EHUNGI KU NOMURARANGANDA

Ongwaye Mukuru tje yandjera omauzeu?

Indi ehungi umwe wOvahongonone va Jehova ndi mape ya a kara na ro ku nomuraranganda we. Ngatu tje omukazendu omukambure wena Michelle we ya pondjuwo yomukazendu wena Sophia.

HAPO MUKURU U FULA VI OHUNGA NOMAUZEU WETU?

Michelle: Mo tja vi Sophia? Me tjaterwa kutja mbe ku vaza ponganda.

Sophia: Ami wina.

Michelle: Otjikando tji tja zu ko, twa hungirire kutja Mukuru u fula vi ohunga nomauzeu wetu. Nove we ndji raerere kutja iho otjiṋa tjoo ripurire ko oure woruveze orure, nu tjinene indu mama woye tja za nokukara moumba wotjihauto. Hapo eye u ri vi nai?

Sophia: Eye u kara nomayuva omawa nomavi. Posi ya, ndino u ri nawa.

Michelle: Me tjaterwa okuzuva nao. Katjiṋa otjipupu okukara noumune ouwa mongaro otja indjo.

Sophia: Otjiperi. Povikando tjiva mbi ripura kutja ma kara mongaro ndjo nga ruṋe.

Michelle: Me ku zuu. Ngahino mo zemburuka kutja otjikando tji tja zire ko mbe ku isire nepuriro ohunga nokutja ongwaye Mukuru tje yandjera omauzeu ndoovazu u nomasa wokuisa po.

Sophia: Ii, me zemburuka.

Michelle: Ngunda atu hi ya tara keziriro rOmbeibela, ngatu rizemburukise omapu tjiva ngu twa hungirire ko.

Sophia: OK.

Michelle: Twe rihongere kutja, omurumendu omuṱakame moruveze rwOmbeibela wina ee ripura kutja ongwaye Mukuru tje yandjera omauzeu. Posi ya, Mukuru ke na pe mu rokohera poo okumuraera kutja ma hepa okukara nongamburiro onyingi.

Sophia: Imbyo tjiri vya ri oviṋa ovipe okuvizuva.

Michelle: Eṱe wina twe rihongere kutja Jehova Mukuru ka vanga kutja tu mune omauzeu. Otjotjihorera, Ombeibela i tja indu ovakarere ve tjaave munu omauzeu, ‘eye aa tjiwa omihihamo vyawo.’ a Hapo katjiṋa otjihuhumiṋe nao okutjiwa kutja Mukuru u kara notjari na eṱe indu tji matu munu omauzeu?

Sophia: Ii, otjiperi.

Michelle: Korusenina, twa hungirire kutja Mukuru u nomasa nu ma yenene okuyandisa omauzeu moiri ngamwa aihe.

Sophia: Imbo hi pe zuu nawa. Ongwaye Mukuru tje yandjera kutja oviṋa ovivi vi tjitwe ngunda e nomasa wokuvitjaera?

OUṊE NGWAA HUNGIRE OUATJIRI?

Michelle: Kutja tu mune eziriro kepuriro roye, ngatu tare kembo etenga rOmbeibela, Genesis. Hapo mo tjiwa ehungi ra Adam na Eva?

Sophia: Ii me tjiwa, mbe rihongera pokereka. Mukuru wa tja ave ri komuti kaaṋi mbo, posi ya owo va rya.

Michelle: Otjiperi. Nai, ngatu tare kovitjitwa mbya tjita kutja Adam na Eva ve katuke. Ovitjitwa mbyo vi notjiṋa nepuriro rokutja ongwaye tji tu muna omauzeu. Arikana tu lesera Genesis ekondwa 3, ezeva 1 nga 5.

