Ami mba kwaterwa moAcul mokandoropa ku ka ri kokure noGuatemala. Eṱunḓu randje ri isanewa kutja olxil nda za momuhoko wOtjimaya. Ami mbe kura ambi hungira eraka randje omuini nOtjispanish. Indu tjee kuru pa ri novita pokati komihoko vya Guatemala oure wozombura 36. Oruveze ndwo Ovaixil ovengi va ṱa.

Indu tji mba ri nozombura ine, erumbi randje ngwa ri nozombura hambombari aa nyandisa ombomba momake nu ai pamuka. Ami mba poṱuparera mbo, ouhumandu erumbi randje ra ṱira mbo. Kombunda yanao ami mbe kekurira monganda yovanatje ovapoṱu motjihuro Guatemala mu mbe kerihonga o-Braille. Ovaungure aave ndji tjaere okuhungira ku novanatje varwe nu wina ovanatje aave ndji humbu nu hee zuu nawa kutja omena raye. Ami aruhe ee rimunu ourike nu ee zeri kutja omieze vivari mbyaatu munu mombura vi ye, kokutja mbi yende konganda ku mama ngwee ndji tjindi nawa nu ngwee ndji raisire orusuvero. Ouhumandu, indu tji mba ri nozombura omurongo otja ṱa. Ami mba hihamwa tjinene okuzepaisa omundu ngwe ndji suverere tjinene.

Tji mba ri nozombura 11, ami mba yaruka kotjirongo kee kara nu mba kakara ku nerumbi randje watate neṱunḓu re. Owo aave ndji vatere novihepwa vyandje vyokorutu nungwari kaave yenene okundjivatera momuinyo. Povikando tjiva ee pura Mukuru e tja: “Omena raye mama tja ṱa? Ongwaye tji mba rira omupoṱu?” Ovandu aave ndji raera kutja omauzeu ayehe nga ya ri ombango ya Mukuru. Ami mba uta okumuna kutja Mukuru kena konatja nu ke notjari. Ami pee hazu okurizepa omena rokutja hee tjiwa kutja hi tjite vi.

Oupoṱu we ndji ngundiparisa morutu na momuinyo. Otjomuatje omuzandu omuṱiṱi ami mba tjerewa povikando pekepeke. Hi na pu mba rapota ozondjito nḓo, orondu hee munu kutja pe nomundu ngu me ripurire ku ami. Ovandu kaave hungire ku na ami tjinene, nu ami wina hee hungire. Ami ee rikarere, mba ri nombameno nu hi mbari nongamburiro momundu.

Indu tji mba ri omutanda, Ovahongonone va Jehova vevari (ovakupasane) ve ya ku ami poskole ngunda ama tu nyanda pendje. Omiṱiri imwe poskole pee hiti nu ngwee ndji ṱire ondjenda we ve ningira kutja ve ndji varure. Owo ve ndji raera ohunga nomakwizikiro wOmbeibela wokutja ovaṱi mave pendurwa novapoṱu mave kamuna rukwao. (Jesaja 35:5; Johanes 5:28, 29) Ami ee tjaterwa i yoviṋa mbyaave ndji hongo, posi yokutja ya ri ouzeu ku ami okuhungira mena rokutja hi mba ri omupaturuke. Owo aruhe aave ku ndji varura okuyekundjihonga Ombeibela nandarire kutja mba ri omundu ngwee kara ku ami omuini. Ovakupasane mba aave kayenda ozokilometa omurongo na kombanda yanao (10 km) nu aave rondo ondundu okuvaza pu mbi ri.

Erumbi randje aari ndji raere kutja ovandu ovakohoke kotutu nu mbe hi na oviṋa ovingi. Nungwari owo aave raisa onḓero mu ami aruhe nu aave ndji etere ouyandjewa pekepeke. Ami mba muna kutja Ovakriste vatjiri uriri ombu mave yenene okuraisa orusuvero otja indo.

