Omapuriro okuza kovalese

2 mOvakorinte 6:14, hapo Paulus aa hungirire koouṋe indu tja ungurisa omambo nga “imba mbe ha kambura mu Kristus,” poo imba mbe he ri ovakriste?

2 Ovakorinte 6:14, ri tja: “Amu kara nehore rimwe na imba mbe ha kambura mu Kristus!” Indu tji twa tara kepu arihe, oukahu kutja Paulus aa hungirire kovandu mbe he ri ouṋepo wombongo yOukriste. Omazuviro ngo wina ya hungirwa momazeva warwe wOmbeibela Paulus ma ungurisa omambo nga “omuhakambura” poo “mbe he ri Ovakriste.”

Otjotjihorera, Paulus wa rakiza Ovakriste okuhinokuyenda kotjombanguriro ku mave kapangurwa i yovapangure “mbe he ri Ovakriste.” (1 Ovakorinte 6:6) Imba mbe he ri Ovakriste va ri ovapangure mbaave pangura motjombanguriro moKorinte. Morutuu rwe orutjavari, Paulus wa tja “ozondunge zawo tjinga aze ṱizirwa monḓorera” i Satan. Omeho waimba mbe he ri Ovakriste ya kutjirwa “ewiwiri” kutja ave ha munu ombuze ombwa. Ovahakambura mba kave nonḓero yokukarera Jehova. Posi ya, Paulus komurungu wanao wa tja: “[Owo tji va] tanaukire ku Muhona ewiwiri mari isiwa ko.”—2 Ovakorinte 3:16; 4:4.

Ovahakambura tjiva ve kara norupa moviṋa mbi ha tjata ku Mukuru poo ve rikotamena koomukuru vovisenginina. (2 Ovakorinte 6:15, 16) Posi ya, kaavehe mbe pirukira ovakarere va Jehova. Tjiva ve raisa onḓero mouatjiri. Nu ovengi vawo va kupwa poo va kupa Ovakriste nu ve nondjoroka okukara pu na wo. (1 Ovakorinte 7:12-14; 10:27; 14:22-25; 1 Petrus 3:1, 2) Posi ya, Paulus tjinene aa ungurisa embo ndi “ovahakambura” kovandu mbe he ri orupa rwombongo yOukriste ndja zikamena ku imba mbe “kambura mu Muhona” otja tji pa raisiwa pomautiro.—Oviungura 2:41; 5:14; 8:12, 13.

Omurari mbu ri 2 Ovakorinte 6:14, omunanḓengu tjinene kOvakriste mozongaro azehe zehupo rawo, nu potuingi u ungurisiwa okuyandja eronga esemba kOvakriste mbu mave paha omundu okukupa poo okukupwa. (Mateus 19:4-6) Omukriste ngwa papitisiwa ka paha omundu ngu mave kupasana mokati kaimba mbe he ri Ovakriste, mena rokutja omirari mbi ve kongorera nozondando zawo nongamburiro yawo ya panguka tjinene ku indji yOvakriste vatjiri.

Nu hapo tjike na imba mbe rihonga Ombeibela nokukara pozombongarero zombongo? Poo imba mbe ri ovazuvarise mbe hi ya papitisiwa? Hapo owo ovahakambura? Kako. Katu sokuvara ovandu mba yakura ouatjiri wombuze ombwa, nu mbe tjita omarundurukiro yokuvanga okupapitisiwa otjovahakambure. (Ovaroma 10:10; 2 Ovakorinte 4:13) Kornelius ngunda e hi ya papitisiwa wa ri “omurumendu omunangamburiro nu ngwa ri nondira ku Ndjambi.”—Oviungura 10:2.

Hapo ma rire ounongo kOmukriste ngwa papitisiwa okukara noupanga womorusuvero poo okukupwa i yomundu ngu ri omuzuvarise ngu hi ya papitisiwa, mena rokutja eronga nda hungirwa i Paulus 2 Ovakorinte 6:14 kari nokuhungirira komuzuvarise ngu hi ya papitisiwa? Kako, imbwo kaunongo. Omena raye? Mena reronga Paulus nda yandja kOvakriste ovahepundu. Paulus wa tja: “Eje ua kutuka okukupua i auhe, ngu ma vanga norondu tja sokutjita nai moMuhona erike.” (1 Ovakorinte 7:39, EEP) Otja kerakiza ndo, Ovakriste mba papitisiwa mave tunduuzwa okukupwa mu ‘Muhona erike.’

