Adat Lewi 23:1-44
-
Hari ti kudus enggau pengerami (1-44)
23 Ku Jehovah bejaku baru enggau Moses:
2 “Padah ngagai orang Israel: ‘Pengerami ke diasuh Aku, Jehovah, intu kita nya, hari ti kudus. Nya maya alai orang Israel deka begempuru lalu nyembah Aku. Tu pengerami ke udah ditetapka Aku:
3 “‘Kita ulih gawa dalam enam hari, tang hari ketujuh nya Hari Sabat. Nya hari alai kita berehat. Kita patut begempuru lalu nyembah Aku. Kita enda tau gawa ba hari nya. Enda ngira dini alai kita diau, hari nya Hari Sabat ke Aku, Jehovah.
4 “‘Tu pengerami-pengerami ke Aku, Jehovah. Kita patut ngintu gempuru ti kudus tu ba maya ti udah ditetapka:
5 Ba bulan ti kesatu, kena hari ke-14, maya lemai hari,* kita patut ngintu Pengerami Paska ke Aku, Jehovah.
6 “‘Ba bulan ti sama, kena hari ke-15, kita patut ngintu Pengerami Roti ti Enda Beragi ke Aku, Jehovah. Kita patut makai roti ti enda beragi pengelama tujuh hari.
7 Ba hari ti keterubah, kita mesti begempuru nyembah Aku. Ba hari nya, kita enda tau gawa.
8 Tang kita patut nyerahka pemeri ke ditunu ngagai Aku, Jehovah, tiap hari, pengelama tujuh hari. Lalu ba hari ti ketujuh, kita mesti begempuru nyembah Aku. Ba hari nya, kita enda tau gawa.’”
9 Ku Jehovah bejaku baru ngagai Moses:
10 “Padah ngagai orang Israel: ‘Lebuh kita tama ngagai menua ke deka diberi Aku ngagai kita, lalu kita ngetau asil utai ke ditanam kita, kita patut mai sesikat tangkai ari utai ke ditanam kita ti keterubah ngagai imam.
11 Imam deka ngayunka tangkai nya ke depan enggau ke belakang ba depan Aku, Jehovah, nyadika pemeri ngambika kita diterima Aku. Imam patut ngayunka pemeri nya sehari pengudah Hari Sabat.
12 Ba hari pemeri nya diayun, kita mesti nyerahka siku bedus ti lelaki ke beumur setaun tauka kurang nyadika pemeri tunu ngagai Aku, Jehovah. Bedus nya enda tau bisi penimpang.
13 Kita mega patut nyerahka dua kilogram* tepung ti alus ke dichampur enggau minyak nyadika pemeri bijirin. Bau ari pemeri ke ditunu nya deka ngelantangka ati Aku, Jehovah. Kita mega patut nyerahka kira-kira satu liter* wain nyadika pemeri wain.
14 Sebedau kita nyerahka pemeri ngagai Aku, kita enda tau makai roti, bijirin ke dipanggang, tauka bijirin ti baru. Tu meh adat ke patut seruran dititihka kita enggau bala peturun kita, enda ngira dini alai kita diau.
15 “‘Ba hari kita nyerahka pemeri ke diayun,* iya nya sehari pengudah Hari Sabat, kita patut berengkah ngitung tujuh minggu* penuh.
16 Ba hari ke-50, iya nya sehari pengudah Hari Sabat ti ketujuh, kita patut nyerahka bijirin ti baru nyadika pemeri ngagai Aku, Jehovah.
17 Kita patut mai dua tuku roti ari rumah kita nyadika pemeri ke diayun. Roti nya patut digaga ari dua kilogram tepung ti alus ke dichampur enggau ragi lalu dipanggang. Pemeri nya deka nyadi asil gandum ti keterubah ngagai Aku, Jehovah.
18 Kita mega patut nyerahka tujuh iku anak bedus ti lelaki ke beumur setaun, siku sapi ti lelaki ke biak, enggau dua iku bedus ti lelaki. Semua jelu nya enda tau bisi penimpang. Semua jelu nya patut diserahka nyadika pemeri tunu ngagai Aku, Jehovah, seretai enggau pemeri bijirin enggau pemeri wain. Bau ari pemeri ke ditunu nya deka ngelantangka ati Aku, Jehovah.
19 Kita mega patut nyerahka siku kambin ti biak nyadika pemeri kena ngulihka pengampun dosa enggau dua iku anak bedus ti lelaki ke beumur setaun nyadika pemeri bebaik.
20 Udah nya, imam deka ngayunka dua iku bedus ti lelaki nya ke depan enggau ke belakang, seretai enggau roti ari asil gandum ti keterubah nyadika pemeri* ngagai Aku, Jehovah. Pemeri nya deka nyadi begian ti kudus ngagai Aku, Jehovah, lalu deka diempu imam.
21 Ba hari nya, kita patut ngangauka semua orang begempuru lalu nyembah Aku. Kita enda tau gawa ba hari nya. Tu meh adat ke patut seruran dititihka kita enggau bala peturun kita, enda ngira dini alai kita diau.
