JAWAʼ IN ULAL AN BIBLIA
Tam u ubatʼ abal ki ataʼ i tumín
Talchik in ulal ki ubatʼin abal ka ataʼ i tumín, yab jantʼoj in kwaʼal kʼeʼat in ulalchik abal pel jun i ubatʼlab axi lej kʼakʼadh.
¿Walám kidháb ku ubatʼin abal ki ataʼ i tumín?
JAWAʼ TALCHIK IN BELÁL
Yan i atikláb in tsálpayal abal yab jantʼoj in kwaʼal kom an eyalchik in binál i kʼij abal ku ubatʼin. an eyalchik in tʼajál abal ka ubatʼin an atikláb kʼal an lotería abal kin támkuy i tumín ani in pidhál jitaʼ más in yéjenchal.
JAWAʼ IN ULAL AN BIBLIA
An Biblia yab in olnál abal an atiklábchik yab in tomnál ka ubatʼin abal kin ataʼ i tumín. Pero tu pidhál i tolmixtaláb abal ki tʼajaʼ ti kwéntaj jantʼiniʼ in tsálpayal a Dios.
Tam jun u ubatʼ tokot kʼwajat in tsálpayal kin átanchij an tumín axi kʼeʼat. Ani nixéʼ yab játs axi a Jesús in uluw abal in tomnál ki tʼajaʼ «Ka lej tʼajaʼ ti kwéntaj yab ka watʼadh kʼaʼinchij an tumín axi tejéʼ tsabál» (Lucas 12:15) Patal jitaʼ u ubatʼ pel kom in kʼaʼinchal an tumín. Bélits abal in exlál yab neʼets kin ataʼ, jitaʼ u ubatʼ kʼal an lotería in tʼajchal kin tsálpay abal neʼets kin ataʼ yan i tumín. Kom an atiklábchik in léʼ kin ataʼ yan i tumín, jaxtám u ubatʼchik kʼal an lotería ani in pakuwal yan i tumín.
Kʼal axéʼ in tʼajálchik abal an atikláb kin kʼaʼinchij más an tumín. An lotería in tʼajál kin tsalpaychik abal neʼets kin ataʼ yan i tumín, pero kʼal nixéʼ i éjtowal ki ódhnaʼ axi más. Kom expidh in tsálpayal kin átanchij in tumínal axi más. Pero an Biblia in ulal abal: «yab ki aliy i kwetém léʼnomtal. Ki tsuʼuw jawaʼ in yéjenchalchik axi más» (1 Corintios 10:24) Jun i péjach kʼal an laju i abatnaxtaláb axi in bínaʼ a Moisés in ulal: «Yab ka kʼaʼinchij . . . axi in kwaʼalchik axi más» (Éxodo 20:17) Tam jun i atikláb neʼets ti ubatʼ kʼal an lotería, kʼwajat in tsálpayal abal axi más kwaʼal kin kʼibaʼ abal jajáʼ kin ataʼ an tumin.
An Biblia tu ólchal abal yab ki tsálpay abal jun i tsinat tsapláb neʼets kin tʼajaʼ abal ki ataʼ yan i tumín. Al an biyál Israel, waʼtsin axi yab in bélaʼ kʼal a Dios ani «tújey kin kʼakʼnaʼ jun i dios axi in tsálpayalakchik abal neʼets ka tólmiyatchik abal kin ataʼ i tumin» ani ¿jantʼiniʼ tin tsuʼuw a Dios? Jajáʼ in uluw: «Kin áynanchij kin tʼajaʼ in pójkax tʼajbiláb tu tamét ani in tákuychik kin tʼajaʼ axi nanáʼ yab u kulbetnál» (Isaías 65:11, 12).