Hapo omambo nga “mu Muhona” na inga “mu Kristus” ye heya tjike? Paulus wa hungira ohunga novandu mba ri “mu Kristus” poo “mu Muhona” mOvaroma 16:8-10 nOvakolose 4:7. a Indu tji wa lese omazeva ngo, ove mo munu kutja ovandu otja imba ‘ovaungure vapamwe,’ ‘ovaṱakame,’ ‘ovakwetu ovasuverwa,’ ‘ovaungure ovaṱakame,’ nu ‘ovakarere ovakwetu.’

Oruṋe omundu tje rira ‘omukarere omukwetu mu Muhona’? Iho tji tjitwa indu eye tje ri yandjere okuungura otjiungura tjomukarere nokurizemba omuini. Jesus wa kahurura kutja: “Auhe ngu ma vanga okuyenda puna Ami nge rizembe omuini, a toore otjikoroise tje nu e Ndji kongorere.” (Mateus 16:24) Eye u uta okukongorera Kristus nokutjita ombango ya Mukuru indu tje riyandja ku Mukuru. Nu okuzambo, eye u papitisiwa na rire omuzuvarise omuṱakame komurungu wa Jehova Mukuru. b Ku nao, okukupa mu ‘Muhona erike’ ku heya okukupa omundu ngwa raisa kutja eye tjiri omukambure nu ngwe riyandjera okurira “omukarere waNdjambi nowaMuhona Jesus Kristus.”—Jakobus 1:1.

Omundu ngu rihonga Ombeibela ku nOvahongonone va Jehova nu ngu tjita omarundurukiro, eye u tjita otjiṋa otjisemba. Posi ya, eye ngunda kee riyandja ku Jehova nokumukarera. Eye ngunda u tjita omarundurukiro ngu maye heperwa po. Eye ma hepa okutjita omarundurukiro omanene, tjimuna okuriyandja ku Jehova nokurira Omukriste ngwa papitisiwa, ngunda e hi ya tjita omarundurukiro warwe omanene mehupo tjimuna orukupo.

Hapo ma rire ondunge ombwa kOmukriste okukara noupanga womorusuvero ku nomundu ngu tjita omarundurukiro omawa momerihongero we wOmbeibela, ngahino nondando yokumuundja ngandu tja papitisiwa, nu okuzambo ave kupasana? Kako. Otjiṋa ho mape ya atji kurungisa omuhongwa wOmbeibela indu tja tjiwa kutja Omukriste ngwa papitisiwa ma vanga okumukupa, posi ya eye ma tjiti nao uriri tja zu nokupapitisiwa.

Potuingi, omundu u rira omuzuvarise ngu hi ya papitisiwa oure woruveze orusupi uriri, ngandu tje ya pondondo yokupapitisiwa. Ku nao, eronga ndi ri kombanda mba rokukupa mu Muhona uriri kazeu tjinene okuyenenisa. Posi ya, hapo tjike indu omundu tje nozombura nḓa yenene okukupa poo okukupwa, tje kurisiwa mouatjiri, nu tje ri omuzuvarise ngu hi ya papitisiwa? Indu tji pe ri nao, hapo otjikwaye tji tji mu tjaera okuriyandja ku Jehova? Ongwaye tje keyakeya? Nandarire kutja eye kamuhakambura, eṱe kamaatu tja eye u ri “mu Muhona.”

Eronga ra Paulus ohunga norukupo ombatero kweṱe. (Jesaja 48:17) Indu ovakupasane tji ve riyandja ku Jehova, owo ve kara norukupo oruwa ndwa zikamena komirari vya Jehova. Owo ve kongorera omirari vimwe, nu ve kara nozondando zemwe. Nu otjiṋa hi tji tjita kutja ve kare norukupo oruṋingandu. Nu wina, okukupa mu ‘Muhona erike’ ku raisa ouṱakame wetu ku Jehova, nu iho tji tu etera ozondaya ozongarerere, mena rokutja Jehova “omuṱakame ku imba mbe ri ovaṱakame.”—Epsalme 18:25.

[Omambo wokehi]

[Otjiperendero]

“Ove, Muhona, oOve omuṱakame ku imba mbe ri ovaṱakame”