22 “‘Lebuh kita ngetau ba ladang, anang ngetau sampai abis utai tanam ba tisi ladang kita. Enti sema bisi asil ketau ke tinggal, anang ngumpul iya. Tinggalka asil ketau nya ngagai orang ke miskin sereta orang asing ke diau enggau kita. Aku tu Jehovah, Petara kita.’”
23 Ku Jehovah bejaku baru ngagai Moses:
24 “Padah ngagai orang Israel: ‘Ba bulan ti ketujuh, kena hari ti kesatu, kita patut berehat. Ba hari nya, terumpit deka disepu kena ngingatka kita ngambika begempuru nyembah Aku.
25 Kita enda tau gawa, lalu kita patut nyerahka pemeri ke ditunu ngagai Aku, Jehovah. ’”
26 Ku Jehovah bejaku baru ngagai Moses:
27 “Tang kena bulan ti ketujuh, ba hari ti ke-10, nya Hari Pengampun Dosa. Kita patut begempuru nyembah Aku, lalu kita patut nunjukka diri tusah ati* ke dosa ke udah dikereja kita. Kita mega patut nyerahka pemeri ke ditunu ngagai Aku, Jehovah.
28 Ba hari nya, kita enda tau gawa, laban maya nya kita deka ngulihka pengampun dosa ari Aku, Jehovah, Petara kita.
29 Barang sapa ke enda nunjukka diri tusah ati ke dosa ke udah dikereja diri,* orang nya patut dibunuh.
30 Aku deka munuh barang sapa ke gawa ba hari nya.
31 Kita enda tau gawa. Tu meh adat ke patut seruran dititihka kita enggau bala peturun kita, enda ngira dini alai kita diau.
32 Nya meh Hari Sabat, hari kita patut berehat lalu nunjukka diri tusah ati ke dosa ke udah dikereja kita. Kita patut ngereja nya maya mata panas padam ba hari ti kesemilan bulan nya, nyentuk ngagai mata panas padam ba hari siti.”
33 Ku Jehovah nampung jaku Iya enggau Moses:
34 “Padah ngagai orang Israel: ‘Kena bulan ti ketujuh, ba hari ke-15, nya Pengerami Belangkau. Kita patut ngintu pengerami nya pengelama tujuh hari ke Aku, Jehovah.
35 Ba hari ti keterubah, kita mesti begempuru nyembah Aku. Ba hari nya, kita enda tau gawa.
36 Kita patut nyerahka pemeri ke ditunu ngagai Aku, Jehovah, tiap hari, pengelama tujuh hari. Lalu ba hari ti kelapan, kita mesti begempuru nyembah Aku, lalu nyerahka pemeri ke ditunu ngagai Aku, Jehovah. Nya gempuru ti kudus. Kita enda tau gawa ba hari nya.
37 “‘Nya meh pengerami-pengerami ke Aku, Jehovah. Kita patut ngintu pengerami nya enggau datai begempuru nyembah Aku, Jehovah. Maya nya, kita patut nyerahka pemeri tunu, pemeri bijirin, enggau pemeri wain nitihka utai ke patut diserahka ninting hari.
38 Semua pemeri nya pemeri tambahan ke patut diserahka ngagai Aku, Jehovah, maya Hari Sabat. Semua pemeri nya nyadi pemeri tambahan ngagai pemeri kena ngamatka semaya, pemeri sukarela, enggau pemeri-pemeri bukai ke patut diserahka kita ngagai Aku, Jehovah.
39 Tang ba bulan ti ketujuh, kena hari ke-15, pengudah kita tembu ngetau, kita patut ngintu pengerami kena ngemuliaka Aku, Jehovah, pengelama tujuh hari. Kita patut berehat ba hari keterubah enggau hari kelapan.
40 Ba hari ti keterubah, ambi buah ti pemadu manah, dan engkerema, dan ke bisi mayuh daun, enggau dan pun kayu ke tumbuh ba lebak. Rami gaga ati meh ba depan Aku, Jehovah, Petara kita, pengelama tujuh hari.
41 Kita patut ngintu pengerami nya kena ngemuliaka Aku, Jehovah, setaun sekali, pengelama tujuh hari. Kita patut ngintu pengerami nya ba bulan ti ketujuh. Tu meh adat ke patut seruran dititihka kita enggau bala peturun kita.
42 Semua orang Israel patut diau ba langkau pengelama tujuh hari.
43 Enggau nya, bala peturun kita deka nemu, Aku ke udah ngasuh orang Israel diau dalam langkau lebuh Aku mai sida pansut ari menua Ejip. Aku tu Jehovah, Petara kita.’”
44 Nya alai, Moses pan madah ngagai orang Israel pasal pengerami-pengerami ke udah ditetapka Jehovah.
Nota Kaki
^ Engka merujuk ngagai timpuh pengudah mata panas padam, tang sebedau hari petang.
^ Jaku Asal, “dua persepuluh efah.” Peda Rujukan B14.
^ Jaku Asal, “satu perempat hin.” Peda Rujukan B14.
^ Tauka “nyerahka tangkai ari asil utai tanam kita nyadika pemeri ke diayun.”
^ Jaku Asal, “tujuh Hari Sabat.”
^ Tauka “pemeri ke diayun.”
^ Tu engka merujuk ngagai bepuasa sereta pantang larang ke bukai.
^ Tauka engka, “enda bepuasa.”