Ami ee rihongo Ombeibela nombatero yomambo nga tjangwa mo-Braille. Nandarire kutja ee zuu nawa oviṋa mbyee hongwa, ya ri ouzeu okuyakura oviṋa tjiva momuinyo. Otjotjihorera, ya ri ouzeu okukambura kutja Mukuru u rikendera ku ami otjomundu nokutja varwe mave yenene okuraisa orusuvero ndwo ku ami. Ee zuu nawa kutja omena raye Jehova tje yandjera ouzeu oure woruveze orusupi posi yokutja, ya ri ouzeu ku ami okumuvara otja Ihe worusuvero. a

Oviṋa mbyee rihongo momatjangwa vye ndji vatera okurundurura oumune wandje kouṱiṱiṱiṱi. Otjotjihorera, mbe rihonga kutja Mukuru tjiri u ṱondjenda na imba mbe muna omauzeu. Ohunga novakarere ve mbaave tatumisiwa Mukuru wa tja: “Ami mba munu nawanawa ouzeu wotjiwaṋa tjandje . . . Ami me tjiwa omihihamo vyatjo.” (Eksodus 3:7) Indu tji mba uta okusuvera ovikaṋena vya Jehova oviwa tja tjita kutja mbi riyandje ku ye. Mombura ndji 1998, ami mba papitisiwa otja umwe wOvahongonone va Jehova.

Kombunda yombura imwe tji mba za nokupapitisiwa mba ya koskole yovapoṱu meṋe yotjihuro hi Escuintla. Omunene mombongo mu mba ri wa muna kutja ya ri ouzeu ku ami okuyenda kozombongarero motjirongo mee kara. Ombongo ndja ri popezu ya ri munda mbwina nondundu otjingeyo ndji ovakupasane ndjaave rondo okuyekundjihonga Ombeibela nu ya ri ouzeu ku ami okutoora ondjira ndjo. Omunene wombongo wa ningira Ovahongonone va Jehova ovakupasane mba ri moEscuintla nu mba ri nonḓero okundjiyakura mo yawo nokundjivatera kutja mbi kare pozombongarero zombongo. Owo ve ndji ṱiza otja umwe wokaṋepo meṱunḓu rawo nga ku ndino ndi.

Ami me yenene okuhungira ohunga noviṋa ovingi norusuvero rwatjiri ovandu mombongo ndu ve ndji raisira. Oviṋa avihe mbi, vi ndji pa ongamburiro kutja otjOmuhongonone wa Jehova mbi ri mokati kOvakriste vatjiri.—Johanes 13:34, 35.

Ami hi rimunu kutja hi nonḓengu nu hi nomaundjiro rukwao. Nai ehupo randje ri nomuhunga. Otja Omuhongonone wa Jehova ngu mbi honga ovandu Ombeibela oruveze aruhe, mbi yandja ombango okuhonga varwe ouatjiri wOmbeibela pendje nokuyandja ombango koungundipare wandje worutu. Nu wina mbi nondjingonekero yokurira omunene wombongo nokuyandja omahungi nga zikamena kOmbeibela mombongo. Ami mba kara nondjingonekero yokuyandja omahungi nga zikamena kOmbeibela pomaworonganeno wotukondwa pu pe kara ovandu ovengi.

Mombura ndji 2010, ami mba mana pOskole yOmbeibela yOvarumendu Ovakombe (nai ndji tjiukwa otja Oskole yOvazuvarise vOuhona) ndja ri moEl Salvador. Oskole ndji ye ndji rongerisa kutja mbi yenenise oviungura vyandje mombongo nawa. Okumuna omahongero ngo kwa tjita kutja mbi rimune onḓengu nokutja mba suverwa tjinene i Jehova ngu yenena okuhonga omundu ngamwa auhe okuungura otjiungura tje.

Jesus wa tja: “Mokuyandja mu nenyando tjinene pokupewa.” (Oviungura 20:35) Ndino, ami me yenene okutja tjiri mbi nondjoroka nandarire kutja hee undjire ko, nai ami mbi muna kutja me yenene okuvatera varwe.,