets’ey u olak, belits abal k’wajatak kwetém o k’al k’e’at i atiklábchik, wilk’idhak u ol, yab expidh tam ne’ets ti k’apul. Tam in olonchalak a Jehová in pidhalak an k’ak’namal, ani in puwenchalak ani in konchalak i tolmixtaláb tam ne’etsak kin t’aja’ i takuxtaláb axi exbadh. Ki tsu’uw jant’ini’ tin t’aja’ axé’ ban capítulos 24, 34, 91, 122 ani 123.
KI TSALPAY KI TÓLMIY OK’OX AXI K’EAT
Tam junchikil a Jesús in yejenchalak ka koyóts, pero yab in t’aja’, kom in le’ak kin tólmiy axi k’e’at, yab expidh in tsalpay tin kwetemtal ani in tomnal ki aynanchij in t’iplabil. I éjtowal ki tsu’uw jant’ini’ tin tejwamédha’ axé’ ban capítulos 19, 41 ani 52.
ETS’EY KU PAKLWANCHIXIN
A Jesús yab expidh in uluw abal kwa’alak ku paklwanchixin. Jajá’ ets’ey in t’aja’ tam ti k’wajatak k’al in aykolil ani k’al k’e’at i atiklábchik. Ki tsu’uw jant’ini’ tin tejwamédha’ ban capítulos 26, 40, 64, 85 ani 131.
KI T’OJONCHIJ A JEHOVÁ K’AL PATAL I ICHICH
An k’ej kaw in ulalak abal an judíos ne’etsak kin pojka’ an mesías ani k’al jita’ tu k’wiynalak ne’etsak ka tsemdháj. A Jesús walám in éjtowalak kin tsalpay abal yab in tomnál kin lej tsapnanchij, pero yab antsaná’ tin t’aja’ jajá’ in tsapnanchij kin olna’ an chubaxtaláb, axé’ pel jun i alwa t’iplab abal wawá’ tam ku ayoknáj. Ki lupudh tsalpay k’al jawa in ulal an capítulos 16, 72 ani 103.
KI TEJWAMÉDHA’ I TSÁ’ATALÁB
A Jesús yab ejtíl axi k’e’at an atiklábchik kom jajá’ lej tsalpadh ani in exlalak yan jant’oj. Jajá’ yab walbidhak, jaxtám yab i éjtowal ki jumbiy k’al k’e’at i atikláb, belits antsaná’ in tejwamédha’ i tsa’ataláb ani in tólmiy axi k’e’at. I éjtowal ki exóbna’ más k’al an tsa’ataláb axi in tejwamédha’ ban capítulos 10, 62, 66, 94 ani 116.
KI TEJWAMÉDHA’ I K’AYATALÁB
A Jesús ets’ey in tejwamédhanchij i k’aya’taláb in abatwalej ani k’e’at i atikláb tam yab in tsapnachalak kin punuw ti t’ajbiláb jawa’ u exobchinal. K’al i k’aya’taláb u wichelakchik kin ucha’ jawa’ in yejenchalak kin t’aja’ abal ka utey más k’al a Jehová. Ki tsu’uw jant’ini’ tin tejwamédha’ an k’aya’taláb ban capítulos 74, 98, 118 ani 135.
