1 Samuel 2:1-36
2 Ku Hanah besampi:
“Ati aku gaga ketegal Jehovah;Jehovah meri aku pengering.*
Aku ulih nyaut munsuh aku enggau berani,Laban aku gaga ati Nuan udah nyelamatka aku.
2 Nadai sapa-sapa ke kudus baka Jehovah,Nadai sapa-sapa ke sebaka enggau Nuan,Lalu nadai gunung batu ke teguh baka Nuan, Petara kami.
3 Badu agi kita bejaku begah,Badu agi bejaku enggau sumbung,Laban Jehovah nya Petara ke nemu semua utai,Lalu Iya ngakim semua utai ke dikereja orang enggau adil.
4 Iya matahka anak panah orang ke kering,Tang Iya meri pengering ngagai orang ke lemi.
5 Orang ke kenyang mesti gawa kena ngulihka roti,Tang orang ke lapar enda agi lapar.
Indu ke mandul udah ngadaka tujuh iku anak lelaki,Tang indu ke bisi mayuh anak lelaki udah mandul.
6 Jehovah ulih ngambi nyawa sereta meri nyawa;Iya ulih mai orang ngagai Kubur,* lalu Iya mega ulih ngidupka orang nya baru.
7 Jehovah ulih ngasuh orang miskin tauka kaya;Iya ulih ngemaruhka tauka ngeninggika orang.
8 Iya ngangkatka orang ke baruh pendiau ari debu;Iya ngeninggika orang miskin ari tugung amau,*Ngambika sida duduk enggau orang ke tinggi pangkat,Sereta bulih penuduk ti dipebasa.
Asas dunya endang enggi Jehovah,Lalu Iya nganchau tanah ti subur ba atas asas dunya nya.
9 Iya nyaga orang ke setia ngagai Iya,Tang ngemunaska orang ke jai dalam pemetang.
Mensia enda ulih mujur ngena pengering diri empu.
10 Jehovah deka nganchurka orang ke ngelaban Iya;*Iya deka mandangka pengeringat Iya baka munyi guntur ari langit.
Jehovah deka ngakim serata dunya,Iya deka meri kuasa ngagai raja Iya,Lalu meri pengering ngagai* orang ke ditata Iya.”
11 Udah nya, Elkanah pulai ngagai rumah iya ba Ramah. Tang, Samuel ke agi mit gawa ke Jehovah di baruh iring Imam Eli.
12 Dua iku anak lelaki Eli nya amat jai. Seduai iya enda bebasaka Jehovah.
13 Tu meh utai ke biasa nyadi ngagai begian pemeri ke ditetapka ke bala imam: Tiap kali lebuh bisi orang nyerahka pemeri, penulung imam deka datai mai gerepu ti besai. Lebuh dagin nya benung direbus,
14 penulung imam nya deka ngachukka gerepu dalam siti ari periuk ke dikena ngerebus dagin. Nama-nama utai ke dibai pansut ngena gerepu nya deka diambi imam. Nya meh utai ke digaga sida ba Siloh, ngagai semua orang Israel ke datai kia.
15 Nambahka nya, sebedau lemak jelu ditunu, penulung imam deka datai lalu bejaku ngagai orang ke nyerahka pemeri. Ku iya: “Beri dagin mata ngambika bisi dipanggang imam. Iya enggai nerima dagin ti udah direbus.”
16 Enti orang nya madahka: “Tunu dulu lemak nya. Udah nya, baru nuan tau ngambi nama-nama utai ti dikedekaka nuan,” penulung imam nya deka madahka: “Enggai! Beri ngagai aku diatu. Enti enda, aku empu deka ngambi iya!”
17 Bala penulung imam nya ngereja dosa ti amat besai ba mata Jehovah, laban sida* enda bebasaka pemeri ke diserahka ngagai Jehovah.
18 Maya nya, Samuel udah gawa ke Jehovah taja pan iya agi biak. Iya ngena epod ti digaga ari kain linin.
19 Pia mega, ninting taun, indai iya deka ngaga baju jubah mit ti enda belengan ke iya lalu meri baju jubah nya ngagai iya, lebuh indai iya enggau apai iya datai nyerahka pemeri ke patut diserahka ninting taun.
20 Eli lalu merekatka Elkanah enggau bini iya. Ku iya: “Awakka Jehovah meri nuan siku anak ari bini nuan tu kena nganti anak ke udah diserahka ngagai Jehovah.” Udah nya, seduai iya pulai ke rumah.
21 Jehovah ingatka Hanah, lalu Hanah ngandung. Iya ngadaka tiga iku anak lelaki enggau dua iku anak indu. Tang ba maya ti sama, Samuel mansang besai, lalu ngelantangka ati Jehovah.*
22 Eli nyau udah tuai, lalu iya bisi ninga pasal semua utai ke dikereja dua iku anak iya ngagai orang Israel. Iya mega nemu seduai iya udah tinduk* enggau bala indu ke gawa ba pintu penama langkau gempuru.