Talchik i púlik bichow, an tumin axi in támkuyalchik pel abal kin tólmiy an atiklábchik axi más in yéjenchal. Ejtíl in tʼajálchik i programas abal ti exóbal ani abal kin koʼoychik i tʼojlab. Bélits abal u éynal abal kin tólmiy an atiklábchik axi kidháb játs juʼtáj tin kaldhál. In kaldhámal kʼal an ubatʼintaláb axi a Jehová yab in kulbetnál. Kom an ubatʼláb in tʼajál abal ka átanchij in tumínal axi kʼeʼat.
«Yab ka kʼaʼinchij . . . axi in kwaʼalchik axi más» (Éxodo 20:17).
¿Jantʼoj tam kʼibataláb in watʼálchik axi u ubatʼ abal kin ataʼ i tumín?
JAWAʼ IN ULAL AN BIBLIA
An Biblia tu ólchal: «Axi in lej kʼaʼinchal an tumin u lej nixokʼnab abal ka wálbin. U wikʼat koʼoyab in ichích kʼal yan i leʼnomtaláb kʼal axi tu kweteʼ tontobel ani tu odhnáb ani játs tu jun putat kʼibedháb jajáʼchik» (1 Timoteo 6:9) Kʼal an ubatʼláb, játs juʼtáj tu tujél ka léʼnaʼ ka koʼoy jawaʼ yab a kʼal, nixéʼ lej kʼakʼadh. Jaxtám an Biblia in olnál, abal yab in tomnál ki tʼajaʼ (Efesios 5:3).
Kom axéʼ in tʼajál ka léʼnaʼ ka ataʼ i tumín dhubatkʼij ani yab ki tʼójon, axéʼ in tʼajál ka léʼnaʼ ka koʼoy más i tumín. An Biblia in ulal: «an kʼanidhomtaláb kʼal an tumin», jaʼits juʼtáj tu júnel patal axi yab alwaʼ. Max ka kʼadhpich kʼaʼinchij an tumin, «neʼets kin tʼajaʼ abal ti abatnanchij a éjatal». In tʼajál abal ki kʼwajiy lej tʼeʼpidh ani in éjtowal ti ódhnanchij a jaʼúbtal kʼal a Jehová. An Biblia in ulal abal jitaʼ ijkanenek kʼal an leʼnomtaláb kʼal an tumin «in támuwal yan i kʼibataláb» (1 Timoteo 6:10).
An leʼnomtaláb kʼal an tumín in tʼajál abal yab kit kʼwajiy kulbél kʼal an tumin axi in kwaʼalchik ani yab xeʼetschik kulbél. Eclesiastés 5:10, in ulal: «Jitaʼ in kʼanidhál an tumín yab jaykʼiʼ neʼets ka kʼwajiy kulbél kʼal jawaʼ in kwaʼal, ni jitaʼ in kʼanidhál an kʼaláb kʼal jawaʼ in atal»
Jitaʼchik kin jilaʼ ka atan kʼal an leʼnomtaláb kʼal an tumín, xowéʼ in atsʼál kʼibat kin jilaʼ ti ubatʼ. Ti Estados Unidos waʼtsin yan i atikláb axi atamej kʼal an leʼnomtaláb abal ti ubatʼ.
Proverbios 20:21, tu exóbchal abal an atiklábchik axi u ubatʼ in éjtowal kin koʼoy yan i tumín, pero yab neʼets kin koʼoy in láblixtal a Dios. Jayej jitaʼ kin ujnaʼ ti ubatʼ, in éjtowal ka jilkʼon lej tokʼlidh ani kin kʼibaʼ patal ejtíl, in jaʼúbchik, in tʼojlábil ani in yanél. Ki bélkaʼ patal an exobchixtaláb axi tu pidhál an Biblia, tu tólmiyal abal yab ki kʼibaʼ patal axi i kwaʼal.
«Axi in lej kʼaʼinchal an tumin u nixokʼnab abal ka wálbin. U wikʼat koʼoyab in ichích kʼal yan i leʼnomtaláb kʼal axi tu kweteʼ tontobel ani tu odhnáb ani játs tu jun putat kʼibedháb jajáʼchik» (1 Timoteo 6:9).
