“Hi ripura okurundurura ouye rukwao”
OMBEIBELA I RUNDURURA OMIINYO VYOVANDU
“Hi ripura okurundurura ouye rukwao”
Nda serekarerwa i Jukka Sylgren
OMBURA MA KWATWA: 1966
EHI KAZA: OFINLAND
EKURUHUNGI: OMURWIRE WOUSEMBA WOVANDU MOTJIWAṊA
EKURUHUNGI RANDJE: Okuza kouṱiṱi mba suverere okuti. Popengi ami neṱunḓu randje aatu tjaterwa okukara mokuti, pa ri omarindi omawa nga kondorokere otjirongo tjetu oJyväskylä, mondivitivi ya Finland. Ami wina mba suvera ovinamuinyo. Tji mba ri omuatje ee vanga okupukata okambihi poo ombwa ngamwa aihe ndji mba munu. Indu tji mba rira omunene ee pindikisiwa i omuano ovandu maave tjindi ovinamuinyo navi! Otja oruveze tjaaru kayenda, mbe rikuta ku notjira tjaatji rwire ousemba wovinamuinyo, nu mba kahakaena kuna varwe mbaave rikendere ovinamuinyo tjimuna ami.
Aatu kayenda momivanda vyotjihuro okurwira ousemba wovipuka. Aatu handjaura ondjivisiro kovandu nokukayenda momivanda vyotjihuro ama tu raisa onyengo kozonganda nḓe konḓonona ovipuka nokupirukira ozostora nḓe randisa ozombanda nḓe ungurwa pomainya wovipuka. Nandarire twa zikamisa otjira otjipe tjaatji tjevere ovipuka. Mena rokutja aatu toora omikambo okuyenenisa ozondando zetu, kunao aatu hiti moumba ku nouhonapare. Nu popengi ee kamburwa nokutwarewa kotjombanguriro.
Kombanda yokurikendera ovinamuinyo, ami wina ee rikendere omauzeu warwe nga takavarere mouye. Kunao ami mbe ke rikutire kovira vyarwe ovingi, tjimuna Amnesty International noGreenpeace. Ami ee ungurisa omasa wandje aehe okuyandja oruvara kovitjitwa vyovira mbi. Ami ee rwire ovasyona, novahepauke, novandu varwe mbaave hepa ombatero.
Korusenina mba kamuna kutja, himee yenene okurundurura ouye. Nandarire kutja ovira mbi aavi yenene okuisa po omauzeu tjiva omaṱiṱi, posiya omauzeu inga omanene aaye ririre ko omengi. Ya ri tjimuna omasa wourunde ya kambura ouye auhe, nu kapa ri omundu ngwee rikendere otjiṋa oparukaze. Kunao, ee rimunu okuhina omasa rukwao.
OMUANO OMBEIBELA MU YARUNDURURA OMUINYO WANDJE: Mena rokutja hee yenene okuvatera, ami mba wire momuinyo, nu mba uta okuripura ohunga na Mukuru nOmbeibela. Rukuru ee rihongo Ombeibela kuna Ovahongonone va Jehova. Nandarire kutja Ovahongonone va Jehova aave raisa otjari nu va ri nonḓero mwami, ami hee vanga okurundurura omuano mbwee hupu. Posiya otjikando hi oviṋa vya runduruka.
Ami mba toora Ombeibela yandje nu e utu okulesa. Oyo tjiri ye ndji huhumiṋa. Mba muna omatjangwa omengi nge honga ovandu okuraisa otjari kovipuka. Otjotjihorera, Omiano 12:10 mari tja: “Omundu omusemba u suvera ovinamuinyo vye.” (Good News Translation) Nu wina mba kamuna kutja Mukuru kangu eta omauzeu mouye. Nungwari, omauzeu ye ririra ko omengi mena rokutja ovandu ovengi kave kongorere omirari vya Mukuru. Ami mba kumisirwe indu tji mbe rihonga ohunga norusuvero nomuretima wa Jehova.—Epsalme 103:8-14.
Ami mba muna ozoadresa mokambo nga Ombeibela tjiri i honga tjike? Nu mba tjanga kutja me vanga okurihonga Ombeibela. Nu tjimanga Ovahongonone va Jehova ve ya poyandje ave ndji ningire okurihonga Ombeibela kuna wo, ami mba yakura. Ami mba uta okuyenda kozombongarero zombongo pEtwo rOmerikotameneno. Kunao, ee tjaterwa i oviṋa mbyee rihongo okuza mOmbeibela.
Me raisa ondangi kOmbeibela, mena rokutja ye ndji vatera okutjita omarundurukiro mehupo randje. Ami mba isa okupepa omakaya nokunwa otjikariha okukapitisa etota. Mba rundurura omuano mbwee rihwikike nu mba isa okuhungira omambo omavi. Wina mba uta okuraisa ondengero kouhonapare. (Ovaroma 13:1) Ami mba isa omeritjindiro wandje omavi nge ndji pandekere tjinene.
Otjiṋa tji tja ri otjizeu ku ami ya ri okuisa ovira mbyaavi kuramene po ousemba wovandu novipuka. Ihi katja ri otjiṋa otjipupu. Rutenga ee munu kutja tji mba piti movira mbi me ve hihamisa. Nungwari, mba kauta okumuna kutja Ouhona wa Mukuru owo auyerike ombu mau yenene okuyeta ouwa watjiri kouye. Kunao, mba tya okuyandja omasa wandje aehe okuvatera Ouhona mbwi nokuhonga varwe ohunga na wo.—Mateus 6:33.
OMUANO MBU MBA MUNA OUWA: Otjomundu ngu mba ri movira pekepeke, ee haṋa ovandu movimbumba vivari, otjimbumba tjovandu ovawa na ihi tjovandu ovavi, nu mba tondere tjinene ovandu mbaave tjiti oviṋa ovivi. Posiya nai mena rOmbeibela ami mba rundurura oumune wandje mbo. Nu, mbi kondja okuraisa orusuvero kovandu avehe. (Mateus 5:44) Omuano umwe mu mbi raisa orusuvero ndwi, omokuhaṋasana ombuze ombwa yOuhona wa Mukuru ku novandu. Ami mbi tjaterwa okumuna omuano oviungura mbi mu vi tunduuza ohange, ouṋingandu, nokuyandja omaundjiro watjiri kovandu.
Mokuyandja omerikendero wandje aehe ku Jehova mba muna ohange momuinyo. Mbi nongamburiro yokutja Eye Otjomuute, kamaa yandjere ovandu novipuka okutjindwa navi nga aruhe, poo okuyandjera kutja ehi retu ewa ndi ri nyonwe. Nu moruveze rwatjimanga, okupitira mOuhona we, Eye ma kayarura avihe mbya nyonwa koupe. (Jesaja 11:1-9) Okutjiwa ouatjiri mbwi kaku ndji etere ondjoroka uriri, posiya wina mbi tjaterwa okuvatera varwe kutja ve kare nongamburiro mouatjiri mbwi. Ami nai hi ripura okurundurura ouye rukwao.
[Picture]
[Picture]
[Credit Line]
Animalia
[Picture]