Sophia: OK. “Nungwari onyoka ya ri notjurutjutju tjinene povipuka avihe mbya ungurirwe i Muhona Ndjambi. Noyo ya pura komukazendu ai tja: ‘Indu Ndjambi otja hee, tjiri, kutja aamu ri komiti ngamwa avihe motjikunino?’ Nomukazendu wa zira konyoka a tja: ‘Kovihape vyomiti, mbi ri motjikunino, tu nousemba okurya ku vyo, nungwari kovihape vyomuti mbu ri mokati kotjikunino, Ndjambi wa tja: “Eṋe amu ri ko ku wo, nu amu ṱunu ku wo; tjaa mamu ṱu.” ’ Nonyoka arire tji ya tja komukazendu: ‘Kamambo! Indee uri, kamaamu ṱu! Nungwari Ndjambi ma tjiwa kutja tji mwa ri ku wo, omeho weṋu maye paturuka, amu sana ku Ndjambi omuini namu tjiwa ouwa nouvi.’ ”

Michelle: Okuhepa. Ngatu tare komazeva ngo. Rutenga, wa munu kutja onyoka ya hungira komukazendu, Eva. Orupa rwarwe rwOmbeibela ru raisa kutja ya ri Satan Omudiaboli ngwa hungire okupitira monyoka. b Satan wa pura Eva ohunga netwako Mukuru nda twapere ohunga nomuti. Hapo wa munu kutja Mukuru wa tja mape tjitwa tjike ku Adam na Eva indu tji va ri komuti mbo?

Sophia: Owo mave ṱu.

Michelle: Otjiperi. Tara komambo Satan nga hungira ohunga na Mukuru. Eye wa tja: “Kamambo! Indee uri, kamaamu ṱu!” Satan wa isana Mukuru kutja omunavizeze.

Sophia: Ami okuuta okuzuva orupa rwehungi ndi nawa.

Michelle: Indu Satan tja isana Mukuru kutja omunavizeze, eye wa tjita kutja pe kare ombata ndji mai hepa oruveze okuzengururwa. Mo munu kutja ongwaye?

Sophia: Kako hi nokutjiwa.

Michelle: OK, me yenene okusasaneka nai. Ngatu tje eyuva rimwe mbe ya pove ne ku raera kutja mbi nomasa pove. Hapo mo raisa vi kutja ouṋe ngu nomasa?

Sophia: Me munu kutja matu tjiti ombatasaneno.

Michelle: Ii, otjiperi. Ngahino matu yenene okutoorora otjiṋa otjizeu nu atu tara kutja ouṋe ngu ma yenene okutjitoora. Otjiperi kutja okuraisa kutja ngu nomasa ouṋe otjiṋa otjipupu.

Sophia: Ii, me ku zuu kutja mo tja vi.

Michelle: Posi ya, pendje nokutja mbi nomasa pove, tjike indu tji mba tja ami mbi nouatjiri pove? Iho katjiṋa otjipupu, po vi?

Sophia: Ii, me munu nao.

Michelle: Kombanda yanao, okukara nouatjiri kaku ri tjimuna okukara nomasa, ku maku yenene okuzengururwa oupupu.

Sophia: Otjiperi.

Michelle: Ii, omuano auyerike mbu matu yenene okuzengurura ombata ndjo oondi tji twa yandjere oruveze okukapita kutja varwe ve yenene okumuna kutja ngu u nouatjiri ouṋe.

Sophia: Iho otjiṋa otjizuvakwa.

Michelle: Nambano, tara rukwao kehungi ndi mu Genesis. Hapo Satan wa tja u nomasa pu Mukuru?

Sophia: Kako.

Michelle: Mukuru atja hakahana okuraisa kutja eye ongu nomasa. Posi ya, Satan wa tja eye u nouatjiri pu Mukuru. Momuano warwe, eye wa raera Eva kutja, ‘Mukuru me ku korere ovizeze, posi ya ami me ku raere ouatjiri.’

Sophia: Otjiṋa otjinanambango.

