OMBEIBELA I RUNDURURA OMIINYO VYOVANDU

Ehupo randje ra ri evi

Nda Serekarerwa I Stephen Mcdowell

OMBURA MA KWATWA: 1952

EHI KA ZA: UNITED STATES

EKURUHUNGI RE: OMAZENGE OMAVI

OMUANO MBU MBE KURA: Ami mbe kurira moLos Angeles, tja California, moU.S.A., morokaasi mu mwa ri ovimbumba vyovandu ovanautwe nu mbaave ungurisa ovipurukise. Ovanene vandje va ri novanatje hamboumwe, nu ami mba ri omutjavari.

Mama we tu kurisa otjouṋepo wokereka indji evangeli. Posi yokutja, tji mba ri omutanda ee hupu pevari. Osondaha aihe ami ee imbura mokowa yokereka, nu mokati kotjivike ee i kozopati, okuungurisa ovipurukise nokutjita oruvakiro.

Ami ee pindike tjimanga nu mba ri nomazenge omavi. Ee ungurisa otjiṋa ngamwa atjihe okurwa na tjo kutja mbi taare. Oviṋa mbi mbe ri honga kokereka kaavi ndji vatere. Ami ee tja, “Ongore oya Muhona nu owami otjiungurisiwa tje.” Tji mba ri moskole yokombanda komurungu wombura ndji 1970, ami mba ṱunwa i yotjimbumba hi Black Panthers, tji tjaari otjimbumba tjopolotika tjaatji tjiukirwa komazenge watjo wokurwira ousemba wovandu. Ami mba rira okaṋepo kotjimbumba tjovanatje voskole tjaatji rwire ousemba wovandu. Nu povikando tjiva aatu raisa onyengo, tjaatji tjiti kutja oskole i pate oure woruveze orusupi.

Okuraisa onyengo momuano mbwo kaaku kovisa omazenge wandje. Ku nao, ami mba uta okukara norupa movitjitwa vyoutwe. Otjotjihorera, povikando tjiva ami nomapanga wandje aatu tarere ozomuvi nḓaaze raisa ondatumisire ovandu va Africa ndjaave munu moUnited States. Mena roviṋa mbyaatu tarere, eṱe twa uta okutona omitanda vyovaapa mbyaavi tarere pu na eṱe ozomuvi nḓo. Nu okuzambo twa ya kotokaasi twovaapa okukapaha ovandu varwe ovengi mbu matu tono.

Kuṱa komaandero woumutanda wandje, ami nerumbi randje novangu vandje vevari aatu tjiti oviṋa ovingi vyoutwe. Oviṋa mbyo aavi tu hitisa moumba. Omuangu wandje umwe wa ri okaṋepo kotjimbumba otjinaumba tjaatji tjiukwa, nu ami ee kara pu na wo. Ehupo randje aari ririre ko evi.

OMUANO OMBEIBELA MU YA RUNDURURA OMUINYO WANDJE: Epanga randje ra ri novanene mba ri Ovahongonone va Jehova. Owo ve ndji ṋanga kozombongarero zawo zombongo, nu ami mba yakura omaṋangero ngo. Okuza koruveze tji mba ya ngo, ami ee yenene okumuna omuano Ovahongonone mu va pangukire. Pozombongarero nḓo omundu auhe wa ri nOmbeibela nu aave i ungurisa. Ovanatje omitanda nandarire aave yandja omahungi pozombongarero nḓo. Ami tjiri mba tjaterwa tjinene okurihonga ena ra Mukuru, Jehova, nokurizuva amari ungurisiwa. (Epsalme 83:18) Pa ri ovandu ovengi vomihoko pekepeke mombongo, posi ya o yenene okumuna kutja kapa ri nombangu youmuhokohoko.

Rutenga, ami hee vanga okurihonga Ombeibela ku nOvahongonone va Jehova, posi ya ee tjaterwa okuyenda kozombongarero zawo. Ongurova imwe, ngunda amba i kombongarero yOvahongonone, otjimbumba tjomapanga wandje va ya ko-show yomizumbi. Ngunda ave ri ngo, owo va tona omutanda nga tji va zepa mena rokutja ka vanga okuvepa ondjeketa ye yomukova. Eyuva nda kongorera ko, owo aave rihivi ohunga notjiṋa tji va tjiti ho. Owo nandarire aave yoro indu tjaave pangurwa potjombanguriro. Otjingi tjawo va pewa omberero yokukara motjovakamburwa oure womuinyo wawo. Tjiri mbi nondjoroka tjinene kutja hi mba ri pu na wo ongurova ndjo. Ami mbe rimanena okurundurura ehupo randje nokuuta okurihonga Ombeibela.

