Միջազգային կրոնական ազատության հարցերով ԱՄՆ հանձնաժողովի հանձնակատար Նուրի Տուրկելը 2021 թ. փետրվարի 24-ին հայտարարեց, որ խղճի կալանավորների հարցերով զբաղվող ծրագրի շրջանակներում աջակցելու է 70-ամյա Շամիլ Խակիմովին։ Նա մասնավորապես նշեց. «2019 թ.-ից, երբ այս ծեր, վատառողջ մարդը անարդարացիորեն դատապարտվեց յոթուկես տարվա ազատազրկման, սկսեց հյուծվել գերծանրաբեռնված և անմխիթար վիճակում գտնվող կալանավայրում։ Այս պատժաժամկետը մահվան դատավճիռ է Խակիմովի համար, որը՝ որպես Եհովայի վկա, շինծու մեղադրանքով ազատազրկվել է իր կրոնը խաղաղ կերպով դավանելու համար»։

Եղբայր Խակիմովի կինը մահացել է։ Նա Տաջիկստանի հյուսիսում ապրող այն 24 Եհովայի վկաներից է, որոնք 2019 թ. հունվարին և փետրվարին հարցաքննվեցին կազմակերպված հանցագործության գործերով վարչության աշխատակիցների կողմից։ Նրան ձերբակալեցին, հարցեր տվեցին այն մասին, թե ինչպես է դարձել Եհովայի վկա, և թե ինչ կառուցվածք ունի Եհովայի վկաների կազմակերպությունը։

Եղբայր Խակիմովը 8 ժամ նախնական կալանքի տակ մնաց, որի ընթացքում նրան թույլ չտվեցին հետվիրահատական բուժօգնություն ստանալ։ Նա նաև արյան բարձր ճնշում ունի։ Երբ ոստիկաններն ի վերջո նրան տուն տարան, առգրավեցին նրա էլեկտրոնային սարքերը, Աստվածաշունչը, Աստվածաշնչի ուսումնասիրության մի քանի ձեռնարկներ, ինչպես նաև անձնագիրը։ Առանց անձնագրի եղբայր Խակիմովը չէր կարող կենսաթոշակ ստանալ և շարունակել իր հետվիրահատական բուժումը։

2019 թ. փետրվարի 28-ին Խոջենտ քաղաքի դատարանը որոշեց եղբայր Խակիմովին նախնական կալանքի վերցնել։ Նրա կալանավորման ժամկետը երկարաձգվել է երեք անգամ։ Հետաքննության և դատավարության ողջ ընթացքում նա կալանքի տակ է եղել։

2019 թ. սեպտեմբերի 10-ին Խակիմովը մեղավոր ճանաչվեց և դատապարտվեց յոթուկես տարվա ազատազրկման։ Սակայն 2020 թ. հուլիսի 4-ին կալանավայրի վարչությունից տեղեկացրին, որ նրա պատժաժամկետը համաներման մասին օրենքով կրճատվելու է 2 տարի 3 ամիս և 10 օրով։ Նա պետք է ազատ արձակվի 2024 թ. մայիսի 16-ին։

Վստահ ենք, որ Եհովան կշարունակի օգնել մեր եղբայրներին և քույրերին, որոնք համբերությամբ և ուրախությամբ դիմակայում են այս փորձությանը (Սաղմոս 20։2)։