Michelle: Mena rokutja Mukuru u nounongo, eye aa tjiwa kutja ma sokuyandjera oruveze okukapita okuzengurura ombata ndjo. Nu iho aatji sokuraisa kutja ouṋe ngu ma hungire ouatjiri nu ouṋe ngu ma kora ovizeze.

EPU ENANḒENGU

Sophia: Indu Eva tja za nokuṱa, hapo iho katji raisire kutja Mukuru aa hungire ouatjiri?

Michelle: Ii, tja raisa nao. Posi ya pe novingi mombatasaneno ya Satan. Tara rukwao kezeva 5. Hapo ovikwaye vyarwe Satan mbya raera ku Eva?

Sophia: Eye wa tja indu Eva tja ri kotjihape, omeho we maye paturuka.

Michelle: Otjiperi, nu wa tja eye ma “sana ku Ndjambi” nu a “tjiwa ouwa nouvi.” Ku nao, Satan wa tja Mukuru u rurupara ovandu oviṋa oviwa.

Sophia: Me munu.

Michelle: Nu indjo wina ya ri ombatasaneno onene.

Sophia: Mo hee vi nao?

Michelle: Mokuhungira nao, Satan wa tja Eva novandu avehe kave nokuhepa okuhonaparerwa po i Mukuru. Mongaro ndji wina, Jehova aa tjiwa kutja ma sokuyandja oruveze ku Satan okuraisa munda we. Ku nao, Mukuru wa yandjera Satan okuhonaparera po ouye mbwi oure woruveze orusupi. Nu iho tji raisa nawa kutja ongwaye tji tu muna omauzeu, omena rokutja Satan ongu ri omuhonapare wouye mbwi. c Posi ya pe nombuze ombwa.

Sophia: Ombuze iṋe ndjo?

Michelle: Ombeibela i honga ouatjiri uvari ounanḓengu ohunga na Mukuru. Outenga, Jehova u rikendera ku eṱe indu tji matu munu omauzeu. Otjotjihorera, tara komambo wOmbara David, nge ri mEpsalme 31:7. David wa munine omauzeu omengi mehupo re, posi ya tara komambo nga hungira ku Mukuru mongumbiro. Arikana tu lesera ezeva ndo.

Sophia: OK. Mari tja: “Me yoroka nu me nyandere orusuvero rwoye, tjinga awa tara kondjenda yandje, nu awa tjiwa ombamisiro yandje.”

Michelle: Nandarire kutja David wa munine omauzeu, eye wa muna omahuhumiṋino mokutjiwa kutja Jehova aa munu oviṋa avihe mbyaavi tjitwa ku ye. Hapo katji huhumiṋe nao, okutjiwa kutja Jehova u tjiwa oviṋa avihe, nandarire omihihamo vyetu momuinyo mbi vi ha yenene okumunikwa i yovandu varwe?

Sophia: Ii, otjihuhumiṋe.

Michelle: Ouatjiri outjavari owombwi wokutja Mukuru kamaa yandjere kutja omauzeu ngu tu muna ye karerere. Ombeibela i honga kutja moruveze rwatjimanga eye mee ku nyona ouye wa Satan ourunde mbwi. Eye ma yarura oviṋa avihe ovivi mbya tjitwa koupe, nu ihi matji kamburire mo oviṋa mbya tjitwa kove na mama woye. Pe ri nawa tji mba kotoka otjivike tji matji yende nu mbi ye ku ku raisira kutja ongwaye tji matu yenene okukara nongamburiro kutja Mukuru ma kaisa po omauzeu ayehe ngu tu muna?

Sophia: Ii me ku undju.

Hapo pe nepu kaaṋi rOmbeibela ndu u vanga okutjiwa? Hapo ove u vanga okutjiwa ongamburiro yOvahongonone va Jehova? Tji pe ri nao, o keyakeya okupura umwe wOvahongonone va Jehova. Eye ma kara nonyuṋe okuhungirira komapu ngo pu na ove.

[Footnotes]