2024 թ. հունիսի 20-ին Խաբարովսկի երկրամասի Ինդուստրիալնի շրջանի դատարանը մեղավոր ճանաչեց քույր Մայա Կարպուշկինային, եղբայրներ Ստանիսլավ Կիմին և Նիկոլայ Պոլևոդովին, քույր Սվետլանա Սեդովային և եղբայր Վիտալի Ժուկին ու նրա կնոջը՝ Տատյանային։ Մայան դատապարտվեց չորս տարվա պայմանական ազատազրկման։ Սվետլանան և Տատյանան դատապարտվեցին հինգ տարվա պայմանական ազատազրկման։ Քույրերը չեն կալանավորվի։ Ստանիսլավը, Վիտալին և Նիկոլայը դատապարտվեցին ութ տարի և երկու ամսվա, ութ տարի և չորս ամսվա, ութ տարի և վեց ամսվա ազատազրկման՝ համապատասխանաբար։ Սրանք 2017 թ. արգելքից ի վեր նշանակված ամենախիստ պատիժներից են։ Եղբայրներին նիստերի դահլիճից տարան կալանավայր։

1. Նոյեմբերի 10, 2018

   Ոստիկանները ներխուժեցին սրճարան, որտեղ 55 հոգանոց հավաքույթ էր։ Նրանք հարցաքննեցին, նկարեցին ներկաներին և վերցրին բոլորի մատնահետքերը, անգամ երեխաներինը։

2. Նոյեմբերի 12, 2018

   Ստանիսլավին, Նիկոլային և Վիտալիին վերցրին նախնական կալանքի։ Մայայի, Սվետլանայի և Տատյանայի նկատմամբ նշանակվեցին տեղաշարժի սահմանափակումներ։

3. Հունվարի 14, 2019

   Նիկոլայի և Վիտալիի նախնական կալանքը փոխարինվեց տնային կալանքով։

4. Հունվարի 29, 2019

   Ստանիսլավի կալանքը նույնպես փոխարինվեց տնային կալանքով։

5. Հուլիսի 18, 2019

   Գործն ուղարկվեց Խաբարովսկի երկրամասի Ինդուստրիալնի շրջանի դատարան։

6. Օգոստոսի 2, 2019

   Նիկոլայը ազատ արձակվեց տնային կալանքից։

7. Սեպտեմբերի 9, 2019

   Մեկ այլ գործ, որը հարուցվել էր Ստանիսլավի և Նիկոլայի դեմ, նույնպես ուղարկվեց Խաբարովսկի երկրամասի Ինդուստրիալնի շրջանի դատարան։

8. Նոյեմբերի 5, 2019

   Նիկոլայի նկատմամբ նշանակվեցին տեղաշարժի սահմանափակումներ։

9. Հունվարի 18, 2020

   Ստանիսլավը և Վիտալին ազատ արձակվեցին տնային կալանքից։

10. Փետրվարի 4, 2020

    Ստանիսլավը և Նիկոլայը այլ քրեական գործում մեղավոր ճանաչվեցին, յուրաքանչյուրը դատապարտվեց երկու տարվա պայմանական ազատազրկման։ Խաբարովսկի Ժելեզնոդորոժնի շրջանի դատարանը նրանց նկատմամբ նշանակեց փորձաշրջան։

11. Օգոստոսի 3, 2020

    Ինդուստրիալնի շրջանի դատարանը գործը վերադարձրեց դատախազություն։ Դատախազը որոշեց բողոքարկել այն։

12. Սեպտեմբերի 29, 2020

    Խաբարովսկի շրջանային դատարանը քննեց դատախազի բողոքը։ Ստանիսլավին և Նիկոլային թույլ տրվեց խոսել դատարանի հետ։ Նրանք ասացին, որ Ռուսաստանի Դաշնությունը, ինչպես աշխարհի շատ այլ երկրներ, ստորագրել է միջազգային համաձայնագիր, ըստ որի՝ պետք է հարգել քաղաքացիների պաշտամունքի ազատության իրավունքները։

13. Հոկտեմբերի 12, 2020

    Խաբարովսկի շրջանային դատարանը ուժի մեջ է թողել Ինդուստրիալնի շրջանի դատարանի որոշումը, և գործը վերադարձվել է դատախազություն։

14. Դեկտեմբերի 15, 2021

    Գործը նորից ուղարկվեց Ինդուստրիալնի շրջանի դատարան։

Վստահ ենք, որ Եհովան կշարունակի աջակցել մեր սիրելի եղբայրներին և քույրերին, ովքեր շատ այլ հավատարիմների հետ կազմում են «վկաների մեծ բազմություն» (Եբրայեցիներ 12։1)։