Nandarire kutja mba ṱunwa tjinene i yombangu youmuhokohoko, oviṋa mbi mba muna mokati kOvahongonone va Jehova vye ndji ṱuna tjinene. Otjotjihorera, indu Omuhongonone wa Jehova omuyapa tji ma piti mehi, eye aa yenene okuisa ovanatje ve pu neṱunḓu rovazoozu. Wina eṱunḓu rovaapa ra yenena okukara pu nomuatje omutanda omuzoozu ngwaa hepa oruveze okukara po. Ami mba muna kutja Ovahongonone va Jehova ve yenenisa omambo wa Jesus nga tjangwa mu Johanes 13:35, nge tja: “Tji mwa suverasana, indino avehe otji mave tjiwa kutja oweṋe ovahongewa vandje.” Ee tjiwa kutja mba munu eṱunḓu ratjiri.

Otja tjee rihongo Ombeibela, ami mba uta okumuna kutja ee hepa okurundurura omeripura wandje. Ee hepa okuyarura ouripura wandje koupe, kokutja mbi raise ongaro ombore nokuyakura kutja imbwi oomuano omusemba wokuhupa. (Ovaroma 12:2) Kouṱiṱiṱiṱi, ami mba tjita omarundurukiro. Nu mombura ndji 1974 mu Januari, mba papitisiwa otja umwe wOvahongonone va Jehova.

Nandarire kombunda yokupapitisiwa, ami ee hepa okuungurira komazenge wandje. Otjotjihorera, otjikando tjimwe ngunda ambi ri motjiungura tjokuzuvarisa, ami mba rambera omurumendu ngwa vaka oradio yandje mohauto. Otja tje vaza popezu na ye, eye wa wisa pehi oradio na tupuka. Indu tji mba raera ovakwetu ohunga nomuano mu mba kotora oradio yandje, omunene wombongo we ndji pura kutja, “Stephen, hapo ove otjo tjita vi andakuzu wa kambura omurumendu ngo?” Epuriro ndo ra tjita kutja mbi ripure nu re ndji vatera kutja mbi kayende komurungu okuungurira komazenge wandje.

Mombura ndji 1974 mu Oktoba, ami mba uta okukarera otjomuzuvarise woruveze aruhe. Ee kara motjiungura tjokuzuvarisa okuhonga varwe Ombeibela ozoiri 100, omueze auhe. Kombunda, mba ri nomerizirira wokuvatera pomberoo ohongora yOvahongonone va Jehova moBrooklyn, tja New York. Nu mombura ndji 1978, ami mba yaruka koLos Angeles okukatjevera mama ngwa verere. Ozombura mbari kombunda yanao, ami mba kupa omukazendu wandje omusuverwa Aarhonda. Eye we ndji vatera tjinene okutjevera mama nga tja ṱa. Kombunda ami na Aarhonda twa yenena okukara norupa moskole ya Gilead nu twa hindwa koPanama, mu twa kayenda komurungu okukakarera otjovahindwa.

Okuza kombapitisimo yandje, ami mba kara mozongaro ozengi nḓaaze tjiti kutja mbi pindike. Mbe rihonga okuza po povandu mbe kondja okundjipindikisa, poo mbi kondja okurundurura ongaro ndjo momiano vyarwe. Ovandu ovengi nandarire omukazendu wandje, ve ndji tanga komuano mbu mba tjinda ozongaro nḓo. Ami nandarire hi kambura kutja mba yenena okutjita omarundurukiro ngo. Nu hi ritanga omuini komarundurukiro ngu mba tjita, nungwari mbi nongamburiro kutja Ombeibela i nomasa wokurundurura omundu.​—Ovaheberi 4:​12.

OUWA MBU MBA MUNA: Ombeibela ye ndji pa ondando mehupo, nu ye ndji honga omuano mu me yenene okukara nohange yatjiri. Ami hi tono ovandu rukwao, nungwari mbi ve vatera okukara noupanga ouwa ku na Jehova. Ami nandarire mbe rihonga Ombeibela ku nomunavita wandje okuza koskole yokombanda. Kombunda yombapitisimo ye, eṱe twa yenene okurara metuwo rimwe oure woruveze orusupi. Eṱe ngamba oweṱe omapanga wopopezu. Nga ku ndino, ami nomukazendu wandje twa yenene okuvatera ovandu vokombanda 80 okurira Ovahongonone va Jehova mokurihonga Ombeibela pu na wo.

Ami tjiri mbi nondangi tjinene ku Jehova kokundjipa ehupo ewa neṱunḓu ratjiri.

[Omambo Omanene]

Ee hepa okuyarura ouripura wandje koupe kokutja mbi raise ongaro ombore nokuyakura kutja imbwi oomuano omusemba wokuhupa