23 Iya selalu madah ngagai seduai iya: “Aku bisi ninga semua orang nusui penyai ke dikereja seduai. Nama kebuah seduai majak ngereja utai nya?
24 Anang baka nya seduai, anak. Utai ke didinga aku ba bala nembiak Jehovah ukai utai ti manah.
25 Enti bisi orang bedosa ngagai orang bukai, sesiku orang ulih besampi ngagai Jehovah ngarika iya.* Tang enti iya bedosa ngelaban Jehovah, sapa ke ulih besampi ngarika iya?” Taja pia, seduai iya enggai mendingka apai seduai iya, lalu Jehovah udah mutuska deka munuh seduai iya.
26 Tang ba maya ti sama, Samuel majak mansang besai lalu dikerinduka Jehovah enggau semua orang.
27 Siku lelaki ke dianjung Petara datai ngagai Eli lalu bejaku: “Tu meh pesan ari Jehovah: ‘Aku udah ngayanka Diri ngagai ruang bilik aki ini nuan lebuh sida nyadi ulun Firaun* ba menua Ejip.
28 Ari semua raban bansa Israel, aki ini nuan udah dipilih nyadi imam ke Aku. Sida deka nyerahka pemeri ba alta,* nunu menyan,* sereta ngena epod lebuh sida gawa ke Aku. Semua pemeri ke ditunu ari orang Israel mega diberi Aku ngagai ruang bilik aki ini nuan.
29 Nama kebuah kita enda bebasaka atur Aku bekaul enggau korban sereta pemeri ba endur Aku diau? Nama kebuah nuan lebih agi bebasaka anak nuan ari ke bebasaka Aku? Nama kebuah kita ngasuh diri gemu makai begian ti pemadu manah ari tiap iti pemeri ke diserahka orang Israel?
30 “‘Nya meh kebuah Jehovah, Petara orang Israel, madahka: “Aku amat udah madahka ruang bilik nuan enggau ruang bilik aki ini nuan deka seruran gawa ke Aku.” Tang diatu Jehovah madahka: “Aku enda agi ngemendarka utai nya nyadi, laban Aku deka bebasaka orang ke bebasaka Aku, tang Aku deka ngemaruhka orang ke ngemaruhka Aku.”
31 Maya deka datai alai Aku deka muai pengering nuan, sereta pengering ruang bilik aki ini nuan ngambika semua lelaki ba ruang bilik nuan mati sebedau sida tuai umur.
32 Lebuh orang Israel idup nyamai, nuan deka meda munsuh nuan ba endur Aku diau, lalu nadai agi orang ke tuai umur ba ruang bilik nuan.
33 Siku ari peturun nuan deka mengkang gawa ba alta Aku. Tang iya deka ngasuh mata nuan enda ulih meda agi, lalu iya deka mai penusah ati ngagai nuan. Kelimpah ari nya, mayuh ari ruang bilik nuan deka dibunuh ngena pedang.
34 Kena nunjukka utai ke disebut Aku tu amat, Aku deka meri siti tanda ngagai nuan: Kedua-dua anak lelaki nuan, iya nya Hopni enggau Pinehas, deka mati ba hari ti sama.
35 Aku deka ngelantik siku imam ti setia ke Aku, lalu iya deka ngereja utai sejalai enggau utai ti dikinginka ati Aku. Aku deka ngagaka iya siti rumah* ti meruan belama iya, lalu iya deka seruran gawa ke orang ti ditata Aku.
36 Peturun nuan ke agi idup deka datai ngagai iya lalu besugang, laban deka minta upah enggau pemakai. Peturun nuan nya deka madahka: “Kasih meh ke aku, beri aku pengawa nyadi imam ngambika aku bisi utai ke diempa.”’”
Nota Kaki
^ Jaku Asal, “Tanduk aku ditinggika Jehovah.” Peda Penerang Leka Jaku, “Tanduk.”
^ Tauka “Sheol,” iya nya pendam ke mensia. Peda Penerang Leka Jaku.
^ Tauka engka, “tugung sampah.”
^ Tauka engka, “Orang ke ngelaban Jehovah deka takut.”
^ Jaku Asal, “Lalu ngeninggika tanduk.” Peda Penerang Leka Jaku, “Tanduk.”
^ Engka merujuk ngagai dua iku anak lelaki Eli, tang mega engka nyengkaum bala penulung imam.
^ Tauka “mansang besai ba depan Jehovah,” iya nya ba langkau sembiang Jehovah.
^ Iya nya, ngereja pengawa seks.
^ Tauka engka, “Petara deka nyadi hakim ngarika iya.”
^ Gelar ke diberi ngagai raja Ejip.
^ Peda Penerang Leka Jaku.
^ Tauka engka, “ngasuh asap ari pemeri niki ke atas.”
^ Iya nya, tusut peturun imam.
